استعراضات, عن الألعاب, مقالات

شهر جديد وألعاب جديدة (سبتمبر 2020)

مقال جديد هنعمله هنا في جيمزاوي بعنوان “شهر جديد وألعاب جديدة” هنتكلم فيه عن ألعاب كل شهر بنبذات مختصرة عنها وايه الالعاب اللي هنكون متحمسين لتجربتها وايه الألعاب اللي هنعملها Skip من أوسع أبوابه 😃 بحيث تاخدوا انتوا فكرة عن ايه الجديد اللي بينزل كل شهر ومنها تجهزوا محافظكم برده تحسباً just in case 😀 وابتداء من شهر سبتمبر الجاي صدقوني المحافظ هتبدأ تفضي لأن سبتمبر بيبدأ معاه موسم العطلات بره في الغرب ومعاه بنبدأ نشوف الألعاب التقيلة لغاية أخر السنة.

 

Crusader Kings III
الأجهزة : PC
تاريخ الإصدار : 1 سبتمبر


بداية مبشرة بالشهر ده مع لعبة بيتحسدوا عليها بتوع البي سي ، لأن اللعبة الإستراتيجية Crusader Kings نادراً لما نشوف منها جزء جديد ، الجزء الثاني نزل بسنة 2012 ولأكثر من 5 سنين فضل ينزل له  توسعات وإضافات جديدة (مدفوعة) لحد ما المطور نفسه زهق وقال نشتغل علي جزء جديد 😀 واللي هيكون متوسع بشكل أكبر في الجيم بلاي عن الجزء اللي فات ، والبداية مع ميزة الـ lifestyles واللي هيكون في منها حوالي 5 هتختار ما بينهم لما تيجي تعمل شخصية جديدة اول ما تبدء اللعبة ، وكل واحدة منهم ليها شجرة مهارات معينة مختلفة عن التانية بحيث تناسب كل شخص وذوقه ، حاجة جميلة برده إن الشخصيات بقت أشكالها 3D المرة دي ، وخريطة اللعبة بقي فيها تفاصيل أكبر بكتير عن الجزء اللي فات.. طبعاً نظام الحكم والوراثة والأديان كل ده اتحسن ومش محتاج أدخل في تفاصيل أكتر لأن اللعبة بصراحة الجيم بلاي فيها عميق وأشوفه معقد جداً خصوصاً إني حاولت أكتر من مرة مع الجزء الثاني بس للأسف كان محتاج طولة بال شوية لأنك بتلعب بأسرة حاكمة علي مرور العصور مش شخصية واحدة 😅

 

WRC 9
تاريخ الإصدار: 3 سبتمبر
الأجهزة: PC , PS4 , Xbox One , Nintendo Switch

الجزء السنوي الجديد للعبة سباقات الرالي WRC هيشمل معاه سيزون الرالي 2020 مع تحسينات ملحوظة علي طريقة القيادة والجرافيكس وتفاصيل العربيات وطرق السباقات مع إمكانية كبيرة إننا نشوف طور Career محترم بالجزء ده.

 

Marvel’s Avengers
تاريخ الإصدار: 4 سبتمبر
الأجهزة: PC , PS4 , Xbox One


أضخم لعبة بالشهر ده وهي التعاون الجديد بين شركة مارفل وشركة سكوير إنيكس لتقديم لعبة قوية تناسب سلسلة أفلام أفانجرز السينمائية ، اللعبة هتكون من تطوير أستوديو Crystal Dynamics مطور ألعاب تومب رايدر ، اللعبة قعدت حبة حلوين بالبيتا ده لو كان معاك PS4 😀 وشوفنا فيها تقريباً كل حاجة من أسلوب اللعب واللي هيعتمد علي الكومبوهات والضربات الخاصة اللي بتتملي بعد وقت معين مع إمكانية تدمير تقريباً كل شئ حوليك في اللعبة بطريقة جميلة جداً مش مزعجة ومريحة كمان للعين. اللعبة هتعتمد علي نظام المراحل وهتخليك تتجول العالم وقبل كل مرحلة ممكن تختار تلعبها لوحدك أو مع 3 أشخاص تانيين . وكل واحد هيختار شخصية من 6 شخصيات رئيسية هتقدمهم اللعبة وهما Captain America و Iron Man و Thor و Black Widow و Hulk و Ms. Marvel وهيكون في شخصيات إضافية هتيجي في الطريق بعد إصدار اللعبة زي Hawkeye وSpiderman.

 

NBA 2K21
تاريخ الإصدار: 4 سبتمبر
الأجهزة: PC , PS4 , Xbox One, Nintendo Switch


مع غياب المنافس NBA Live من شركة EA .. سلسلة ألعاب NBA 2K بتحلق لوحدها تماماً لو هنتكلم عن لعبة كرة سلة ممتعة بجيم بلاي موزون. اللعبة تقريباً مشوفناش ليها أي إستعراضات رسمية لحد دلوقتي إلا كم تريلر قصير .. بس معتقدش هنشوف لا جديد في الجيم بلاي أو الجرافيكس لأن اللعبة أشوف وصلت للـ Peak خلاص بجزء 2K20 .. طبعاً لو هنشوف جديد فهو تركيز الشركة علي طور الـ Career بشكل ملحوظ لأن ده اللي بيجيب للشركة فلوس كل سنة عن طريق إنهم يعملوا قصة جديدة للشخصية اللي هتلعب بيها ويجددوا شكل الحي أو الـ neighborhood اللي بتتجمع فيه أنت وصحابك وضيف كم رقصة وإحتفال جديد وخلاص كده بقي عندنا جزء جديد بسيطة اهي😃

 

Tony Hawk’s Pro Skater 1 + 2
تاريخ الإصدار: 8 سبتمبر
الأجهزة: PC , PS4 , Xbox One

لعبة السكوتر”توني هوك” اللي كانت مشهورة جداً أيام البلايستيشن 1 ، هترجع تاني بريميك للجزء الأول والثاني منها برسومات وأسلوب لعب يناسبوا أجهزة الجيل ده وهتكون من نشر شركة Activision أه والله ما بهزر أكتفيجين فعلا😁

 

Kingdoms of Amalur: Reckoning
تاريخ الإصدار: 8 سبتمبر
الأجهزة: PC , PS4 , Xbox One


لعبة الشهر بالنسبة لي شخصياً ، من زمان وانا كان نفسي اجرب اللعبة دي وكنت أتمني ريماستر ليها ، وأخيراً شركة THQ Nordic بعد استحواذها علي حقوق اللعبة بتعلن عن ريماستر ليها وشكله هيكون تمهيد للجزء الثاني .. اللعبة نفسها كانت من نشر EA ونزلت بـ 2012 ولسبب ما اللعبة منجحتش تجارياً ( سكايرم احم 😄 ) وده أدي إلي أن الفريق المطور 38 Studios يقفل أبوابه نهائياً.
اللعبة هي مغامرات أربيجي عالم مفتوح ، فيها شبه شويه من لعبة سكايرم ، بتخصص ليك شخصية بكلاس معين وتبدأ تخلص مهمات أساسية وتتقدم في قصة اللعبة مع وجود برده مهمات ونشاطات جانبية ، لعبة أربيجي يعني زي الكتاب ما بيقول 😁

 

WWE 2K Battlegrounds
تاريخ الإصدار: 18 سبتمبر
الأجهزة: PC , PS4 , Xbox One , Nintendo Switch

جزء جديد من لعبة المصارعة الحرة WWE ولكن المرة دي هيكون مختلف عن كل سنة لأنه أولاً هيكون من مطور مختلف واللي هوSaber Interactive ،ثانياً وده الأهم إننا أخيراً هنشوف لعبة مصارعة بتركز علي اللعب الأركيدي والعشوائي لأول مرة من وقت ما نزلت اللعبة المشهورة WWE All Stars بسنة 2011. اللعبة هتضم 70 مصارع تقريباً نصهم هينزلوا كإضافات 😀 ، طبعاً هيكون في حلبات مختلفة تناسب أسلوب اللعبة وهيكون فيها شوية لقطات تتفاعل معاها زي التماسيح والطيارات .. أشكال المصارعين نفسهم أتغيرت وبقوا أشبه بأقزام متفهمش ليه مع أن All Stars كانت أركيدية برده بس المصارع كان بطوله عادي 😀 أتمني بس تبقي في الأخر ممتعة بقدر All Stars.

 

Crysis Remastered
تاريخ الإصدار: 18 سبتمبر
الأجهزة: PC , PS4 , Xbox One


النسخة المحسنة للجزء الأول من لعبة الشوتر والمنظور الأول كرايسس اللي نزلت بـ 2007 وكنت تبقي ملك زمانك لو كان جهاز الكومبيوتر بتاعك عرف يفتح المنيو بتاعها حتي ، نسخة الريماستر كانت المفترض تنزل في شهر يوليو اللي فات بس بعد ما نزل تريلر للعبة وكانت الرسومات تقريباً تحسها أضعف من النسخة الأصلية نفسها ، فناس كتير انتقدوا المطور بشكل علني لدرجة أن المطور نفسه قال يأجل اللعبة أفضل لحد ما يصلح مشاكل الإضاءة وتفاصيل الجرافيكس باللعبة. وفعلاً في الفيديو الدعائي الجديد الخاص باللعبة ، الرسومات شكلها فعلاً إتحسن بشكل اي حد يلاحظه والظاهر المطور كان لازم يتقرص ودنه😃 لأنه تقريباً كان ناوي يدينا بورت رخيص من نسخة النينتندو سويتش واللي نزلت علي فكرة في ميعادها من غير ما تتأخر فتقريباً ملهاش تفسير غير كده 😅

 

13 Sentinels: Aegis Rim (الإصدار الغربي)
تاريخ الإصدار: 25 سبتمبر
الأجهزة: PS4


المطور الياباني Atlus ميبقاش أطلس فعلاً الا لما ينزل لعبته الأول في بلده اليابان وبعد كده لما يفتكر وربك يفرج يبقي ينزلها بعدين للعالم بره الكوكب بتاعه 😁 ، والدور المرة دي علي لعبة الإستراتيجة المميزة 13 Sentinels: Aegis Rim واللي بتخلط ما بين نظام الأدفانشر ونظام اللعب الإستراتيجي وبتتحكم فيها ب 13 شخصية مختلفة ، كل واحد مختلف في أسلوبه وقدراته عن الشخص التاني.

 

Mafia: Definitive Edition
تاريخ الإصدار: 25 سبتمبر
الأجهزة: PC , PS4 , Xbox One

الجزء الأول من لعبة مافيا للأسف مخدش نصيبه من الشهرة زي الجزء التاني المعروف وده لأنه كان قديم شويه ونزل سنة 2002 علي جهاز الـ PS2 ، ولحسن حظنا شركة 2K أفتكرته أخيراً وقررت تعمله ريميك محترم وتوكل مطور الجزء الثالث “Hangar 13 ” مهمة التطوير ( الله يستر 😀 ) وأنه يشتغل عليه من الصفر ليناسب توجه ألعاب الجيل الحالي ، قصة اللعبة بتبدأ أحداثها في ثلاثينات القرن الماضي مع شخصية Tommy Angelo اللي كان شغال سائق تاكسي وازاي قدر يدخل عالم المافيا ليكون بعدها واحد من كبار شخصيات المنظمة.

 

في النهاية دول كانوا 10 ألعاب بنرشحها ليكم بشهر سبتمبر وياريت تشاركونا رأيكم في التعليقات عن ايه أكتر لعبة متحمسين ليها في شهر سبتمبر ، أنا بالنسبة لي زي ما ذكرت فوق Kingdoms of Amalur: Reckoning هي لعبة الشهر بالنسبة لي لأن النوع ده من الألعاب بحبه جداً

Hussein Osman

About Hussein Osman

محرر وكاتب علي باب الله ، بقدّر جداً هواية الفيديو جيمز ،ومن وأنا صغير هوايات كتير اتغيرت في حياتي إلا ألعاب الفيديو متغيرش حبي ليها بالعكس كان بيزيد مع مرور السنين .. بعشق جداً ألعاب الاربيجي سواء الغربية زي فال اوت وويتشر وايلدر سكرولز او اليابانية زي فاينال فانتسي وبيرسونا ودراجون كويست