Articles, Gaming News, News

شهر جديد و ألعاب جديدة (نوفمبر 2020 🔥)

موعدنا بكره بإذن الله مع إفتتاحية شهر نوفمبر واللي بيكون عادة أقوي شهر بتنزل فيه ألعاب خلال السنة كلها فما بالك إنه هيكون شهر إطلاق الجيل الجديد PS5 و Xbox Series X/S بجانب كمان صدور ألعاب قوية فيه.

ولو قارنا إطلاق الجيل ده في 2013 مع إطلاق الجيل الجديد فالجيل الجديد يربح بسهولة لإني فاكر في 2013 تقريبا مكنش في غير كم لعبة cross generation زي اساسنز بلاك فلاج وفيفا وكول اوف ديوتي لكن الجيل الجديد هيكون في ألعاب كتير cross generation متحسنين بشكل كامل للجيل الجديد وللاسف مش هاذكرهم في التقرير وهاكتفي بذكرهم هنا سريعا بسبب كترة وزحمة الألعاب.

ألعاب الجيل الحالي اللي هتتوفر بنسخة الجيل الجديد الشهر ده هما Devil May Cry 5 Special Edition و Borderlands 3 و NBA 2K21 و No Man’s Sky و Ark Survival Evolved و Observer System Redux و Gears 5 و Halo Master Chief Collection و Spider Man Remastered و Mortal Kombat 11 Ultimate و Watch Dogs Legion و Dead By Daylight و WRC 9. ده غير الألعاب الجديدة نفسها اللي هتتوفر الشهر ده واللي هيكونوا كالتالي :-

Dirt 5

ميعاد الإصدار : 6 نوفمبر

الأجهزة : PS4 / PS5 / PC/ Xbox one / Xbox Series

نوفمبر هيكون شهر قوي من ناحية ألعاب السباقات مع حصولنا علي لعبتين سباقات ممتعين جدا ، أولهم هو الجزء الخامس الجديد للعبة السباقات المشهورة Dirt من تطوير أستوديو Codemasters بالإضافة إلي إن شغال عليه مطورين سابقين عملوا ألعاب حلوة تانية زي Driveclub و MotorStorm.

الجزء الخامس بيوعد بتجربة سباقات مميزة أركيدية علي الطرق الوعرة والجليدية مع تحسن ملحوظ في وزنية وقيادة السيارات ووجود طقس ديناميكي عواصف وأمطار ودورة ليل ونهار بتتغير وقت السباق ، اللعبة هتدعم كمان طور انقسام الشاشة Split Screen لأربعة لاعبين.

كمان لأول مرة هيتم تقديم طور قصة بمود الCareer بتدور أحداثها حولين شخصيتين بينافسوا بعض في بطولات السباقات وإنت بتلعب بواحد فيهم.

Need for Speed: Hot Pursuit Remastered

ميعاد الإصدار : 6 نوفمبر

الأجهزة : PS4 /Xbox One / Nintendo Switch

فاجأتنا بصراحة EA لما أعلنت من قريب عن ريماستر لعبة نيد فور سبيد اللي نزلت في 2010 بإسم Hot Pursuit وحققت نجاح كبير لتكون واحدة من أفضل إصدارات السلسلة .. اللعبة بتركز بشكل كبير علي مطاردات الشرطة و بتقدم عالم مفتوح بمقاطعة Seacrest County الأمريكية مع وجود طور قصة حوالي 12 ساعة و ممتع بتلعب فيه بدور شرطي أو متسابق وكل واحد له مسار مختلف عن التاني

كمان هنشهد عودة نظام الAuto log من اللعبة الأصلية واللي كان أشبه بالشبكة الاجتماعية وبيتتبع إحصائيات اللاعبين ونتايج السباقات ومقارنتهم بين كل لاعب والتاني.

الريماستر هيضم معاه كل إضافات اللعبة الأصلية من سيارات وسباقات وايفنتات مع تحسين كبير في الرسومات والتفاصيل مع دعم اللعب المشترك بين الأجهزة لطور الملتي بلاير اللي بيوصل ل 8 لاعبين.

XIII

ميعاد الإصدار : 10 نوفمبر

الأجهزة : Xbox One / PS4/ PC

اللعبة هي شوتر منظور أول وتعتبر ريميك للعبة الأصلية اللي نزلت بنفس الأسم في ال 2003 علي أجهزة الحاسب من شركة يوبي سوفت وكانت بتتميز برسومات القصص المصورة أو ال Cel-shaded.

اللعبة بتتبع أحداث البطل فاقد الذاكرة في أجواء مضطربة في الولايات المتحدة بعد إغتيال الرئيس الأمريكي وسعي العصابات والمباحث والاستخبارات الأمريكية وراك.

Destiny 2: Beyond Light

ميعاد الإصدار : 10 نوفمبر

الأجهزة : Xbox One / PS4/ PC

التوسعة الخامسة للعبة الشوتر المجانية ديستني 2 هي حقبة جديدة للسلسلة زي ما وصفها أستوديو بنجي ، واللي يبدو بإنه ما زال قادر علي سرد قصص جديدة داخل عالم ديستني مع مغامرة جديدة كليا المرة دي ونخوض رحلة ضد الظلام في القمر الثلجي واللي يدعي Europa والقصة كالمعتاد شكلها شيق جدا التوسعة هتضيف معاها عتاد وأسلحة ومهام جديدة ومنطقة Earth’s Cosmodrome من لعبة ديستني الأولي و عودة ال raid المشهور Vault of Glass من الجزء الأول.

وأحب أنوه إن مع صدور التوسعة وإضافة حاجات جديدة في المقابل هيتم إعادة هيكلة محتوي اللعبة مع حذف أسلحة ودروع و Raids و مهام القصة وال Activities بالإضافة إلي الخمس كواكب الأساسيين باللعبة هيتم حذفهم وإعادة العمل عليهم وممكن نشوفهم مرة تانية في المستقبل وبسبب كده مساحة اللعبة هتقل بنسبة حوالي 40% علي كل الأجهزة.

Assassin’s Creed Valhalla

ميعاد الإصدار : 10 نوفمبر

الأجهزة : PS4 / PS5 / PC/ Xbox one / Xbox Series

عنوان أساسينز كريد راجع بقوة مع إصدار فالاهلا واللي بياخدنا مغامرة في عصر الفايكنج في فترة غزوهم لدول أوروبا وبتلعب بدور قائدهم وبتختار سواء ذكر أو أنثي والجديد في الجزء ده إنك بتعدل علي شكل الشخصية كأنها تماما لعبة أربيجي تقليدية مع التركيز بشكل أكبر في الجزء ده علي الاختيارات أثناء حوارك مع الشخصيات والعواقب اللي هتترتب عليها قراراتك طوال أحداث القصة.

اللعبة هتقدم معاها شوية حاجات جامدة شخصيا متحمسلهم زي إنك تقدر تمسك أي سلاحين في اللعبة كمان ممكن تمسك درعين وتقاتل بيهم بجانب الأسلحة ، سلاح ال hidden blade رجع من تاني والمرة دي هتقدر تغتال العدو من ضربة واحدة بعكس جزء أوديسي اللي كان بينقص من ال health تبعه بس ، مشاهد الاغتيالات اللي كانت في الأجزاء القديمة وانك تتكلم مع الضحية هترجع من تاني مع عودة ال hood وامكانية أنك تتخبي وسط الحشود.. كمان ميزة ال Eagle Vision رجعت من تاني بإسم جديد وهو Odin Sight بالإضافة إلي إمكانية استدعاء الصقر زي الجزء اللي فات عشان يستطلع علي المكان من حوليك.

في حاجات تانية ممكن نتكلم عليها للعبة لكن الأفضل نسيبها نتكلم عنها بإستفاضة شوية في مقال مخصص ليها إسمه ” ليه تتحمس” هينزل بالأيام الجاية.

Yakuza: Like a Dragon

ميعاد الإصدار : 10 نوفمبر

الأجهزة : PS4 / PC/ Xbox one / Xbox Series

مع نهاية قصة كازوما كيريو بطل ألعاب ياكوزا في الإصدار اللي فات .. Like A Dragon هو الجزء السابع من اللعبة واللي بيقدم معاه قصة جديدة ببطل جديد كليا ، مش بس البطل اتغير كمان أسلوب اللعب اتغير فبدل ما كان الأول قتال مباشر مع الأعداء دلوقتي بقي بنظام الأربيجي التقليدي أو تعاقب الأدوار مع اختلاف حركات وقدرات كل شخصية عن التانية فالاول كنت بتتحكم بشخصيتك وبس.. دلوقتي هيبقي معاك شخصيات تانية تساعدك في القتال.

Planet Coaster: Console Edition

ميعاد الإصدار : 10 نوفمبر

الأجهزة : PS4 / Xbox one / Xbox Series

لعبة Planet Coaster تعتبر من أشهر ألعاب المحاكاة لبناء ملاهي الألعاب علي جهاز PC مع تحقيقها لنجاحات كبيرة بعد صدورها عليه بال 2016 وتخطي مبيعاتها لأكتر من 2 مليون نسخة.

اللعبة أخيرا افتكروا ينزلوها لأجهزة الكونسول واللي هتضم معاها كل المحتويات الإضافية اللي نزلت للعبة الأصلية ، مع وجود 3 أطوار بتقدمهم اللعبة هما Sandbox و Challenge و Career بيضيفوا عمر طويل جدا لمدة اللعب.

Godfall

ميعاد الإصدار : 12 نوفمبر

الأجهزة : PC / PS5

أول العاب الجيل الجديد اللي اتعلن عنها للبلايستيشن 5 هي اللعبة الجديدة من شركة Gearbox صاحبة ألعاب بوردرلاندز الشهيرة ، اللعبة هي أكشن أربيجي بتعتمد بشكل رئيسي علي الكلاسات والشخصيات وتنوع أساليب القتال والقدرات والأسلحة من شخصية للتانية و هتتطلب اتصال دائم بالانترنت لانها بتعتمد بشكل أساسي علي اللعب الجماعي Co op رغم ان هيكون في طور فردي سنجل بلاير ولكن مفيش أي تفاصيل حوليه لإن اللعبة بتقدم معها تجربة Looter في المقام الأول والتركيز علي عناصر اللعب أونلاين.

The Pathless

ميعاد الإصدار : 12 نوفمبر

الأجهزة : PC / PS5/ PS4

حصرية تانية لسوني هتصدر مع إطلاق البلايستيشن 5 وهي لعبة مغامرات واستكشاف منظور الشخص الثالث بتقدم معاها عالم مفتوح وبتدور أحداثها في جزيرة ملعونة وعليك انك ترفع اللعنة من خلال شخصية الصيادة اللي بتتحكم بيها وبيكون معاها سلاحها الرئيسي القوس والسهم مع وجود مرافق ليك وهو الصقر واللي ممكن يحملك من مكان لمكان مع إمكانية تطوير قدراته عن طريق ال Crystals اللي بتلاقيها في عالم اللعبة.

اللعبة باين إنها هتقدم تجربة بقاء مميزة وشكلها من رأيي هتكون أحد مفاجأت السنة.

Spider-Man: Miles Morales

ميعاد الإصدار : 12 نوفمبر

الأجهزة : PS5/ PS4

الجزء الجديد للعبة سبايدر مان هيقدم معاه مغامرة بقصة جديدة كليا بمدينة نيويورك الأمريكية مع التركيز علي شخصية مايلز بدل الشخصية الرئيسية بيتر باركر ، مفيش للاسف اي تفاصيل لجيم بلاي اللعبة بس متوقع انها تكون مشابهة للجزء اللي فات من ناحية أسلوب المهام والقصص الجانبية مع زيادة وتنويع في الضربات والكومبوهات. اللعبة هتشتغل علي البلايستيشن 5 بدقة 4K وسرعة 60 فريم في الثانية وهتستفيد من مميزات الجهاز زي الصوت ثلاثي الابعاد وتقنية تتبع الأشعة Ray Tracing وتقنية الاهتزاز haptic feedback لكونترولر Dualsense.

Sackboy: A Big Adventure

ميعاد الإصدار : 12 نوفمبر

الأجهزة : PS5/ PS4

لعبة بلاتفورم خاصة بشخصية Sackboy من ألعاب LittleBigPlanet شكلها خفيف وممتع مع تقديمها لمراحل بأبعاد 3D كاملة .. و ممكن تلعبها لوحدك أو كو أوب 4 لاعبين.

Demon’s Souls

ميعاد الإصدار : 12 نوفمبر

الأجهزة : PS5

اللعبة اللي بدأت دورة حياتها علي البلايستيشن 3 بال 2009 لتبدأ معاها شهرة فريق التطوير FromSoftware وجنرا السولز عموما مع تطبيقها لأفكار زي العالم المضيئ والمظلم بطريقة حلوة جدا لكن بجيم بلاي كان فيه عيوب كتير .. وبعد أكتر من عشر سنين أخيرا حصلنا علي ريميك للعبة من المطور Bluepoint Games اللي اشتغل علي ريميك لعبة Shadow of the Colossus واللي وعد بإصلاح عيوب الجيم بلاي مع تحسين شامل بكل الجوانب التانية للعبة زي الأصوات والرسومات وتفاصيل البيئة وهي هتكون بلا شك اللعبة اللي هتستعرض فيها سوني عضلات جهاز PS5 يوم إطلاقه.

Bugsnax

ميعاد الإصدار : 12 نوفمبر

الأجهزة : PC / PS5/ PS4

اللعبة اللي اتعلن عنها من قريب كأحد حصريات إطلاق البلايسيتشن 5 وواحدة من الألعاب المجانية لمشتركين PS Plus الشهر ده .

اللعبة هي منظور أول بتدور أحداثها في أحد الجزر وانت بتلعب بدور كائن أو حيوان بيسافر للجزيرة دي عشان يحاول يمسك كائنات شكلها غريب إسمها Bugsnax وهتحتوي اللعبة علي حوالي 100 فصيلة من الكائنات دي.

Kingdom Hearts: Melody of Memory

ميعاد الإصدار : 13 نوفمبر

الأجهزة : PS4 /Xbox One / Nintendo Switch

لعبتين كينجدم هارتس في جيل واحد مين يصدق 😅 ، رغم ان الجزء التالت معداش علي صدوره سنتين علي بعض ، ولكن ده ميمنعش إطلاق سكوير إنيكس لعبة جديدة لكينجدم هارتس ولكن المرة دي بشكل مختلف شوية وجنرا جديدة تماما عليها وهي لعبة أكشن إيقاعية بتعتمد علي ضغط الازرار في التوقيت الصحيح مع وجود قدرات لكل شخصية وتنوع في ضربات أسلحتهم.

اللعبة بتقدم طور لعب فردي مع قصة بتدور أحداثها حول شخصية كايري بعد نهاية الجزء الثالث وممكن تلعبها co op مع واحد تاني سواء أوفلاين أو أونلاين.

اللعبة هيكون فيها 20 شخصية قابلين للعب والتبديل بينهم منهم شخصيات السلسلة نفسها زي سورا وريكو وروكساس وأكوا وتيرا وجوفي ودونالد البط أو شخصيات من عوالم ديزني زي هيركليز وعلاء الدين وسيبما وغيرهم مع دعم رسمي للغة العربية.

Call of Duty: Black Ops Cold War

ميعاد الإصدار : 13 نوفمبر

الأجهزة : PS4 / PS5 / PC/ Xbox one / Xbox Series

الإصدار الجديد لألعاب كول اوف ديوتي هيكون من تطوير المرة دي أستوديو Treyarch و Raven Software اللي هيكون مسئول عن طور القصة و هتكون تكملة مباشرة لجزء بلاك اوبس الأول اللي نزل في 2010 مع حضور بعض من الشخصيات القديمة.

هتدور احداث اللعبة بفترة الثمانينات في وقت الحرب الباردة بين أمريكا والاتحاد السوفيتي(روسيا) وهتشمل مهمات في مناطق آسيا وأوروبا وأمريكا الجنوبية.

اللعبة لأول مرة هتقدم خيار تصميم شخصيتك بطور القصة مع حرية أكبر في تخصيص الشخصية بالطريقة اللي تناسبك .. اللعبة برده لأول مرة هتقدم معاها المهمات الجانبية وعشان تظهرلك لازم تجمع أدلة كفاية أثناء الإستكشاف بالمهمة الرئيسية.

اللعبة هتحتوي علي اكتر من نهاية وهيرجع معاها طور الزومبي بقصة وسرد جديد بعد غيابه في إصدار Modern Warfare بالسنة اللي فاتت مع دعم لأول مرة نقل أسلحتك وتقدمك من طور الأونلاين.

اللعبة مش هتخلو أكيد من أطوار الأونلاين المعتادة اللي اتقدمت في الأجزاء اللي فاتت سواء 6 ضد 6 أو 12 ضد 12 بالإضافة إلي تقديمها لطور جديد كليا اسمه Fireteam هيحتوي علي 40 لاعب داخل الخريطة الواحدة.

Hyrule Warriors: Age of Calamity

ميعاد الإصدار : 20 نوفمبر

الأجهزة : Nintendo Switch

حصرية نينتندو لموسم الأعياد السنة دي هي لعبة المغامرات و الهاك اند سلاش الجزء الجديد للعبة Hyrule Warriors واللي يعتبر تكملة للجزء الأصلي اللي نزل في 2014 علي جهاز الوي يو .. اللعبة بتدور أحداثها في عالم سلسلة أسطورة زيلدا أسلوب اللعب فيها مشابه شوية لألعاب Dynasty Warriors وده لأنها من نفس المطور Omega Force

مع تركيز اللعبة علي قتال الأعداء وحل الألغاز وتطوير المعدات وعمل crafting للأسلحة واللي بالمناسبة مش هتتكسر مع مرور الوقت بعكس لعبة Zelda Breath Of The Wild .اللعبة بتقدم أكتر من شخصية قابلين للعب زي لينك والأميرة زيلدا.

16 لعبة اخترناها ليكم كأهم ألعاب شهر نوفمبر 2020 ، ولكم بس أن تتخيلوا لو كان نزل في الشهر ده كمان Cyberpunk 2077 و Halo Infinite قبل تأجيلهم حرفيا بدون مبالغة كان هيبقي شهر دمار🔥

شاركنا في التعليقات بإيه أكتر لعبة مستنيها خلال الشهر ، انا عن نفسي مستني أجرب جدا Assassin’s Creed Valhalla 🤩

Hussein Osman

About Hussein Osman

محرر وكاتب علي باب الله ، بقدّر جداً هواية الفيديو جيمز ،ومن وأنا صغير هوايات كتير اتغيرت في حياتي إلا ألعاب الفيديو متغيرش حبي ليها بالعكس كان بيزيد مع مرور السنين .. بعشق جداً ألعاب الاربيجي سواء الغربية زي فال اوت وويتشر وايلدر سكرولز او اليابانية زي فاينال فانتسي وبيرسونا ودراجون كويست