جربت ديمو كراش بانديكوت 4، اللي فتح يوم 16، وانطباعي عنه كان إيجابي بشكل كبير، ولفت نظري للعبة هتكون احتمال كبير تبقي لعبة عظيمة من ألعاب السنة دي. للي مايعرفش كراشهي سلسلة عريقة آخر جزء نزل منها كان من 12 سنة، لكننا كنا محظوظين كفاية للحصول علي نسخة محسنة بشكل عظيم من الثلاثية في سنة 2017، والجزء الجديد قرب أخيرًا، ومع تجربتي للديمو أحب أطمنك إنه مش هيخيب توقعاتنا!
من صغري محب لفكرة ألعاب الPlatformers عشان كانت مسلية، ومرحة ومش محتاجة تلعبها بكامل تركيزك زي ألعاب من نوع Red dead redemption مثلًا اللي بتحتاج تكون مركز فيها جدًا عشان القصة فيها فائقة الأهمية، ولكن ده كان أثناء الطفولة، دلوقتي أقدر أقولك إني قدرت أفهم أكتر إيه سبب حبي للألعاب دي حتي وأنا كبير، وازاي تصميمها بيكون مختلف عن بعضها.
لعبة كراش 4 بتحاول تاخد النوع ده من الألعاب لمستوي جديد، عن طريق تقديم تنوع كافي يخليك قادر تلعب ساعات طويلة من اللعبة وانت مش زهقان، مع إن ضمنيًا كلنا متفقين إنك بتعمل تقريبًا نفس الحاجة طول وقت لعبك، صح؟
لأ، في سلسلة كراش اختلاف البيئات ونوعية العقبات اللي بتحطها قدامك اللعبة بيقدملك تنوع كافي، يخليك حابب تكمل في المستويات المختلفة، وتعيد مستويات قديمة وتجيب فيها سكورات أعلي، وده لسا موجود مع الجزء الرابع، لكن مع إضافة مهمة جدًا، وهي الاهتمام بتوفير ميكانكس جديدة كليًا، بتخلي أسلوب اللعب يختلف بشكل كبير.
الديمو بيقدم 3 مراحل هم :
Snow Way Out
Dino Dash
Ship Happens
أول مرحلتين بتلعب بكراش، والمرحلة التالتة بتلعب بدكتور نيو كورتكس، والشخصتين أسلوب حركتهم ولعبهم مختلف تمامًا، وبالتالي بيديك شعور بالتغيير الكبير، وكسر للملل، ده غير إن كل مرحلة فيها ميكانك خاصة بالشخصية بتقدر تستخدمها عشان تعدي العقبات اللي قدامك، ودي كمان حاجة بتكسر الملل بشكل كبير لأن الميكانكس متجددة ومختلفة عن بعضها.
المرحلة الأولي بتلعب في بيئة ثلجية، وده معناه إن هيكون عليك تتنطط ما بين ألواح تلج كتير، في منهم ألواح بتتكسر بعد 3 ثواني من وقوفك عليها، وفي ألواح ثابته، وفي ألواح بتزحلق، بتخلي حركتك مش ثابتة، وفي تقديم لميكانك توقيف الوقت اللي بتحتاجها كتير في أوقات النط علي الألواح، أو حتي لما بتفعل الجسور اللي بتفضل موجودة لمدة ثانتين، ودي حاجة بتعزز من احساس الانجاز لما بتخلص المرحلة دي.
المرحلة دي لوحدها خلصتها 10 مرات، لأن كان دايمًا في أفضل، وكان في حتت شديدة الصعوبة. المرحلة دي قدمت مرحلة بونص، ومرحلة البونص كانت لطيفة، وتصميمها أصغر لكن أعقد.
مرحلة Dino Dash قدمت ميكانك جديدة وهي اخفاء أو إظهار العوائق اللي قدامك زي الصغور، والشجر، وساهمت الميكانك دي في إنها تحطك في لحظات محتاجة منك رد فعل سريع، ومفاجيء.
الكلام عن تصميم أسلوب اللعب لازم مايخليناش ننسي إن تصميم البيئات بصريًا كمان كان عظيم، وأفضل ما في السلسلة، وموضوع السفر عبر الزمن ده شكله هيفتح علينا احتمالات كتير لبيئات ممكن نشوفها، زي مثلًا بيئة Dino Dash اللي كانت في عصر الديناصورات، وكان في عروض الدعاية أزمنة تانية مش قادر أستني عشان أشوفها.
المرحل ةالأخيرة – Ship Happens- واللعب بكورتكس كان تغيير كبير، لإنه بيقدملك اسلوب حركة مختلف تمامًا، أولًا كورتكس لا يملك ميكانك النطة المزدوجة، بيملك بدالها إمكانية الDash واللي بتخليه أسرع وعنده إمكانية الحركة بين منصات علي مسافة أبعد من بعض، لكن السرعة بتخليها ساعات ماتظبتش، ده غير إن سلاح كورتكس هو مسدس بيقوم بتحويل الخصوم أو بعض الأشياء في البيئة لمنصات يقدر ينط عليها، بضربة تحولهم لمنصة صلبة، وثابتة، وبضربتين تحولهم لمنصة تساعدك علي النط لمسافة أعلي، فالموضوع في الحتت اللي بتحتاج سرعة ممكن ساعات يلخبط، وتحس إن في زحمة علي الشاشة، وصعوبة في تنسيق كل الحركات والاحتمالات في وقت واحد، وعشان كده قيمة الإعادة بتزيد جدًا هنا عن الأجزاء السابقة.
كنوع من أنواع التسهيل علي اللاعبين، تم إضافة دايرة سودة صغيرة بتظهر تحت شخصيتك لما تنط، بتوريك انت هتنزل فين عشان تقدر تنزل في الأماكن اللي انت عايزها، وتتجنب الوقوع.
بشكل عام رغم محتوي الديمو القصير، لكن حسيت بقد إيه تصاميم البيئات، والجيم ميكانكس فيهم تنوع هيخلي اللعبة ممتعة إلي حد بعيد، ده غير إن مستوي الرسوم، والصوتيات شيء في مستوي عالي جدًا من الجمال، والاختلاف عن أي جزء سابق.
الخلاصة:
علي الرغم من إن عروض اللعبة مشدتنيش ومكنتش ناوي ألعبها، لكن كراش 4 بتكسر فكرة التكرار علي 3 أصعدة، وهم تنويع البيئات ونوع العقبات، وده شيء كانت السلسلة متميزة فيه من أولها، ولكن بتضيف المرة دي جانبين تانين، وهم الميكانكس الجديدة المُصممة بشكل جميل، وفكرة تعدد الشخصيات القابلة للعب، عن طريق إتاحة كراش ودكتور كورتكس في الديمو، وفي اللعبة الكاملة هيبقي متاح اللعب بكوكو.،ومع تقديم اللعبة الكاملة ل100 مرحلة، أعتقد ممكن تبقي أكتر لعبة Platformer طموحة شوفتها في حياتي، واتحمستلها أكتر، ولو أنت من عشاق السلسلة أنصحك تشتريها وانت مغمض لأن واضح إننا هنشهد لعبة عظيمة.
Mostafa Argoun
