أخيرًا شوفنا أساسينز كريد فالهالا، لعبة كان عندي حواليها شكوك كتير ومع ذلك كنت متحمس أشوفها بتقدم إيه.
مش هكدب عليك أنا مش عاشق لبيئة الفايكينجز لكنها حقبة تاريخية مثيرة للاهتمام، خصوصًا إنها متقدمة في لعبة زي أساسينز كريد بتركز علي الصراعات السياسية وتجسيد التاريخ بشكل دقيق، أو واقعي بقدر الإمكان (في أوديسي كان في استغلال كتير للأساطير اليونانية). لكن أنا متحمسلها عشان أشرف إسماعيل مخرج اللعبة السابق اللي كان شغال عليها واضطر يسيبها عشان ظروف خاصة -حسب كلامه- واللي مايعرفش مين أشرف إسماعيل، ده مخرج من أصول عربية -فخر العرب الجديد- اشتغل علي لعبتين من أفضل ألعاب السلسلة وهم black flagوorigins وتتفق أو تختلف مع كونهم لعبة ممتعة وممكن نقول عليهم ألعاب عظيمة كمان، لكن محدش يقدر ينكر إنهم لعبتين فيهم تغيير كبير عن المعتاد، جرأة في الأفكار، مع ابتكار وتقديم أفكار كتير جديدة، ومن هنا نستنتج إن فالهالا كان المفروض تكون بداية جديدة، أو علي الأقل محطة كبيرة جديدة لسلسلة بحبها، لكن كل ده كان وقت وجود أشرف إسماعيل، ماذا بعد رحيله؟ أنا خلاص ركبت الHype train
امبارح يوبي سوفت عملت مؤتمر يوبي سوفت فوروارد وعرضت تريلر جيمبلاي -أخيرًا -للعبة وكان واضح إن التسريبات قدمت build قديم للعبة، وحاليًا اللعبة شكلها أفضل بكتير من التسريبات، لكن مش أفضل بشكل ثوري مقارنة بأوديسي، يعني نقدر نقول إنها مش زي الفرق بين بلاج فلاج ويونيتي..لكن في فرق ..فخلينا نتكلم في اللي اتعرض ونخلي موضوع الجرافيكس ده علي جنب بقي.
أولًا المعارك:
المعارك فيها عنف أكتر وده اللعبة حاولت تنقله كشيء من التوثيق للحقبة التاريخية وفكرة إن الفاكينجز كانوا فعلًا محاربين أقويا وشرسين لدرجة بعيدة، وده متمثل بكمية من الأنيميشنز الجديدة مع مجموعة من الكومبوهات اللي الجديدة اللي شبه نظام كومبوهات أوديسي لكن مع تغييرها لتناسب أكتر الفايكينجز. الموضوع شبه شوية الفرق بين أنيميشنز القتال بتاعة الجزء التاني والتجديد الكبير اللي حصل عليهم في الجزء التالت.
كمان في إمكانية الdual wielding أو استخدام سلاحين، زي مثلًا الفاس، والسيوف، ده غير الدروع ، وكل واحد فيهم له سلسلة الكومبوهات الخاصة بيه، مع إمكانية مزجهم واستخدام الكومبوهات دي ورا بعض.
واحدة من مشاكل المعارك في أوديسي هي الذكاء الاصطناعي، وإن المعارك كانت بتعتمد في الصعوبة إنها ترميك قصاد عدد كبير من الأعداء اللي لابسين دروع عشا تجبرك تستخدم أسلوب مختلف عن أسلوب القتال المباشر من أول قنابل الدخان لحد الهروب أصلًا من المعارك واستخدام التسلل، وهنا مش واضح هل اللعبة لسا معتمدة علي ده ولا لأ، بس في خبر حلو هو إن الhidden blade رجعت والاغتيالات من ضربة واحدة برضو رجعت، وده خبر قديم شوية الحقيقة بس جدير بالذكر.
العرض موضحش التسلل هيكون مهم إلي انهي حد، لكن التسلل الااجتماعي (التخفي وسط الزحمة) رجع وده كان عنصر مهم جدًا وغايب عن أخر لعبتين، وفي العرض تم الإشارة لإن استخدام التسلل هيكون مهم أثناء أداء المهمات في مدن إنجلترا نفسها، اللي مليانة حراس معادين.
العالم والنشاطات الجانبية:
العالم في فالهالا شكله كبير زي أوديسي، بتقدم أربع ممالك من ممالك إنجلترا، وهم Wessex, Northumberland, east Anglia , Mercia وجزء من النرويج.
وتقريبًا في فرص لاستكشاف مقابر أو أنقاد أماكن تاريخية شبيهة باللي شوفناه في سلسلة تومب رايدر مثلًا، أو زي ما شوفنا مع أورجنز في استكشاف الأهرامات، واللي كانت حاجة ممتعة بس مفيش منها كتير في اللعبة.
في كمان أنشطة الRaids اللي بتقدم الغارات اللي كانوا بيعملوها فعلًا الفاكينجز لسرقة المدن والقري الإنجليزية، وبيكون فيها استخدام لأفراد مجموعتك أو عشيرتك، والفيديو ورانا إن البطلة بتعمل revive لواحد فيهم، وده بخليني أسأل هو يوبي سوفت نسيوا إن للعب الجماعي في لعبة أساسينز كريد لسا حلم من أحلام الجيمرز؟؟ تقريبًا يونيتي وصمت الموضوع ده وصمة عار ومش هيفكروا يرجعوه تاني قريب لكن تخيل لو كان موجود في فالهالا..!
العنصر الأساسي في الجيم بلاي المرة دي هو إمكانية بناء وتطوير القرية بتاعتك،عن طريق بناء المساكن وإدارة الموارد مع إمكانية الحصول علي امتيازات مقابل ده، ماتحددش هي إيه بس متوقع تكون أسلحة وأماكن للكرافتتينج والحاجات دي، يمعني إن النظام ده هيبقي شبيه بنظام تطوير المخيمات في ريد دير 2.
في كمان إمكانية تكوين تحالفات مع الممالك المجاورة، وده شيء شبيه شوية بلعبة Dragon age inquisition، وأتوقع خيارات الحوارات هيبقي هي اللي ليها الدور ده، وطبعًا إتمام المهمات للحلفاء دي، ونتمني نشوف مكاسب بتستفيد بيها من التحالفات دي.
في كمان نوع من المهمات الجانبية شبيه شوية بمهمات paris stories أو Murder mysteries اللي موجودين في يونيتي، وبعض المهما تاللي شوفناها في أوريجنز ،ودول بيعتمدوا علي الاستكشاف ، والتحقيق، وجميع المعلومات، هدفها بيكون غالبًا إنها تديك معلومات عن عالم اللعبة والfactions اللي فيه، ولما اتعملت قبل كده في السلسلة كانت حلوة وبتدي العالم انطباع إنه حي.
اللعبة فيها نوع من المراكب اسمه longship اتقال في العرض إنه متقدم عشان يقدم لحظات تقرب اللاعبين للعبة عن طريق القصص والأغاني اللي بيقولها ويغنيها الطقم اللي معاك. كمان في نوع من أنواع الأنشطة اسمه flyting ودي بتبقي زي تبادل الشتايم أو الإهانات بشكل فيه سجع معين، حاجة شبه مسابقات الشعر في الجاهلية لكن بالتشايم والإهانات والتحفيل!! ده يعتبر نشاط لطيف عشان بتكسب منه جوايز ونقط، وبيضيف طبعًا لمدي واقعية العالم اللي انت فيه، لكن النوع
ده من النشاطات بيخليني أسأل، هل دي خيارات التصميم اللي ممكن تشيل لعبة بحجم فالهالا؟
أي لعبة لازم بتحتاج يا إما gameplay feature جديدة تمامًا، يا إما قصة قوية تربط النشاطات الجانبية دي ببعض، وتديهم مصداقية أو مبرر إنك تعملهم.مثال علي كلامي هو نظام الnemesis system في لعبة Shadow of Mordor واللي بيخلي المعارك مع الأعداء مش متكررة لإنك ببساطة لما بتقتل حد بتكسب من وراه مهارات، ولو حد قتلك بيكسب هو من وراك مهارات والمرة الجاية اللي بتقابله فيها، بيكون أقوي بشكل ملحوظ من قبل كده، فده بيدي فكرة الخسارة والفوز في المعارك أهمية أكتر، مثال تاني علي كلامي تشعب القرارات في لعبة فول أوت ، مفيش قرار صح أو قرار غلط لكن كل قرار هيفتحلك مليون احتمال، يغير القصة ويحرمك من امتيازات كنت هتاخدها، ويديك امتيازات جديدة، وده بيخليك تتحمل مسؤلية قراراتك، وتشوف عالم اللعبة وهو بيعاقبك عليها، وهو كمان يشوفك هتغير مواقفك ولا لأ، وده فايدته إنك ممكن أه يكون اللي بتعمله في أساسه مكرر في ألعاب فول أوت، لكنه بيقدملك قصة وتفرع ليها عظيم بيخليك عايز تكمل، ومش فارق معاك التكرار.
ده بيخلينا ننهي كلامنا عن اللي شوفناه في العرض، لكن بيخلينا برضو نطرح سؤال تاني، هل احنا شوفنا gameplay feature ثورية من خلال العرض تخلي اللي مش متحمس للعبة يتحمسلها؟
الإجابة هي لأ، ولو في حاجة قريبة من كده فهي نظام الsettlements لكن لو هو جديد عن السلسلة ده مش معناه إننا أول مرة نشوفه، فالحقيقة فالهالا في مأزق كبير لو لم تقدم قصة قوية جدًا تخلينا حابين العالم والشخصيات، وعايزين نعيش معاهم وننغمس في أسلوب حياتهم بكل عناصره، ولكن لو ده مش موجود هتبقي النشاطات الجانبية شبه الجزءين اللي فاتوا لكن بمسميات مختلفة.
