نرجع تاني لمقال شهر جديد وألعاب جديدة واللي هنتكلم فيه المرة دي عن الألعاب اللي هتصدر في شهر أكتوبر الجاي واللي فيه الحقيقة مجموعة ألعاب قوية ومتنوعة تناسب كل الأذواق.
Crash Bandicoot 4: It’s About Time
ميعاد الإصدار:- 2 أكتوبر
الأجهزة:- PS4 / Xbox One
معتقدش إن في بداية أفضل من كده مع إفتتاحية قوية للشهر الجديد مع عودة لعبة كراش بانديكوت بجزء جديدوهو الجزء الرئيسي بعد غياب سنين طويلة من جيل البلايستيشن 1 و صدور أجزاء فرعية للعبة علي جهاز البلايستيشن 2 محققتش نفس نجاح ثلاثية البلايستيشن 1 ووقفت بعدها اللعبة لترجع مرة تانية من خلال ريميك للثلاثية الأولي بسنة 2017 وتحقق نجاح كبير وتنوي شركة أكتيفيجين الاستثمار في العنوان وتدي الضوء الأخضر للمطور الموهوب Toys for Bob إنه يشتغل علي الجزء الرابع واللي هيضم معاه مراحل رئيسية خاصة بطور القصة ومراحل فرعية ، بالنسبة للمراحل الرئيسية فممكن تلعبها في زمنين مختلفين ، الزمن الأساسي وهو إنك تختار واحد من الشخصيتين Crash أو Coco وتلعب بيهم أو الزمن البديل وبتختار في المراحل دي واحد من شخصيات تلاتة هما Doctor Neo Cortex و Dingodile و Tawna وكل شخصية من التلاتة هتكون ليها حركات وقدرات مختلفة عن التانية زي مثلا Dingodile بيستعمل سلاح ناري أو Tawna اللي بتستعمل ضربتها اليدوية والخطاف عشان توصل لأماكن بعيدة ، شخصيةCortex بتستعمل سلاحها علي الأعداء عشان توصل من خلالها من مكان للتاني.
أما شخصيات Coco و Crash هيعتمد الجيم بلاي في المراحل بتاعتهم علي ال Masks أو الأقنعة 🎭 وهيكون في 4 أقنعة علي حسب كلام المطور واللي كشف عن 2 منهم لحد دلوقتي ، واحد بيأثر علي الجاذبية ويخليك تمشي علي الأسقف والحوائط الجانبية والقناع التاني هيساعد كراش أنه يبطأ الوقت أثناء المراحل..
بالنسبة للمراحل الفرعية فهي عبارة عن مراحل قديمة إسمها Flashback levels بيكون فيها تحديات معينة ، وعشان تفتحها بتجمع شرائط VHS اللي بتكون مخبأة بالمراحل الأساسية.
اللعبة هيكون فيها ملتي بلاير مع أطوار زي Check point Race وهو عبارة عن سباق بين 4 لاعبين وطور Crate Combo وفيه بتحطم أكبر عدد ممكن من الصناديق قبل إنتهاء الوقت. هيكون في كمان مود تعاوني Co-op اسمه Pass N Play وفيه بتلعب مراحل القصة مع 3 لاعبين تانيين وتمرروا الكونترولر لبعض.
Star Wars: Squadrons
الأجهزة :- PS4 / Xbox One / PC
ميعاد الإصدار 2 أكتوبر
لعبة ستار وورز جديدة كشفت عنها EA من فترة وعلي عكس المتوقع بعد نجاح جزء The Fallen Order بالسنة اللي فاتت ، فاللعبة الجديدة هتكون منظور أول وهتعتمد بشكل أساسي علي قيادة المركبات الفضائية واللي هتكون عنصر رئيسي باللعبة من ناحية إن هيكون ليها تطويرات علي دروعها وأسلحتها ، وهيكون في 4 أنواع من المركبات Fighter و Interceptor وBomber وSupport وكل واحدة بتبقي مختلفة في قدارتها وسرعتها وقوة هجومها ودفاعها عن التانية.
اللعبة مش هتقدم بس طور قصة ، هيكون في كمان طور ملتي بلاير 5 لاعبين ضد 5 في مود اسمه Dogfight وهو أشبه بـ Team Deathmatch في ألعاب الملتي بلاير العادية ، في مود كمان للملتي بلاير إسمه Fleet Battles وهو شبه المود اللي فات ولكن المختلف إن في هدف المرة دي وهي السفينة الأم عند كل فريق ، واللي يدمرها الأول هيكون الفريق الكسبان.
RIDE 4
8 أكتوبر
الأجهزة :- PS4 / Xbox One / PC
لعبة سباقات الدراجات النارية RIDE هترجع من تاني بجزئها الرابع واللي هيقدم معاه تغييرات وتحسينات عامة علي نظام القيادة ، مع تحسين تفاصيل حلبات السباق وجعلها أقرب للواقع .. أيضأً تم تحسين الذكاء الإصطناعي بشكل كبير وجعله أقرب للمنافسين الحقيقيين ، نظام الإضاءة تحسن برده مع إضافة ميزة الطقس الديناميكي أثناء السباق وتعاقب الليل والنهار.
FIFA 21
9 أكتوبر
الأجهزة :- PS4 / Xbox One / PC
فيفا 21 متحمسلها بشكل كبير الحقيقة لدرجة عملتها مقال مخصوص اسمه ليه تتحمس😄 ، وشكلها هتكون رجعة حلوة لسلسلة فيفا لإن EA وعدت بتغييرات كتيرة فيها فبجانب الجيم بلاي اللي إتحسن يعني بشكل ملحوظ ولكن علي الجانب التاني ..تقريباً هتلاقي كل مود في اللعبة نال نصيبه من التغييرات والتحسينات ، إتعرف أكتر عن تغييرات اللعبة وأسباب حماسي ليها من خلال المقال.
اللعبة رغم إن مفيهاش حقوق نادي يوفينتوس الإيطالي بسبب وجوده مع لعبة PES ، ولكن EA نجحت في إنها تاخد حقوق أكبر ناديين في إيطاليا وهما الإنتر والميلان وترخص كل حقوقهم بلعبة فيفا 21 من ناحية الأطقم والشعارات والملعب ، ده بجانب حقوق دوريات كرة القدم الإنجليزي والألماني والأسباني والفرنسي ودوري أبطال أوروبا والدوري الأوروبي. كمان في إضافة حلوة في الجزء ده وهو إن في فرق معينة زي الميلان وتشيلسي وغيرهم بيشغلوا أغاني حماسية بعد كل هدف للفريق وهو في ملعبه ، اللعبة نقلت كل أغاني الفرق وحطتها في اللعبة ده غير أناشيد بعض الفرق زي ليفربول وريال مدريد هتسمع أناشيدهم أثناء دخولهم للملعب.
Remothered: Broken Porcelain
ميعاد الإصدار:- 13 أكتوبر
الأجهزة :- PS4 / Xbox One / PC /Nintendo Switch
لعبة الرعب Remothered مقرر إنها تكون ثلاثية ، الجزء الأول منها نزل في بداية 2018 بإسم Tormented Fathers ، الجزء التاني Broken Porcelain هيستكمل معانا مغامرة شخصية البطلة Rosemary Reed مع وجود شخصية جديدة وهي الشابة Jen اللي بتحاول تهرب هي وصديقتها Linn من نزل Ashmann والمديرة بتاعته في أجواء رعب مليئة بالقلق والغموض.
Raji: An Ancient Epic
ميعاد الإصدار:- 15 أكتوبر
الأجهزة :- PS4 / Xbox One / PC
اللعبة من تطوير أستوديو هندي و صدرت الشهر اللي فات كحصرية مؤقتة لجهاز النينتندو سويتش وأخيراً هنحصل بالشهر ده عليها لبقية الأجهزة .. رغم إن اللعبة من مطور مستقل ولكنها بتقدم معها تجربة فنية ساحرة بأجواء الهند القديمة مع شخصية الفتاة Raji وبنخوض معها مغامرة في بيئات ساحرة ، اللعبة هي أكشن مغامرات من منظور الشخص الثالث ولكن بكاميرا علوية.
Ghostrunner
ميعاد الإصدار:- 27 أكتوبر
الأجهزة :- PS4 / Xbox One / PC /Nintendo Switch
Ghostrunner هي لعبة جديدة هتحاكي أجواء الـ cyberpunk ، بتقدم تجربة أكشن سريعة من المنظور الأول وبتعتمد بشكل كبير علي الركض والباركور وتقطيع جسم الإعداء بالسيف من خلال تحكمك بشخصية نينجا وبتدور أحداثها في المستقبل باليابان واللي بتحاول تقضي فيها علي الفوضي.
Watch Dogs: Legion
ميعاد الإصدار :- 29 أكتوبر
الأجهزة :- PS4 / Xbox One / PC
أكتر لعبة متحمسلها الشهر ده بجانب فيفا هي واتش دوجز ليجون ، اللعبة هترجع من جديد منذ إصدار الجزء التاني في 2016 واللي معجبنيش شخصياً بسبب إن حسيته كاجوال زيادة عن اللزوم ، وأتمني الجزء ده يكون جدي أكتر وعلي الأقل من اللي شوفته في عروض اللعبة ، فهنشوف فيه تحسينات كبيرة عن الجزء اللي فات من ناحية قيادة السيارات والموتسكيلات والتصويب بالأسلحة وإنيميشن الضربات اليدوية والتخفي.
اللعبة نفسها هتدور أحداثها في لندن مع جماعة الهاكرز المعروفين DedSec واللي بيواجهوا النظام الفاسد للحكومة والشركات ، والمرة دي مش هيكون فيه قائد المجموعة اللي بتلعب بيه زي الأجزاء اللي فاتت ، في الجزء ده إنت اللي هتجند الشخصيات اللي عايز تلعب بيها والمطور صرح إنك ممكن تجند أي NPC أو شخصية عشوائية هتلاقيها حواليك في عالم اللعبة.
وكل شخصية هتختلف عن التانية من ناحية القدرات بتاعتها ، في شخصية مختصة بالتخفي ، في شخصية مختصة بتصويب الأسلحة ، شخصية تانية مختصة بالهاك ، وممكن مثلاً تجند شخصية عامة ومعروفة زي محامي أو ظابط وعلي كلام المطور إنك لو عملت جريمة ومطلوب القبض عليك ، فالشخصية دي هتساعدك وتمحي جريمتك كأنها محصلتش.. في شخصيات تانية Legendary ودول بيبقوا نادرين في عالم اللعبة وبيكون ليهم قدرات تانية قوية جدا مقارنة بباقي الشخصيات العادية.. في إضافة جميلة تانية للشخصيات وهي الموت المفاجئ لو مثلاً جندت رجل عجوز أو شاب مدمن للمخدرات الخ .. بيبقي في إحتمال إنه يموت بشكل عشوائي😅
اللعبة هتقدم معها طور لعب تعاوني Co-op فممكن يدخل معاك في الجيم 3 لاعبين وإنت الرابع وتخلصوا مهام اللعبة مع بعض وأفضل شئ إن تقدمك بيتحفظ بين المودين (اللعب الفردي والجماعي).
The Dark Pictures Anthology: Little Hope
ميعاد الإصدار:- 30 أكتوبر
الأجهزة :- PS4 / Xbox One / PC
بعد نجاح لعبة Man of Medan اللي نزلت أغسطس السنة اللي فات ، جي الدور علي الجزء التاني للعبة الرعب The Dark Pictures واللي هيكون بعنوان Little Hope وهتقدم معها مغامرة داخل مدينة Ghost Town مع 5 شخصيات هيتحكم بيهم اللاعب ، وهتعتمد اللعبة بشكل أساسي علي الخيارات اللي بيختارها اللاعب في الحوارات بين الشخصيات و أسلوب اللعب بنظام quick time events مع وجود أكتر من نهاية بتتحدد بناء علي الخيارات اللي قمت بيها طوال اللعبة.
اللعبة زي الجزء اللي فات ممكن تلعبها برده co-op مع واحد تاني من خلال الشبكة ، أو تلعبوا خمسة مع بعض وكل واحد يختار شخصية خاصة بيه.