ديه مراجعة سريعة وبدون حرق للموسم الأول من مسلسل The Witcher المُكون من 8 حلقات ، قبل ما أبدأ لازم أأكد إن المسلسل مش بيتبع الألعاب بل هو مبني على الروايات الأساسية ولذك طبيعي هتلاقي إختلافات بين الألعاب والمسلسل عشان كدة مينفعش ننتقده على الأساس ده ، وطبعاً المسلسل لا يصلح للمشاهدة العائلية نظراً لما به من مشاهد إباحية.
مسلسل The Witcher بيركز على 3 شخصيات رئيسية وهم Geralt of Rivia و Ciri و Yennefer ، خلال الـ 8 حلقات المسلسل هينتقل بين منظور كل شخصية وطبعاً الشخصيات هتتجمع مع بعضها في بعض الأوقات.
بالنسبة لشخصية جيرالت فا هو Witcher ، مين هما الويتشرز ؟ ، دول كانوا ناس طبيعية وهما أطفال ولكنهم خضعوا لسحر خلاهم بشكل عام أشخاص خارقين ، تدريباتهم صعبة جداً وعدد كبير من الأطفال بيموتوا في التدريبات ديه، جيرالت حياته عبارة عن وحوش وأموال ، بما إنه شخص خارق عن الطبيعي فا الناس بيدفعوا فلوس مقابل إنه يقضي على الوحوش ، الممثل Henry Cavill هو الي أدى دور جيرالت.
شخصية Ciri هي الأميرة الصغيرة الي هتكتشف فجأة إن عندها قوة خارقة ضخمة جداً والمملكة الي هي عايشة فيها هتتدمر بسبب هجوم من جيش بيدور عليها بسبب قواها الخارقة ، الممثلة Freya Allan هي الي بتقدم دور Ciri.
وأخيراً شخصية Yennefer وهي الشابة الصغيرة الي عندها إعاقة جسدية والي هتخش في تدريبات في مدرسة للسحرة وزي ما الي لعبوا اللعبة وقرأوا الروايات عارفين فاه تتحول وتكون واحدة من أقوى ساحرات عالم The Witcher، الممثلة Anya Chalotra هي الي قدمت الدور.
طبعاً الممثل فيه شخصيات كتير جداً وشخصياً شايف كل الممثلين قدموا الدور بشكل أكثر من مثالي ، في شخصية لازم نذكرها وهو Jaskier ( الشاعر ) الي بيخطف الأضواء في كل ثانية بيطلع فيها على الشاشة والممثل Joey Batey قدم الدور بشكل خرافي ( للعلم شخصية Jaskier هي هي شخصية Dandelion في الألعاب ) ، صوت الشاعر رائع وقدم مجموعة من الأغاني الرائعة ، بالحديث عن الأغاني فالموسيقى التصويرية والأغاني في المسلسل حقيقي ممتازة وبتحسسك إنك في عالم الألعاب.
كل حلقة من المسلسل عبارة عن قصة قصيرة بتحكي تاريخ الشخصيات وبتدخلنا في مغامرات رائعة ، طبعاً المغامرات الأساسية الي هيحبها كل المشاهدين هي مغامرات Geralt وصيده لمختلف الوحوش والي بشكل عام اتقدمت بشكل جيد جداً، ده ميمنعش إن مغامرات Ciri و Yennefer إتقدمت برضو بشكل حلو خلانا متشوقين نشوف الشخصيات ديه أكتر وده الي جعل المسلسل يحصل على متوسط تقييمات 88/100 من المشاهدين على IMDB و 92/100 على موقع Rotten Tomatoes ، ملناش دعوة بتقييمات النُقاد لإنهم فعلياً أي حاجة بالنسبالهم عيب وكلامهم بشكل عام خاطئ تماماً.
ولكن هل ده يعني إن الموسم الأول مثالي ؟ ، اكيد لا ، مفيش مسلسل أو فيلم بيوصلوا لدرجة المثالية من الإمتيار وطبيعي العيوب هتختلف من شخص لآخر ولكن ديه هي العيوب الي انا أقدر اقول عليها شخصياً محتاجة تعديل :
أولاً : بعض مشاهد الـ CGI بتظهر في بعض الأحيان إنها مش مثالية ومش داخلة مع الجو عشان كدة أتوقع إنهم في المواسم الي جاية هيحسونها بشكل كبير نظراً للنجاح الي حققه المسلسل من ناحية تقييمات المشاهدين.
ثانياً : التسلسل الزمني وللأسف ده ضرب عند ناس كتير جداً من الي بيتفرجوا لإن المسلسل مش بيشرح تسلسل زمني مُعين فا عايز المشاهد يستنتج الي بيحصل ، النصيحة ديه لأي حد لسة هيبدأ يتفرج : لما تشوف شخصية Ciri إعتبر إن ده الوقت الحاضر ، لما تشوف شخصية Geralt أو Yennefer فا إعتبر ده الماضي لحد الحلقة السابعة والي في نهايتها وفي الحلقة الثامنة الزمن هيبقى متناسق مع بعض من غير مشاكل.
