من أيام ظهرت إشاعة مفادها إن سوني قررت توقف أي لعبة مش واثقة فيها، وتقلل من الريسك اللي بتاخده مع ألعابها بتقديم أنواع ألعاب ممكن ماتعجبش جموع كبيرة من اللاعبين، وتركز أكتر علي الblockbusters أمثال The last of us، وUncharted و God of war و Ratchet and clank وspiderman واللي إلي حد كبير بيحققوا أرباح مضمونة للشركة وبيمثلوا حافز للاعبين لشراء أجهزة سوني.
Returnal تعتبر هي أكبر نفي للإشاعة دي بسبب اللي بتقدمه من أفكار جريئة وغير معتادة، وخارجة عن المألوف بشكل كبير، وعظيم. وخليني أشرحلك ليه.
ستوديو Housemarque مطور لعبة Returnal يعتبر ستوديو مش كبير طور ألعاب معروفة زي Stardust و Superstar dust و Nex Machina وهي ألعاب تندرج تحت نوع Bullet Hell شوتر، مع اختلاف المنظور في كل لعبة منهم، ولكن Returnal تعتبر هي أول لعبة منهم بالحجم والجودة اللي نقدر بجد نقول عليها AAA وعشان كده التحدي قدامهم مكانش صغير، واللعبة علي الرغم من شكلها اللي يديك انطباع إنها لعبة سينيمائية لكنها في الحقيقة مزيج بين أكتر من مدرسة وده اللي بيديها روح وطابع مختلفين عن أي شيء شوفته قبل كده.
خلال وقت لعبي أكتر لعبتين كنت بفتكرهم هم Doom Eternal و Control، وعلي الرغم من التشابهات اللي بين اللعبتين دول وReturnal لكن ماقدرش أبدًا أقول إن أفكار Returnal “مأخوذة” من أي لعبة، لإن كل حاجة هنا مختلفة لكن ممكن نقول إنها متاثرة بيهم بس.
قصة ريترنال بتتكلم عن شخصية سيلين رائدة الفضاء اللي بتستكشف شيء غامض بيوصل بيها لكوكب مهجور، وبتفقد التحكم في سفينتها عشان تلاقي نفسها محبوسة علي الكوكب ده ومضطرة تستكشفه، وبتتعرف علي الحضارة اللي كانت عليه قبل كده وبنتعرف إحنا عن ماضيها ودوافعها وقصتها عن طريق مقاطع سينيمائية قليلة، ومراحل من منظور الشخص الأول شبيهة بأجواء لعبة PT اللي أتلغت، وطبعًا عنصر الوثائق والAudio Logs.
إذن اللعبة مش لعبة سينيمائية بقدر ما هي مركزة علي أسلوب اللعب، لكن بتقدم قصة قوية، تمامًا زي كنترول، وعلي الرغم من إنها مش لعبة رعب لكن فيها لحظات كتير مرعبة بشكل كبير جدًا بسبب إحساس الوحدة و الإنعزال اللي بتحسسك بيهم اللعبة، في أرض شاسعة مهجورة، وحتي أهلها اللي سكنوها قبل كده مخلوقات غريبة بتتكلم لغة جديدة. سيلين بتكتشف إن الكوكب عالق في دورة زمنية متكررة، كل ما بتموت بتلاقي نفسك رجعت لأول لحظة نزلت فيها علي الكوكب، وبتعيد كل شيء من الأول فيما عدا الأسلحة اللي جمعتها بيكون الProgress بتاعك محفوظ فيها. وموضوع اللوب الزمني ده بيفسر أسم اللعبة. اللعبة بتحاول تصنف نفسها إنها Rogue Like لكنها في الحقيقة مش كده أوي، أينعم إنت بتعيد من الأول لما تموت لكن اللعبة Narrative driven أكتر من أي لعبة تانية من النوع نفسه، وهنا التشابه الأكبر مع لعبة كنترول، وهو التركيز علي قصة بتسلل معين، والمتعة أغلبها في الوصول مش الرحلة نفسها، عكس لعبة Hades مثلًا.
الكومبات في اللعبة عظيم،وهنا بيظهر أكبر تشابه مع لعبة كنترول، نوع الأسلحة وأسلوبهم، وعم وجود ذخيرة، بس كل سلاح بيبقي له وقت محدد يعمل فيه كول داون عشان تقدر تستخدمه تاني. عدد الأسلحة في اللعبة 10 كل واحد فيهم له مميزات بتبقي مقفولة أول ما بتاخد السلاح لكن مع كترة استخدامه بتنجح في فتحها، ودي واحدة من الحاجات النادرة في اللعبة اللي بتكمل معاك حتي لو مت وعيدت من الأول.
الأسلحة كلها مختلفة عن بعضها، وأغلبها اعتماد اللعبة علي الparticle effects بشكل كبير لإبراز قوة الأسلحة واختلافها عن بعضها، يعتبر الThermogenic Launcher هو أكتر سلاح حبيته وحسيت بتأثية في المعارك الضخمة في اللعبة. كل سلاح بيديك مؤثرات مختلفة تمامًا من خلال دراع التحكم عن طريق خاصية Hectic Feedback واللي بتعتبر returnal أحسن لعبة استخدمته لحد دلوقتي، فالتغييرات المناخية وضربات الأعداء وحتي ضرباتك أنت بتنعكس علي يد التحكم وبتديك ميزة الإحساس عن طريق حاسة اللمس، بعد ما تم المؤثرات الصوتية والبصرية بشكل عظيم هنتكلم عليه بعد شوية.مميزات دراع التحكم هنا مستغلة من خلال الadaptive trigger برضو اللي بتفرق قوة الضغط عليه وبتخليك تطلع السلاح وتصوب تصويب حر لو دوست دوسة خفيفة، أو تعمر السلاح الثانوي لو دوست للأخر علي زر الr2.
اللعبة فيها بعض الcollectables اللي بتبقي علي شكل Parasites’ بتديك ميزات قصادها عيوب، مثلًا في مرة حصلت علي parastie بيسمحلي بالHEALING لكن بيقلل الDAMAGE بتاعي. علي الرغم من المتعة اللي ناتجة عن المقايدة في المواقف دي، واللي بتحسسك بالخطورة والقلق، لكن حسيت إن الموضوع عشوائي بشكل كبير.
MECHANIC تانية تم إضافتها، وشايفها رائعة هي الADRENALINE BAR ودي عبارة عن بار بيتملي كل ما بتقتل أعداء أكتر، ومع كل عدوين بيموتوا بتتنقل للفل أعلي من الأدرنالين، ومعل كل لفل بتكتسف قدرة أفضل. ولكن مع تلقيك ضربة واحدة بتخسر كل تقدمك في مستويات الأدرنالين. تعتبر الميكانك دي مستحيلة إلي حد ما، لكن بتكافيء الحريفة اللي هيبقوا عايزين يحسوا بالإمتياز وسط الآخرين. واحدة من القدرات اللي اكتسبتها بالأدرنالين هو زيادة الDamage بشكل كبير ساعدني أجتاز أول boss من أول مرة.
تصميم المعارك مشابهة بشكل كبير للعبة كنترول زي ما ذكرت كذا مرة في كلامي، المعارك معتمدة علي أسلوب Push forward combat، وهو الأسلوب اللي بيجبرك علي الحركة أثناء القتال، لتفادي ضربات الأعداء وحركتهم، وذكاءهم الإصطناعي اللي مصمم علي الحركة والمباغتة المستمرة.
بس هنا الموضوع أصعب بكتير جدًا لإنك لو مت في أي نقطة من اللعبة بتعيد من الأول خالص، في نقطة واحدة للحفظ وهي في نص اللعبة بالظبط. والحقيقة وجدت إن ده تصميم مزعج جدًا في الكثير من الأحيان وهيطفش ناس كتير من اللعبة كان ممكن يحبوها لو أختارت خيارات تصميمية أفضل من كده.
الأعداء مصممين بشكل عظيم، بصريًا وعمليًا لإنهم أقويا وأذكيا ودايمًا بيشكلوا تحدي كبير، وعلي الرغم من إن فيه aim assist لكن اللعبة بتتحداك مش عن طريق دقة التصويب زي معظم الشوترز، ولكن عن طريق وضعك أمام أعداد كبيرة من الأعداء المباغتين بمختلف مستوياتهم، وبيكون عليك تفادي ضرباتهم اللي بتبقي حرفيًا في كل مكان. معارك الزعماء كانت صعبة بشكل كبير، لكن الأصعب منها هو المعارك العادية اللي عادةً بتبقي مصممة عشان تباغتك وتجيلك بشكل أنت مش مستعد فيه، وفي نوعية من الأعداء قريبين من الBOSSES في المستوي بتلاقيهم وسط عدد كبير من الأعداء، وهضطر تستخدم معاهم أسلحة الMELEE. الحلو في النوع ده من الاعداء هو إنه بيضيف أجواء رعب إلي حد كبير، لإنك دايمًا مش عارف إمتي هتتحط في موقف بالغ الصعوبة قصاد أعداء تصميمهم وحركتهم غريبة، وغير متوقعة، وأشكال الأعداء حقيقةً هي واحدة من أعظم التصميمات اللي شوفتها علي الإطلاق، لإنها أشكال مختلفة، ومخيفة وطبعًا إحساس الخوف بيكون علي أخرة لما تبقي عارف إنك لو مت هتعيد من الأول!
الاستكشاف في اللعبة مابيعتمدش علي الPUZZLES بشكل كبير علي قد ما بيعتمد علي إنك تلاقي طرق للتنقل، فالخريطة هتقولك علي مكان كل حاجة، وهتتحددهولك بدقة كمان لكن الشطارة هي إنك تعرف توصله من غير ما تموت! وعلي الرغم من المكافآت اللي هتلاقيها من ورا الاستكشاف، لكن الموضوع مكانش واخد مساحة كبيرة هنا، وماحستش بيه غير في المرة التانية اللي لعبت فيها بعد ما خلصت القصة واللعبة كلها.
بتستخدم اللعبة تقنية ال3d AUDIO وهو حاجة ماشوفناهاش كتير في ألعاب كبيرة، وأكتر لعبة حسيت بأثير الموضوع ده فيها كانت Hunt showdown،وفي ريترنال كان الموضوع جميل والأصوات حقيقةً متعة للودان. الموسيقي هنا غامضة، وهادية وبتساعدك تخش في الأجواء في لحظات القصة واللحظات اللي بين المعارك، لكن في المعارك لا شيء يعلو فوق صوت المؤثرات .
رسوم اللعبة متتازة، والتفاصيل دايمًا علي الشاشة كتير وتكاد تكون فوضاوية لن بشكل جميل، الليزر بمختلف ألوانه، والإضاءات، والإنفجارات الناتجة عن مختلف الأسلحة، واختلاف البيئات بين الصحاري الحمراء المشابهة لكوكب المريخ، والبيئات الثليجة، وبالغابات، كلها متقدمة بشكل عظيم ومستوي خرافي من التفاصيل، وطبعًا كل ده بجانب تصميم الأعداء الممتاز.
الأداء كويس إلي حد كبير لكن في المعارك الضخمة الفريمات بتقع بشكل ملحوظ، وده ماينفعش في لعبة بالصعوبة دي، لإنها بتتطلب الحركة السريعة والثانية بتفرق! اللعبة كمان شغالة بupscaled 4k مش native 4k لكن في أغلبية الوقت بتحاول توصل ل 60 إطار في الثانية. اللعبة كمان فصلت معايا مرة وضيعت عليها ساعتين كاملين لعب وده شيء أتمني ماحدش يمر بيه أبدًا.
الخلاصة:
لعبة ريترنال لعبة مختلفة تمامًا عن معظم ألعاب سوني الحصرية لمنصاتها، ولولا الخيارات التصميمية اللي بتخليها تعجب شريحة معينة جدًا من الناس، كان ممكن تبقي أحد أفضل حصريات سوني في تاريخها، بسبب قصتها الرائعة، وعالمها المصمم بشكل جميل بصريًا وسمعيًا، وكيفية استغلالها لكل مميزات الكنترولر الجديد، وكمان الكومبات الممتع، وتصميم الأعداء العبقري.
مشكلة لعبة ريترنال هو إن مدتها 12 ساعة في المتوسط، وده عمر طويل نسبيًا إنه يخلص في مرة واحدة، المطور أقترح علينا نحط الجهاز في وضع الREST MODE، لكن ماذا لو النور قطع مثلًا؟ وهنا بتبان أكبر عيوب ريترنال وهو القرارات التصميمة المتطرفة دي.
ريترنال لعبة ممتازة بنصح بيها أي لاعب عنده استعداد يتقبل الصعوبة المبالغ فيها في النص التاني من عمر اللعبة مقابل إنه يلعب لعبة هتخليه علي حافة كرسيه طول فترة لعبها، وهتنقله لعالم تاني تمامًا وهينسي كل حاجة في حياته لحد ما يخلصها. علي الرغم من بعض العيوب المتعلقة بعدم توازن الصعوبة، لكن ماقدرش أوصف اللعبة بلفظ غير إنها عظيمة، وبهني المطور عليها، واللي أعلن عن وجودة ضمن استوديوهات تطوير الألعاب الكبيرة خلاص.