السنة الي فات معرض E3 وقف بسبب فيروس كورونا وده أثر بشكل كبير على إعلانات الشركات وحصل تأجيلات لحاجات كتير جداً. بس على الرغم من كدة فا شركات كتير فضلوا مكملين مع نفسهم أونلاين زي PlayStation و Xbox و Ubisoft و EA وغيرهم وشوفنا إعلانات كتير مميزة برضو.
السنة ديه معرض E3 راجع بنسخة 2021 ومش هيكون معرض كامل فعلي بل هيكون معرض رقمي، المعرض هيستمر في الفترة بين 15 و 17 يونيو 2021 وهيشارك فيه مجموعة كبيرة من شركات الألعاب بالإضافة لواحدة من الشركات مُصنعة للأجهزة المنزلية، يعني ميكروسوفت أو سوني أو نينتيندو وبما إن سوني قررت إنها متدخلش أي حدث E3 تاني فا بنسبة كبيرة هنشوف ميكروسوفت هي الي في E3.
يوم 14 هيكون في حدث Pre Show هيستمر لكام ساعة وهيضم شوية إعلانات بسيطة تجهيزاً للحدث الرئيسي نفسه يوم 15، الحدث هيستمر لمدة 3 أيام وكل يوم هيستمر لمدة 12 ساعة بإعلانات وإستعراض Demos وحاجات كتير مختلفة لتشويق اللاعبين مرة تانية.
بشكل عام إحنا متحمسين جداً لعودة حدث E3 خاصةً وإن الحدث الأهم من كل سنة لإن ده الوقت الي بيكون أكتر تميزاً والشركات بتتحمس إنها تشارك بعروض أكبر وأطول لألعابها لإنها متأكدة إن في ملايين من اللاعبين بيتابعوا الحدث حول العالم. مع إصدار الجيل الجديد من أجهزة الكونسول فالسنة ديه في فرصة كبيرة للشركات إنها تتألق وتشارك بعروض ضخمة تشوقنا لمستقبل مختلف السلاسل أو العناوين الجديدة من الألعاب المميزة.
تابعونا على السوشيال ميديا عشان تعرفوا أخر الأخبار عن E3 2021 وتشوفوا تغطيتنا للحدث :
promidoz
