معلومات جديدة عن منصة Xbox Series S

خلال الفترة الي فاتت سمعنا شوية اقاويل بتقول ان منصة Xbox Series S هتخلي تجربة الالعاب سيئة وحتى الالعاب على الاجهزة الاقوى هتكون محكومة بسبب ان المنصة نفسها ضعيفة.

ميكروسوفت نفسها أكدت ان الجهاز دخل مرحلة التطوير من 2016 هو و Xbox Series X  و الجهاز مش هيقلل إطلاقاً من مستوى الألعاب على الجيل الجديد بل الفكرة كلها اصلاً إن الجهاز هيشغل الألعاب على 1080p أو 1440p بدل  4K وده مش هيأثر على الألعاب بالسلب نهائياً.

غير كدة فحجم الألعاب على Xbox Series S هيكون أقل من حجمها على منصة Xbox Series X بنسبة 30% تقريباً فا لو عندك لعبة حجمها 100 جيجا بايت على Xbox Series X حجمها هيبقى 70 جيجا بايت على Xbox Series S وديه حاجة ممتازة جداً خاصة وإن حجم هارد الـ SSD بتاع الجهاز هو 512 جيجا بايت فقط فا ديه هتكون حاجة مفيدة. حجم الألعاب هيقل عشان دقة الالعاب والـ Textures هتقل على Series S.

منصة Xbox Series S هتصدر في 10 نوفمبر 2020 بسعر 300 دولار أمريكي بجانب منصة Xbox Series X والي سعرها هيكون 500 دولار أمريكي.

لو أنت واحد من الناس عايز جهاز جيل جديد يكون رخيص ويشغلك كل الألعاب بدقة 1080 أو 1440 على إطارات كويسة بجرافيك ممتاز فالجهاز ده أكيد عشانك، كمان خدمة Xbox Game Pass بإشتراك 10 دولار شهرياً هتكون ممتازة لكل الحصريات الجديدة.