الأسبوع الي فات كان مليان بالإشاعات والتسريبات بس عشان مناخدش من وقتكم كتير فإحنا النهاردة جايبنلكم أهم الأخبار والتسريبات الي انتشرت خلال الأسبوع الي فات زي إن ميكروسوفت نشرت إستطلاع رأي حول يد تحكم Dualsense وإننا ممكن نشوف بث State of Play جديد من سوني قريب. اهلاً بيكم في ملخص أخبار الأسبوع.
1- تسريب : بث State of Play جديد قريباً :
أول خبر معانا النهاردة هو تسريب من المُسرب المعروف Roberto Serrano والي بيأكد إننا خلال أواخر يناير أو في شهر فبراير هنشوف بث State of Play جديد من PlayStation وفي البث ده هنشوف الإعلان بشكل كامل عن لعبة God of War Ragnarok مع بعض الحصريات التانية وألعاب الطرف الثالث.
2- بطل Red Dead 2 من المحتمل أن يتواجد في God of War Ragnarok :
تكملة لأخبار God of War Ragnarok فالممثل الشهير Roger Clark الي قدم دور Arthur Morgan في لعبة Red Dead Redemption 2 نشر صورة على حسابه الرسمي على إنستجرام بتوضح إن في أماكن شغل فاضية في إستوديو Santa Monica مُطور God of War، بعد نشر الصورة ديه في تكهنات كتيرة بدأت تنتشر وناس كتير بتتوقع إننا هنشوف الممثل في Ragnarok وهيقدم دور Thor او Odin.
3- ميكروسوفت تنشر إستطلاع رأي حول يد تحكم Dualsense :
ميكروسوفت نشرت إستطلاع رأي لمُلاك أجهزة Xbox بتسألهم فيه عن رأيهم في يد تحكم Dualsense الي نزلت مع منصة PlayStation 5 وهل في ناس حابة تشوف المميزات الي فيها في يد تحكم جديدة من Xbox ولا لا. من الواضح إن ميكروسوفت بتجهز ليد تحكم Elite جديدة وبنسبة كبيرة هنشوف فيها المميزات الموجودة في Dualsense زي Adaptive Triggers و Haptic Feedback.
4- تعاون مميز بين Fall Guys و DOOM Eternal :
من الحاجات الحلوة الأسبوع ده إننا شوفنا تعاون بين Fall Guys و DOOM Eternal واتضاف للعبة Fall Guys شخصيات منها زي الـ DOOM Slayer و Tyrant و Cacodemon والإعلان الي نزل للتعاون ده كان اكتر حاجة كيوت ممكن تشوفها. لو لسة بتلعب Fall Guys قولنا ناوي تشتري شخصيات DOOM الجديدة ولا لا.
5- إغلاق موقع سلسلة Killzone :
إستوديو Guerrilla Games أعلن عن إغلاق موقع سلسلة Killzone والخبر ده قتل الأمل عند ناس كتير كانت متوقعة إننا هنشوف جزء جديد من السلسلة على منصة PlayStation 4. اخر لعبة من السلسلة نزلت في 2013 بجانب إصدار جهاز PlayStation 4 كانت بإسم Killzone Shadow Fall واخدت تقييمات متوسطة من النُقاد.
إغلاق الموقع مش معناه إنه السلسلة خلصت أو مش هينزل منها أجزاء تانية إستوديو Guerrilla Games خلال الفترة الجاية هيركز على سلسلة Horizon وألعاب تانية وواضح إنهم مش ناويين يرجعوا لسلسلة Killzone في أي وقت قريب.
6- إستوديو Naughty Dog بدأ الشغل على مشروعه الجديد :
إستوديو Naughty Dog عمل تغييرات كبيرة في الإدارة خلال الفترة الي فاتت وضاف مطورين جداد كتير جداً، الموضوع ده خلى ناس كتير تتوقع إنهم بدأوا شغل على مشروعهم الجديد.
على الرغم من إختلافنا مع الأفكار الي قدمتها The Last of Us Part II إلا اننا منقدرش ننكر النجاح الي حققته وحصولها على لعبة السنة وجوايز تانية كتير. خلال الفترة الي فاتت كان في توقعات بإن الإستوديو هيشتغل على مشروع جديد تماماً بس مش بعيد برضو نشوفهم شغالين على جزء جديد من The Last of Us أو سلسلة Uncharted، كمان الإستوديو المفروض إنه شغال على مود الأونلاين للعبة The Last of Us 2.
7- مسلسل The Last of Us هو فقط بداية أعمال PlayStation التليفزيونية :
نكمل أخبار The Last of Us والمرة ديه هنتكلم عن المسلسل. على حسب كلام رئيس بلايستيشن Jim Ryan فا مسلسل The Last of Us الي هيتقدم على شبكة HBO هيكون هو البداية لكمية ضخمة من الأفلام والمسلسلات الي هتتعمل من ألعاب PlayStation.
خلال شهر يوليو الي جاي هنشوف فيلم Uncharted وبنسبة كبيرة مسلسل The Last of Us هيتوفر خلال سنة 2022 واحنا متحمسين نشوف الأفلام والمسلسلات الي بعدهم هتتاخد من أنهي ألعاب.
8- تأكيد سوني على موعد إصدار بعض ألعابها :
في حدث CES 2021 شركة PlayStation أكدت على مواعيد إصدار مجموعة من ألعابها الي جاية. Ratchet and Clank Rift apart و Horizon 2 Forbidden West هينزلوا في 2021. لعبة Returnal هتنزل في 19 مارس وهتنضم ليها لعبة Kena Bridge of Spirits في نفس الشهر.
في شهر أكتوبر هنشوف إصدار لعبتين وهما Stray و Ghostwire Tokyo وفي يناير 2022 هنشوف إصدار لعبة Project Athia. كمان تم الإعلان عن تأجيل لعبة Pragmata لحد سنة 2023 بدل 2022.
9- الإعلان عن لعبة Indiana Jones من Bethesda :
شركة Bethesda أعلنت عن لعبة Indiana Jones والي هتقدم قصة وأفكار مبتكرة تماماً، اللعبة هتكون من تطوير إستوديو Machine Games الي قدملنا سلسلة Wolfenstein، كمان اللعبة هيتم تطو يرها بتعاون مع Lucasfilm Games والمنتج التنفيذي ليها هيكون Todd Howard. مفيش تفاصيل كتير عن اللعبة بس متتوقعوش إننا نشوفها في 2021 وكمان لسة مش عارفين إذا هتكون حصرية على Xbox ولا هتنزل كمان على PlayStation لإن تطوير اللعبة بدأ قبل إستحواذ ميكروسوفت على Bethesda.
