من أول ما ظهرت inZOI وهي واخدة مكان مميز وسط ألعاب المحاكاة بفضل مستواها الرسومي المبهر وتفاصيلها الدقيقة اللي بتحاول تقرّبك من الحياة الواقعية بأكبر شكل ممكن. دلوقتي ومع أول إضافة ضخمة بعنوان Island Getaway، التجربة بتاخد منعطف جديد بيغيّر الإيقاع ويفتح أفق أوسع للعب.

الإضافة بتنقلك لجزيرة استوائية اسمها Cahaya، مكان مليان مناظر طبيعية خلابة، شواطئ مفتوحة، قوارب، أنشطة بحرية وزراعة وصيد وتعدين. الهدف مش مجرد تغيير شكل الخريطة، لكن خلق إحساس إن شخصياتك فعلاً بتاخد إجازة وتعيش مغامرة مختلفة عن الروتين المعتاد.

فهل Island Getaway مجرد محتوى إضافي للتجميل ولا فعلًا هتغير طريقة لعبك وتخلي inZOI أعمق وأغنى؟ وهل الرحلة للجزر الاستوائية دي كافية عشان تثبت إن اللعبة عندها مستقبل طويل مش بس بداية قوية؟

محتوى الإضافة 

إضافة Island Getaway مش جاية عشان تحكيلك قصة جديدة، لكنها بتركز على إنها تفتح قدامك محتوى مختلف يخلي شخصياتك تعيش أجواء جديدة كليًا. الجزيرة الاستوائية Cahaya هي قلب التوسعة، ومقسومة لمناطق متنوعة تجمع بين الترفيه والاسترخاء من ناحية، والأنشطة العملية اللي شبه البقاء من ناحية تانية.

في الجزء الترفيهي هتلاقي منتجعات كاملة فيها حمامات سباحة، ساونا، جلسات مساج، ألعاب زي البولينج والبلياردو، ورحلات بحرية للاستكشاف أو الغوص. فيه كمان ميزة الإقامة في فيلات داخل المنتجع لفترة محدودة، ودي بتخلي الإحساس وكأن شخصياتك فعلاً في عطلة مدفوعة التفاصيل.

أما الجزء العملي من الجزيرة فبيعتمد على أنشطة زي الزراعة والصيد والتعدين. تقدر تبني مزارع صغيرة وتجمع موارد طبيعية زي الأخشاب والمعادن، وتستخدمها في تطوير أدوات أو تحسين أسلوب حياتك. فيه كمان ميكانيكية الصيد البحري اللي بتسمحلك تجمع أنواع مختلفة من الأسماك والكائنات، وكل اكتشاف بيتسجل في كتاب مجموعات جديد.

الإضافة مش بس بتوقف عند الأنشطة، لكن كمان بتقدم أماكن خاصة زي Miatara Temple، معبد مرتبط بالقطط، تقدر تزوره وتتعامل مع تماثيل أو تشتري عناصر غريبة زي تمائم وحاجات خاصة بالقطط. فيه جانب روحاني وغامض بيدي عمق للعالم بعيد عن مجرد الأنشطة اليومية.

كمان في مجموعة من الوظائف الجديدة اللي بتظهر لأول مرة في التوسعة، زي إن شخصياتك تشتغل كـ”مرشد سياحي متدرب” أو “مراقب أعشاش سلاحف” أو حتى “سائق تاكسي مبتدئ”. الوظايف دي صحيح لسه بسيطة وبتتقدم بشكل أوتوماتيكي، لكن بتدي لمسة جديدة وتفتح فرص لتجارب أكتر.

الجيم بلاي

الجيم بلاي في Island Getaway مبني على فكرة إنك تنقل الزويز بتوعك من الروتين العادي وتدخلهم في عالم استوائي مليان أنشطة وتجارب. الإضافة مش بس بتديك مكان جديد تتفرج عليه، لكن كمان بتغيّر إيقاع اللعبة وتخلي يوميات شخصياتك فيها مزيج من الاسترخاء والمغامرة.

أول حاجة هتلاحظها إن الجزيرة متقسمة لمنطقتين أساسيتين. منطقة المنتجعات، ودي مليانة أنشطة ترفيهية زي السباحة، الساونا، المساج، الغطس، الرحلات البحرية وحتى ألعاب خفيفة زي البولينج. هنا اللعبة بتحاول تخليك تعيش جو عطلة كاملة، وكأن شخصياتك في إجازة مدفوعة التفاصيل.

الجزء التاني بيميل أكتر لأسلوب الحياة العملي أو شبه البقاء. فيه زراعة تقدر من خلالها تزرع محاصيل صغيرة وتستخدمها في الأكل أو البيع، وفيه صيد سمك بأنواعه، ومع تقدم المستوى بتقدر تفتح معدات أكتر وتستكشف أعماق البحر وتتعامل مع كائنات مختلفة زي السلاحف أو حتى أسماك غريبة. التعدين كمان واحد من العناصر الجديدة، بيخليك تجمع معادن وأحجار كريمة تقدر تستخدمها في التطوير أو تبيعها وتكسب منها.

الجميل إن كل نشاط من دول مش مجرد إضافة شكلية، لكنه بيكمل بعضه. مثلًا الصيد والزراعة ممكن يوفروا موارد تساعدك في تطوير حياتك اليومية، أو التعدين ممكن يخليك تجمع فلوس عشان تحجز إقامة في فيلا داخل المنتجع. ده بيخلي الدورة اليومية لشخصياتك مترابطة أكتر ومليانة دوافع.

كمان التنقل في الجزيرة نفسه جزء من الجيم بلاي. تقدر تستخدم التاكسي المائي، تركب قوارب، أو حتى تستدعي وسائل تنقل شخصية زي الـ e-scooter. التجربة دي مش بس عملية، لكنها بتدي إحساس بالحرية وتخليك تكتشف مناطق مختلفة في Cahaya.

الأنشطة الجديدة مش بس عملية أو ترفيهية، لكن فيها جانب استكشافي وغامض زي معبد Miatara Temple اللي مرتبط بالقطط، تقدر تزوره وتلاقي فيه عناصر غريبة وأجواء مختلفة عن باقي الجزيرة. وده بيدي عمق للعالم ويكسر روتين الأنشطة التقليدية.

النقطة اللي تستحق الذكر إن الجيم بلاي لسه فيه بعض العيوب. أوقات الشخصيات بتتصرف لوحدها بشكل عشوائي من غير ما تديلك فرصة تتحكم، وكمان التوجيه للمبتدئين مش واضح قوي، فممكن تحس في الأول إنك تايه وسط كم الأنشطة. برضه بعض الوظايف الجديدة زي “مرشد سياحي متدرب” أو “مراقب أعشاش سلاحف” لسه سطحية ومش معمولة بشكل عميق، لكنها بداية كويسة بتدي تنوع.

الجرافيكس

من أول ما توصل جزيرة Cahaya هتحس إن الإضافة معمولة عشان تبهر عينك. الاستوديو استغل Unreal Engine 5 بشكل واضح، وده باين في تفاصيل البيئات اللي اتقسمت بين منتجعات فخمة وجوانب طبيعية شبه برية. الإضاءة هنا هي كلمة السر، من أشعة الشمس اللي بتنعكس على سطح البحر لحد المشاهد الليلية اللي بتبان فيها الألعاب النارية أو لمعة النجوم فوق الشاطئ.

المياه من أكتر الحاجات اللي ملفتة للنظر، سواء في الرحلات البحرية أو وقت ما شخصياتك تغوص. هتشوف الشعب المرجانية بألوان زاهية، أسماك وسلاحف بتتحرك حوالينك، وأحيانًا كائنات بحرية أكبر زي قروش أو قناديل بحر بتدي إحساس خطر وسط المنظر الجميل.

تصميم الشخصيات كمان واخد خطوة لقدام. صحيح مازال في بعض الزويز بيعانوا من تعبيرات وجه باردة أو نمطية، لكن في الإضافة التفاصيل بقت أوضح شوية خصوصًا مع الأنشطة الجديدة زي السباحة أو الجلوس في الساونا. حركات الجسم وردود الأفعال في المية أو أثناء الاسترخاء في المنتجعات بتدي إحساس طبيعي أكتر.

المنتجع نفسه مليان تفاصيل صغيرة زي المسابح، ألعاب البولينج، وأماكن المساج. حتى الأثاث والفيلات اللي ممكن تحجز فيها معمولة بعناية تخليها قريبة جدًا من شكل المنتجعات الواقعية. على الناحية التانية، المناطق العملية زي المزارع أو الكهوف فيها طابع أغمق شوية، مع خامات واضحة للأرض والمعادن وأجواء مختلفة عن الجزء الترفيهي.

التقييم النهائي

8.5/10

 Island Getaway لـ inZOI بتنقل اللعبة لمرحلة جديدة بتجمع بين أجواء استوائية مبهرة وأنشطة متنوعة زي الصيد والزراعة والغوص والاسترخاء في المنتجع، ورغم وجود بعض الملاحظات وعيوب إلا إن التجربة عمومًا ممتعة وبتدي إحساس إن اللعبة بدأت تلاقي هويتها، وده يخلي الإضافة مكسب كبير خصوصًا إنها مجانية وممكن تكون المدخل المثالي لأي لاعب جديد عايز يكتشف عالم inZOI ويشوف هل يكمّل معاه ولا لأ.