NBA 2K26 – هل الإصدار الجديد هيرجع الثقة لعشاق السلسلة ولا مجرد تحديث شكلي؟

سلسلة NBA 2K بقالها سنين طويلة هي المرجع الأساسي لعشاق كرة السلة في الألعاب، واللي بيميزها عن أي لعبة رياضية تانية إن كل سنة بيكون في محاولات للتطوير، سواء في طريقة اللعب أو في التفاصيل الصغيرة اللي بتخلي التجربة أقرب للواقع. ومع كل إصدار جديد، الاعبين بيسألوا يا ترى في جديد يستاهل نشتري النسخة دي؟ ولا هو مجرد تحديث بسيط على اللي فات؟

اللي لعب الإصدارات القديمة عارف إن 2K ساعات بتيجي بإضافات ضخمة تغيّر التجربة من أولها لآخرها، وساعات تانية بتكتفي بتعديلات طفيفة. لكن اللي يخلي الناس مكملة معاها رغم الانتقادات هو إن مفيش لعبة تانية قادرة توصل نفس مستوى التفاصيل، سواء في تحركات اللعيبة، أو الأجواء في الملعب، أو حتى صوت الجمهور والتعليق اللي بيخليك تحس إنك بتتفرج على ماتش حقيقي.

السنة دي ومع نزول NBA 2K26، الكل كان مستني يشوف إذا كانت اللعبة هتقدر ترجع الثقة بشكل أكبر ولا لأ، خصوصًا بعد الجدل حوالين الإصدار اللي فات. هل المطورين ركزوا على تحسين أسلوب اللعب والجيم بلاي؟ هل في تغييرات مؤثرة في الأطوار الكبيرة زي MyCareer وMyTeam وThe City؟ ولا هيفضل الموضوع معتمد أكتر على تحسينات شكلية وخطوات صغيرة لقدام؟ طيب ما تيجوا نشوف؟

محتوى اللعبة وأطوارها

لو بصينا على محتوى NBA 2K26 هنلاقي إن اللعبة كالعادة ضخمة جدًا ومليانة اختيارات تخليك محتار تبدأ منين. المطورين هنا بيقدموها مش كلعبة رياضية بس، لكن كعالم كامل ممكن تعيش فيه، سواء بتحب تلعب لوحدك أو مع صحابك أونلاين.

أول حاجة بتيجي في بال أي حد هي طور MyCareer، وده الطور اللي بتعمل فيه لاعبك الخاص وتبدأ رحلته من الصفر لحد ما يبقى نجم في الـNBA. الطور السنة دي واخد اهتمام أكبر بالقصة والتفاصيل، ومعاها تجربة حياة كاملة جوه الملاعب وبره كمان. هتلاقي اختيارات بتأثر على مسار الكارير بتاعك، وبتديك إحساس إنك عايش القصة مش بس بتلعب ماتشات.

بعد كده عندنا The City، وده أشبه بعالم مفتوح/سوشيال هب ضخم جوه اللعبة. هنا تقدر تنزل الشارع وتلعب ماتشات 2 ضد 2 أو 3 ضد 3 في باركات مليانة لعيبة حقيقية زيك، أو تدخل بطولات، أو حتى تتجول في المحلات وتعمل تخصيص لشخصيتك باللبس والجزم والستايلات. الجديد إن المدينة بقت أبسط وأسهل في التنقل، عشان تقضي وقتك في اللعب مش في الجري من مكان للتاني. كمان في إضافات زي Crews، اللي تخليك تنضم لجروب أو “كلان” مع صحابك وتحققوا أهداف جماعية.

نروح لطور MyTeam، وده الطور اللي بيعتمد على تجميع كروت لعيبة وتكوين فريق أحلامك. السنة دي المطورين عملوا حركة مهمة جدًا وهي إضافة لاعبات الـWNBA لأول مرة في الطور ده، وده فتح الباب لتجارب جديدة تمامًا بمزيج بين أساطير الـNBA وأبرز نجمات السلة. غير كده هتلاقي أطوار زي Domination، Triple Threat، وكمان إضافات جديدة زي Breakout: Gauntlet اللي بتجمع بين أسلوب التحديات والتكتيك في استخدام الكروت.

أما لو بتحب الطور الكلاسيكي الخاص بالإدارة، ففي عندك MyNBA وMyGM. هنا تقدر تتحكم في فريق بالكامل، من التعاقدات للصفقات للخطط، وتبني سلالة بطولات عبر السنين. في إضافات صغيرة السنة دي زي سيناريوهات جاهزة بتديك تحديات محددة تحاول تحققها كمدير عام، وكمان استمرار ميزة الـEras اللي بتخليك تبدأ من عصور مختلفة في تاريخ الدوري.

وما ننساش وجود طور The W الخاص بالـWNBA، اللي بقى له دور أكبر في اللعبة مش كجزء جانبي بس. تقدر تعمل لاعبة خاصة بيك وتخوض رحلتها في دوري السيدات بنفس الروح اللي موجودة في MyCareer.

الجيم بلاي

الجيم بلاي في NBA 2K26 هو النقطة اللي بتحس فعلًا إنها واخدة أكبر قفزة السنة دي. المطورين ركّزوا على الحركة والأنيميشنز بشكل يخلي كل لمسة وكل خطوة على الملعب أقرب للواقع من أي وقت فات.

أول تغيير واضح هو الموشن إنچن الجديد. السنة اللي فاتت شفنا تحسين في المراوغات، والسنة دي الحركة كلها بقت أكثر سلاسة، من الجري لقطع الكورة وحتى الارتداد للخلف عشان تسدد. مفيش الإحساس القديم بتاع إن اللعيبة بتتزحلق على التلج أو بتتسحب جوه أنيميشن غصب عنك. دلوقتي الحركة مرنة وبتديك تحكم أكبر، وده يخلي كل ماتش مختلف ومليان تكتيك.

كمان في إضافة مهمة في التسديد وهي الـShot Meter الجديد. المقياس بقى منحني وسهل تتبعه، والـ”جرين” أو التسديدة المثالية بقت مرتبطة بشكل مباشر بالمسافة والضغط الدفاعي. لو مدافع لازق فيك، المساحة الخضرا بتصغر بشكل يخليك شبه مستحيل تسجل، لكن لو مفتوح هتلاقيها أوضح وأسهل. الميكانيزم ده بيخلي كل تسديدة ليها وزنها، وبيكافئك لما تخلق مساحة لنفسك.

الموضوع مش واقف عند كده. دلوقتي بقى فيه حاجة اسمها Catch-and-Shoot Boost. لو استلمت الكورة وضغطت على الزر في اللحظة الصح، تقدر تعمل إطلاق أسرع زي ستيفن كاري، وده يفرق جدًا في الماتشات الأونلاين اللي كل ثانية بتفرق.

على مستوى الدفاع، في تحسن في الذكاء الاصطناعي لكن لسه محتاج شغل. ساعات بتحس إنك عامل كل حاجة صح، ومع ذلك الخصم يقدر يسجل رغم إنك مغطي كويس. بس في العموم الالتحامات وبناء الهجمة بقت أعمق، والبلوكات والريباوند بقت ليها وزن أكتر بفضل تعديل الفيزكس.

الجيم بلاي كمان بقى فيه تنوع في الـGo-To Moves. السنة دي قدروا يخلوا الحركات المميزة لكل نجم أوضح، زي تحركات جوكر “يوكيتش” أو الـFadeaway بتاع إمبيد. ده يدي إحساس إنك ماسك لاعب حقيقي له ستايل خاص، مش مجرد نسخة كربونية.

أما عن الأطوار المختلفة زي MyCareer أو The City، فكل واحدة بتستفيد من التطويرات دي بشكل مباشر. في الـPark مثلًا، التايمينج في التسديد والتمرير السريع فرقوا في إحساس اللعب الجماعي. وفي MyNBA أو MyTeam، الميكانيكيات دي بتخلي الفرق اللي بتعملها بالكروت أو اللي بتديرها في الإدارة تتحس واقعية أكتر على الملعب.

الجرافيكس

أول ما تفتح NBA 2K26 هتحس إن الموضوع مش مجرد لعبة جيم بلاي متطور، لأ، ده عرض كامل معمول كإنك قاعد قدام ماتش NBA حقيقي على التلفزيون. التفاصيل المرئية بقت أوضح من أي وقت قبل كده، من عرق اللعيبة اللي بقى meme في السلسلة لحد إضاءة الملاعب اللي بتتغير حسب الأجواء والحماس.

الأنيميشنز السنة دي واخدة مستوى تاني. الحركات اليدوية، تعبيرات الوش، وحتى التفاعل بين اللعيبة والجمهور كلها بقت طبيعية أكتر. حركة الجمهور جوه المدرجات مش مجرد صور متكررة، لأ، بقى فيه تنوع في ردود الفعل حسب اللحظة لو سددت مثلاً ثلاثية قاتلة هتسمع وتلاقي الاستاد كله واقف على رجله.

الـHalftime Show والشغل اللي بيتعمل وقت التايم أوت زادوا تنوع. فيه عروض بالكرة، مسابقات بين الجمهور، وأحيانًا لقطات لكاميرات الجمهور اللي بتدي جو مرح وسط الجدية. حتى التفاصيل الصغيرة زي اللوحات الإعلانية حوالين الملعب بقت مليانة علامات تجارية واقعية.

الأقوى بقى إن ProPLAY و الموشن إنچن ساعدوا يخلو الرسومات مش بس شكل، لكن إحساس. يعني حركة اللعيبة على الأرض متوافقة مع شكلهم وتعبيراتهم. لما لاعب يتعب أو يتصاب، هتشوف ده في وشه وحركته مش بس أرقام بتقل.

التقييم النهائي

8\10

لعبة NBA 2K26 مش لعبة بتقدم ثورة ضخمة عن اللي قبلها، لكنها خطوة ورا خطوة بتثبت إن السلسلة لسه رقم واحد في محاكاة السلة. الجيم بلاي بقى أنعم وأقرب للواقعية، والجرافيكس والعرض التقديمي وصلوا لمستوى يخليك تحس إنك بتتفرج على ماتش حقيقي، والأطوار مليانة محتوى يخلي أي نوع من الفانز يلاقي اللي يحبه.

لسه عندنا نفس المشكلة الأزلية مع المعاملات المالية (VC) اللي بتضغط على أي حد عايز يدخل الأونلاين بسرعة، ولسه في أطوار كان ممكن تاخد تطوير أكتر زي MyGM. لكن لما تبص للصورة الكبيرة، هتلاقي إن التجربة لسه ممتعة بشكل ضخم، خصوصًا مع إضافة الـWNBA في MyTeam وتطوير MyCareer اللي رجع تاني يقدم قصة حقيقية تشدك.

لو إنت فان للسلة أو حتى عايز لعبة رياضية تملى وقتك بمحتوى لا نهائي، 2K26 هتديك اللي إنت عايزه وزيادة. بس خليك عارف إن المتعة الحقيقية هتحتاج وقت وصبر أكتر من فلوس.