Borderlands 4 – هل العالم المفتوح هيعيد السلسلة لمجدها ولا يدفنها أكتر؟ 🎮🔥

من أكتر من 15 سنة وسلسلة Borderlands واقفة كواحدة من أهم ألعاب التصويب اللي فتحت باب كبير لعالم الـ Looter Shooter وعرفت اللاعبين يعني إيه كل دقيقة تلاقي سلاح مجنون جديد ينقلك لتجربة فوضوية كلها انفجارات وضحك ساخر لكن ممتع. كل جزء من السلسلة كان ليه بصمته الخاصة الجزء التاني مثلًا قدّم شخصيات ماحدش نسيها وكتب أحداث متوازنة بين الكوميديا السوداء والدراما أما الجزء التالت فرغم إنه كان أضخم إنتاج للسلسلة إلا إنه اتعرض لانتقادات كبيرة بسبب النكات الركيكة والمعارك الطويلة المملة اللي خلت الزعماء يتحولوا لكأنهم جدران بتستنزفك بدل ما يكونوا تحديات ممتعة. دلوقتي مع Borderlands 4 الوضع واخد منحنى مختلف Gearbox قررت تسيب وراها نظام المراحل الكبيرة المقسومة وتدخل عالم مفتوح لأول مرة على كوكب جديد اسمه Kairos مليان مناطق متنوعة أنشطة جانبية وتحديات أسبوعية وطرق حركة وتنقل تخلي الاستكشاف جزء أساسي من التجربة.

فهل التغيير الجريء ده هيقدر يرجع السلسلة لمكانتها اللي فقدتها؟ هل العالم المفتوح هيكون فعلاً نقطة قوة ولا مجرد مساحة واسعة من غير روح؟ هل الشخصيات الجديدة هتقدر تعوض غياب الوجوه القديمة اللي تعودنا عليها؟ طيب ما تيجوا نشوف

القصة

الأحداث المرة دي بتاخدنا بعيد عن كوكب Pandora اللي اتعودنا عليه وننزل على كوكب جديد اسمه Kairos، كوكب كبير متقسم لأقاليم مختلفة كل إقليم تحت سيطرة واحد من أتباع الشرير الرئيسي المعروف باسم الـ Timekeeper. الراجل ده قدر يفرض حكمه على الكوكب بالكامل عن طريق غسيل عقول السكان وتحويل حياتهم لنظام ديكتاتوري خانق، وكل منطقة حواليه مليانة جيوش ومخلوقات غريبة بتخدمه.

الـ Vault Hunters الجداد بيدخلوا في القصة من اللحظة اللي بيلاقوا نفسهم جزء من الصراع ده، وبدل ما يكون هدفهم الأساسي بس البحث عن الفولتس زي الأجزاء القديمة، المرة دي بيتورطوا في معركة لتحرير الكوكب نفسه. في البداية بيتعرضوا لسيطرة مباشرة من الـ Timekeeper بعد ما يزرع فيهم غُرسة بتخليه يقدر يتتبعهم ويتحكم في تصرفاتهم، وده كان ممكن يبقى دافع انتقامي قوي، لكن بيظهر روبوت صغير يقدر يعطل الإشارة ويمنع سيطرته، وده بيغير مسار القصة ناحية مقاومة جماعية.

مع تقدم الأحداث بيبدأ الـ Vault Hunters يجمعوا حلفاء من كل منطقة، من شخصيات عندها قصص شخصية زي العلماء أو المقاتلين اللي كانوا ضحايا الحكم الاستبدادي. القصة بتقدم شخصيات جديدة بالكامل زي Levaine اللي ليه علاقة معقدة مع بعض الصيادين، وكمان وجوه مألوفة بتظهر لحظات قصيرة زي Claptrap عشان تحافظ على روح السلسلة.

القصة عمومًا كلها بتدور حوالين بناء مقاومة ضخمة ضد الـ Timekeeper وأتباعه الثلاثة، والسيطرة على إقليم ورا التاني لحد ما توصل لمركز سلطته في Dominion City. رغم إن الأحداث واخدة طابع جدي أكتر من قبل، Borderlands 4 لسه بتحافظ على لمسات الكوميديا والجنون اللي بتميز السلسلة، سواء في الحوارات أو المهام الجانبية اللي بتطلعك من أجواء الحرب لقصص ساخرة وغريبة.

الجيم بلاي

اللعبة هنا واخدة نقلة كبيرة عن أي جزء فات، مش بس في الأسلحة أو القدرات، لكن كمان في شكل اللعب نفسه. لأول مرة Borderlands تتحول لعالم مفتوح كامل على كوكب Kairos، من غير تقسيم مناطق بشاشات تحميل. عندك أربع أقاليم ضخمة مليانة مهام جانبية، أنشطة، زعماء، وتحديات أسبوعية شبه ألعاب الـ MMO.

الحركة بقت أنعم وأسرع بكتير، بقى عندك Double Jump، Dash في أي اتجاه، تسلق، سباحة، Glider يخليك تعدي مسافات ضخمة في الهوا، وكمان Grappling Hook تمسك بيه أعداء أو براميل متفجرة وتستعملها كسلاح، أو حتى توصل لمناطق بعيدة. ده كله بيخلي المعارك سريعة جدًا ومليانة تكتيكات جديدة.

كل Vault Hunter من الأربعة ليه 3 شجرات مهارات مختلفة تخليك تبني شخصيتك بالطريقة اللي تعجبك. مثلًا Vex الـ Siren تقدر تبنيها على نسخ طيفية تتقاتل جنبك، أو تبنيها على أسلحة عنصرية تعمل كومبوهات بالكهربا والنار والإشعاع. أما Rafa عنده Turrets وأسلحة DigiStruct بتخليه زي ماكينة حرب متنقلة، وAmon الـ Forgeknight بيحول المعركة لقتال قريب بفؤوس وعنابر نار وتلج. حتى Harlowe عندها قدرات بالجاذبية تحبس الأعداء في فقاعات وتلعب بيهم زي الدمى.

الأسلحة نفسها لسه هي قلب السلسلة، وكل سلاح غريب ومختلف. ممكن تلاقي رشاش يضرب صواريخ صغيرة، أو مسدس يطلق دارتس تنفجر بعد ثواني، أو قنبلة تتحول لثقب أسود يسحب كل اللي حواليه. كمان في Enhancements جديدة زي رميات السكاكين، الـ Throwing Knives، أو مودات بتغير طريقة شحن الأسلحة.

المعارك ضد الأعداء بقت متنوعة، خصوصًا مع أعداء جداد زي عناكب ميكانيكية بترجع الطلقات، أو مخلوقات متغطية بكريستالات لازم تفكها قبل ما تقدر تقتلهم. والزعماء بقوا أقل في موضوع الـ Bullet Sponge وأكتر في ميكانيكيات ممتعة زي إنك تستعمل عناصر البيئة أو تفضل في الهوا عشان الأرض كلها بتتحول لفخ.

بالنسبة للأونلاين، تقدر تلعب لوحدك أو مع 3 صحابك، وكل واحد يقدر يبعد يعمل حاجة تانية في الخريطة وترجعوله في ثانية عن طريق Fast Travel سريع. في Endgame كمان فيه أنشطة أسبوعية، زعماء بيتكرروا للـ Loot، وتحديات بموديفايرز زي أعداء يتعالجوا من النار أو أعداء يموتوا ويعملوا Black Hole.

الجرافيكس

 Borderlands 4 لسه محافظة على أسلوبها الكارتوني المميز اللي متعودين عليه من زمان، الـ Cel-Shaded اللي بيخلي اللعبة شكلها كتاب كوميكس متحرك. بس المرة دي Gearbox طوروا محرك اللعبة وأضافوا تفاصيل أدق سواء في الإضاءة أو انعكاس الأسلحة أو حتى تعابير الشخصيات.

كوكب Kairos متقسم لمناطق مختلفة وكل منطقة ليها طابعها البصري الخاص. هتلاقي صحاري واسعة مليانة عواصف ترابية، غابات كريستالية متلألئة، مدن متهالكة مضاءة بنيون، وأماكن صناعية فيها خطوط إضاءة وزرع ميكانيكي غريب. التنوع ده بيخلي الاستكشاف ممتع، وكل منطقة تحس إنها ليها هوية خاصة.

التأثيرات البصرية في المعارك من أجمل الحاجات اللي في اللعبة. كل طلقة وكل انفجار مليان ألوان وتأثيرات إضاءة بتدي إحساس بالفوضى المنظمة. لما ترمي قنبلة تعمل ثقب أسود وتشوف الأعداء بيتسحبوا جواها مع شرارات كهربا ونار حوالين المشهد، المنظر فعلاً يخليك توقف لحظة تتفرج.

تصميم الأعداء والزعماء كمان واخد عناية أكبر. هتشوف أعداء بجسمهم متغطي بكريستالات مضيئة، أو وحوش ميكانيكية فيها تفاصيل دقيقة في كل حركة. والزعماء الكبار واخدين مؤثرات خاصة زي موجات طاقة بتكسر الأرض أو تغييرات في الجو حوالين ساحة القتال.

التقييم النهائي

9\10

Borderlands 4 لعبة راهنت بجرأة وقدمت نقلة واضحة للسلسلة بعالم مفتوح أوسع وحركة أسرع وأنشطة تخلي التجربة تعيش معاك فترة طويلة. الجيم بلاي مازال بيقدم مزيج ممتع من الفوضى والابتكار، مع ترسانة ضخمة من الأسلحة الغريبة وVault Hunters أخيرًا متوازنين بأساليب لعب مختلفة وممتعة. ولو إنت من عشاق ألعاب التصويب اللي مبنية على الـ Loot وبتدور على تجربة جماعية مجنونة، اللعبة هتقدملك أكشن وضحك وجرعة هوس بالتجميع ترجعك لأيام مجد السلسلة.