EA SPORTS FC 26: محاولة لكسر دائرة التكرار وبداية عهد جديد؟

من زمان وجمهور الكورة بيتكلم إن ألعاب EA واقفة مكانها كل سنة بتنزل نسخة جديدة بتغييرات شكلها لطيف لكن في الآخر بتحس إنها نفس اللعبة وده خلّى ناس كتير تفقد الحماس وتتعامل مع السلسلة كأنها مجرد تحديث موسمي مش تجربة جديدة فعلاً

السنة دي الوضع مختلف شوية مع EA SPORTS FC 26 لأن الشركة قررت تاخد مخاطرة حقيقية اعتمدت على آراء اللاعبين اللي مدمنين Ultimate Team وكمان جمهور الكارير موود اللي عايز يحس بتجربة واقعية قريبة من اللي بيشوفها في الملاعب وده أدى إننا قدام لعبتين في لعبة واحدة تجربة بطيئة وتكتيكية مليانة تفاصيل صغيرة زي التعب وحالة الطقس وخطة الفريق وتجربة تانية سريعة مليانة مهارات وأهداف تناسب أجواء الأونلاين

اللي مخلّي FC 26 مميزة المرة دي إن التغييرات مش مجرد شكل أو جرافيكس جديد لكن محاولة لإعادة التوازن اللي السلسلة فقدته سنين طويلة بين الواقعية اللي بيطلبها الجمهور وبين متعة الأركيد اللي خلت اللعبة مشهورة في الأساس وفهل FC 26 هتبقى بداية عهد جديد يرجّع ثقة اللاعبين ولا في الآخر هنكتشف إننا لسه بنلعب نفس اللعبة القديمة في لبس جديد؟

محتوى وأطوار اللعبة

لما تفتح FC 26 هتلاقي نفسك قدام باقة ضخمة من الأطوار اللي بقت شبه أساسية في السلسلة من سنين، بس السنة دي في تغييرات جوهرية في طريقة اللعب اللي بتحكم كل طور.

أول وأشهر طور هو Ultimate Team الطور اللي ملايين بيلعبوه يوميًا وبيصرفوا عليه وقت وفلوس عشان يبنوا التشكيلة الأحلام. الجديد السنة دي إن فيه تغييرات واضحة على الـ Progression يعني إزاي الفريق بيتطور. فيه أنظمة زي Evolutions اللي بتخليك تطور لاعبين عاديين وتحوّلهم لنجوم أساسيين، وكمان رجوع بطولات اللاعبين الفضة اللي بتخلي الكروت اللي محدش بيبص عليها زمان ترجع ليها قيمة. غير كده بقى فيه Live Events ودي فعاليات موسمية بتخليك تغيّر التشكيلة بتاعتك على حسب شروط معينة، يعني مثلًا ممكن يطلبوا منك فريق كله من الدوري الألماني أو لازم تعتمد على لاعيبة شباب. ده بيجبرك تفكّر وتنوّع بدل ما تعتمد على نفس التشكيلة القوية طول الموسم.

بس Ultimate Team لسه محتفظ بعيوبه القديمة أهمها إن الباكجات (اللي هي زي الكروت العشوائية) ما زالت موجودة، وده معناه إن اللي بيصرف فلوس حقيقية ممكن يسبق غيره بسهولة. حتى مع التعديلات اللي بتحاول تقلل “الـ Power Creep” اللي بيخلي اللعبة بعد نص الموسم كلها مليانة كروت خارقة، الطور لسه متقسم بين اللي بيلعب للمتعة واللي داخل يتعامل معاه كأنه استثمار.

نروح بعد كده على Manager Career Mode اللي واخد أكبر تحديث من سنين. هنا بقى التركيز على الواقعية والتفاصيل الصغيرة. هتلاقي إن النتايج بتأثر على وضعك كمدير فني، ممكن تتشال من ناديك أو ييجي فريق تاني يتعاقد معاك لو شايف إنك مناسب لخطتهم. المرة دي الذكاء الاصطناعي مش بس بيغيّر الخطة حسب المباراة لكن كمان كل فريق بقي بيتأثر بالمدرب الجديد اللي بييجي له. يعني لو ماسك آرسنال وبعدين بيب جوارديولا مسك مان يونايتد، هتلاقي طريقة لعب يونايتد اتغيرت على حسب فلسفته.

فيه أحداث عشوائية بتحصل وبتكسر الملل زي إصابات في التمرين أو حتى مواقف غريبة زي لاعب مهم يتعك في الأكل قبل ماتش كبير ويتشال من التشكيلة. ده غير الـ Scenarios اللي بتظهر بشكل ديناميكي زي مشاكل مالية أو مشادات بين اللاعيبة في التدريب. الحاجات دي بتخلي الموسم مش متوقع، وتحس فعلًا إنك مدير فني في وسط دراما كروية.

طور Player Career Mode لسه موجود زي ما هو، بس دلوقتي اتضاف نظام Archetypes اللي بيخلي شخصيتك الكروية أكتر تحديدًا. ممكن تبني لاعبك على إنه مهاجم هداف عنده غريزة التهديف، أو جناح سريع مهاري، أو خط وسط بيعتمد على القوة البدنية. كل Archetype بيدي اللاعب أسلوب لعب مختلف، وده بيخلي كل تجربة مختلفة حتى لو بدأت نفس المركز. وكمان دلوقتي تقدر تكمل الكارير بتاعتك بإنك تاخد لاعيبة أساطير من الـ Season Pass أو من Ultimate Team وتنقلهم للكارير، وده رغم إنه ممتع لكنه مثير للجدل عشان مربوط بالفلوس.

نرجع للطور الأصغر بس المحبوب وهو Rush Mode اللي هو أشبه بخليفة FIFA Street أو Volta. Rush هو كورة خماسية سريعة فيها مهارات وحركات مجنونة، وسنة FC 26 ضافوا تحسينات كبيرة عليه زي إنك تقدر تلعب بدور الحارس، وكمان صلحوا مشاكل الملل اللي كانت بتحصل لما لاعب يسيب الكنترول شغال ومبيشاركش. دلوقتي اللعبة أذكى في التعامل مع الغياب وبتديك مرونة أكبر في الملعب.

غير كده فيه Clubs Mode اللي بيسمحلك تعمل فريق مع صحابك وتلعبوا دوري كامل أونلاين، وده المرة دي بقى أعمق بفضل الـ Archetypes الجديدة اللي بتدي أدوار متنوعة. يعني فريقك ممكن يبقى فيه لاعب بنيته مهاجم كلاسيكي، والتاني صانع ألعاب حديث، والتالت جناح سريع. التخصيص هنا أكبر بكتير وبيخلي التعاون بين اللاعبين في النادي ممتع أكتر.

الجيم بلاي

أول حاجة لازم تتقال إن FC 26 السنة دي قدمت نقلة كبيرة جدًا في إحساس اللعب نفسه. من أول ما تبدأ الماتش هتحس إنك قدام نظامين مختلفين تمامًا، نظام Authentic اللي بيميل للواقعية ونظام Competitive اللي معمول مخصوص لعشاق الأونلاين وUltimate Team.

في Authentic الماتش ماشي بسرعة أهدى، الكورة تقيلة شوية وبتتأثر بالجو والملعب، يعني لو المطر نازل هتلاقي الكورة بتتزحلّق أو بتقف فجأة على أرضية مبلولة، ولو فيه رياح قوية الكرات العرضية ممكن تروح في اتجاه غير متوقع. التعب كمان بقى عنصر أساسي، المهاجم السريع مش هيقدر يجري بنفس القوة 90 دقيقة كاملة، فلازم تبدل وتفكر في تغييراتك. الدفاع بقى ليه وزن أكبر، وخطط زي 4-5-1 أو 4-2-3-1 فعلاً بتبان في الملعب.

أما في Competitive الدنيا مختلفة تمامًا، السرعة أعلى، اللاعبين رشاقتهم مبالغ فيها، والتعب مش مأثر عليهم زي الواقع. الهجوم بياخد الأولوية، والنتيجة ممكن تبقى 5-3 أو 7-4 عادي جدًا. ده الطور اللي معمول عشان يديك متعة سريعة، أجوان كتيرة، Skills واستعراض، وبصراحة هو اللي مسيطر على Ultimate Team والمنافسات الأونلاين.

الجيم بلاي كمان اتطور في جوانب صغيرة لكنها مؤثرة جدًا. الذكاء الاصطناعي للاعبين اللي مش تحت سيطرتك بقى أذكى، يعني لو انت ماسك خط الوسط، المهاجم هيعمل جري منحني عشان يفتحلك زاوية باص، والمدافعين بقوا يغطوا المساحات بشكل منطقي أكتر.

الميزة الكبيرة السنة دي في الحراس إن تصرفاتهم بقت متنوعة وواقعية أكتر. مش زي زمان يا إما يسيب الكورة تدخل يا إما يطير مسافة مستحيلة ويمسكها. دلوقتي ممكن يصد ويطلّعها ركنية، أو يلمسها بالعافية وتعدي جنبه، أو يطلع ويقفل الزاوية في مواجهة واحد لواحد. ده خلّى الماتشات أصعب في التسجيل وأقرب للي بنشوفه في الحقيقة.

الميكانيكيات الجديدة زي الجري المزدوج، الـ GrappleHook، والـ Glider (في بعض الأنشطة والأطوار الخاصة) وسّعت طرق الحركة في الملعب. دلوقتي معاك حرية أكبر في التحرك، سواء في المساحات الواسعة أو حتى في أوضاع زي Rush Mode اللي بيعتمد على المساحات الصغيرة.

كمان فيه تفاصيل صغيرة زي إن ضربات الرأس بقت مرتبطة بموقع اللاعب وقوته الفعلية مش بس بزرار تضغطه. يعني لو عندك مهاجم طويل زي هالاند هتستفيد من طوله، لكن لو جناح قصير مش هيفوز بسهولة بالكرات العالية.

التمرير نفسه بقى متأثر أكتر بالضغط والمسافة، وده بيبان في Authentic خصوصًا. يعني لو حاولت تعمل باص طويل من غير ما توازن جسمك كويس الكورة ممكن تطلع ضعيفة أو تروح للخصم.

الجيم بلاي كمان ركّز على تنويع طرق التهديف. تقدر تكسب بالمجهود الفردي، أو بالعرضيات والتكتيك، أو حتى من خلال الكرات الثابتة اللي بقت متطورة أكتر. الركنيات مثلًا بقى ليها نظام حركة لاعيبة قبل التنفيذ، والفاولات فيها خيارات أكتر لتسديدات ملتفة أو مباشرة.

الجرافيكس

من أول لحظة تفتح فيها FC 26 هتحس إن اللعبة واخدة خطوة قدام في التفاصيل البصرية. الاستادات بقت شبه الحقيقة أكتر من أي وقت فات، مش بس في شكل المدرجات والملعب نفسه لكن كمان في الجو العام حوالين الماتش. قبل البداية هتلاقي الكاميرا بتعمل Zoom من صور أقمار صناعية لحد الملعب، ودي لمسة صغيرة بس بتدي إحساس إنك داخل عرض كروي حقيقي.

الجمهور بقى بطل في نفسه. في ماتشات الدوري الإنجليزي الكاميرا ممكن تجيب جماهير الفريق وهم متجمعين في بار صغير قبل الماتش لابسين تيشيرتات وأعلام ناديهم. في أمريكا الجنوبية هتشوف الشماريخ مولعة في المدرجات والدخان مغطي نص الاستاد، وفي مباريات وست هام تلاقي فقاعات الصابون الشهيرة بتطير فوق الملعب. التفاصيل دي بتفرق جدًا في الإحساس، وبتخلي كل ملعب ليه شخصية وروح خاصة.

الملاعب نفسها متأثرة بالطقس بشكل واضح. المطر مش مجرد مؤثر بصري، لكن فعليًا بيغير شكل الأرضية. الكورة ممكن تزحلق أو تقف فجأة على أرض مبلولة، واللاعيبة بتبان عليهم قطرات المطر والطين على الشرابات بعد التحام قوي. الجو المشمس بيدي إضاءة قوية، والليل بيلمع فيه العشب تحت نور الكشافات بشكل يخلي المنظر أقرب للبث التلفزيوني.

تصميم اللاعبين وصل لمرحلة جديدة من الواقعية. الوجوه بقت أوضح، الشعر بيتحرك طبيعي أكتر بفضل تحديث الـ Hair Physics، والعرق بيظهر في اللقطات القريبة مع شدة الماتش. حتى حركات الجري والاحتفال بقت أقرب للي بنشوفه على الحقيقة، مع اعتماد أكبر على بيانات حقيقية اتجمعت من مباريات فعلية.

الإعادة (Replays) بقت بتستغل تقنيات زي HyperMotion POV اللي بتعرض إحصائيات مباشرة جوه المشهد نفسه، يعني ممكن تشوف نسبة الاستحواذ مكتوبة على الأرضية أو مسار الكورة مرسوم بخطوط 3D. دي حاجات بتخلي التجربة مش مجرد لعبة، لكن عرض متكامل أقرب للبث الرياضي.

الـ UI نفسه اتغيّر. قوائم Ultimate Team مثلًا شكلها أبسط لكن أوضح، مع Bar إضافي بيوريك تقييم مهارة المراوغات ورجل اللاعب المفضلة.

التقييم النهائي

9\10

لعبة EA Sports FC 26 بتقدم تجربة كرة قدم أوسع وأغنى من السنين اللي فاتت، فيها محاولة واضحة ترضي كل الأطراف سواء جمهور الواقعية اللي بيدور على ماتشات تكتيكية أبطأ في الكارير موود أو جمهور الأونلاين اللي عايز متعة سريعة وأهداف كتير في Ultimate Team. الجرافيكس والتقديم وصلوا لدرجة تبهر وتخلي أي ماتش تحسه حي، لكن لسه فيه مشاكل قديمة زي اعتماد زايد على المشتريات في الأونلاين وبعض العيوب الصغيرة في الأنيميشن. ومع كده، الإصدار ده يعتبر خطوة حقيقية للأمام ويخلي السلسلة تحس إنها بتبدأ فصل جديد بدل ما تفضل مجرد تحديث موسمي.