Capcom Fighting Collection 2: هل الذكريات تكفي؟

أنا من الناس اللي بتحب تجرّب الجديد، بس قلبها دايمًا متعلق بالقديم، وخصوصًا لو قديم محترم وملموس، زي ألعاب كابكوم بتاعة التسعينات، ولما سمعت إنهم نزلوا تجميعة جديدة اسمها Capcom Fighting Collection 2 فيها Power Stone وProject Justice وCapcom vs SNK وStreet Fighter Alpha 3 وPlasma Sword، قلت لنفسي أنا كده داخل على حاجة هتحرك فيا ذكريات كتير.

بس ساعتها سألت نفسي هل فعلا اللعبة دي هتبقى ممتعة بالشكل اللي متخيله؟ هل فعلا مجموعة قديمة زي دي ممكن ترجعلي نفس الإحساس اللي كنت بحسه وأنا قاعد قدام التلفزيون؟ هل كابكوم قدرت تقدم حاجة بتكّرم تاريخها بجد، ولا هي مجرد محاولة سريعة لشد انتباه الجيل اللي فاكر الأيام دي؟

القصة

الحلو في المجموعة دي إنها مش بتركّز على حكاية واحدة، ولا عاوزاك تمشي ورا تسلسل معين.
كل لعبة ليها عالمها، وشخصياتها، وطريقتها في سرد القصة، بس معظم القصص كانت دايمًا مجرد خلفية للقتال، مش هي الهدف الرئيسي.

في Street Fighter Alpha 3 مثلاً، القصة حوالين الصراع المستمر بين ريو وشادو لو وبايسون وكامي وغيرهم، بس اللعبة مش بتهتم تسرد تفاصيل كتير. هي عاوزاك تحس بالأكشن على طول، وتحس إن كل فايت مهم أكتر من أي حوار.

أما في Capcom vs SNK 1 و2، فالوضع أقرب لبطولة ضخمة فيها شخصيات من شركتين كبار: كابكوم وSNK. واللي عجبني هنا مش القصة قد ما عجبني نظام الجروف، اللي بتختار منه أسلوب اللعب، سواء على طريقة كابكوم أو إس إن كيه، وكل جروف بيغيّر طريقة شحن الباور والهجوم الدفاعي. ودي حاجة بتخلي التجربة دايمًا مختلفة، وتخليك تجرب شخصيات بطرق جديدة.

Project Justice كان مفاجأة بالنسبالي، لإنه استمرار مباشر لـRival Schools، بس بحجم أكبر وبمستوى أنضج. اللعبة كلها بتدور حوالين مدارس يابانية، وطلاب بيدافعوا عن اسم مدرستهم في معارك تلاتة ضد تلاتة، وكل فريق ليه سيناريو خاص، وحركات جماعية حقيقية فيها إبداع وعفوية، ودي كانت من أكتر الألعاب اللي شدتني في المجموعة.

Plasma Sword هو الجزء التاني من Star Gladiator، واللي دايمًا كنت بشوفه زمان ومش فاهمه، بس هنا حسيته أوضح شوية. اللعبة بتحصل في عالم فضائي، وشخصياته عندهم سيوف بلازما، وفيها طابع خيال علمي جامد. الشرير بيرجع في صورة جديدة وبيحاول يسيطر على المجرة، وانت لازم توقفه. أنا شخصيًا ما اندمجتش مع قصته قوي، بس أعجبتني فكرته المختلفة عن باقي الألعاب.

أما Power Stone، فهي حالة خاصة. الجزء الأول بسيط شوية واحد ضد واحد بتحاول تجمع الأحجار علشان تتحول لشكل خارق وتعمل ضربات مدمّرة. بس الجزء التاني كان فعلاً التحفة: أربعة لاعبين على خريطة كبيرة مليانة صناديق وأسلحة بتطلع فجأة، وكل حد بيجري ورا الجواهر ويتخانق في نفس الوقت.

ده كان أقرب لجو ألعاب الضحك والمنافسة اللي بتخلي الجو مسلي، حتى لو مش بتفهم كل اللي بيحصل.
Capcom Fighting Evolution كان بالنسبة ليا أضعف جزء في المجموعة، مش لأنه سيء، بس لأنه مجرد تجميع شخصيات من Street Fighter 2 و3 وAlpha وRed Earth، وكل واحد داخل من غير ما يتغير أو يتظبط. تحس كأنهم مترميين سوا في لعبة واحدة من غير مجهود كبير.

الجيم بلاي

اللي يهمني دايمًا مش بس الجرافيكس أو الذكريات، أنا عايز أحس إن اللعبة ممكن ألعبها دلوقتي وأتبسط بيها. وهنا لازم أعترف إن Capcom عملت شغل محترم جدًا في تعديل التجربة من غير ما تغيّر جوهرها.

كل لعبة في المجموعة واخدة شكلها الأصلي، بس زوّدوا عليها شوية حاجات بتفرق مع الوقت.
أولهم طور التدريب، وده كان مهم جدًا ليّا علشان أراجع الحركات، وأشوف المدى بتاع كل ضربة، والـhitboxes، وأتدرّب على الكومبوهات اللي كنت بنسى أعملها زمان.

كمان ضافوا اختيار يخليك تعمل الضربات الخارقة بزرار واحد، ودي فعلاً ساعدت صحابي اللي أول مرة يدخلوا اللعبة يشاركوا ويتبسطوا، من غير ما أقعد أشرح لهم الدايرة، والربع دايرة، والنص لفّة، وفوق، وتحت.
بس أجمد حاجة في رأيي هي اللعب أونلاين. كل الألعاب فيها Rollback Netcode، يعني حتى لو بلعب ضد واحد من بلد تانية، اللعبة بتشتغل بشكل ناعم، ومفيش لاج، ولا ضربات بتتأخر. تحس فعلاً إنهم حافظوا على الروح القديمة، بس طوروها علشان تمشي مع زمننا.
أكتر الألعاب اللي حسيت إنها لسه ممتعة لحد النهاردة كانت Project Justice وPower Stone 2، لأنهم بيعتمدوا على تيم بلاي، وحركة، وسرعة في الخريطة. تحس إنك بتلعب لعبة حديثة، مش حاجة من عشرين سنة.

أما Capcom vs SNK، فهي كانت المعركة الرسمية بتاعت المحترفين. اللعبة دي محتاجة تركيز، وفهم للأنظمة، وفعلاً حسيت إنها معمولة علشان الناس اللي بتحب العمق في القتال.

Plasma Sword عجبني من ناحية الفكرة، بس التحكم كان تقيل شوية، وحسيت إن الشخصيات ما بتتحركش بنفس السلاسة، وده خلاني أرجع للعب حاجات تانية بسرعة.

الجرافيكس

بصراحة ماكنتش مستني جرافيكس HD، ولا ريميكات ضخمة، لإن المجموعة أصلاً موجهة للناس اللي بتحب الشكل القديم، وفعلاً ده اللي حصل. الألعاب كلها محافظين فيها على الرسوم الكلاسيكية، سواء كانت ثنائية الأبعاد أو بداية جرافيكس 3D.

بس الجميل إنهم ضافوا فلتر للصورة، وتقدر تزوّد الدقة، أو تحط تأثير كأنك بتلعب على شاشة CRT بتاعت زمان. والواجهة نفسها شكلها حديث، ومنظم، وسهل تتنقل بين الألعاب، وتغير الإعدادات.

التقييم النهائي

8.5\10

بالنسبالي Capcom Fighting Collection 2 مش مجرد تجميعة، هي زيارة لزمن كنت فيه متحمس لكل فايت، ومش عايز أخسر ولا جولة. كل لعبة فيها بتحسسك بحاجة مختلفة، وكل ضغطة زر فيها بتفكرك بلقطة حصلت من عشرين سنة. لو انت واحد عدى عليه الزمن ده، هتتبسط جدًا، وهتحس إنك رجعت شبّاكك القديم، من غير ما تدفع تمنه من أعصابك. ولو لسه جديد على النوع ده من الألعاب، فالمجموعة دي تعتبر باب واسع تدخل منه على واحدة من أمتع العوالم اللي كابكوم خلقتها.

ولو هقول عيب واضح، فهو إن مش كل الألعاب بنفس المستوى، وفيه عناوين أضعف من غيرها، لكن التنوع اللي فيها، والتجربة الكاملة اللي بتحصل عليها مقابل السعر، يخليها صفقة ممتازة لأي حد بيحب ألعاب القتال أو عايز يعيش شوية من الماضي بقلب حاضر.