مراجعة لعبة Elden Ring: Nightreign

عارف لما تبقى متعود على أكلة معينة طول عمرك، وكل مرة بتطلبها بتكون عارف طعمها من غير ما تدوق؟ بس مرة واحدة، الشيف قرر يغيّر الوصفة ويضيف لها حاجة جديدة؟
ده بالظبط اللي عملته FromSoftware في Elden Ring: Nightreign. اللعبة دي مش مجرد جزء تاني، ولا DLC، ولا حتى محاولة لإعادة نجاح اللعبة الأصلية. دي تجربة مختلفة بس في نفس العالم الغامض والمريب اللي كلنا حبّيناه. قررت FromSoftware تمشي في سكة مش مألوفة ليها، وتخلط ما بين تحديات ألعاب السولز اللي بتموت فيها بالعشرات، ونظام التكرار والتقدم اللي بنشوفه في ألعاب الـ Rogue-like.

لكن هل ده كان ريسك محسوب؟ وهل فعلاً التجربة تستاهل وقتك، خاصة لو كنت من محبّي Elden Ring الأصلية؟ طيب ما تيجوا نشوف؟

القصة

من أول لحظة هتحس إن FromSoftware مش ناوية تشرحلك حاجة بسهولة. مفيش مشاهد افتتاحية مبهرة، مفيش حد بييجي يقولك: “إنت البطل اللي جاي ينقذ العالم”. لأ، القصة هنا متقدّمة بأسلوبهم الكلاسيكي الغامض، واللي لو إنت متعود عليه من ألعابهم زي Bloodborne أو Dark Souls، هتحس إنك رجعت البيت.

القصة مش بتحكيلك، بتحسّسك. يعني إيه؟ يعني مفيش خط سرد مباشر، لكن فيه قطع من الحكاية مرمية في كل حتة في العالم. كل شخصية من التمانية اللي تقدر تلعب بيهم، ليها خلفية خاصة بيها. هتعرفها من مستندات، من شوية NPCs بيتكلموا كلام مش مفهوم في الأول، أو حتى من شكل الدروع والأسلحة اللي بتلاقيها.

كل بعثة بتدخّل فيها بتحس إن ليها طابع مميز، وكل زعيم كبير في نهاية الليالي التلاتة بيكون ليه علاقة ما بحكاية أكبر عن عالم Nightreign.
فيه شعور دايم إن في مصيبة حصلت في العالم ده زمان، وإنك إنت داخل تحاول تفهمها، وتواجه اللي فضّل منها.

اللعبة كمان بتقدملك لحظات اسمها “ذكريات”، فيها بتعيش مواقف من ماضي بعض الشخصيات، وده بيضيف عمق بسيط يخليك تتعلق أكتر بالشخصية اللي اخترتها.

بس خلينا نكون صريحين، القصة مش مركز التجربة، ومش هتفهم كل حاجة من أول مرة. لو إنت بتحب القصص اللي تشرح وتوضح، اللعبة دي مش هتديك ده. إنما لو بتحب تغوص، وتربط الحاجات ببعض، وتستكشف بنفسك، هتلاقي كنوز في كل ركن من أركان العالم.

الجيم بلاي

أول ما تبدأ أي بعثة في Nightreign، بتلاقينا بننزل من السما كأننا في لعبة Battle Royale، بس بدل ما ندور على أسلحة نارية، إحنا بندوّر على أسلحة، دروع، وتعويذات تحمينا من اللي جاي. كل بعثة فيها دورة زمنية بتتكرر 3 مرات وهما نهار وليل، وعلى مدار الثلاث ليالي دول، بتواجه أعداء وزعماء، وكل ليلة أصعب من اللي قبلها.

في النهار بتستكشف، تجمع موارد، تدور على أسرار، وتزبط تجهيزك. وفي الليل بقى الرعب الحقيقي. الأعداء بيبقوا أشرس، والزعماء بيظهروا، وكل ليلة بيختمها Boss لازم تهزمه عشان تكمل. والليلة التالتة بتواجه واحد من تمان زعماء كبار، وكل واحد ليه قصة وشكل وأسلوب لعب مختلف.

اللعبة بتتخيّرك بين إنك تلعب لوحدك، أو مع اتنين من أصحابك (يعني 3 لاعبين كحد أقصى). لكن خد بالك اللعب لوحدك شبه مستحيل. FromSoftware هنا عاملين الموازنة كأن اللعبة معمولة تتلعب بـ 3 محترفين سولز مع بعض. لو دخلت لوحدك، استعد للموت كل شوية، وهتتعب على الفاضي.

اللي مخلّي الموضوع مش مُحبط هو إنك حتى لو خسرت، بتطلع بحاجة. اللعبة بتديك مهارات دائمة لشخصيتك في الـ Roundtable Hold، ودي بتفضل معاك حتى لو بدأت بعثة جديدة. مع الوقت هتحس إنك أقوى، أسرع، وعندك قدرات تخليك تستعد أحسن.

الفكرة دي من عالم الـ Rogue-like، واللي جرب ألعاب زي Hades أو Returnal، هيفهم قد إيه الموضوع ممتع لما تحس إن كل محاولة فاشلة قرّبتك أكتر من الفوز.

لكن في نفس الوقت، ومع مرور الساعات، هتحس بحاجة غريبة…رغم إن البداية مشوقة، وكل بعثة شكلها حلو، إلا إن بعد كام محاولة، هتحس إنك شوفت كل حاجة.  ده غير أن الخرائط كبيرة ، بس شبه بعض. التغيير بيكون بسيط زي هنا فيها تلج، هناك فيها رماد. أما بقى الزعماء الصغيرين بيتكرروا من بعثة للتانية كأنهم شِفَر محفوظة.

بمعنى يعني لو دخلت بعثة جديدة، فيه احتمال كبير تلاقي نفس الأعداء، نفس الفخاخ، ونفس النهاية بس بلون مختلف. وده بيخلّي التكرار يحل محل الإبداع، وده شيء مش متعودين عليه من FromSoftware.

لو انت بتلعب مع صحابك، الموضوع ممكن يعدي، لأن كل مرة فيها مواقف جديدة بسبب التفاعل بينكم. بس لو بتلعب لوحدك فلأ هتحس بالملل بسرعة. الموضوع بيتحوّل من مغامرة لتجربة روتينية.

الجرافيكس

FromSoftware عمرها ما كانت بتلعب على الجرافيكس العالي بمعناه التقني، لكن دايمًا بتكسب بالـتوجه الفني. وده اللي موجود في Nightreign بكل قوة.

الليل هنا مش مجرد وقت، ده بطل من أبطال اللعبة. الظلال، الإضاءة، تصميم الوحوش، كلها معمولة بعناية تخليك تحس إنك في عالم بيعيّشك رعب نفسي قبل ما تدخل أي معركة.

كل منطقة بتاخد طابعها الخاص، وكل زعيم رئيسي شكله فريد وله حضور قوي. طريقة العرض في اللحظات دي بتخليك تحس إنك في مشهد سينمائي، مع موسيقى تخلي النبض يعلى.

لكن خلينا نقول الحقيقة، اللعبة تقنيًا مش مختلفة كتير عن Elden Ring الأصلية. نفس المحرك، نفس الدقة، ويمكن أقل في بعض اللحظات. بس ده متوقع، خصوصًا إنها لسه نازلة على الجيل القديم كمان.

التقييم النهائي

8\10

Elden Ring: Nightreign بتقدم تجربة جديدة ومميزة من FromSoftware، فيها أفكار مبتكرة ودمج ذكي بين تحديات السولز ونظام الـRogue-like. اللعب الجماعي ممتع جدًا، والزعماء وتصميم العالم يخلوك تحس فعلًا إنك في مغامرة مظلمة ومثيرة. صحيح إن فيها شوية تكرار، وصعوبة اللعب الفردي ممكن تكون محبطة للبعض، لكن لو عارف إنت داخل على إيه، هتلاقي تجربة قوية تستاهل وقتك.