مراجعة لعبة

Layers of Fear

سنة 2023 من أفضل السنين في ألعاب الرعب

بين عناوين جديدة منتظرة وعناوين تانية نازلة بـ ريماستر أو ريميك

من أول ريميك ديد سبيس اللي بدأنا بيه السنة ولغاية Amnesia The Bunker و Outlast Trials اللي لسة نازلين قريب

مفيش شك إن محبين ألعاب الرعب عايشين أحسن أيام حياتهم دلوقتي

وطبعًا مينفعش سنة مميزة لألعاب الرعب زي دي ميكونش فيها تواجد لعنوان Layers of Fear..

واحد من أفضل عناوين الرعب النفسي اللي بتركز على خلق أجواء موترة أكتر من تركيزها على الجيمبلاي..

خليني بس أوضح إن لعبتنا النهاردة هي ريميك للجزئين اللي نزلوا في 2016 و 2019

أيوة بالظبط هو ريميك واحد لجزئين سوا مع بعض

لكن مع إضافات في القصة وتصميم المراحل يخلوك تقدر تقول عليها ريبوت في بعض الأوقات..

وكالعادة طبعًا هنتكلم عن الإضافات دي بالتفصيل في مراجعتنا النهاردة

ريميك Layers of Fear مبني من الصفر على محرك Unreal Engine 5

وهو من تطوير استوديو Bloober Team

الاستوديو نفسه مطور الجزئين اللي فاتوا من السلسلة،

والأهم إنه مطور ريميك Silent Hill 2 عنوان الرعب النفسي الأشهر

القصة

أحداث القصة بتتقسم لفصول

الفصول دي بتحكي قصص مختلفة لأكتر من شخصية

وكل قصة ليها مكانها وزمانها والأجواء بتاعتها

لكن القصص كلها تقريبًا بتتشارك في فكرة السعي للكمال من خلال الفن

وإن أد ايه التفكير ده خطير وإزاي ممكن يأذي صاحبه

القصة بتقدم حكايات 5 شخصيات:

حكاية الرسام (ودي أهم واحدة) – حكاية الممثل – حكاية الإبنة – حكاية المغني

والـ4 حكايات دول هما نفسهم تقريبًا من الجزئين اللي فاتوا من السلسلة بس مع شوية تعديلات..

دول طبعًا مع حكاية الكاتبة الجديدة اللي بنلعبها لأول مرة

واللي مهمتها تربط بين الحكايات الأربعة بطريقة ذكية جدًا..

الأحداث بتاخدك من قصة للتانية في أوقات مختلفة

يعني متتوقعش إنك هتلعب كل قصة بشكل مستمر من غير انقطاع وبعدين تخش على اللي بعدها

لا، السرد هنا بيركز على إنه يخدم الفكرة العامة للقصص دي كلها،

وكتير هتلاقي نفسك بتتنقل من قصة للتانية في وسط الأحداث عادي وممكن تلاقي نفسك مش فاهم ده بيحصل ليه

بس صدقني في الآخر هتفهم، وزي ما قلتلك إن الربط بين القصص في الريميك اتعمل بشكل ذكي جدًا

فـ اعتبره فيلم طويل أحداثه مربوطة ببعض بس لازم تستنى للنهايات عشان تفهم الموضوع

القصة اللي بتمتد لـ 15-20 ساعة ليها نهايات مختلفة

بتختلف حسب الحاجات اللي بتجمعها والطرق اللي بتختار تدخلها

وتقدر تلعب فصول معينة لأكتر من مرة عشان تجمع حاجات مختلفة

وطبعًا ممكن تعيد اللعبة كلها من الأول بعد ما تخلصها عشان تختار نهاية تانية

أكتر حاجة عجبتني في القصة هو الربط بين الأحداث زي ما قلتلك

أما عن القصص نفسها

فـ كان فيه تذبذب واضح في مستوى القصص

يعني قصة الرسام واضح الشغل اللي فيها وجودتها ممتازة

لكن قصة الممثل مثلًا أقل منها ومخدتش حقها، أو البناء ليها كان محتاج يكون أفضل

وهكذا مع باقي القصص، هتلاقي حاجة حلوة أوي وحاجة ممكن تشوفها مش على نفس المستوى

الجديد في الريميك

ريميك Layers of Fear مش بيقدم الصورة المعتادة عن الريميك

أو زي ما قلتلك في البداية، تقدر تعتبره ريبوت على ريميك

ومش للعبة واحدة، دا للعبتين

وكمان اللعبتين اللي في لعبة واحدة دول اسمهم بنفس اسم اللعبة الأولى من اللعبتين

أنا فاهم، الموضوع محير شوية

شويتين تلاتة

بس من غير تفاصيل كتير في موضوع الأسامي ده وهو ريميك ولا ريبوت واللخبطة دي اللي السبب فيها هو الماركتنج للعبة

خلينا نخش في الحاجات الجديدة في اللعبة دي

أو اللعبتين اللي معمولين في لعبة واحدة..

الجديد في البتاعة اللي بنعملها مراجعة دي النهاردة ..

بص يا سيدي

– حصل ربط وتوضيح بشكل كبير لأحداث القصص الأربعة، وده عن طريق قصة الكاتبة، بالطريقة اللي تخدم الهدف العام من القصة

– تعديلات على تصميم المراحل والرعب والخضات

– الملاحظات أو الـ Notes اللي بتلاقيها بقى معاها أداء صوتي بيقول اللي مكتوب فيها، وعجبني جدًا الأداء الصوتي في الحتة دي خصوصًا

– وطبعًا التحسينات الرسومية والصوتية الكبيرة في الريميك المبني على محرك Unreal Engine 5

اتفاجئت بكمية الإضافات دي الحقيقة، دا غير جمع قصة الجزئين مع بعض في ريميك واحد

ودي حتة لازم نحيي استوديو Bloober Team عليها، إنه ريميك حقيقي بيقدم قيمة مقابل سعر

مش مجرد نسخ ولزق للعبة بس بجرافيك أحسن وخلاص

فـ لو أنت ملعبتش اللعبتين الأصليتين يبقى لازم تجرب الريميك، تجربة متتفوتش

ولو لعبتهم فـ مش هتندم على التجربة دي لأن فعلًا فيه إضافات تستحق سواء من ناحية القصة أو العالم أو الألغاز

الجيمبلاي

زي أغلب ألعاب الرعب النفسي

الجيمبلاي مفيهوش حاجات كتير أو تفاصيل نتكلم عنها

الموضوع بيتلخص في المشي والاستكشاف وحل الألغاز بوسائل تفاعل بسيطة جدًا

دا كله في أجواء مرعبة وبيئات مزعجة نفسيًا

عجبتني جدًا الألغاز هنا

واللي أكترها بيعتمد على البيئة حواليك وتغيرها اللحظي

وبتحتاج منك تفكير فعلا مش مجرد حشو في الجيمبلاي وخلاص

والكلام ده بيكون حلو جدًا في البداية، لكن مع مرور الوقت وبسبب طول وقت اللعبة

حسيت إن فيه تكرار ملحوظ في بعض الألغاز من وقت للتاني

مش عايز أحرق عليك واقولك مثال من الألغاز دي

بس بالرغم من تكرارها، استمتعت بيها جدًا

توظيف تغيير البيئة لحل اللغز اتعمل بشكل رائع

من ناحية الرعب محسيتش بطرق جديدة للرعب أو إبداع استثنائي في الناحية دي

لو بتلعب ألعاب رعب كتير هيكون أغلب الرعب هنا مش مفاجئ ليك وممكن متتأثرش بيه

بس بشكل عام الرعب كويس والأجواء لكل مكان معمولة حلو

بس بردو الرعب بيواجه مشكلة التكرار زيه زي الألغاز

وده بردو ممكن يكون بسبب طول مدة القصة واللي خلى المطور يضطر يكرر بعض الحاجات على مدار اللعبة

العالم والأجواء

بناء العالم وأجواءه هي أهم عامل في ألعاب الرعب النفسي

وبالأخص في عنوان Layers of Fear المميز بالنقطة دي

اللعبة بتاخدك لـ 5 أماكن مختلفة

وكل مكان ليه الطابع الخاص بيه بس التوجه الفني للعبة بصمته واضحة

تصميم العالم بيتألق في المراحل اللي بيكون فيها تغير لحظي للبيئة

حاجة كدة زي الخير الشر

فـ الاوضة اللي بتشوفها عادية ومنظمة، مجرد ما تدير وشك وتبص تاني تلاقيها كلها خراب ودمار ومفيش حاجة في مكانها

دا غير إن فيه أماكن بتستكشفها أكتر من مرة في نفس الفصل، ولكن مع تشابكات وتغيرات في البيئة بيكون ليها دلالة في المرحلة دي من الأحداث

التوجه بتاع الفنان اللي بيدور على الكمال

والرسم والموسيقى والكلام ده

فكرني بـ ستيفانو من The Evil Within 2 واللي هو واحد من أفضل وأجمد الأشرار في ألعاب الرعب بالنسبالي

وعلى الرغم من الاختلافات بين اللعبتين

لكن التوجه الفني للرسم والموسيقى والفن عمومًا في أجواء لعبة رعب وتوظيفها صح

شايفها نقطة بيتشابه فيها اللعبتين مع بصمة كل لعبة فيها

الأداء التقني

Layers of Fear تحفة بصرية وبتستغل إمكانيات محرك Unreal Engine 5 بشكل رائع

ولحسن الحظ إن اللعبة Optimized كويس جدًا

وأداءها مفيهوش مشاكل خالص تقريبًا

باستثناء تقطيع بسيط جدًا لمدة ثانية أو أقل بالرغم من إني بلعبها على SSD..

التقطيع بيحصل لما تخش من مكان لمكان جديد ويكون فيه تغير بيحصل أو هيحصل في البيئة

ومكدبش عليك النقطة دي كانت بتعرفني لو انا داخل على حتة فيها رعب ولا لا

وفي الأغلب كنت بتوقع صح بسببها

جربت اللعبة على جهاز بمعالج i3-12100F وكارت RTX 2070 مع رامات 16 جيجا وتخزين SSD

ومع تشغيل اللعبة على أقصى إعدادات وتتبع آشعة

 تقدر تقول مكنش فيه مشاكل تقنية ملحوظة نهائي تقريبًا

محصلش كراش للعبة أو وقوع للفريمات

وبشكل عام كانت التجربة التقنية حلوة..

بـ 30 دولار؟!

لو سألتني على أهم ميزة في Layers of Fear

هتكون هي السعر بكل تأكيد

اللعبة بتقدم 15 ساعة تقريبًا من اللعب، وممكن يزيدوا معاك لـ 30 ساعة لو عايز تجمع كل حاجة وتستكشف كل مكان

دا غير النهايات المختلفة وقيمة إعادة اللعب أو الـ Replay Value العالية

مع قصة كويسة وجرافيكس تحفة بصريًا

وموضوع إنها ريميك 2 في 1 اللي مش عايز ألخبطك بيه تاني ده

يعني معاك لعبتين معمولهم ريميك في لعبة واحدة

وكل ده بـ 30 دولار!!

التقييم النهائي

8.5 من 10