رحلة المافيا عبر العقود: من الكلاسيكيات للعودة للجذور

سلسلة Mafia تعتبر واحدة من أهم أيقونات ألعاب الجريمة المنظمة، من وقت ظهور الجزء الأول سنة 2002 واللي كان بيحطك جوه قصة سينمائية عن الصعود وسط المافيا والانهيار الحتمي، بأسلوب مركز على الشخصيات والحوارات. على مدار السنين، السلسلة مشيت عبر عقود مختلفة الجزء الأول في التلاتينات، الجزء التاني في الأربعينات والخمسينات، والجزء التالت في أواخر الستينات.

بعد Mafia III اللي اتقسمت الآراء حواليه بين ناس معجبة بالقصة والتمثيل، وناس شايفة إن العالم المفتوح فيه كان ممل ومكرر، رجعت السلسلة بقوة سنة 2020 مع Mafia: Definitive Edition، الريميك الكامل للجزء الأول. النجاح ده شجع المطور Hangar 13 وناشر اللعبة 2K إنهم يواصلوا. لكن بدل ما يكملوا في السبعينات أو التمانينات زي ما البعض توقع، قرروا يرجعونا لأول القرن العشرين، للسنين اللي اتشكلت فيها المافيا فعليًا، واللي بتجمع بين طابع العصابات الإيطالية وأجواء الغرب الأمريكي في نفس الوقت.

Mafia: The Old Country مش لعبة عالم مفتوح مليانة أيقونات ونشاطات جانبية زي ما شفنا في ألعاب كتير، لكنها بتقدم تجربة خطية، هل ده معناه إنك هتستمتع بالقصة من أول لحظة لآخرها؟ هل الأسلوب الخطي هيخلي الأحداث مشوقة أكتر ولا هيقلل من إحساس الحرية؟ طيب ما تيجوا نشوف

القصة

الأحداث بتبدأ سنة 1904 في قلب صقلية، وسط مناجم كبريت قاسية بيشتغل فيها إنزو فافارا في ظروف شبه عبودية. حياته كلها شغل شاق وسط الغبار والحر الشديد، وحلمه الوحيد إنه يهرب ويبدأ من جديد. الحلم ده كان متلخص في بطاقة بريدية من صاحبه عن مدينة أمريكية اسمها Empire Bay، واللي بالنسبة له كانت رمز الأمل والحرية.

لكن حياته بتتقلب 180 درجة لما يدخل في مواجهة مع صاحب المنجم سبادارو، اللي يطلع في الحقيقة زعيم لعيلة مافيا محلية. المواجهة دي بتجبر إنزو يهرب، والهروب بيرميه بالصدفة وسط عيلة منافسة هي عيلة توريسي، بقيادة دون برناردو توريسي راجل قصير، لكن هيبته وصوته الخشن يخلوك حاسس إنك بتتفرج فيلم مافيا بجد.

إنزو بيبدأ من الصفر في مزارع العيلة، ومع الوقت بيثبت نفسه وياخد مهام أكبر وأخطر، من حماية مصالح العيلة، لعمليات تصفية، وحراسة شخصيات مهمة. وعلى مدار 3 سنين، بيتحول من عامل بسيط لعضو كامل في المافيا.

القصة مش مجرد حكاية جريمة، دي رحلة عن الطموح، والخيانة، والروابط العائلية، والتضحيات اللي بتدفعها عشان تحافظ على ولاءك.

الجيم بلاي

اللعبة محافظة على أسلوب اللعب الكلاسيكي بتاع سلسلة مافيا وده معناه إنك مش هتلاقي عالم مفتوح مليان مهمات جانبية وصداع لكن هتلاقي تجربة خطية مركزة على القصة والمهمات الأساسية

المهمات متقسمة بين التخفي والقتال والمطاردات التخفي بياخد مساحة مهمة في أسلوب اللعب وفي مهام كتير لازم تدخل مناطق من غير ما حد يشوفك وبعضها بيحط شرط إنك ما تتكشفش

هنا بتعتمد على إنك تستخبى وتعمل إلهاء للحراس عن طريق رمي عملات أو زجاجات لكن مش أي زجاجة لازم تكون من اللي اللعبة بتسمح تمسكها تقدر تعمل تصفيات قاتلة أو تمسك العدو وتخليه ينام وكمان ممكن تحرك الجثث وتخبيها في صناديق وده بيخلي عنصر التخفي جزء أساسي مش مجرد إضافة جانبية

القتال بالأسلحة النارية بسيط لكن ممتع بيعتمد على نظام الاحتماء ومعاك ترسانة متنوعة من مسدسات وشوتجن وبنادق قديمة مناسبة لزمن اللعبة ذكاء الأعداء الاصطناعي أحسن من الأجزاء اللي فاتت وبيحاولوا يلتفوا حواليك أو يضغطوا عليك لكن ساعات سلوكهم بيكون غريب

المعارك بالسكاكين شبه معارك الزعماء وبتعتمد على المراوغة والصد والضرب في الوقت الصح شكلها سينمائي وجذاب لكنها ساعات قليلة التحدي لأن صحة إنزو بترجع في نص القتال وده بيقلل الإحساس بالخطر

المطاردات والسباقات سواء بالخيل أو بالعربيات القديمة ممتعة جدًا وبتنقل إحساس المغامرة
فيه سباق مميز مستوحى من سباق تارغا فلوريو التاريخي في صقلية ورغم إنه قصير لكنه من أفضل لحظات اللعبة

اللعبة فيها نظام ترقية بسيط عن طريق الخرز والعقود اللي بتحطها في مسبحة إنزو وكل واحدة بتديك ميزة زي سرعة إعادة التلقيم أو زيادة الضرر كمان فيه أنواع مختلفة من السكاكين بقدرات خاصة لكن مفيش شجرة مهارات معقدة وكل حاجة مصممة تبقى مباشرة وسهلة

الجرافيكس

اللعبة شغالة على محرك Unreal Engine 5 وده واضح في مستوى التفاصيل في بيئة صقلية في أوائل القرن العشرين من مزارع العنب والتلال الخضراء للشوارع الحجرية الضيقة والقصور الفخمة كل حاجة معمولة بدقة وجمال

حتى العربيات البدائية في الزمن ده متصممة بعناية وأصوات محركاتها والسلاسل المعدنية في الدفع الخلفي يخلوك حاسس فعلًا إنك في 1904 تصميم الشخصيات والحركات في الحوارات متقن جدًا خصوصًا تعبيرات الوجه اللي بتنقل المشاعر بوضوح

التقييم النهائي

8\10

Mafia The Old Country مش بتحاول تعيد اختراع العجلة لكنها بتعرف بالظبط إيه اللي الجمهور بيحبه في السلسلة وبتقدمه بأفضل صورة ممكنة القصة قوية ومكتوبة بحرفية والشخصيات ليها حضور وتمثيل صوتي يرفع من قيمة كل مشهد أسلوب اللعب بسيط لكنه متماسك والمهمات مصممة تخدم القصة من غير حشو أو إطالة الجرافيكس والأجواء السينمائية بيحطوك جوه صقلية في بدايات القرن العشرين لدرجة تحس إنك عايش وسط الأحداث

اللعبة يمكن ما يكونش فيها محتوى ضخم أو إعادة لعب كتير لكنها بتقدم تجربة مركزة وغنية تحترم وقتك وتشدك من أول مشهد لآخر مشهد لو بتحب ألعاب القصة الخطية وأجواء المافيا الكلاسيكية يبقى دي واحدة من التجارب اللي صعب تفوتها