Midnight Murder Club: قصر الرعب والضحك اللي هيغير شكل الشوتر الأونلاين

في الألعاب الأونلاين، ساعات بتظهر لعبة مجنونة تكسر الروتين وتقدم جو مختلف خالص. Midnight Murder Club من تطوير Velan Studios واحدة من الألعاب دي، شوتر جماعي بس متغلف برعب وضحك في نفس الوقت. مفيش جيوش ولا خرائط ضخمة، الموضوع كله بيحصل في قصر مظلم قديم اسمه Wormwood Manor. كل لاعب ماسك كشاف ومسدس بسيط، الكشاف ينورلك السكة، بس في نفس اللحظة يفضح مكانك للي مستنيك في الضلمة.

فهل اللعبة دي فعلًا تستحق التجربة؟ وهل هي مجرد متعة مؤقتة ولا ممكن تبقى إضافة حقيقية لمكتبتك؟ خصوصًا إن اللعبة كمان فيها اوبشنGuest Pass، يعني اللي يشتري اللعبة يقدر يعزم خمسة من صحابه يلعبوا معاه مجانًا. فمتيجوا نشوف؟

الجيم بلاي 

اللعبة هنا مش شوتر تقليدي زي اللي اتعودنا عليه، مفيش أسلحة تقيلة ولا خرائط مفتوحة، الموضوع كله بيحصل في قصر مظلم وضخم اسمه Wormwood Manor. كل لاعب معاه كشاف يدوي ومسدس بسيط، وده يخليك تحس إنك متقيد جدًا، بس في نفس الوقت ده سر المتعة. الكشاف بينورلك الطريق لكن لو شغلته في وقت غلط، خصمك هيشوفك أسرع من ما أنت شايفه.

الجولات نفسها قصيرة لكن مليانة توتر، لأن كل خطوة بتعملها محسوبة. ممكن تستخبى في ركن مظلم وتستنى اللحظة الصح، أو تغامر وتولع الكشاف عشان تشوف الطريق، فتتفاجئ إنك فضحت نفسك. اللحظة دي بالذات هي اللي بتدي الجيم إحساس إنك داخل لعبة قط وفار، وكل طلقة أو قرار صغير ممكن يقلب الجولة 180 درجة.

الميزة الأهم في التجربة هي Proximity Chat، ودي بتخلي الأصوات مسموعة بس لو اللاعبين قريبين من بعض. ده بيخلق مواقف مرعبة أحيانًا، زي لما تسمع خطوات حد ورا الباب، لكن في نفس اللحظة ممكن الموقف ينقلب لكوميديا لما تلاقي نفسك بتصرخ أو بتضحك وسط القلق. وده اللي بيخلي اللعبة شبه حفلة مليانة صراخ وضحك في نفس الوقت.

القصر مليان أدوات وحركات تدي لكل جولة طابع مختلف، زي نضارات للرؤية الليلية، دروع واقية، أفخاخ على الأرض، وكمان قنابل مولوتوف ترميها على خصمك. غير إنك تقدر تستغل المكان نفسه، زي توقع نجفة من السقف على لاعب تاني. الحاجات دي كلها بتخلي كل ماتش مميز ومفيش اتنين شبه بعض.

بس رغم إن التجربة حماسية جدًا، اللعبة باين إنها معمولة عشان تتلعب مع صحابك. لو لعبتها لوحدك مع بوتات أو مع ناس عشوائيين، هتحس إن نص المتعة راح. الضحك والصريخ وسط التوتر هما اللي بيعملوا اللحظة. وميزة Guest Pass بتأكد ده، لإنك تقدر تعزم لحد خمس صحاب يلعبوا معاك مجانًا من غير ما يشتروا اللعبة.

 أطوار اللعبة

اللعبة مش مقتصرة على طور واحد لكنها بتقدم مجموعة كبيرة من الأنماط اللي بتخلي كل ماتش له طابعه الخاص. البداية مع طور Free for All اللي بيجمع ستة لاعبين في مواجهة مباشرة حيث يسعى كل واحد منهم لتحقيق أكبر عدد من القتلات، وهو أبسط طور لكنه ممتع جدًا. بعده ييجي طور Team Deathmatch اللي بيقسم اللاعبين إلى ثلاث فرق ثنائية وكل فريق لازم ينسق مع زميله علشان يسيطر على الموقف ويحقق التفوق. أما طور Thief in the Night فهو مختلف شوية لأنه بيعتمد على التنافس بين الفرق الثلاثية في محاولة لفتح خزائن القصر وجمع الجواجم الثمينة ثم إيداعها في المخزن، والفريق اللي ينجح في تجميع قيمة أعلى هو اللي يخرج منتصر.

أما طور Headhunters فده بقى تحدي تقيل، بيحط أربع لعيبة قصاد اتنين حراس، والمطلوب من الأربعة يكسروا التوتيمات الشريرة اللي متوزعة في القصر، وفي نفس الوقت الحراس بيعملوا المستحيل عشان يمنعوهم. وبعده ييجي طور Wildcards اللي يعتبر أكتر طور مجنون في اللعبة، لأنه بيضيف كروت خاصة بتقلب الماتش فوق تحت. فجأة تلاقي ثريا ضخمة وقعت على دماغ حد، أو تلاقي راسك كبرت بشكل كوميدي يخلي أي حد يصطادك بسهولة، وممكن الأسلحة تتحول لحاجات مرعبة وتعمل دمار شامل يخلي الجولة شبه فيلم رعب كوميدي.

وأخيرًا في طور Graveyard Shift اللي مايل أكتر للعب التعاوني. تقدر تلعبه لوحدك أو مع واحد صاحبك، وفيه بتدخل تدور على تحف ملوثة أو تكسر توتيمات شريرة، وكل ده وإنت بتواجه موجات متتالية من الوحوش والشياطين. الطور ده بيغير جو اللعب خالص وبيقدملك تجربة PvE مختلفة بتكمّل الطابع الجماعي اللي اللعبة مبنية عليه.

التقييم النهائي

9/10

لعبة Midnight Murder Club لعبة صغيرة لكنها كبيرة في فكرتها وتجربتها. مش هتلاقي فيها جرافيكس خارق ولا محتوى ضخم زي الألعاب العملاقة، لكن هتلاقي حاجة أهم وهي لحظات ضحك وتوتر ورعب جماعي صعب تتكرر في لعبة تانية. سواء دخلت القصر مع أصحابك أو جربت الأطوار المختلفة، اللعبة بتعرف إزاي تسيب بصمة مميزة وتكسر الروتين اللي متعودين عليه في ألعاب التصويب.