من السرعة المجنونة للواقعية القاسية: هل Monster Energy Supercross 25 تستاهل وقتك؟

كبرنا، واتغيرت أولوياتنا، وحتى ذوقنا في الألعاب قلب 180 درجة. زمان كنت بدوّر على السرعة المجنونة، والنيترو، والانزلاقات اللي تتحدى قوانين الفيزياء في ألعاب زي Need for Speed وForza Horizon… إنما دلوقتي، بقيت ميّال أكتر لألعاب السباقات الواقعية، اللي مش بترحم، واللي مفيهاش مكافآت لو فضلت تدوس الزرار بسرعة وخلاص.

ومن هنا، بتدخل Monster Energy Supercross 25 على الخط، بلعبة تعتبر نقلة كبيرة للسلسلة بعد ما انتقلت لمحرك Unreal Engine 5، وبمحاولة باينة إنها تقدم تجربة شبه حقيقية في كل نقزة، وكل حفرة، وكل فرامل مضروبة.

بس أوعى تنخدع في شكلها، عشان Monster Energy Supercross 25 مش من نوعية الألعاب اللي تفتحها تكسب على طول. دي مدرسة، ساحة تدريب قاسية، بتعلمك بالطريقة الأصعب: إنك تقع. اللعبة مفيهاش مانع تلطشك في الأرض، بس كل مرة تقوم فيها، بتحس إنك بقيت أقرب للإتقان.

فيا ترى، تستاهل Supercross 25 وقتك؟ هل فعلًا قدرت تقدم تجربة سباق قريبة من الواقع؟ وهل Milestone أخيرًا قدرت تخرج من دايرة الجمهور الضيق وتفتح الباب للاعبين جداد؟ طيب ما يلا بينا؟

محتوى اللعبة:

في Monster Energy Supercross 25، مطور Milestone المرة دي ما اكتفتش بمجرد لعبة سباق عادية وخلاص، لا… دي دخلت بقلب جامد وقدمت محتوى غني ومتنوع يخلي النسخة دي واحدة من أكتر النسخ الكاملة في تاريخ السلسلة. كل تفصيلة هنا معمولة علشان تنقلك حرفيًا من الكرسي قدام الشاشة، لجوه حلبة السباق وسط الأكشن.

من الحاجات اللي بتميز الجزء ده، هو التمثيل الكامل لكل راكبي الدراجات في فئات 250cc (الشرق والغرب) وكمان فئة 450cc. يعني أي اسم شوفته في سباق حقيقي هتلاقيه قدامك في اللعبة، بنفس اللبس، الرقم، والفريق. الإحساس إنك بتتسابق ضد نجوم البطولة الحقيقيين على مسارات من الموسم الرسمي نفسه، فعلاً حاجة ترفع الأدرينالين.

ولأول مرة في السلسلة، اللعبة جاية بكل حلبات موسم 2025، بتصميمات دقيقة وحديثة. سواء بتحب المنحنيات الضيقة، القفزات المجنونة، أو الخطوط الطويلة اللي تحسسك بالسرعة القصوى، كل مضمار فيهم بيقدم تحدي مختلف.

طور الـ “Career” بياخدك في رحلة بتبدأ من فئة “Futures”، بتثبت فيها نفسك وحدة وحدة، لحد ما توصل لفئة 250، وبعدها لنجوم الصف الأول في فئة 450. بس السكة مش كلها سباقات. لازم تحافظ على توازن بين الشهرة، السمعة، والعلاقة مع الفريق. كل قرار – سواء اختيار الراعي، أو التعامل مع الشخصيات التانية – له تأثير مباشر على مشوارك.

واللعبة مش بتحبسك جوا الحلبة بس، لأ، كمان بتديك حياة براها. فيه نظام تفاعلي شبه سوشال ميديا، تتعامل من خلاله مع المتسابقين، تبني صداقات، تعمل عداوات، أو حتى تولّع منافسة تنفجر في السباق الجاي. وعلى الرغم إن الجزء ده لسه بسيط شوية، لكنه بيضيف بُعد إضافي للمسيرة.

وفوق كل ده، اللعبة بتقدم ست مضامير خارجية معمولة من الاستوديو، بتكسر الروتين وتضيف تنوع حلو. وكمان فيه DLC جاي قريب، هيضيف حلبات SuperMotocross لموسم 2025، يعني المحتوى لسه هيكبر أكتر، واللعبة عمرها هيطول من غير ما تحس بملل.

أسلوب اللعب:

لو كنت فاكر إن قيادة موتوسيكل في لعبة سوبركروس سهلة زي تحريك العصاية يمين وشمال، فاستعد لصدمة… Monster Energy Supercross 25 مش بتهزر. اللعبة مش بتسامح، لكن في نفس الوقت، بتكافئ أي حد يصبر ويتعلم خبايا المسارات.

أول ما تعدي التوتوريال القصير، هتلاقي نفسك في قلب التحدي الحقيقي. اللعبة بتديك اختيارات لأنظمة فيزياء مختلفة، وأصعبهم طبعًا هو “Pro Physics” اللي بيقرب من الواقعية لدرجة مرعبة. هنا، الفرق بين الفوز والوقعة المؤلمة هو إزاي توازن بين البنزين، الفرامل، وتحريك جسمك على الموتوسيكل.

لو جاي من ألعاب زي Gran Turismo، فالتنقل للنوع ده من السباقات شبه إنك بتتعلم تطير طيارة ورق بعد سنين من ركوب العجلة. بس لما تبدأ تفهم الأساسيات – زي توقيت القفز، وحركات الـ Scrubs والـ Whips – اللعبة هتبدأ تديك على قد تعبك.

من أذكى الإضافات في الجزء ده، هو نظام التشوه الديناميكي (Deformation). يعني باختصار، كل لفة بتسيب أثر. المنحنيات بتتغير، والقفزات بتبقى يا إما أخطر يا إما فرصتك لتسبق حد. وده بيخلي كل لفة مختلفة عن اللي قبلها، وكل سباق في تجديد.

التغير الطبيعي ده في تضاريس المضمار بيدي كل سباق طويل طابع جديد، وبيخليك دايمًا تكتشف خطوط سير مختلفة، أو تتفادى حفرة ممكن ترميك برا المنافسة في لحظة.

ولو بتدور على لحظات تحس كدا إنك فوق السحاب، القفزات هنا هي المكافأة! كمية القفزات اللي في كل مضمار، والإحساس إنك طاير فوق الأرض، فعلاً لحظات مش هتتكرر في أي لعبة سباق تانية. ومتعة إنك تطير فوق خصمك وتعدّيه في الهوا؟ متعة غير محدودة.

اللعبة عايزة التزام. لو مش مستعد تقع كتير، وتخرج عن المضمار، ويمكن تعيد نفس السباق أكتر من مرة، هتحس إنك تايه. لكن أول ما تمسك اللعبة صح، وتبدأ تفهم رد فعل الموتوسيكل مع الأرض، وتقرا كل نقزة صح، بتحس إنك فعلاً ماسك وحش ميكانيكي بيلعب بين إيديك.

الجرافكس

من أول لحظة، Monster Energy Supercross 25 بتشدك بتجربة بصرية غامرة هدفها الأول إنها تبهر عينك قبل أي حاجة تانية. الإضاءة المتعوب عليها، خصوصًا في الحلبات اللي جوا، بتحسسك إنك بتتفرج على بث حي من بطولة حقيقية.

تصميم الموتوسيكلات والمتسابقين كمان معمول بدقة، من الخامات لحد الانعكاسات اللي على البدلة والخوذة. وكمان فيه مشاهد سينمائية بين السباقات بتدي اللعبة طابع فني مختلف عن المعتاد.

ولما اللعبة تنقلك من حلبة داخلية لبيئة خارجية، بتستعرض قوة الاستوديو في شغل الإضاءة الطبيعية وتفاصيل الأرض، سواء كانت طين أو رمل أو أيًا يكن… كله معمول عشان يخليك حاسس إنك هناك فعلاً.

التقييم النهائي

8.5/10

لعبة Monster Energy Supercross 25 مش لعبة للناس اللي بتحب السهل والمكسب السريع، دي لعبة للناس اللي عندها شغف، عندها صبر، وبتحب تتحدى نفسها قبل أي حد تاني. كل سباق فيها هو معركة، وكل وقعة فيها درس، وكل فوز بيبقى ليه طعم تاني خالص… طعم التعب والتطور الحقيقي.

فلو كنت من الناس اللي بتحب تعافر، وتتعلم، وتحس بإنجاز حقيقي بعد ما توصل لخط النهاية… يبقى Monster Energy Supercross 25 تستاهل فرصتك. بس خد بالك، دي مش لعبة هتدلّعك… دي لعبة هتعلّمك.