MotoGP 25: لما الحلبة تتحوّل لساحة معركة حقيقية 🏁🔥

هل عمرك جرّبت تحس إنك راكب على ظهر وحش بيصرخ بصوت موتور بيوصل لـ18 ألف لفة في الدقيقة؟ هل تخيلت نفسك طالع من آخر منعطف في اللفة الأخيرة، وجنبك على بعد ملّي متر سواق بطل عالم بيحاول يخطف منك المركز الأول؟ لو الإجابة “آه”، فـ MotoGP 25 مش مجرد لعبة سباق… دي محاكاة حقيقية للجنون اللي بيحصل على الحلبة.

المطور الأيطالي Milestone دخل المنافسة بتقنيات جديدة، تغييرات جوهرية، وتجربة بيقولوا إنها الأقرب للي بيحصل فعلًا على الحلبة. مش بس في شكل اللعبة… لأ، كمان في طريقتها، في حسّها، في كل تفصيلة من صوت الموتور لحد زاوية الميل وانت داخل على الكيرڤ. فهل هي مجرد خطوة تكميلية في السلسلة؟ ولا لحظة تغيير بجد؟ طيب ما تيجوا نشوف؟

محتوى اللعبة

في الكارير مود الجديد هتلاقي حرية كبيرة في التقدم، تقدر تبدأ مسيرتك من فئة Moto3 وتصعد لفئات أعلى، أو لو مش عايز تلف كتير تبتدي مع فريق في MotoGP على طول. كل بداية موسم بيجيلك نقطة تحوّل أو Turning Point، وهنا اللعبة بتديك اختيار: إما تشتغل على عقد جديد مع فريق كبير، أو تدخل تحدّي شخصي مع سواق معين، أو حتى تشتغل على تطوير فريق ضعيف وتحاول توصّله للقمة. كل اختيار بيغير طريقة تقدمك، وبيأثر على شكل الموسم بالكامل، وده بيخلي كل مرة تلعب فيها الكارير تبقى مختلفة عن اللي قبلها.

وبين كل سباق والتاني، هتبدأ توصلك دعوات من السواقين الكبار عشان تشارك معاهم في سباقات جانبية. يعني مثلًا Quartararo هيبعتلك تدخله في Flat Track، أو Marquez هيشدّك على Minibike، وVinales هيخدك على Motard. السباقات دي مش مجرد فواصل للضحك، دي مربوطة بسمعتك وعلاقاتك، وكل مرة بتشارك فيها بتقوّي علاقتك بالسواق اللي دعاك، وده ممكن يفتحلك فرصة إنك تنضم لفريقه بعدين.

كمان السباقات الجانبية نفسها مش بس للعرض، دي بتحسّن قدراتك، بتزوّد لياقتك، وبتجهزك بدنيًا ونفسيًا للجولات الكبيرة. يعني بعد كل جولة مجهدة، اللعبة ممكن ترميك في Race Off، وتخليك تلعب موتارد أو مينيبايك أو فلات تراك، وكل نوع من دول ليه أسلوب مختلف تمامًا. مرة هتتزحلق على أرض طرية، ومرة هتلف على أسفلت ضيق، ومرة هتتعلم تتحكم في دراجة خفيفة بشكل سريع. الجو ده مش بس بيكسر الملل، ده بيساعدك تطور مهاراتك وتسترجع أنفاسك قبل ما تدخل في الجولات الرسمية من تاني.

وعلى مدار الموسم، اللعبة بتفتحلك مجال حقيقي إنك تشتغل على تطوير الدراجة نفسها. مش مجرد أرقام وخلاص، لأ، هتتكلم مع المهندس بتاع الفريق، وتحدد إيه الأولوية: ثبات؟ فرامل؟ شاسيه؟ وتبدأ تشتغل عليها خطوة بخطوة. لو بدأت مع فريق ضعيف زي Yamaha أو Honda، هتحس إنك بتبني حاجة فعلًا، وبتاخد مسؤولية تطوير دراجتك من أول الموسم لحد آخره.

ولو حابب تخوض تجربة أبسط وأسرع، فيه طور Arcade Experience، واللي معمول مخصوص للناس اللي لسه داخلة عالم MotoGP أو مش حابة تتعمق في كل تفصيلة. في الوضع ده اللعبة بتخفف كل حاجة: الفيزياء أسهل، الدراجة ما بتقلبكش بسهولة، وقوانين السباق مش صارمة. يعني تقدر تفتح اللعبة، تمسك الدراجة، وتدخل في سباق من غير ما تقعد نص ساعة تظبط إعدادات. ورغم بساطته، الوضع ده مازال بيقدم إحساس واقعي نسبيًا، يعني ما تحولش اللعبة لحاجة كارتونية، بس في نفس الوقت بيحسسك إنك ملك الطريق.

ولو حابب تطلع من دايرة اللعب الفردي، فالأونلاين في MotoGP 25 متاح ومفتوح، وبدعم كروس بلاي بين PS5 وXbox وPC، يعني تقدر تلعب مع أي حد تقريبًا. في سباقات Ranked مصنفة، بتجمعك مع ناس في نفس مستواك، وفي كمان سباقات ودية وسريعة، وفيه Split-Screen على نفس الجهاز لو عايز تلعب مع صاحبك في البيت. السيرفرات مستقرة واللعبة بتحاول دايمًا تخلي التجربة سلسة وسريعة من غير تعقيدات.

ده غير أطوار إضافية زي Time Trial لو حابب تكسر رقمك الشخصي في كل حلبة، أو أوضاع تانية زي Elimination واللي بيتم استبعاد آخر سائق كل لفة، وRelay واللي بيخليك تتسابق كفريق. كل وضع فيهم بيضيف نكهة مختلفة، وتقدر تلعبهم لوحدك أو مع صحابك، وهما وسيلة كويسة إنك تتعود على أنماط سباق غير تقليدية وتخرج من الروتين.

الجيم بلاي

اللعبة بتقدملك أسلوب قيادة أقرب ما يكون للواقع، خصوصًا في الوضع الاحترافي. الدراجة بقت أكثر ثبات، ومشاكل زي اهتزاز الموتور أو قلب العجلة الخلفية عند الفرامل اتحلت بشكل كبير. القيادة نفسها بقت أنعم، وبتحس إن الدراجة بتتجاوب معاك مش بتحاربك. لو انت محترف أو عندك خبرة في السلسلة، الوضع Pro هيقدملك تحدّي كبير، لكن مرضي جدًا. أما لو مبتدئ أو لسه جديد، وضع Arcade هيكون أحسن مدخل ليك.

الذكاء الاصطناعي بيتغير حسب المستوى اللي تختاره، وده بيخليك تتحكم في الصعوبة بشكل دقيق. تقدر تبدأ على 30 أو 40% لحد ما تحس إنك جاهز، وتوصل لحد 100% وتشوف التحدي الحقيقي. لكن بالرغم من كده، الـAI أحيانًا بيتصرف بشكل غريب أو مش طبيعي في مواقف معينة، وده بيخلي السباق مش دايمًا متوازن زي ما تتوقع.

كل فئة دراجات في اللعبة ليها إحساس خاص، من الـMoto3 البطيئة نسبيًا، لحد الـMotoGP السريعة بجنون. الفروقات بينهم واضحة، والتحكم بقى مضبوط أكتر من الأجزاء اللي فاتت، وده بيخليك تتنقل بينهم وأنت حاسس بفرق حقيقي مش مجرد أرقام.

نظام تطوير الدراجة جوه الكارير بقى أعمق، مش مجرد بتجمع نقاط وخلاص. دلوقتي بقى عندك مهندس تتكلم معاه، تختار إيه اللي تحب تحسّنه في الدراجة، وتبدأ تشتغل عليه على مدار الموسم. كل تطوير بيأثر على أداء الدراجة في السباق، وده بيخلي لكل قرار وزنه، وكل تعديل نتيجته واضحة.

الجرافيكس

نقلة Unreal Engine 5 بان تأثيرها من أول سباق. الرسوم بقت أنضف، تفاصيل الحلبات بقت دقيقة بشكل مدهش، والإضاءة الطبيعية مديّة إحساس واقعي جدًا خصوصًا في السباقات اللي بتتغير فيها حالة الطقس. المطر بيظهر بشكل جميل، والمسطحات بتعكس الضوء بطريقة واقعية.

لكن رغم ده، في بعض التفاصيل لسه محتاجة شغل، خصوصًا نماذج المتسابقين. الوشوش والحركات أحيانًا بتكون غريبة شوية، وبتفكرّك إنك لسه في لعبة مش في سباق حقيقي. ده مش بيفسد التجربة، بس ممكن يكسّر شوية من واقعية المشهد.

الصوت كمان واخد نصيبه من التطوير. صوت المحركات متسجل من دراجات حقيقية، وكل فئة ليها نغمتها اللي بتميزها. الهوا، الفرامل، الاحتكاك… كله واخد عناية وبيوصلك جو السباق زي ما هو. ولو بتلعب بسماعة كويسة، هتحس إنك وسط الحلبة مش قدام شاشة.

التقييم النهائي

8\10

لعبة MotoGP 25 مش مجرد جزء جديد، دي نقلة حقيقية للسلسلة. اللعبة دمجت الواقعية بالحماس، وقدمت تجربة سباق فيها عمق وتفاصيل تخليك تحس إنك فعلاً جوه الحلبة. الكارير مود متنوع، الأركيد سهل وممتع، والأونلاين مفتوح للجميع. صحيح لسه في شوية عيوب زي الـAI والأنيميشين، بس التطور اللي حصل في الجيم بلاي والجرافيكس يخليها تستحق التجربة بجد. لو بتحب السرعة والتحدي، اللعبة دي هتخطفك من أول لفة.