فيه ألعاب كورة بتحاول توصل للواقعية زي FC، وفيه ألعاب تانية بتحاول تبسّط الدنيا زي eFootball… بس نادر جدًا لما تلاقي لعبة تمسح السبورة وتبدأ من أول وجديد. أنا واحد من الناس اللي بتحب تجرّب كل حاجة مختلفة، وخصوصًا لما لعبة تتحدى قواعد النوع اللي بتنتمي له.

 وأول ما شفت Rematch، حسيت إننا مش قدام منافس تقليدي ولا تجربة بتحاول تقلّد اللي قبليها… لأ، إحنا قدام رؤية مجنونة لمستقبل كرة القدم، معمولة بروح فنية غريبة وجرأة واضحة. واللي خلّى الحماس يزيد أكتر، إن اللعبة دي جاية من استوديو Sloclap، اللي قدّم واحدة من أنجح ألعاب الأكشن في الجيل الأخير واللي هي Sifu. استوديو معروف بالعنف، بالقتال، بالسرعة… وفجأة يقرر يعمل لعبة رياضية؟! 

فهل Rematch لعبة ممتعة فعلًا؟ هل تستحق التجربة وسط الزحمة دي؟ وهل هي بداية نوع جديد من ألعاب الكورة؟ طيب ما تيجوا نشوف؟؟

القصة

بص، متستناش قصة تقليدية هنا. Rematch مش لعبة فيها بطل بيمر برحلة، ولا خصم شرير عايز يهزمك، ولا مشاهد سينمائية هتنزل دموعك. الفكرة كلها إننا في سنة 2065، والعالم مكان مختلف تمامًا مفيش حروب، مفيش كوارث بيئية، الناس اتحدت وبقت عايشة بتناغم مع الطبيعة والتكنولوجيا. والرياضة اتحولت لفن!

كل ماتش بيحصل في ملعب من نوع غريب ملعب على سد كهربا، جوه غابة، فوق سطح القمر، أو حتى تحت المية. وكل مرة بتلعب، الملعب بيتغيّر، والجو بيتبدل، والإضاءة بتولّع… وكل ده معمول عشان يخليك تحس إنك بتشارك في عرض، مش ماتش كورة عادي.

إنت مش مدرب، ولا مدير فني، إنت لاعب. نجم. إنت اللي بتاخد الكورة، إنت اللي بتسجل، إنت اللي بتشيل فريقك أو تضيع الماتش عليه. كل حاجة بتدور حواليك إنت.

الجيم بلاي

أول ما تبدأ، بتحس إنك دخلت على حاجة شبه لعبة قتالية. منظور الشخص التالت، كاميرا واطية ورا ضهرك، والملعب مقفول زي قفص، والكرة مبتخرجش من الملعب أصلاً! مفيش تسلل ومفيش أخطاء ومفيش ركلات حرة ومفيش توقف… كل حاجة ماشية على طول.

كل ماتش مدته 6 دقايق، لكن تحس كأنهم 60! الإيقاع سريع، وكل حركة إنت بتعملها بإيدك
زي الباص والشوت والمراوغة، وقطع الكورة مفيش حاجة تلقائية.

يعني مثلًا، عشان تعمل Pass مظبوط، لازم توجّه الانالوج يمين أو شمال وتختار الزاوية بنفسك. أما الشوت لازم توقيت دقيق جدًا عشان يطلع قوي أو كرف. والمراوغة بقى شبه ألعاب الأكشن بالضبط.

فيه ميكانيكا حلوة اسمها “Extra Effort”  دي لحظة بتقدر تضغط فيها وتطلع بكل مجهودك، سواء علشان تلحق كورة، أو تدخل انقضاض سريع. بس متقدرش تستخدمها على طول، لأن ليها عداد طاقة بيخلص.

الجميل بقى اللعبة كلها skill-based، يعني مفيش أي لاعب عنده ستاتس أعلى من التاني، ولا Boosts. إنت ومهارتك بس، إنت وردّ فعلك، إنت وفريقك. الأنظمة المتاحة حاليًا فيها 3v3، 4v4، و5v5… وفيه Ranked Mode للناس اللي بتحب التنافس الجامد.

 لكن للأسف، اللعبة كلها أونلاين دلوقتي. مفيش AI أو أوفلاين، وده بيكسر شوية مزاجك لو حبيت تلعب لوحدك. بس المطورين وعدوا إن ده هيتضاف قريب في 2026.

نقطة مهمة جدًا في اللعبة وهي مفيش تمييز أو فروقات بين اللاعبين. تقدر تختار شكل لاعبك بحرية كاملة جنس، ولون بشرة، وستايل لبس، وحركة احتفال، وصوت… بس ده كله شكلي.
مفيش واحد أقوى من التاني، كل الناس بتبدأ من نفس النقطة، والفرق الوحيد هو مهارتك إنت.

اللعبة بتروّج لقيم زي التعاون، والمساواة، والاحتراف. مفيش “ادفع تكسب”، مفيش “باك حظك حلو فيه”، ومفيش “شحن عشان تبقى خارق”… دي لعبة معمولة عشان اللي يلعبها بذكاء، يكسب.

الجرافيكس

اللعبة شكلها مش واقعي… لكن مبهرة Rematch ما حاولتش تقلّد FC أو eFootBall، لا، دي لعبة رايحة في اتجاه فنّي بحت. كل ساحة ليها طابعها مرة Neon، مرة ألوان بانورامية، مرة كله أخضر، مرة كله أزرق جليدي. والإضاءة مجنونة خصوصًا مع تأثيرات الواقع المعزز حوالين الخطوط، والحوائط اللي الكرة بتخبط فيها وترد.

الشخصيات نفسها مش كارتونية سخيفة، لكن فيها لمسة Animation حلوة. الـUI بسيط، الحركات فيها Fluidity، وحتى صوت الكورة وهي بتخبط في الحيطة يخليك تحس كأنك في صالة أركيد من المستقبل.

كل موسم، بيتغير شكل الملاعب والتأثيرات… فمتزهقش. الملل مش موجود في قاموس اللعبة دي أصلاً.

التقييم النهائي

8\10

في وقت ألعاب الكورة فيه بقت بتكرر نفس المعادلة كل سنة، Rematch قررت تكسر كل التوقعات وتقدم تجربة من كوكب تاني. لعبة مش هدفها الواقعية، ولا بتجري ورا الرخص والفرق والدوريات… لأ، دي لعبة بتمزج بين الفن، والأكشن، والرياضة، في قالب مستقبلي مليان طاقة وإبداع. صحيح اللعبة لسه في بدايتها، ولسه ناقصها شوية حاجات زي الأوفلاين أو أطوار فردية، لكن اللي موجود حاليًا يكفي يخليك تقول إحنا فعلاً قدام بداية جديدة لجيل مختلف من ألعاب الكورة.