من شوارع أمريكا لـقرى اليابان… Silent Hill f بتعيد تعريف الرعب النفسي

من بعد ما ريميك Silent Hill 2 نزل السنة اللي فاتت وحقق نجاح كبير، الناس كلها كانت متفقة إنه كان رهان آمن. اللعبة اعتمدت على قصة كلاسيكية موجودة من زمان واللي جمهور السلسلة بيعتبرها أيقونة، وبالتالي كان الطبيعي إن النجاح مضمون. لكن مع Silent Hill f الوضع مختلف خالص، كونامي قررت تاخد مخاطرة كبيرة وتخرج عن كل اللي اتعودنا عليه. اللعبة ما بترجعش لبلدة سايلنت هيل القديمة، ولا بتعيد تدوير نفس الشخصيات ولا الأجواء اللي حافظينها، لأ دي بتنقل السلسلة كلها لمكان وزمن جديدين، اليابان في الستينيات، وسط قرية غريبة مليانة تفاصيل ثقافية محلية، وقصة جديدة بشخصيات مختلفة تمامًا.

المخاطرة هنا مش بس في المكان أو التوقيت، لكن كمان في طبيعة التجربة نفسها. بدل الأسلحة النارية اللي كانت دايمًا موجودة، اللعبة بتعتمد بشكل أساسي على قتال قريب بالأسلحة البيضاء، وده تغيير ضخم بالنسبة لواحدة من أقدم سلاسل الرعب النفسي. وبدل البطل الكلاسيكي اللي غالبًا بيكون راجل محطم نص عمره، المرة دي بنت مراهقة اسمها هيناكو، قصتها مرتبطة بمعاناة شخصية ونفسية بتتحول لكوابيس ملموسة في عالم اللعبة.

فهل التغيير ده هيخلي Silent Hill f بداية جديدة تعيد روح السلسلة وتفتح أبواب جديدة للرعب النفسي، ولا هيطلع مجرد تجربة غريبة مش هتعجب جمهور عاشق للهوية الأصلية؟ طيب ما تيجوا نشوف

القصة

القصة في Silent Hill f مختلفة عن أي حاجة شفناها قبل كده في السلسلة. الأحداث بتدور في اليابان في ستينيات القرن اللي فات، في قرية خيالية اسمها إبيسوغاوكا. القرية في البداية شكلها هادي وتقليدي، لكن مع الوقت كل حاجة بتتحول لكابوس غريب مليان ضباب وزهور حمراء متطفلة وأشكال مخيفة طالعة من الأرض والجدران، وكأن الطبيعة نفسها بقت بتنتقم من البشر.

البطلة اسمها هيناكو شيميزو، بنت مراهقة عايشة في بيت مفكك وسط عيلة مضطربة. أبوها مدمن كحول وعنيف، وأمها ضعيفة بتتجاهل اللي بيحصل، وده خلى هيناكو طول حياتها تحس إنها منبوذة. الجروح النفسية دي بتظهر بشكل مباشر في الأحداث، لأن وحوش القرية وأسرارها كلها بتجسد المعاناة اللي شايلها جوّاها.

زي أي قصة في سايلنت هيل، الرعب هنا مش بس من الكائنات اللي بتهاجمك، لكن من الرموز والمعاني وذكريات الماضي اللي بتتجسد قدامك. من خلال رسائل شخصية من زمايلها في المدرسة، ومن مذكرات متفرقة، ومن مواجهات مع وحوش شبه بشر مشوهين، اللعبة بتكشف تدريجيًا جذور الألم اللي عايشاه هيناكو، من تمييز ضدها كبنت، لتعذيب أسري، لقصص عن الإدمان والهروب من الواقع.

الجزء المميز إن القصة مش خط مستقيم. وأنت ماشي هتلاقي اختيارات صغيرة بتأثر على النهاية، ومع أول تختيم هتكتشف إن في كذا خط زمني ونهايات بديلة بتفتح معاك في الـ New Game+. ده بيخلي القصة مش مجرد تجربة واحدة، لكن لغز كبير مليان احتمالات لازم تعيد وتعيش أكتر من مرة عشان تفك طلاسمه.

الجيم بلاي

الجيم بلاي في Silent Hill f هو أكتر نقطة مثيرة للجدل، لأنه مختلف تمامًا عن اللي اتعودنا عليه من السلسلة. مفيش أسلحة نارية زي المسدسات أو الشوت جن اللي كنا بنعتمد عليهم قبل كده، هنا القتال كله معتمد على أسلحة Melee زي المواسير الحديد، العصي الخشبية، والفؤوس اللي بتلاقيها متناثرة حوالين القرية. كل سلاح ليه عمر افتراضي، بيتكسر بعد شوية ضربات، وده بيزود التوتر لأنك دايمًا محتاج تدور على بديل أو تستعمل كيتات صيانة عشان تصلحه.

اللعبة قدمت نظام قتال بطيء وتقيل متعمد، بتحس فيه إن البطلة فعلاً مراهقة مش مقاتلة محترفة. عندك ضربات خفيفة وسريعة لكن ضعيفة، وضربات تقيلة تسبب ضرر أكبر بس بتستهلك طاقة أكتر وبتخلي هيناكو عرضة للهجوم. فوق ده كله، في نظام اسمه Focus، بتضغط وتحمّل الهجوم عشان تعمل ضربة أقوى أو كاونتر على العدو، بس ده بيستهلك من عدّاد الـ Sanity اللي هو جزء أساسي من الميكانيكيات.

المقاييس اللي لازم تتابعها كتيرة هما Health بيقل مع الهجمات، Stamina بتستهلك مع الضرب والجري والمراوغة، وSanity اللي بيمثل حالتها النفسية. لو الـ Sanity خلصت، صحتك نفسها تبقى معرضة للهجمات النفسية اللي ممكن تمحيك بسرعة. الموازنة بين التلاتة دول طول الوقت بتعمل توتر مستمر، يخليك تفكر مرتين قبل أي اشتباك.

الأعداء نفسهم متنوعين جدًا في دمى مشوهة بتهجمك بسكاكين من الزوايا، كائنات شبه عيال مدارس مشوهين بيجروا وراك، وكائنات ضخمة عبارة عن تجمع لحم متعفن بينفجر ويولد وحوش أصغر. في شوية وحوش بتتأثر بالضوء أو بالزاوية اللي بتبص بيها عليهم، وده بيخلي المواجهات مختلفة في كل مرة.

لكن مش كله قتال. زي أي لعبة Silent Hill، في ألغاز كتيرة ومشاهد استكشافية. بعض الألغاز بسيطة زي جمع مفاتيح أو حل كلمات سر، وبعضها معتمد على الفولكلور الياباني والرموز الثقافية اللي محتاجة تركيز شديد أو حتى بحث خارجي. ده بيضيف عنصر غموض يخلي التجربة تقيلة ومعقدة.

كمان عندك مناطق بتدخلك لعالم تاني اسمه الـ Dark Shrine، وده أشبه بالـ Otherworld الكلاسيكي، بس هنا بيقدم تحديات أصعب وأعداء أغرب، مع مكافآت زي أسلحة خاصة أو قصص جانبية بتوضح ماضي هيناكو. في العالم ده الأسلحة ساعات بتكون غير قابلة للكسر، وساعات هيناكو بتاخد قدرات خارقة مؤقتة تخليها تقدر تواجه جحافل من الوحوش.

الجرافيكس

من أول لحظة هتدخل قرية Ebisugaoka هتحس قد إيه Konami ركزت على التفاصيل البصرية عشان يخلقوا جو مرعب وغريب في نفس الوقت. اللعبة واخدة خلفية اليابان في الستينات، وده بان في كل حاجة حوالين البطلة هيناكو.

المميز إن العالم مش مجرد خلفية ثابتة، كل تفصيلة بتعكس إحساس بالانحدار والفناء. الضباب الكثيف اللي مميز السلسلة راجع لكن هنا مخلوط بزهور حمراء مسممة وجذور نباتية متشعبة بتغطي البيوت والجدران بشكل بيخليك تحس إن المكان نفسه بيتنفس. في لحظات معينة، الزهور دي بتفتح فجأة وتطلع منها وحوش أو تبتلع شخصيات، وده بيضيف عنصر رعب بصري مش متوقع.

تصميم الوحوش كمان من أقوى عناصر اللعبة. عندك دمى مشوهة بتتحرك زي العرائس بخيوط مكسورة، كائنات ضخمة ببطون متورمة مليانة وجوه بشرية، لحد مسوخ بتقرب من فكرة “اللحم الحي” اللي بيتغير قدامك. تصميماتهم مقرفة ومرسومة بطريقة تخليك عايز تبص وتبعد في نفس الوقت، وده بالظبط اللي يخليها Silent Hill.

الأجواء مش بس في الجرافيكس، لكن في استخدام الإضاءة والظل. الكشافات والأنوار في البيوت القديمة بتخلق مناطق شبه مظلمة تجبرك تعتمد على أصوات خطواتك أو تنفس هيناكو. كمان في تلاعب بالألوان؛ الأحمر الغامق دايمًا مرتبط بالخطر، والظلال الزرقاء بتدي إحساس بالبرودة والعزلة.

المؤثرات البصرية التانية زي المطر اللي بينزل ويثبت في الهوا أو الضباب اللي بيخفي تفاصيل الطريق بيزودوا إحساسك إنك محبوس في كابوس مش طبيعي. حتى لما تدخل الـ Dark Shrine، العالم البديل، هتلاقي المعابد المضيئة بالفوانيس الحمراء والبوابات الخشبية التقليدية بتتحول لمكان مقدس مرعب، فيه جدران بتتنفس وأرضيات بتتشقق تحت رجلك.

الأنيميشنز نفسها متعمدة تكون تقيلة، خصوصًا في القتال. التلويح بالماسورة أو بالفأس بياخد وقت أطول من اللي متعود عليه في ألعاب أكشن، وده متعمد عشان تحس بالعجز. حتى الوحوش ساعات بتقف ثابتة في وضعيات غير طبيعية وبعدين تهاجمك فجأة بحركة غير متوقعة، حاجة بتخلي التوتر أعلى.

التقييم النهائي

9\10

Silent Hill f قدرت تقدم تجربة مرعبة ومختلفة عن اللي اتعودنا عليه في السلسلة، بعالم ياباني مليان تفاصيل بصرية ساحرة ومرعبة في نفس الوقت، وقصة سوداوية بتتعمق في جروح البطلة النفسية. صحيح القتال تقيل ومش ممتع طول الوقت، وأحيانًا بيكسر الإيقاع، لكن التصميم الفني، الألغاز الذكية، وتعدد النهايات يخلوها تجربة تستاهل تتعاش أكتر من مرة. اللعبة مش كاملة، لكنها خطوة جريئة بتحاول تعيد روح Silent Hill بطريقة جديدة، وده في حد ذاته يخليها تجربة مميزة تستحق التجربة.