نوستالجيا التزلج… لما اللعبة كانت أسلوب حياة مش مجرد تسلية!

فاكر لما كنا بنقعد بالساعات قدام البلايستيشن نحاول نجيب أعلى سكور، وننط من فوق العربيات، ونربط كومبو ورا التاني من غير ما نقع؟ أيوه، دي كانت أيام Tony Hawk’s Pro Skater 3 و4… ألعاب عمرها ما كانت مجرد “تسلية”، كانت جزء من يومنا، وساعات طويلة من التكرار الممتع والتحدي المستمر.

اللي لعب السلسلة زمان هيفهم قصدي… اللعبة كانت مزيج غريب بين البساطة والإدمان، بين الجرافيكس اللي كان عادي وقتها، بس الروح اللي فيها كانت مختلفة تمامًا. المطور وقتها كان Neversoft، والناشر كان Activision، وده لوحده كان كفاية يخلي أي لاعب يثق إن التجربة اللي جاية مش هتكون عادية.

ودلوقتي بعد ما نزل الريميك الجديد لجزئي 3 و4، مع مطور جديد واللي هو Iron Galaxy حسيت إني برجع أعيش ذكرياتي، بس في نسخة أحلى، أنضج، وأكتر اتقانًا.

فهل فعلاً اللعبة دي هتخليك تنسى الوقت زي زمان؟ هل فعلاً المطورين قدروا يرجعوا الروح من غير ما يضيعوا البساطة؟ هل الريميك يستحق التجربة في وسط الزحمة اللي احنا فيها دي؟ طيب ما تيجوا نشوف؟

الجيم بلاي

أول ما تمسك الكنترولر وتبدأ أول جولة، بتحس بشعور غريب وهي أن اللعبة سهلة بس مش سطحية. هي بسيطة بس وراها عمق مرعب.

نظام اللعب بيرتكز على فكرة إنك تدخل مرحلة مليانة ramps وrails، وأماكن مجنونة تعمل فيها الحركات اللي انت حافظها من زمان، أو تتعلم حركات جديدة. آلية اللعب بتخليك تقدر تجمع بين أنواع مختلفة من الحركات زي manual مع grind مع air tricks علشان تبني كومبو طويل، وكل ما زادت الحركات اللي بتربطها، زادت النقاط.

الجزء التالت قدم ميكانيكية مهمة جدًا وهي الـRevert، ودي بتفتحلك إمكانية تربط النزول من الرامب بحركة Manual تكمل بيها الكومبو، وده بيزود الإدمان بشكل خرافي، لأنك بتحاول كل مرة تزود الثانية دي اللي تخلي سكورك ينفجر. في الجزء الرابع، زودوا حركة Spine Transfer، اللي بتخليك تنط من رامب لرامب بسهولة، وده خلق طرق جديدة للتنقل والربط بين الحركات. وكمان تقدر تستخدم Double Input للحركات الهوائية، فمثلًا ممكن تعمل Double Kickflip أو Double Heelflip لو ضغطت مرتين بسرعة، وده بيفتح باب لحركات أكثر تنوعًا وتأثيرًا بصريًا.

الميزة الكبيرة في الرابع كمان كانت إنهم شالوا المؤقت! مافيش ضغط الدقيقتين اللي كان موجود في التالت، بقى عندك حرية تامة تكتشف المرحلة وتكلم الشخصيات وتدخل التحديات براحتك. وفي الريميك، الجميل إنهم ادولك حرية الاختيار يا تلعب بالتايمر يا من غير، وده بيخلي التجربة مرنة ومناسبة لأي مود أنت فيه.

اللعبة كمان بتديك اختيار تمدد المدة لحد 60 دقيقة لو حابب تجرب التجربة المفتوحة بدون ضغط الزمن. الخاصية دي بتديك مرونة تتحكم في تجربة اللعب حسب مزاجك.

أطوار ومحتوى اللعبة

طور “Create‑A‑Park” رجع بقوة، مع أدوات أكبر للتعديل، وتقدر تتحكم حتى في توزيع المهام داخل الحلبة وتنشرها للآخرين أو تلعب بيها أونلاين. كمان في نظام تخصيص شامل لشخصيتك من اللبس للـ board، وده بيربطك أكتر بالعالم.

كمان طور الأونلاين والمحلي ممتع جدًا، فيه تحديات جماعية زي منافسات من يقدر يجيب أكبر كومبو، أو يجمع H-A-W-K أسرع، وده بيخلي التجربة فيها روح تنافسية وبتطوّل عمر اللعبة.

بس، رغم كل ده، في شوية حاجات كانت ممكن تبقى أحسن. مثلاً، التعديل اللي حصل في نسخة THPS4 قلل من عمق الطور الأصلي، لأن اللعبة بقت كل المراحل فيها تحت نظام دقيقتين، وده خلى الحرية القديمة والـfree roam يختفي بنسبة كبيرة. كمان بعض المهمات الأيقونية زي تحدي Zoo أو مهمة سباق Kona تغيرت أو اختفت، وده أكيد هيزعج جمهور اللعبة الأصلي. وSkitch، اللي بيرجعك تمسك بعربية ماشية، بقى موجود بس مش متكامل أو مفيد في كل المراحل.

والشخصيات السرية الكلاسيكية زي Jango Fett للأسف مش موجودة، واتغيروا بشخصيات أقل شهرة وتأثير، وده بيقلل من المفاجآت الممتعة اللي كانت موجودة زمان.

الجرافيكس

المفاجأة الكبيرة فعلاً في الريميك كانت في الجرافيكس. أنا فاكر المراحل زمان، كانت باهتة شوية، تصميمها حلو بس بسيط. لكن دلوقتي الوضع اختلف، كل حاجة بقت حية!

الإضاءة بقت ناعمة وواقعية، الظلال بتمشي مع حركة الشمس، textures عالية الجودة، وكل مستوى تحس إن فيه تفاصيل عمرها ما كانت موجودة زمان. مش بس كده، تصميم الشخصيات بقى فيه نضج، اللبس بيتحرك، والـanimation بقى ناعم ومليان تفاصيل صغيرة بتخلي كل حركة تحسسك إنها حقيقية.

اللي شدّني أكتر إن كل مستوى اتحافظ على روحه الأصلية، يعني لو انت حافظ المرحلة القديمة، هتعرف تمشي فيها بسهولة. بس في نفس الوقت، كأنك بتشوفها لأول مرة بسبب كمية التفاصيل الجديدة اللي ضافوها.

تمت إعادة بناء مراحل كلاسيكية زي Airport وFoundry وAlcatraz، وكأنهم بيرجعوا للحياة، وكمان أضافوا مراحل جديدة زي Waterpark وPinball وMovie Studio، وفعلاً بتحس إنهم من نسيج اللعبة الأصلي، مش حاجة دخيلة.

التقييم النهائي

8/10

لعبة Tony Hawk’s Pro Skater 3 + 4 هي تجربة ناضجة، بتجمع بين نوستالجيا الزمن الجميل وروعة الجيل الجديد. اللعبة قدرت تلمس نفس الوتر اللي لمسنا وإحنا صغيرين، لكن كمان عرفت تطوره وتخليه مناسب لليومين دول.

سواء لعبتها زمان أو بتجربها لأول مرة… اللعبة دي هتعلّق معاك، وهتخليك ترجع تمسك الكنترولر كل يوم، حتى لو كنت فاكر إن النوع ده من الألعاب ماعدتش ليه مكان.