استعراضات, عن الألعاب

ليه تتحمس للعبة Wasteland 3 !

ليه تتحمس للعبة Wasteland 3 !

(ليه تتحمس) سلسلة مقالات جديدة هنعملها هنا في جيمزاوي ومن اسمها كده هنخليك هتتحمس للعبة اللي هنتكلم عنها و مهمتنا فيها إننا مش هنسيبك الا لما تطلع من المقال ده وانت متحمس علي الاقل بنسبة 90% والباقي عليك انت 😁
هنبدأ مقالنا عن لعبة جميلة اسمها Wasteland 3 من المطور inXile Entertainment نازلة تقريبا كمان يومين تحديدا في 28 أغسطس لأجهزة PS4 و PC و Xbox One.

مبدأياً إحنا هنسيب تاريخ اللعبة والكلام عن أجزائها اللي فاتت ونخليه للمراجعة نصدعكم بيه 😄 دي يعني لو هتتعمل بإذن الله.

خلينا نتكلم عن اللعبة نفسها وايه اللي تتوقعه منها لما تيجي تلعبها.

اللعبة بتقدم معها تجربة بقاء حلو ؟ بعناصر أربيجي عميقة جدا بتأثر علي طريقة اللعب (هنشرحها بعدين) حلو ؟ مع أسلوب لعب شبه مباشر علي طريقة الألعاب الإستراتيجية حلو ؟ مع قصة شيقة وحوارات جميلة يتغلب عليها طابع ال Mature الحوارات الجد يعني للناس البالغة بعيداً عن الحورات الطفولية اللي بنشوفها في ألعاب اليومين دول اللي بتحاول تبقي عميقة “عافية”
شايفين كل الحاجات الحلوة االي فوق دي هنحاول نتكلم عنها دلوقتي حاجة حاجة

أولاً: اللعبة بتقدملك تجربة بقاء من خلال اختيارك لشخصين (رجل وبنت) في بداية اللعبة هتتحكم بيهم وبتختار background ليهم او خلفية عن طبيعتهم الشخصية وطريقة نشأتهم بطريقة مثيرة جدا ، وكمان كل ما تتقدم في اللعبة فهي بتسمحلك إنك تجند أو تعمل recruit لأشخاص معينة بتقابلهم في رحتلك باللعبة.

ثانياً : عناصر الأربيجي وقدرات الشخصيات حاضرة هنا وبقوة ،المطور ده صدقوني من تجربتي معاه في الجزء اللي فات معندوش ياما ارحميني في عناصر الأربيجي 😁 وكمان بتتوزع معاك بشكل مذهل مع تقدمك في اللعبة يعني إتوقع إنك هتتسحل وإنت بتبني الشخصية بتاعتك وتخلي عندها نقاط قوة في المقابل برده هيكون عندها نقاط ضعف يقابلهم شخصيات تانية بتتحكم فيهم وبتحاول تسد نقاط الضعف عند كل شخصية بنقطة قوة للشخصية التانية وهكذا ،ولو هنعمل ريفيو للعبة لما تنزل هنوريلكم شوية أمثلة علي تعقيدات عناصر الاربيجي في Wasteland 3.

ليه تتحمس للعبة Wasteland 3 !

أسلوب اللعب .. بإختصار لو لعبت لعبة مشهورة اسمها xcom من شركة 2K هتفهم هنا الأمور ماشية ازاي .. لو ملعبتش حاجة زيها قبل كده هشرحلك الجيم بلاي ماشي ازاي
اللعبة زي ما ذكرت فوق الجيم بلاي بتاعها شبه مباشر يعني مثلا بتبقي بتتحكم بالشخصية وتتحرك عادي ولكن اول ما تقابل اعداء الجيم بلاي بيوقف ويتحول لساحة إستراتيجية أشبه بلعبة الشطرنج.

عندك لكل شخصية مربعات محدودة حواليها بتتحرك فيها والأفضل طبعا إنك بتتحرك للمربعات اللي عندها ساتر أو Cover ،لإن وقتها بتكون إنت محمي من ضربات الاعداء لما بيجي الدور عليهم ،فهنا نظام الضربات بالدور يعني انت تخلص دورك في التحرك وخلاص إتمركزت كده انت أخدت محاولة و بقت معاك محاولة تانية في نفس التيرن ساعتها بتبدأ تصوب علي الأعداء وكل ما كانت المسافة بينك وبينه اقرب كل ما كانت فرصتك في التصويب عليه واصابته بتبقي احسن او ممكن تاخد guard وتحمي نفسك لو مش عايز تصوب ..

كل ده والجيم واقف، انت لسه بتخطط ،خلاص خططت وخلصت المحاولتين لكل شخصية بيبدأ التيرن يروح للأعداء وهنا بقي يجي دور الذكاء الاصطناعي أو ال AI في التخطيط هل لو كنت قريب منه يجي من وراك يحاصرك؟ ممكن جدا .. هل لو معاه سلاح بعيد المدي زي القناص يرجع بعيد شوية ويقنص عليك؟ ممكن برده ، كله علي حسب المعركة ومكانها وطريقة تمركزك الصحيحة.. فالحاجات دي كلها بتخلي كل معركة مختلفة عن التانية بشكل أو بأخر وده بيعدم التكرار بشكل كبير في اللعبة ده غير أن في أوامر تانية بتتغير علي حسب الموقف في المعركة بخلاف التصويب وال guard ،زي إنك تعمل Heal لشخصية تانية أو تعمل reload للسلاح او ترمي قنبلة علي كبشة أعداء متمركزين جنب بعض.

وتطويرات الشخصيات بتساعد برده علي تحسين اللعب شوية زي إنها مثلاً تخليك تضرب أسلحة تانية من بعيد غير القنابل أو تزودلك عدد المربعات اللي هتتحرك فيها او تزودلك عدد ال turns بتاعتك بدل 2 يبقوا 3 وهكذا.

الجيم بلاي عميق جدا وبيعتمد بشكل كبير علي التمركز بتاعك ولو عرفت تضمن أماكن الأعداء وتعرف تحركاتهم مظبوط خلاص انت كده بدأت تدمن اللعبة و دخلت في جوها لأنك بقيت فاهمها ..هل في حاجات تانية في الجيم بلاي؟ أيوه في حاجات تانية بس خلوها احسن في الريفيو ،أنا بس حبيت اتكلم هنا عن Core الجيم بلاي او لب اللعبة نفسه بحيث تبقي فاهم انت داخل علي ايه قبل ما تلعبها.

ليه تتحمس للعبة Wasteland 3 !

القصة لو هنحكي عليها فهي مش من أكبر مزايا اللعبة يعني متتوقعش مشاهد سينمائية مثلا وحاجات زي كده .. هي تعتمد بشكل كبير علي الأجواء اللي حوليك والحوارات بين الشخصيات والاختيارات بتلعب بشكل كبير في تغيير شكل الحوارات ومصير الشخصيات نفسها وبناءً عليه بتتغير القصة كل ما تتقدم أكتر.. و أحداث اللعبة نفسها بتدور في منطقة جليدية بأحد الولايات بأمريكا بعد دمار العالم وهيتعين عليك مهمة بناء العالم ده وتخلق نظام جديد بس طبعا هيكون قدامك عقبات كتير.

ليه تتحمس للعبة Wasteland 3 !

حاجة أخيرة هتكلم عنها ولسه خدت بالي منها وانا بفنش المقال 😅 وهو اللعب التعاوني أو co op، في تريلر نزل للعبة تقريباً من يومين بيشرح فكرة اللعب التعاوني هاسيب لكم التريلر تحت.. انا بصراحة إتفاجأت جدا لإني كنت متوقع اللعبة طور فردي بس.
فدلوقتي اللعبة بقت حاجة أشبه بلعبة ديابلو .. واحد يدخل معاك في الجيم بشكل مباشر علطول ويبدأ يساعدك بشخصيته اللي مصممها او يتحكم بالشخصيات اللي في الsquad تبعك علي حسب إختيارك انت .. في حاجات كتير صراحة مبهمة ولسه مش واضحة في المود ده من ناحية “طريقة عمله” ولكن في حاجة لفتت انتباهي وضحها المطور وهو إنك ممكن تعمل Invite أو دعوة لأي واحد عشان يدخل معاك الجيم حتي لو كان لسه بادئ اللعبة مش بس كده .. ده كمان ممكن يعمل save لو دخل معاك عندك في السيشن أو الجلسة بتاعتك ولو انت خرجت خلاص يكمل هو عادي جدا كأن هو صاحب الجيم ، فبصراحة حاجة رهيبة جدا انك تكمل علي سيشن ناس تانية خصوصًا  لو جربتها مع كذا حد ولسه هيبقى في كلام كتير عن المود بس هنخليه للمراجعة ونكون جربناه بنفسنا وحكمنا عليه بشكل اكبر .. وانا من رأيي أنه هيضيف عمر اكبر لتجربة اللعبة وهيخليها تعيش مع مرور الوقت زي لعبة ديابلو 3 كده.

اللعبة أتوقع تقييماتها بشكل كبير هتعدي ال90 براحة .. هل عليها هايب ؟ للأسف لا مش كتير زي ما تستحق وده لأنها مش مشهورة أوي بالشكل الكافي سواء هنا او في الغرب بره بس ما زالت عندها برده لاعبين أوفياء كتير ومايستهانش بعددهم ده غير أنها هتتوفر من يومها الاول علي مكتبة الجيم باس للإكسبوكس ون والبي سي يعني احتمال نشوف ناس جديدة كتير بتلعبها خصوصا ان الاشتراك اول مرة في الخدمة ب 1 دولار بس فبالظبط أكنك لعبتها ببلاش .. لكن لو انت علي ال ps4 هتدفعلك يا حلو 60 دولار عشان تلعبها 😁 وإحمد ربنا إنها نزلالك😏 لأن المطور بقي تبع مايكروسوفت خلاص وهيحصر ألعابه من هنا ورايح للأجهزة بتاعها فتقريبا دي أخر لعبة ليه هنشوفها علي منصات غير تابعة لمايكروسوفت فحاولوا تستمتعوا بيها علي قد ما تقدروا 👍

author-avatar

About Hussein

محرر وكاتب، بحب جداً هواية الفيديو جيمز، هوايات كتير اتغيرت في حياتي إلا ألعاب الفيديو متغيرش شغفي ليها، بالعكس كان بيزيد مع مرور السنين .. بعشق ألعاب الاربيجي سواء الغربية زي فال اوت وويتشر وايلدر سكرولز او اليابانية زي فاينال فانتسي وبيرسونا ودراجون كويست