أخبار اجهزه الفيديو, الأخبار, عن الألعاب, مؤتمرات

إنطباع سريع عن بث Xbox Games Showcase

شوفنا بث Xbox Games Showcase الخاص بإستعراض ألعاب منصة Xbox Series X وفعلاً ميكروسوفت قدمت مجموعة ضخمة من المفاجآت سواء من إستوديوهات الطرف الأول أو بعض الإستوديوهات الخارجية الي هتقدم ألعاب حصرية على منصة Xbox Series X. النهاردة في إنطباعنا هنركز على أهم الحصريات الي هتتوفر لمنصة Xbox Series X.

شركة ميكروسوفت بدأت البث المباشر بالرائعة المنتظرة Halo Infinite والي أكدت أنك حتى لو ملعبتش أي جزء قديم من السلسلة فا هتقدر تستمتع بيها وبقصتها بدون مشاكل إطلاقاً لإنها بتقدم نوع من أنواع الـ Reboot البسيط للسلسلة.

بعض اللاعبين بيقولوا إن جرافيك اللعبة سيء ولكن شخصياً شايف اللعبة بتقدم Textures 4K ممتازة وأكيد محتاجة بعض التحسينات الرسومية في بعض المناطق، ولكن بشكل عام اللعبة شكلها ممتاز. اللعبة هتتوفر مع إطلاق الجهاز في خريف 2020.

بعد Halo Infinite تم الإعلان عن لعبة Forza Motorsport والي هتشتغل على 4K و60 فريم في الثانية وبتقدم رسومات رائعة مع دعم تقنية تتبع الأشعة بشكل مميز جداً. بنسبة كبيرة اللعبة هتكون واحدة من ألعاب الإطلاق لمنصة Xbox Series X ولكن لحد دلوقتي مفيش تفاصيل معينة، بنتوقع اننا هنشوف تفاصيل أكثر عنها في البث القادم من اكس بوكس.

استحالة نشوف جيل جديد من Xbox من غير سلسلة State of Decay وبالفعل الشركة أعلنت عن لعبة State of Decay 3 بعرض سينمائي مميز جداً ونتمنى إن النسخة النهائية من اللعبة تكون قريبة رسومياً من المنظر ده وتقدم قصة مميزة.

من الحاجات المميزة الي ظهرت في البث كانت لعبة Crossfire X ولكن المرة ديه طور القصة الخاص بيها مش طور الأونلاين. القصة بيتم تطويرها من إستوديو  Remedy الي قدم Control و Quantum Break و Alan Wake واللعبة شكلها فعلاً هتقدم تجربة مختلفة ومميزة في عالم ألعاب منظور الشخص الأول.

من المفاجآت الي خلتني منبهر في البث هو الإعلان عن الجزء الثاني من الرائعة STALKER ، اللعبة كان مفترض انها هتتوفر على كل المنصات ولكن ميكروسوفت اخدتها كحصرية ليها وبكدة هتتوفر على الحاسب الشخصي و Xbox Series X فقط. العرض الخاص باللعبة بيستعرض رسومات اللعبة فعلاً وهو مش عرض سينمائي، الاستوديو قال ان اللعبة هتتوفر في 2021 ولكن لسة مفيش ميعاد.

إستوديو Obsidian Entertainment  فاجئنا بالإعلان الرسمي عن لعبة الـ RPG الجديدة الي شغال عليها حالياً تحت إسم Avowed  ، اللعبة من منظور الشخص الأول وشكلها كدة في العصور الوسطى وبتقدم مواجهات بالسحر والسيوف وحاجة مختلفة ومميزة جداً. مفيش تفاصيل كتير عن اللعبة حالياً وبنسبة كبيرة هي  لسة في مراحل التطوير الأولية في الإستوديو.

لعبة The Medium من إستوديو Bloober Team نزلها إعلان جديد والمرة ديه التركيز الرئيسي كان على إستعراض أسلوب اللعب والتنقل المستمر بين العوالم In Real Time بدون وجود أي شاشات تحميل وده بيبين مدى قوة منصة Xbox Series X وقوة الـ SSD  المستخدم فيها.

في النهاية تم ختام البث المباشر بالتأكيد على إن إستوديو Playground Games شغال على لعبة جديدة في عالم Fable وواضح كدة انها هتكون Soft Reboot للسلسلة وهتقدم تجربة مميزة زي الي اتعودنا عليها من عالم Fable الرائع المختفي من سنة 2012. لحد دلوقتي مشوفناش غير 7 حصريات من 7 إستوديوهات طرف أول خاصة بشركة ميكروسوفت ولكننا شوفنا العاب طرف ثالث وحصريات تانية من إستوديوهات خارجية، ده معناه ان لسة في 8 حصريات من 8 استوديوهات طرف أول شغالين عليها لمنصة Xbox Series X.

من أهم الألعاب الأخرى الي تم الإعلان عنها في بث Xbox Games Showcase هما :

  • Hello Neighbor 2
  • Everwild
  • The Gunk
  • Tell me Why
  • إضافة Peril on Gorgon للعبة The Outer Worlds
  • Warhammer 40K Darktide
  • As Dusk Falls
  • Psychonauts 2

ده كدة إنطباع سريع وخفيف عن بث Xbox Game Showcase واحنا في Gamezawy متحمسين جداً نشوف البثوث الجاية في شهر أغسطس سواء من سوني أو ميكروسوفت للإعلان عن المزيد من الألعاب وسعر وميعاد إصدار المنصتين PlayStation 5 و Xbox Series X.البث كامل كان مدته ساعتين ( الحدث نفسه والـ Pre Show ) ولكن من كل الألعاب الي ذكرناها فا Hello Neighbor 2 بس هي الي كانت في الـ Pre Show، لو حابب تتفرج على البث نفسه الي مدته ساعة تقدر تستمتع عن طريق الرابط ده.

Ahmed Yousry

About promidoz

Editor-in-Chief. About 5 years of experience in Gaming Journalism with more than 13k news written, tens of articles, video scripts and reviews. A hardcore gamer that loves a challenge.