أخبار اجهزه الفيديو, الأخبار, عن الألعاب, مؤتمرات, مقالات

إنطباع عن بث PlayStation 5 Showcase

blank

امبارح شوفنا بث PlayStation 5 Showcase والي كان فيه مجموعة من المفاجآت المميزة، ولكن في نفس الوقت في بعض العيوب الي ممكن تخليك تستنى لحد 2022 عشان تشتري الجهاز !

blank

بإختصار ديه أهم الألعاب الي كانت موجودة :

  • Demon’s Souls Remake
  • Final Fantasy 16
  • Resident Evil 8 Village
  • Spider Man Miles Morales
  • Call of Duty Black Ops Cold War
  • وتم إنهاء المؤتمر بعرض تشويقي للعبة God of War: Ragnarok

بالنسبة لألعاب الإصدار الي هتصدر مع الجهاز فا هما Demon’s Souls Remake و Godfall و Spider Man Miles Morales.

طبعاً اول ما هتشوف القائمة هتقول ان ديه قائمة ممتازة جداً وهتخليك تروح على طول تشتري الجهاز، خليني اقولك ان سوني اعلنت امبارح عن شوية حاجات ممكن تقفلك شوية من الجهاز خاصةً في وقت إصداره.

blank

أولاً لعبة زي Spider Man Miles Morales ديه نازلة على PlayStation 4 مش 5 بس فا لو معاك PlayStation 4 أنت مش محتاج الجهاز الجديد عشان اللعبة، غير كدة فا Kena Bridge of Spirits و Quantum Error و  Horizon II Forbidden West كلهم نازلين على PS4 كمان !

 ده معناه ان مفيش حصريات فعلية لمنصة PlayStation 5 في 2020 و 2021 غير Demon’s Souls و Ratchet and Clank Rift Apart. أكيد هتقولي اني نسيت God of War Ragnarok، بس انا احب اقولك انك اكيد عارف  سوني وعارف ان اللعبة بنسبة كبيرة هتتأجل لـ 2022 ومش هيبقى شيء مُفاجئ أصلاً لأن ده كان التُوقع الفعلي.

blank

حاجة تانية ممكن تشوفها على انها عيب هي الاسعار ( مش اسعار الجهاز ولكن اسعار الالعاب ). سوني أكدت ان اسعار العابها هتبقى 70 دولار أمريكي وديه للألعاب الضخمة زي مثلاً Horizon 2 و Demon’s Souls و God of War Ragnarok، إنما لعبة زي Spider Man Miles Morales فهي هتبقى 50 دولار، المفروض اصلاً اسعارهم تبقى 60 و 40 بس سوني قررت تغلي الاسعار عشان جيل جديد بقى .

سعر الجهاز نفسه ممتاز فأنت تقدر تاخد النسخة العادية بسعر 500 دولار أمريكي والنسخة الرقمية بسعر 400 دولار أمريكي، بس زي ما قولت العيب مش في سعر الجهاز لإن ده نفس سعر جهاز Xbox Series X، العيب هنا في ان سوني قررت انها تنزل تلتين حصرياتها في 2020 و 2021 على منصة PlayStation 4 وطبعاً بما إن السعر هيكون غالي وقت الإصدار فأنت أكيد هتفكر انك تستنى شوية.

blank

وشخصياً أقدر اقولك ان ده قرار سليم ، انت لسة معاك Spider Man و Horizon  و Kena و Quantum Error على PlayStation 4، لو فاتك حصريتين زي Ratchet and Clank و Demon’s Souls فأنت تقدر تجربهم عادي لما تجيب الجهاز في اواخر 2021 أو أوائل 2022.

بكدة يبقى استنيت شوية وسعر الجهاز هيرخص نسبياً خاصةً في مصر، وكمان يبقى استفدت اكثر استفادة من منصة PlayStation 4 لحد  ما نشوف في 2022 ان الالعاب الي هتنزل كلها بعد كدة هتبقى حصرية بس على منصة PlayStation 5. على العموم ده مجرد انطباع ورأي شخصي، شاركونا رأيكم في التعليقات وهل ناويين تشتروا فعلاً جهاز PlayStation 5 وقت الإصدار ولا هتستنى شوية وتستفيد بجهازك الحالي، كمان قولولنا ناويين تجيبوا النسخة العادية ولا النسخة الرقمية من الجهاز نظراً لأن السعر بينهم 100 دولار !

Ahmed Yousry

About Ahmed Yousry

Editor-in-Chief. About 5 years of experience in Gaming Journalism with more than 13k news written, tens of articles, video scripts and reviews. A hardcore gamer that loves a challenge.