أخبار اجهزه الفيديو, الأخبار

تفاصيل أكتر عن صورة يد تحكم DualSense المُسربة

blank

مساء الخير يا شباب، من يومين بالظبط نشرنا صورة على حسابتنا على المواقع التواصل الاجتماعي لشخص ماسك يد تحكم Dualsense الخاصة بمنصة PlayStation 5 في الحقيقة.

الصورة انتشرت بشكل ضخم جداً على كل مواقع التواصل الاجتماعي ومجموعة ضخمة من مواقع الجيمنج العالمية نشرت الصورة وبدأت انها تحط التويتة بتاعتنا طبعاً كمصدر للصورة. ديه مش المشكلة، المشكلة ان بعض المواقع من ضمنهم موقع عربي فاكرين ان احنا الي مصورين الصورة بنفسنا على الرغم من اننا مقولناش كدة خالص.

التويتة باين الي مكتوب فيها كالآتي : ” صورة جديدة مُسربة ليد تحكم Dualsense الخاصة بمنصة PlayStation 5

اظن واضح اننا مذكرناش خالص اننا الي مصورين الصورة وده كان رد بس سريع على بعض المواقع الي قالت اننا حاطين الصورة عشان نجيب تفاعل ولايكات، احنا حاطين الصورة لإن واضح انها صورة حقيقة وبالفعل مجموعة ضخمة من مصممين الصور والمحترفين في مختلف البرامج سواء على Reddit أو تويتر أكدوا ان الصورة مش متفبركة.

الصورة وصلتلنا من مصدر( منقدرش نتكلم عنه ) واحنا اخدنا الصورة ونشرناها بسرعة جداً ووضحنا انها صورة متسربة مش احنا الي مصورينها بنفسنا فا كون ان موقع عربي يكذبنا ويقول إننا بنشر أخبار لمجرد الشهرة فا ده شيء مش احترافي تماماً في نقل خبر !

لحد دلوقتي مفيش أي مصدر صريح ومعروف قال ان الصورة fake وبشكل عام الكل بيميل لإنها اقرب حاجة للحقيقة، جودة الصورة معدية الـ 2000 بيكسل فا ده كمان بيوضح انها مش fake ومش ملعوب فيها.

من الناحية الاخرى فا مفيش تأكيد 100% على ان الصورة حقيقة تماماً برضو واحنا بنفسنا مش متأكدين 100% من ان الصورة حقيقية عشان كدة احنا مستنيين نشوف لو هيتم نشر صور تانية أو هتوصلنا صور تانية ليد التحكم خلال الفترة الي جاية خاصةً وإن يد التحكم في الوقت الحالي بيتم تصنيعها هي ومنصة PlayStation 5 في اليابان عشان كدة في احتمالية انها تكون وصلت لأحد الأشخاص الي قدر انه يسرب شكلها.

في الاخر حابين نقول اننا فخورين بأن مجموعة كبيرة من المواقع الضخمة في مجال الجيمنج زي Gaming Bolt و Tech Radar و N4G وغيرهم نشروا الصورة التويتة بتاعتهم وكل المواقع العملاقة ديه بتقول ان الصورة هي فعلاً اقرب حاجة ممكن تكون حقيقية.

غير كدة فإحنا فخورين ان مجموعة كبيرة من المواقع الي نشرت التويتة زي Screen Rant و Tech Radar و Laptop Mag و Games Radar ذكرونا في كل أخبارهم كـ ” Retailer in Egypt “.

على العموم تابعونا على مواقع التواصل الاجتماعي المختلفة سواء على فيس بوك أو تويتر أو انستجرام عشان تشوفوا اخر الاخبار والتسريبات أول بأول.

blank

Ahmed Yousry

About Ahmed Yousry

Editor-in-Chief. About 5 years of experience in Gaming Journalism with more than 13k news written, tens of articles, video scripts and reviews. A hardcore gamer that loves a challenge.