عن الألعاب, مقالات

دراسة جودة Sleeping Dogs

blank

sleeping dogs  مش بس من أكتر الفيديو جيمز اللي استمتعت بيها، هي كمان واحدة من “الأعمال الفنية” اللي بتقدم تجربة مختلفة، بتعرفك بمكان وثقافة مختلفة تمامًا عن المألوف. الصين، وتحديدًا هونج كونج مكان عملاق ، وزحمة ومليان بشر وطبعًا هي مش مدينة فاضلة عشان تكون مدينة بلا جريمة، ولكن بالتأكيد الجريمة في الصين مختلفة عن الجريمة في أي مكان في العالم، وده اللي بتعرفك عليه اللعبة في تجربة هتحس بعدها إنك تعرف كتير عن الصين كدولة، أو زي ما تكون سافرت هناك قبل كده.
blank
كتير من الناس بيحط Sleeping Dogs في مقارنة مباشرة مع سلسلة Gta وطبعًا GTA هي اللي بتكسب، لكن أنا بحب أنظر للعبة Sleeping dogs علي إنها شيء مستقل بذاته، عشان أعرف استمتع بيه من غير ما أخلي العيوب تأثر بالسلب علي تجربتي.

الفكرة ورا Sleeping dogs كانت فعلًا العمل علي لعبة منافسة للعبة Gta ولكن كانت حركة قمة في الذكاء استخدام Setting مختلف بشكل كبير جدًا عن أغلب الألعاب في الوقت ده، وكذلك الاستفادة من أكتر من لعبة في تصميم Game mechanics مناسبة للمكان اللي بتحصل فيه الأحداث، بمعني إن بما إننا في الصين معقول مانشوفش شوية كونجفو حلوين؟
طبعًا لازم، وهنا كان موطن القوة الرئيسي في اللعبة، فالمهمات أغلبها مابتحتاجش أسلحة نارية علي الرغم من وجودها بوفرة في عالم اللعبة، لكنها اختارت تقدم نظام قتال قوي شبيه بنظام ألعاب Yakuza، أو Batman Arkham مع تفاصيل زيادة وهي الEnvironmental Killings ودي مجموعة من الfinish moves اللي بتم باستخدام حاجات في البيئة المحيطة زي مثلا أبواب العربيات، المرواح، واجهات المحلات، وده شيء بيخليك تحس بواقعية العالم من حواليك، وإزاي إن بإمكانك التفاعل معاه بشكل مختلف حسب المكان اللي انت فيه علي الخريطة،وده شيء بتفتقده ألعاب كتير زي مثلًا مافيا 3 اللي صدرت بعد sleeping dogs بزمن طويل.

blank

القصة

قصة اللعبة بطلها شخصية واي تشن، وهو ظابط بيتم تكليفه بمهمة اختراق عصابة Sun On yee وهي أحد عصابات المافيا الصينية، أو الثالوث (Triads) في أحد مناطق هونج كونج اللي اسمها Water Street، وبداية اللعبة بتكون بصفقة مخدرات بيتم القبض فيها علي وي شن عشان يروح السجن، ويقابل صديقه منذ الطفولة جاكي، اللي هو أحد أعضاء العصابة، وهيقدمه ليهم عشان شن ينضملهم.
القصة مكتوبة بطريقة شبيهة شوية بأفلام الجرايم أو الأكشن الصينية، أو سلسلة أفلام Rush Hour، واللي بيميز النوعين دول من الأفلام هو النبرة الخفيفة، وان البطل -في أغلب الأوقات- بتحس إنه أقوي من اللي حواليه وأذكي منهم بشكل ملحوظ، وده عشان مايعقدلكش القصة بشكل يخليها قصة واقعية زيادة عن اللزوم أو مظلمة، وده شيء تم بناء معظم ميكانيكس اللعب عليه وده عنصر هنجيله بعدين.

القصة مابتفضلش بالشكل ده طول الأحداث، بل في التلت الأخير بيكون في شوية التواءات (Plot twists) قوية جدًا، ومفاجأة، وده بيخلي تجربة القصة بالنسبالي تكون رائعة وتفي جدًا بالغرض، لكن لو سألتني أيه أفضل شيء في اللعبة، هقولك العالم ويليه ميكيانكيات اللعب.

شخصية وي شن دايمًا بيتم التلميح لكونها شخصية مش سهلة، وإن ليها ماضي مع العصابات دي حتي قبل الإنضمام للشرطة، وكذلك بعض الأفعال اللي عملها لا تبدو بنوايا كويسة، ودي عناصر حلوة دايمًا لما تكون في بطل قصتك عشان بتديه لمسة واقعية مطلوبة في أي قصة.
blank

 وجود طقم شخصيات جانبية قوي بيخلي القصة ممتعة في اللحظات اللي بيخرج فيها وي شن عن كونه مركز الاهتمام، واستمتعت بشخصياتهم خاصة أفراد العصابة وتمثيلهم كان ممتاز وفريد من نوعه وميزته الرئيسية إنه مزيج بين الواقعية، والسلاسة، يعني محستش إن حد من الممثلين كان حضورة علي الشاشة تقيل، علي الرغم من إن اللعبة اعتمدت علي الحوارات بشكل كبير، فاق توقعاتي لإن بدايتها كانت بتوحي إن القصة هابقي زي أي فيلم Pop corn movie غرضه التسلية والأكشن، لكن اللعبة نجحت في توفير ده، وكمان استغلال إن وقتها 30 ساعة في تعميق علاقات الشخصيات روابطهم ببعض، وإظهار جوانب مختلفة منهم.

الجيم بلاي ميكانيكس

علي البلايستيشن 2 لعبت لعبة اسمها Rise to honor من بطولة Jet Li، وكانت المعارك فيها عبارة عن تجسيد لأسلوب القتالات اللي بنشوفه في أفلام الأكشن الخاصة بجت لي وجاكي تشان، كانت مبهرة وعمرك ما تزهق من المعارك بسبب كميات الcombos والحركات اللي ممكن تعملها، ولما شوفت اعلان sleeping dogs قبل صدورها بفترة عرفت إن اللعبة دي أنا هحب ألعبها لإن ببساطة مكنش في لعبة بتقدم أسلوب المعارك بالقوة دي من بعد Rise to honor، واكتشفت بعد ما خلصت sleeping dogs إن كمان سلسلة ياكوزا بتقدم أسلوب معارك قوي زي ده، واللي أقصده بأسلوب المعارك ده هو أسلوب معتمد بشكل رئيسي علي المارشال أرتس أو الكونجفو بما إنك في الصين، وليس علي الأسلحة النارية علي الرغم في عالم شبيه بعالم Gta، ولكن كل العصابات بتعرف تلعب كونجفو تقريبًا…
blank

عظمة sleeping dogs في معاركها كانت في إمكانية التفاعل مع البيئات زي ما ذكرت، لكن مش بس كده هي كمان كانت مقدمة معارك بأسلحة نارية ممتازة وأسلوب تصويب كويس جدًا ونظام Time cooldown شبيه شوية بماكس بين 3. نقطة المعارك بدون أسلحة نارية دي عمرها ما كانت نقطة قوة GTA علي الرغم من عظمتها، ودايمًا كان بيبقي الخيارات المتاحة قدامك هي الأسلحة النارية فقط، عشان كده دي كانت نقطة تميز للعبة دي عن GTA
طبعًا اللعبة خرجت من المقارنة مع لعبة ياكوزا في لحظة تضمنها إمكانية قيادة السيارات، وعلي الرغم من إن القيادة كانت أركيدية شويتين، لكن كانت تفي جدًا بالغرض، بل كان كمان في Game mechanic فريد من نوعه بيتيح ليك تنط علي أي عربية غير عربيتك وتسرقها وهي ماشية بأي سرعة، الموضوع شبيه بباتمان وهو بينط علي العربيات عشان يستجوب السواق، وده يعتبر تداخل أو دمج بين ميكانيكيات القتال اليدوي، والسواقة بشكل ممتاز.
blank

تصميم المدينة:

الحقيقة السبب كتابتي للمقال ده هو حبي للعنصر ده من اللعبة أكتر من أي حاجة تانية، في بعض الألعاب اللي بتحس إنك في مدينة مصممة بشكل حلو لكن مشابهة لبعضها، ومن أكتر المدن اللي حسيت فيها كده كانت شيكاجو من واتش دوجز 1، لكن هونج كونج هنا علي الرغم من صغر حجمها نسبيًا إلا إنها فيها جميع المظاهر اللي ممكن تتخيلها عن الصين، فيها أسواق السمك -والمخلوقات الغريبة اللي بياكلوها- الواسعة المزدحمة، وفيها مراكب الصيد اللي بتبقي مالية الشواطيء صبح وليل. كل مواطن بيعمل نشاط محدد، وشكلهم مليان حيوية وواقعية، كذلك الشوارع في منها الواسع والضيق، الأحياء الفقيرة والغنية، كل منطقة مختلفة عن التانية بشكل ممتاز.
blank

انت حرفيًا داخل simulator للصين، مش مجرد عالم افتراضي شبه هونج كونج وخلاص، حتي وإن في حاجة اتعملت في اللعبة عرفت إنها حقيقية لاحقًا، عربيات الإسعاف والمطافي كلهم عرضهم أقل من الطبيعي، ولما صادفت الموضوع ده افتكرت إنه بسبب إن المطور حابب يعمل نماذج مجسمة صغيرة الحجم من العربيات دي لكن اكتشفت إن ده حقيقي موجود في الصين، كل العربيات الحكومية عرضها أقل علشان الشوارع أضيق من معظم البلاد! حاجة مكنتش هركز فيها أو أعرفها بدون sleeping dogs.
العالم كمان كان بيبقي فيه نوع من أنواع الrandom events في شيء شبيه باللي شوفناه في RDR2 بس كان من نوع واحد فقط، وهو إن يتم سرقتك عن طريق نشال ما في الشارع بشكل مفاجيء، وتفضل تطارده عشان تستعيد فلوسك. الموضوع اتعمل بابتكار أكتر كمان في أحد المرات وكان في بنت العربية بتاعتها عطلانة علي طريق سريع وبتطلب منك مساعدتها، وطبعًا انت بتفرح بجمال الموضوع وبتفتكر إنها هتديك مهمة مثلًا، بيجي النشال يسرقك وأنت مركز معاها ويجري، وطبعًا بتفضل تجري وراه وسط العربيات علي الطريق السريع في مطاردة ملحمية علي الرغم من كونها مش داخل مهمة أصلًا أو مش Scripted event ولكن حدث كان ممكن جدًا تجاهله.

المحتوي:

للأسف اللعبة مكانتش بالنضج الكافي اللي تقدم بيه محتوي جانبي شديد التنوع، بل إن النشاطات الجانبية هي كام نوع متكررين كتير علي الخريطة وخلاص، وده مكنش وحش بالنسبالي لإني كنت حابب كل النشاطات الصراحة خصوصًا إن في حاجات بتخليك تلعب Mini games وحاجات تخليك “تشوف المدية” أكتر. في مجموعة من المهمات الجانبية معمولة حلو كانت خاصة بعلاقات شن الغرامية، بتتعرف علي شخصيات نسائية وتخرج معاهم في مكان وتعملوا أي نشاط، في أحد المهمات كان في شخصية اسمها أماندا سائحة أمريكية تايهة بتدور علي Gym أو صالة لتعليم المارشال أرتس (القتال) بتساعدها، وبعدين بتاخدها في مكان سياحي كانت بتدور عليه، وتاخدلها شوية صور، في مهمات زي كده كتير وحتي غير خاصة بالمواعدة، في مجموعة مهمات جانبية بتكون عبارة عن قصص صغيرة مصممة بشكل ممتاز، لكن فيما عدا ذلك في بقي مهمات البوليس بتبقي عبارة عن مواجهات مع عصابا في سطو مسلح، أو حالات خطف، وفي مهمات السباقات، وفي مهمات بتطلب منك سرقة عربيات البنوك وتوصيلها للعصابة.
المحتوي بشكل عام من جيد إلي جيد جدًا لكن طبعًا في حالة وجود جزء جديد هيحتاج إعادة هيكلة بشكل مقبول عصري أكتر لإن التكرا أصبح شيء غير مقبول إطلاقًا.

blank

الريماستر والمحتويات الإضافية:

علي الجيل الحالي قررت سكوير إينكس إنها تنزل النسخة المحسنة للجيل الجديد، معاها جميع الإضافات اللي نزلت للعبة، وفي الحقيقة اللعبة علي بلايستيشن 4 شكلها كأنها لعبة جيل جديد، بجانب إن الإضافات كمان قدمت محتوي مختلف عن المحتوي الأصلي، كل إضافة كانت في  Nightmare in northpoint و Year of the snakeاتجاه، ولكن في إضافتين بالأخص يستاهلوا تجربهم وهو في الأولي القصة بتاخد طابع رعب أو خارق للعادة، والأعداء بيكون عندهم قدرات خاصة، وقصتها كويسة ومتقدمة بشكل مختلف خالص عن القصة الأصلية، في الإضافة التانية انت بترجع تمار دورك كشرطي، وبتحقق في مجموعة جرايم في فترة رأس السنة الصينية، وده أكتر وقت كنت حابب أشوف الصين فيه وفعلًا في تغييرات شكلية ممتازة علي العالم في الإضافة دي خاصة في الأسواق وأجواء الاحتفالات.

النسخة المحسنة بشكل عام هي أفضل تجربة ممكنة للعبة سواء بسبب التحسن الرسومي، أو حتي توافر الإضافات كلها اللي بتقدم محتوي جيد جدًا، بنبرة مختلفة عن اللعبة الأصلية بتبين قد إيه المطور عنده فكر مرن يقدر يعمل بنفس اللعبة كذا لون .

في الآخر:

لو قولنا إن sleeping dogs هي Yakuza + Gta هيكون كلام واقعي ،لكن برضو هنكون بنبخس حقها،وبنبصلها بنظرة سطحية، هي لعبة عظيمة وممتعة ،ولو طلبت مني أقيمها برقم هديها 10/10 مش لإنها قدمت أفكار ثورية، ولكنها جمعت بين مجموعة أفكار،في قالب مصمم باحترافية لا توصف (عالم اللعبة) وكل ميكانك من الميكانكس مصمم بجودة عالية، خلتني أحصل علي تجربة مانستنهاش لحد دلوقتي في 2020 مع إني لعبتها وقت ما نزلت في 2012!
مع احتمالية رؤية جزء جديد، فلازم نتكلم عن عظمة وجمال الجزء القديم في تجسيد هونج كونج، في رحلة ثقافية جميلة، بتعرفك علي أسلوب حياة وأشكال مدن وأحياء الناس دي، عن طريق أسلوب لعب وقصة ممتازين.

Mostafa Argoun

About Mostafa Argoun

محرر في مجال الألعاب منذ عام 2012 بعتبر الألعاب فن، وبحب ألعاب القصة والأر بي جي بشكل رئيسي