Gaming News, News, Reviews

مراجعة Biomutant

blank

لعبة Biomutant كانت واحدة من الألعاب الي اتحمستلها بشكل كبير جداً من أول إستعراض نزل ليها في 2017، حطيت آمال كبيرة على إستوديو Experiment 101 إنه يقدملنا تجربة مميزة ومختلفة خاصةً إن شركة THQ Nordic هي الي دعمت الإستوديو ونشرت اللعبة، ولكن للأسف الإستوديو يعتبر نجح وفشل في نفس الوقت بتقديم تجربة غريبة ومش مفهومة !

blank

قصة Biomutant بتتكلم عن إن العالم اتدمر والبشر انقرضوا ومبقاش عايش فيه غير مجموعة من الكائنات المتحولة والمخلوقات الغريبة، العالم كله مُهدد بالإنقراض بسبب 5 وحوش بيهاجموا شجرة الحياة وهدفك في اللعبة إنك تقضي على الوحوش ديه قبل ما يدمروا الشجرة وفي نفس الوقت اللعبة فيها قصة إنتقام خفيفة كدة من الكائن الي قتل عائلة البطل الي بتلعب بيه والي هو واحد من المخلوقات الغريبة الي فضلت عايشة على كوكب الأرض.

القصة مش كبيرة، لو ركزت على القصة نفسها بشكل أساسي فا هي هتاخد منك في حدود الـ 10 ساعات تقريباً ولو قررت تنهي مجموعة من المهام الجانبية فالتجربة ممكن توصل معاك لـ 15 أو 20 ساعة وديه أقل بكتير من الإستوديو ذكره لإن  الإستوديو قال إن اللعبة ممكن توصل لـ 60 ساعة وديه حاجة انا شايفها مستحيلة إلا لو الي بيلعب كان سلحفة.

واحدة من مشاكل اللعبة الأساسية هي طريقة عرض القصة، شخصيات اللعبة كلها بتتكلم بلغات غير مفهومة وديه حاجة مش وحشة لإن كان ممكن كلامهم يتترجم وخلاص، لا انت بتكون مضطر إنك تسمع قصة اللعبة عن طريق الراوي الي بيحكيلك كل تفصيلة في العالم وكمان بيترجم كلام كل الشخصيات. خلينا نسيب النقطة ديه لما نيجي لكلامنا على الحوارات والأصوات في اللعبة عشان اوضحها بشكل اكبر.

blank

Biomutant هي لعبة عالم مفتوح والعالم فعلاً كبير، بس المشكلة انه كبير زيادة عن اللزوم، العالم مليان اماكن كتير حلوة وتحب تستشكف فيها وتاخد صور مميزة بالـ Photo Mode ولكنه عالم فارغ، مفيهوش اي حاجة مميزة بتحصل حواليك ومفيش Npcs كتير هتقابلهم.

نظام الإستكشاف في اللعبة عبارة عن إنك بتروح مكان وتدور في كوم من القمامة أو في صناديق على حاجات وتاخدها، بس كدة خلاص، اللعبة كمان بتقدم ألغاز ولكنها أتفه ألغاز شوفتها في حياتي وبتطلب منك انك تخلي الالوان شبه بعض وخلاص، مفيهاش تفكير ومفيهاش عواقب بتأثر عليك على المدى البعيد لو غلطت ولا اي حاجة، هي موجودة عشان تعوق تقدمك لمدة كام ثانية لحد ما تخلص حل اللغز.

نيجي بقى للحاجة الحلوة الي بتقدمهالك Biomutant وهي نظام المواجهات، اللعبة بتدمج عناصر كتير في بعض زي إنها بتقدم تجربة Hack and Slash ولكنها في نفس الوقت تجربة Shooter كمان مع وجود عناصر RPG. اللعبة فيها ترسانة أسلحة كبيرة، على الاقل هتلاقي 5 أسلحة Melee زي سيف وايد حديدية،  ده غير كمان الأسلحة بعيدة المدى زي البنادق والمسدسات. كل سلاح منهم  هيفيدك في المواجهات بس انت ممكن من اول اللعبة لأخرها تستخدم نفس السلاح و خلاص وهتعرف تخلص كل المهمات فا وجود الكم ده من الاسلحة مش مفيد ليك بأي شكل.

blank

في بداية اللعبة هتصمم شخصيتك والي بتقدر تظبط شكلها ولونها وكمان قدراتها الأولية زي الذكاء ومدى تحملها مثلاً للحرارة والتلوث وغيرها من الأخطار الطبيعية الموجودة في البيئة، إستكشافك في اللعبة وبحثك عن الموارد هيخليك تزود من مستواك وبكدة هتقدر تعلي من صحتك وقدرتك على المقاومة والركض بسرعة أكبار، كمان بتلاقي نقاط ذكاء بتقدر تفتح منها قدرات مختلفة بتساعدك في المواجهات زي إنك تعمل Dash سريع أو تصيب الاعداء بالنار والتلوث.

لما تقرأ الي انا قولته عن نظام المواجهات هتحس إنه فعلاً بيقدم تجربة مميزة ولكن للأسف ديه مش الحقيقة لإن الأعداء الي بتواجههم هما أكتر اعداء مملين في الكون. على الرغم من إن تصميم الأعداء مختلف ومميز ( هتكلم عن النقطة ديه اكتر كمان شوية ) إلا إنهم بيعانوا من التكرار والتشابه الكبير، بإختصار انت هتتعود على اسلوب مواجهات واحد وهتفضل تستخدمه في اللعبة من أولها لأخرها وده هيزود من الملل.

blank

قيس على كدة كل حاجة في عالم ومهمات اللعبة، اللعبة بتتقسم لمهمات Fetch Quests أو الهجوم على مقر للأعداء أو مواجهة الزعماء، مواجهة الزعماء هي اكتر حاجة هتحسسك بالمتعة لإنهم بيقدموا تجربة صعبة نسبياً وكمان كل زعيم منهم له أسلوب مواجهة خاص ومميز. اللعبة فيها مجموعة كبيرة من القبائل ولما تتحد مع قبيلة مُعينة هتقدر تستخدم الإتحاد ده بإنك تهاجم على قبائل تانية وتستحوذ عليها وتقتل زعمائها أو انك تراضيهم بشكل طيب وتخليهم ينضموا ليك ويبقوا تحت سيطرتك.

اللعبة فيها Moral System وهو إن النهاية هتتأثر بأفعالك في اللعبة، لو عملت أفعال كتير مظلمة هتكون متجه أكتر لجانب الشر والظلام ولو عملت أفعال كتير طيبة هتتجه أكتر لجانب النور. الفكرة لذيذة ومعمولة بشكل حلو وفعلاً بتأثر على النهاية لإن اللعبة ليها نهايتين مختلفتين تماماً عن بعض على حسب توجهك لأنهي جانب منهم.

blank

اللعبة بتستخدم محرك Unreal Engine 4 والرسومات هتشدك من أول نظرة، اللعبة بتاخد طابع كرتوني للرسومات وهتحس انه قريب من Fortnite شوية وديه حاجة مش وحشة إطلاقاً لإنها بتدي لـ Biomutant شكل مميز وطابع خاص بيها. تصميم البيئات المُنوعة ممتاز وتصميم الأعداء مختلف وبيخلي كل قبيلة وكل وحش هتقابله يظهر بشكل مميز وفريد من نوعه.

على الرغم من إن العالم هتحسه انه ممتاز رسومياً إلا انه مفيهوش تفاصيل، هتيجي تقرب من الحوائط والأرضيات هتلاقي ان الـ Textures ضعيفة جداً وبيحصل Pop in كتير. كمان الإستوديو اهتم اكتر بتصميم العالم الخارجي ونسى انه عامل كهوف ومهام تحت الأرض والي محصلتش على نفس الإهتمام ده عشان كدة في تفاوت ملحوظ في مستوى اللعبة الرسومي.

زي ما وضحت في كلامي عن القصة فاللعبة يعتبر مفيهاش تمثيل صوتي، كل الشخصيات المتواجدة في عالم اللعبة بتتكلم بلغات غير مفهومة والراوي الإنجليزي بيترجملك الكلام، خليني اقولكم ان الراجل ده هو اكتر حاجة مزعجة في اللعبة ولو الإستوديو معهوش ميزانية إنه يجيب ممثلين صوتيين كان ممكن يخلي الشخصيات تتكلم بالطريقة الغير مفهومة ديه ويحط ترجمة وخلاص بدل ما اكون مضطر اني افضل اسمع الحوارات مرتين عشان احاول افهم القصة. الموضوع ده كمان مخلي ان الشخصيات ملهاش شخصية بالمعنى الحرفي وكل NPC هتحسه شبه التاني بالظبط !

blank

الشخصيات التانية الي بتتكلم نقدر نوصفهم بالملاك والشيطان، جانب الخير وجانب الشر فيك ودول بيظهروا لما تاخد قرار متعلق بالـ Moral System وأدائهم التمثيلي كان ممتاز وكان مديلهم روح خاصة كدة.  الموسيقى التصويرية في اللعبة مش بطالة ولكنها في نفس الوقت مش catchy ومش هتفتكر منها حاجات كتير لما تخلص اللعبة، كمان Biomutant بتعاني من مشكلة في mix الاصوات وهي ان في اصوات واطية جداً في البيئة واصوات تانية عالية جداً وده هيخليك مستغرب أحياناً في المواجهات لما تحس ان السلاح بتاعك مش بيعمل حاجة لإن مفيش ردة فعل صوتية توضحلك الي بيحصل.

تجربتي للعبة كانت على Xbox Series S، اللعبة بتقدملك طريقتين لتجربتها، الأولى بإنك تخلي الدقة 1440p وهتاخد 30 فريم في الثانية أو ممكن تخلي الدقة 1080p في مقابل الحصول على 60 فريم، حاجة حلوة إن الإستوديو مديك الإختيار تستمتع بتجربة سينمائية أو تجربة  أكثر سلاسة.

اللعبة مُترجمة بالكامل ( نصوص وقوائم  ) للغة العربية ولو أنت مش كويس أوي في اللغة الإنجليزية فمتقلقش لإنك مش هتحتاجها في Biomutant.

blank

الخلاصة :

أنا عارف إن لعبة Biomutant إشتغل عليها إستوديو صغير مُكون من 20 شخص وعارف إنها لعبة مش AAA ولكن الإستوديو غلط بإنهم حطوا قدامهم أهداف وآمال أعلى من مستواهم بكتير، غير كدة فأنت مسعر اللعبة بـ 60 دولار الي هو سعر لعبة AAA وبالشكل ده انت كإستوديو وكشركة ناشرة حطيتم نفسكم في موقف مش كويس لإن اللعبة بنسبة 100% متستحقش يتدفع فيها 60 دولار كاملين إطلاقاً !

اللعبة مش تجربة سيئة بالكامل وفيها أفكار لذيذة ولكنها بشكل عام بتقع في فخ إنها مش فاهمة هي عايزة تقدملك إيه بالظبط، لو هتقدر تتغاضى عن العيوب الي ذكرناها ولسة متحمس لتجربة اللعبة على منصة Xbox، فإحنا بنقدملك اللعبة بأفضل سعر، تقدر تشتري اللعبة كود أو أكونت من الرابط ده.

التقييم النهائي : 6/10

Ahmed Yousry

About Ahmed Yousry

Editor-in-Chief. About 5 years of experience in Gaming Journalism with more than 13k news written, tens of articles, video scripts and reviews. A hardcore gamer that loves a challenge.