Articles, News, Reviews

مراجعة Cyberpunk 2077

blank

إصدار Cyberpunk 2077 كان كارثي على أجهزة الكونسول، كمية ضخمة من المشاكل التقنية وأخطاء غريبة جداً محدش كان متوقعها، ده غير كمان إن PlayStation قرروا يشيلوا اللعبة من المتجر بتاعهم. لحسن الحظ إستوديو CD Projekt RED مفضلش ساكت واستمر في إطلاق تحديثات كتير للعبة حسنت من أدائها ورسوماتها على الكونسول وحالياً اللعبة بقت بتقدم تجربة كويسة جداً.

المراجعة ديه هتكون على الجيل الماضي تحديداً على جهاز PlayStation 4 Slim وقريب جداً هنعمل مراجعة تانية للعبة على الجيل الجديد عشان نشوف الفرق ومدى تحسن اللعبة على الأجهزة الجديدة. هل Cyberpunk 2077 وصلت للمستوى الي كان متوقعه اللاعبين ؟ ده الي هنعرفه مع بعض دلوقتي.

blank

في Cyberpunk 2077 أنت بتلعب بشخصية V ( بتختار راجل أو ست ) وفي البداية بيكون ليك إختيارات لتاريخ حياتك، بتقدر تختار بين Street Kid و Corpo و Nomad، الفرق بين التلاتة بيبقى في أول نص ساعة بس من اللعبة وكمان بيكون في إختيارات مختلفة في الكلام مع بعض الشخصيات، إنما الإختيار ده مش هيأثر على نهاية اللعبة ولا القصة بعد كدة.

شخصية V عبارة عن مرتزقة، بيعمل مهمات سواء سرقة أو قتل أو عقد إتفاقات مقابل الفلوس والشهرة في Night City. في واحدة من المهمات بتضطر إنك تسرق شريحة من شركة Arasaka والي تعتبر أضخم شركة في مدينة Night City، لو مهمتك نجحت فأنت هتكون من أغنى الناس في المدينة وشهرتك هتبقى ضخمة.

بس زي ما كان واضح من الإعلانات الي نزلت للعبة المهمة ديه بتفشل والحاوية الي كانت فيها الشريحة بتدمر، مقدمكش حل غير إن الشريحة ديه تدخل دماغك وعلى الرغم من وجود خوف إلا إن الشريحة هي الي هترجعك من الموت مرة تانية.

blank

المفاجأة هي إن الشريحة ديه فيها الروح الرقمية لشخصية Johnny Silverhand الي بيقدمها الممثل العظيم Keanu Reeves وعاجلاً أم أجلاً هيبقى له سيطرة كلية على  جسدك. هدفك الرئيسي في اللعبة هو إنك تخرج الشريحة من دماغك عشان تقدر تعيش فهل هتقدر تعمل كدة ؟ طب وهتعمل إيه في Johnny، هتقدر تخليه صديق ولا عدو ليك ؟ كل حاجة في اللعبة ليها إختيارات واي حاجة انت بتعملها هتأثر على النهاية. اللعبة فيها 6 نهايات رئيسية كلهم مختلفين عن بعض فا ركز في إختيارك عشان تقدر توصل لأفضل نهاية !

قصة Cyberpunk 2077 مش طويلة، انا خلصت القصة ووصلت لكل النهايات في حدود 28 ساعة فا نقدر نقول إن متوسط تجربتك للعبة هتكون 30 ساعة لو ركزت على القصة مع شوية مهمات جانبية. لو حبيت تخلص كل حاجة وتاخد كل الـ Trophies فالتجربة هتعدي معاك 80 ساعة مستريح أوي.

مهمات القصة مفيهاش ملل إطلاقاً ودايماً هتلاقي كل مهمة بتقدملك أفكار وشخصيات جديدة مميزة جداً، الموضوع ده متطبق كمان في المهام الجانبية لدرجة تخليني أقول إن مهمات Cyberpunk 2077 الجانبية تتفوق على مهمات رئيسية في ألعاب ضخمة من شركات معروفة. Cyberpunk تعتبر واحدة من الألعاب الي هتحمسك تسيب كل حاجة في العالم وتفضل مكمل في المهمات الجانبية عشان تنهي قصة واحدة من الشخصيات المميزة الي اتعرفت عليها في Night City.

blank

من أكتر الحاجات الي عجبتني في Cyberpunk 2077 هي إنها تجربة من منظور الشخص الأول، دايماً الفيرست بيرسون بيساعد على غمرك في اللعبة وإستوديو CD Projekt RED نجح في كدة على الرغم من إن ديه أول تجربة للإستوديو من منظور الشخص الأول.

أسلوب لعب Cyberpunk 2077 عميق جداً وبيضم حاجات كتير مميزة، خلونا نبدأ بالأساسيات الأول، المواجهات في اللعبة بتعتمد على نظامين أساسيين، المواجهات المباشرة والتخفي والتسلل وديه أول مرة الإستوديو يقدم فيها تجربة تخفي، للأسف التجربة مش أفضل حاجة بسبب ذكاء الأعداء المتواضع وكمان لما تفكر تقتل عدو بطريقة التخفي بتحس إن الـ Animations بتتكرر كتير فالموضوع بيكون ممل وبطئ عشان كدة هتتجه للمواجهات المباشرة.

اللعبة بقى بتتألق جداً في المواجهات المباشرة خاصةً مع وجود عدد كبير من الأعداء على الشاشة، سايبر بانك بتقدم مجموعة رائعة من الأسلحة، في البداية هتكون أسلحة ضعيفة ولكن مع الوقت هتاخد نسخ متطورة منها وأسلحة مستقبلية كتير هتديك قوة في المواجهات. كمان اللعبة فيها نظام مواجهات يدوي بتقدر تستخدم فيه سيوف Katana ومجموعة سكاكين ولكن متمش إستخدامه بشكل كويس، يعني مثلاً الإستوديو مضافش أعداء لازم تموتهم بالسيوف فعلى الرغم من إنهم بيقدموا تجربة جيدة إلا إن وجود المواجهات اليدوية والأسلحة البيضاء في اللعبة مبيقدموش أي إضافة مميزة.

blank

في مجموعة Set Pieces حلوة جداً في اللعبة من مطاردات لإختراقات وتهكير و Netrunning ولكنها متمش الإستفادة منها بشكل كبير ودايماً بتحس بتكرار فيها. زي أي لعبة RPG فا Cyberpunk 2077 بتقدملك شجرة مهارات ولكنها ضعيفة جداً ومعظم المهارات الي فيها مش بتقدم حاجة مبتكرة، هي بشكل عام شجرة مهارات موجودة عشان تزودلك حياتك شوية وتخليك تصمد وقت أكتر قدام الأعداء مع زيادة ضئيلة في قوة الأسلحة بتاعتك.

مفيش غير كام مهارة هما الي فعلاً هيحسسوك بفرق في اللعبة زي الـ Double Jumping مثلاً. كمان اللعبة بتقدملك Cyberware وديه عبارة عن شوية إضافات كدة لجسمك الآلي بتقدملك أطرف صناعية بس مش بتأثر بشكل ضخم على أسلوب اللعب.

مدينة Night City على الرغم من إنها مدينة تصميمها ممتاز تقنياً إلا إن متمش إستغلالها بأي شكل من الأشكال، حتى مش بيكون في دافع عشان تتجول في المدينة لإنها تعتبر ميتة بسبب الـ NPCs الي ملهومش أي دور ولا شخصية في عالم اللعبة. إفتكروا معايا GTA V و Red Dead Redemption 2 وازاي بتقدر تتفاعل مع الشخصيات الغير قابلة للعب. لما تجرب اللعبتين دول وترجع تجرب Cyberpunk هتحس إنها نزلت من 2010 مش لعبة في 2020. كمان من أكتر الحاجات الي تضايق هي الذكاء الإصطناعي، أثناء المواجهات ممكن نتغاضى عن الموضوع لما تلعب على صعوبات عالية وهتحس بتحدي أحياناً، المشكلة في ذكاء الشرطة الإصطناعي، لو ارتكبت جريمة فالشرطة مش بتطاردك بل بتظهر قدامك فجأة كدة من اللاشيء ولو قررت تهرب منهم الموضوع مش هياخد منك 20 ثانية وهتبقى في أمان بعيداً عن الشرطة.

الفيزيائية بتاعت اللعبة تعتبر منعدمة، بيئة اللعبة مش واقعية وملهاش أي ردة فعل على أي حاجة انت بتعملها. انت عمرك ما هتاخد عالم Cyberpunk 2077 على محمل الجد زي عالم Red Dead Redemption 2 لإن عالم Cyberpunk بيقولك أنا عالم جوا لعبة بس مفيش حاجة فيا منطقية وديه مشكلة ضخمة لإن المفروض تكنولوجيا صناعة الألعاب بتتطور كل مدى مش بتتأخر !

blank

اللعبة مبنية على نسخة محسنة من Red Engine التابع لإستوديو CD Projekt RED  والي تم تطوير لعبة The Witcher 3 بيه. الفرق شاسع طبعاً بين رسومات ويتشر 3 و Cyberpunk، مدينة Night City مليانة تفاصيل مميزة بتجذب العين ليها من الإعلانات الي هتشوفها لتصميم المباني والأماكن الي جواها.

من الحاجات الي حبيتها جداً في اللعبة هي تصميم الشخصيات سواء كانت الشخصيات الأساسية أو الجانبية، كل شخصية فيها تفاصيل مميزة جداً في الملابس والبشرة والمحرك قدر انه يعمل Animations ممتازة في كل المشاهد السينمائية. حركة الشفايف في اللعبة مش معمولة بالإيد بل بتقنية ذكاء إصطناعي إسمها JALI. أول مرة نشوف تقنية زي كدة في لعبة وعلى الرغم من إنها مش مثالية إلا انها أفضل من حركة الشفايف في كل ألعاب العالم المفتوح الي نزلت في 2020 وأتوقع ان التقنية هتتقدم بشكل ضخم خلال السنين الي جاية.

الرسومات على أجهزة الكونسول للجيل الماضي تتقارن بـ Medium على الحاسب الشخصي مع إغلاق بعض المزايا. لو معاك Xbox Series X أو Series S فالجرافيك على المنصتين دول متحسن جداً حتى أكتر من PlayStation 5 بس التجربة الأفضل هتكون على الحاسب الشخصي مع تفعيل تقنية تتبع الأشعة لو جهازك يقدر يستحملها.

blank

الصوتيات في اللعبة مثالية بمعنى الكلمة، الأداء التمثيلي لكل الشخصيات خرافي بس أداء Keanu Reeves لشخصية Johnny Silverhand هو أفضل أداء تمثيلي شوفته من فترة طويلة، مشاعر مختلفة ممكن تظهر في مشاهد سينمائي واحد، غضب وخوف وأحياناً فرحة وحزن وكل حاجة فيهم الممثل قدر يقدمها بشكل مميز. الشخصية الرئيسية كمان V دورها ممتاز جداً سواء إختارت راجل او ست والاتنين قدموا اداء تمثيلي ممتاز. الشخصيات الجانبية كلها زي Judy و Panam و Jackie كلهم قدموا أداء تمثيلي حلو جداً على قد دورهم في اللعبة وهتستمتع بتمثيل إحترافي كل مرة هيظهروا على الشاشة.

الأهم من ده بالنسبالي هي الموسيقى ، الملحن العبقري Marcin Przybyłowicz بيرجع مرة تانية في Cyberpunk 2077 بتقديم موسيقى هتدخلك في عالم اللعبة وهتتحسك انك جزء منه فعلاً. والي يدل على مدى عبقرية الملحن هو انه استخدم أغنية مُعينة في مشهدين مختلفين في اللعبة ، مشهد حماسي وأكشن ومشهد تاني مؤثر وحزين وفي المرتين انت حسيت بالمشاعر الي هو عايز يوصلهالك.

كمان إستوديو CD Projekt RED اتعاقد مع عشرات الملحنين والمغنيين الي صمموا أغاني مخصوص لعالم Cyberpunk 2077 واكتر الاوقات الي هتسمع فيها الأغاني ديه هتكون في راديو العربية أو الدراجة النارية بتاعتك وانت بتتجول في Night City. لو أنت مُقدم محتوى سواء على YouTube أو Twitch وخايف إن الأغاني يكون عليها حقوق نشر فأنت تقدر تقفل كل الأغاني الي عليها حقوق نشر من إعدادات اللعبة وكدة انت هتكون في السليم.

blank

نسخة الشرق الأوسط من اللعبة جاية بترجمة كاملة للنصوص والقوائم باللغة العربية، الترجمة متقدمة بشكل كويس جداً في اللعبة ولكن فيها بعض العيوب البسيطة لبعض المصطلحات الخاصة بعالم Cyberpunk. كمان اللعبة فيها خاصية في القوائم بتخليك تقفل مشاهد العري تماماً الي في منها كتير في القصة وديه حاجة وجودها ممتاز.

بالنسبة لأداء اللعبة التقني فوقت الإصدار اللعبة كانت بتعاني من مشاكل ضخمة على الكونسول، تجربتي للعبة على PS4 Slim يوم الإصدار كانت مش جيدة إطلاقاً، اللعبة كانت شغالة على دقة 720p والفريمات بتقل لـ 20 فريم في الثانية ده غير الجليتشات الكتير الي كنت بتلاقيها في كل حتة قدامك وكمان جودة الصورة كانت بهتانة جداً.

نزل تحديثين للعبة 1.04 و 1.05 حسنوا من التجربة بشكل ضخم، حالياً على PS4 Slim اللعبة شغالة على دقة بتتراوح بين 810 و 1080p ومعظم الوقت بتكون ثابتة أو قريبة من 900p وده كان المطلوب من الأول. كمان الفريمات مبقتش بتقل بالشكل الملحوظ الي بيأثر على تجربة اللعبة وجودة الصورة بقت نقية اكتر. خلال 28 ساعة اللعبة عملت Crash حوالي 3 مرات وكمان قابلتني مشكلة في واحدة من المهمات اضطرتني اني اقفلها وافتحها تاني عشان اعرف اكمل القصة. بعد التحديثات الأخيرة اللعبة معملتش Crash إطلاقاً وكمان مقابلتنيش جليتشات كتيرة.

blank

الخلاصة :

لعبة Cyberpunk 2077 بالنسبالي شخصياً وصلت لمستوى التوقعات المطلوب من ناحية القصة وأسلوب اللعبة وإستوديو CD Projekt RED اثبت انه يقدر يقدم تجارب تانية في نفس مستوى عظمة The Witcher 3.

المشاكل الي كانت بتحاوط اللعبة وقت الإصدار والأخطاء التقنية الكتير الي كانت متواجدة في كل النسخ ديه اثرت على تجربة كل اللاعبين وخلتهم يتسائلوا، طب الإستوديو كان بيعمل ايه في 8 سنين. كمان عالم اللعبة الي متمش إستغلاله بكل قوته مع غياب الذكاء الإصطناعي هيأثر على أسلوب اللعب في النهاية وعلى الوقت الي هتقضيه في Night City.

لو انت بتدور على تجربة تقدملك إبداع قصصي بإختيارات كتير وشخصيات تحبها مع أسلوب لعب فيه إبتكار فا Cyberpunk 2077 هتكون تجربة مثالية بالنسبالك وهتقدملك كل الي أنت محتاجه. بس نصيحة، لو أنت ناوي تجرب اللعبة على PS4 Slim أو Xbox One استنى تحديثات شهر يناير وفبراير عشان تقدر تعيش تجربة أفضل. للتوضيح مرة تانية تقييمي للعبة هو على أساس تجربتي على PS4 Slim وقريب هعملكم مراجعة تانية بعد التجربة على الجيل الجديد لأني متأكد ان تجربتها أفضل على الكونسولز الجديدة.

المميزات :

– من أفضل التصميمات القصصية في تاريخ الألعاب

– المهمات الجانبية في Cyberpunk 2077 أفضل من مهمات أساسية لألعاب أخرى

– أسلوب لعب حماسي وتم استغلال منظور الشخص الأول بشكل مميز

– مدينة Night City مليئة بالتفاصيل

– رسومات ممتازة للعبة وتم تحسين دقتها على الكونسول بعد التحديثات الأخيرة

– أداء تمثيلي ممتاز خاصةً لـ Keanu Reeves

– موسيقى تصويرية من أروع ما يكون

العيوب :

– أداء تقني سيء على الجيل الماضي

– كمية ضخمة من الأخطاء التقنية

– عدم إستغلال كل تفاصيل مدينة Night City الضخمة

– إنعدام الفيزيائية في مدينة Night City

– غياب الذكاء الإصطناعي عند الأعداء

– عدم إستغلال فكرة القتال اليدوي بالأسلحة البيضاء

التقييم النهائي : 8/10

Ahmed Yousry

About Ahmed Yousry

Editor-in-Chief. About 5 years of experience in Gaming Journalism with more than 13k news written, tens of articles, video scripts and reviews. A hardcore gamer that loves a challenge.