News, Reviews

مراجعة Fifa 21

من فترة طويلة وفيفا مبقاش ليها منافس حقيقي يقدم أحسن من اللي بتقدمه كلعبة محاكاة لرياضة كرة القدم، علي الرغم من محاولات لعبة Pro Evolution soccer تقديم الأفضل كل سنة، لكن فيفا نجحت عن طريق اهتمامها بطورين الألتميت تيم والpro Club إنها تكتسح السوق مبيعيًا، وتبقي كل سنة نازلة ساحة المعركة ليها أفضلية الشعبية، وتعلق الناس بالمودين دول، لكن هل التفرد بالنجاح ده شيء صحي لمجتمع للاعبين؟ كل إصدار لفيفا بيكلفك 60 دولار كاملين والفروق بتبقي بسيطة ودي مشكلة فيفا الرئيسية علي الرغم من إنها ممكن تكون ماشية في الاتجاه الصحيح، فهل إصدارة 2021 هي استمرارية لسياسة التحسن التدريجي؟

مبدأيًا أول حاجة هتلاحظها لما تدخل فيفا 21 هو نفس تصاميم القوايم، مع تغييرات بسيطة متمثلة في الألوان، وبعدين هتلاحظ لو دخلت اللعبة نفسها، إن التطوير الرسومي منعدم، شوية وشوش مُحدثه بس، ويبقي الحال علي ما هو عليه في كل جوانب اللعبة إلا جوانب بسيطة، لكن تأثير مش ضئيل إطلاقًا، اسلوب اللعب شهد كام تغيير مهمين هنتكلم عنهم دلوقتي.
أهم التغييرات دي هي خاصية الAgile Dribbling، وهي إن اللاعب جسمه يكون أكثر استجابه للInput بتاعك بحيث تقدر تعدي بسهول ةباستخدام الأنالوج اليمين في مواقف الواحد علي واحد.
تغيير تاني مهم هو الAssisted Headers ودي خاصية ممكن تفتحها أو تقفلها من الsettings بتتيحلك إن ضربات الراس تبقي موجهة أو إنك تتحكم في اتجاها بشكل أكتر دقة وحرية، وخليك ممكن تطلع ضربات رأس صعبة وعظيمة، والتغيير ده جه بسبب إن عدد الأهداف من ضربات الراس قل جدًا في النسختين اللي فاتوا،وفي تغيير تالت يعتبر هو أهم إضافة حصلت في فيفا من فترة وهو التعديل علي نظام التحرك بدون كورة في المساحات، وده بيبقي عن طريق حاجة اسمها Creative Runs بتتحكم فيها في حركة اللاعبين اللي بيمثلوا خيارات التمرير ليك عن طريق الضغط علي L1 وتوجيهم للتحرك في المساحة اللي انت عايزها بالأنالوج اليمين، وفي طريق تانية لاستغلال المساحات اسمها الPlayer Lock بتنفذها عن طريق الضغط علي R3 و L3 مع بعض، وبتتحكم يا إما في اللاعب المُمرر، يا إما في اللاعب اللي عايزه يستلم الكوره وتحركه في المساحة المطلوب استغلالها. الكنترولز دي دقيقة وكلها محتاجة أجزاء من الثانية لاتخاذ القرار، وكمان بتبقي صعبة في الأول وكأنك علي أرض الملعب بجد.في شوية شغل كويسين علي الذكاء الإصطناعي، بحيث يبقي فارق من لاعب كبير للاعب صغير في التمركزات، ولكن ساعات كنت بحس إن ذكاء وتمركزات الدفاع بقي مبالغ فيها وعلي الصعوبات العالية هتلاقي أغلب تسديداتك بيتم صدها من مدافع!!
العرضيات برضو بقت أدق وليها انواع أكتر، قبل كده كنت تحس إن العرضيات بتضمنلك هدف، دلوقتي بقت بتتأثر أكتر بنوع العرضية وعلاقته بسرعة الكورة وارتفاعها، وحركة جسم اللاعب، يعني بشكل عام العرضيات بقت بتضيع عادي، وأكثر واقعية عن قبل كده.

فيفا بالنسبالي بتتميز بإعطاءك حرية أكبر وتحكم في اللي بيحصل جوه الملعب، من تكتيكات وتعامل الفريق مع بعضه، ودلوقتي التحرك بدون كورة، لكن لو أنت اللاعب اللي بيسموه Casual player يعني اللاعب اللي بيلعب مرة كل فترة مش هتحس بالفروق الدقيقة دي، وأكيد هيكون هامك أكتر أطوار اللعبة، هل فيها جديد ولا لأ؟
أكتر طور كان منسي من فترة طويلة هو الكارير، وهنا ففي بعض التحسينات الجميلة عليه زي مثلًا إمكانية التدخل في وسط مباريات الموسم الغير مهمة اللي بتعملها Simulation لو عايز تشوط انت ضربة الجزاء، أو النتيجة مش عاجباك تقدر تدخل في وسط الماتش، كمان في بداية المود بيبقي في خيار اسمه Financial take over بيوفرلك ميزانية كبيرة للانتقالات، وكأن النادي تم بيعه لمستثمر جديد، كمان تم إضافة شرط الإعارة مع أحقية الشراء، وده بند مهم بقي مستخدم في الكورة العالمية مكنش موجود في فيا لحد السنة دي!

أحد أهم التغييرات في الطور ده إنه تم إضافة 3 فئات للتطور في اللاعب، الMorale والSharpness والأولي كانت موجودة قبل كده بس الجديد هو علاقتها بالتانية، الsharpness هي قد إيه اللاعب مندمج مع ضغط المباريات، وبتخليه يتصرف صح في المواقف الصعبة، لكن لو فضلت تلعبه كتير مثلًا وبدأ يُرهق الmorale بتاعه هيقل وبالتالي مستواه يبتدي ينزل بعد ما كان وصل للذروة.
في برضه إمكانية تغيير مركز اللاعبين لأي مركز إنت عايزه، لو عايز تلاعب ميسي حارس مرمي، عن طريق مجموعة من التدريبات الخاصة، وده بيفتح احتمالات تطور كتير للاعيبة ممكن تجيبه وتكتشفها انت زي أي مدرب حقيقي!

طور فولتا برضو حصل علي إضافة مهمة وهي إمكانية اللعب عبر الشبكة مع اصحابك وده مكنش موجود السنة اللي فاتت واللي كانت أول سنة للطور ده. تغيير زي ده كان غير مبررإن الطور ينزل من غيره أصلًا خصوصًا وإن فولتا ده طور شبيه بلعبة فيفا street بتاعة زمان بكان منطقي الناس تبقي عايزها تلعبها مع بعض!! فممكن نعتبر الإضافة دي إضافة تصليح خطأ مش تحسين ملحوظ. طور الفولتا هو أحد الأطوار اللي له إمكانيات كبيرة إنه من الاهم المودات في فيفا لكن للأسف ماشهدش التجديد المطلوب السنة دي، لكن هو بشكل عام موود متصمم بشكل كويس وممتع. المود برضو بيمتلك قصة بعنوان The Debut بتمتد لمدة 4 ساعات مثلًا وعلي الرغم من إن رسوم اللعبة حلوة وكان سهل تخرج قصة قوية بمقاطع سينمائية جودتها ممتازة لكن ده ماحصلش واللي خرج لنا شيء متوسط كأقصي تقدير. شخصيًا كنت معجب جدًا بقصة The Journey اللي بدأت في 2017 وكنت حابب يكملوا في موضوع تقديم قصة شبيهة بكونها لعبة كورة قدم RPG ولكن للأسف ده ماحصلش، وكان لازم حاجة تسد الفراغ اللي سابه المود ده عليا الرغم من اتفاقنا جميعًا إنه مكنش أهم مود في اللعبة.
طبعًا الكل بينتظر اللعبة عشان ألتميت تيم بشكل أساسي، وعشان كده كان في اهتمام بتقديم بعض التحسينات عليه، أهمها
1-تضمين الCO-OP في الSquad battles أو الRivals أو المباريات الودية ووجود مهمات خاصة بيهم
2- تحديات الIcon swap رجع تاني من فيفا 19 بعد ما كان اتلغي من 20
3-جوايز الDIVISION RIVALS كانت حاجة مش موجودة لكن تم إضافتها بشكل مجزي جدًا عن كل دوري بتترقي منه، بحيث يكون معاك كمية كويسة جدًا مع كل مرة بتصعد فيها .
4-وفي مود السكواد باتل بقي متاح ليك تلعب ماتشاتك في أي وقت، من غير ما يفوتك حاجة، ودي تقريبًا أكتر Quality Of life Improvement مؤثر علي أجواء الألتميت تيم لإنك في كل الإصدارات
5- إضافة إمكانية بناء وتخصيص الاستاد الخاص بفريقك في الألتميت تيم، وفي الحقيقة الموضوع كان جميل في ومستوي كويس جدًا من التفاصيل في التخصيصات المتاحة.

يعني بشكل عام كل التحسينات هدفها التحسين من التجربة مش الإضافة ليها، أو تغير جذري علي الألتميت تيم، وده طبعًا هيفرق مع لاعيبة الألتميت لكن مش هيجذب لاعيبة جديدة للطور ده، أو يحول لاعب عادي للاعب مواظب علي الألتميت تيم.

في النهاية:

بدأت ملامح غياب المنافسة الفعلية تظهر علي الصراع بين فيفا وبيس، فيفا حاليًا بتعمل ما بدالها، وفي سنين بتنزل فيها اللعبة بدون أي تغيير صريح، وكونامي بتحاول تحافظ علي القاعدة الجماهيرية الموجودة للعبتهم بيس ، زي ما تكون بتحاول تبعد عن منافسة فيفا، وإصدارة السنة علي جانب ،فيها تحسينات صعب إنكارها، لكنها علي الجانب الآخر استمرار لسير فيفا في الاتجاه نفسه من 2017، فمتتوقعش تغيير ثوري.
فيفا 21 لعبة ماحاكة كرة قدم ممتازة، تستحق الإقتناء في حد ذاتها لكن إذا كنت بتجيبها كل سنة، ومنتظر حاجة ثورية جديدة السنة دي، فده ماحلصش للأسف، وملامح نهاية الجيل بدأت تبان علي اللعبة، ويبان إنها خلاص في حاجة ماسة إلي تغيير كبير قريب، التغييرات والتحسينات السنوية موجودة، لكنها مابتخليش إصدارة 21 إصدارة يجب عليك إقتناءها في وسط إصدارات السنين اللي فاتت.

العيوب:

-اللعبة سعرها 60 دولار ومع ذلك بتتحسن ببطيء عن كل نسخة قبلها
-تذبذب مستوي الحراس لسا موجود
-بعض المدافعين Overpowered بطريقة غير واقعية

المميزات:

+تغييرات بتحس من طور الألتميت تيم أكتر وأكتر أهمها الCO-OP
+ تحسينا قوية علي اسلوب اللعب بتديك عمق في التحكم بلاعبيك بدون كره
+ إضافة الأونلاين في طور فولتا
+ تغييرات ممتازة علي طور الكارير

التقييم النهائي :
8

لشراء اللعبة على PS4 اضغط هنا
لشراء اللعبة على Xbox One اضغط هنا

Mostafa Argoun

About Mostafa Argoun

محرر في مجال الألعاب منذ عام 2012 بعتبر الألعاب فن، وبحب ألعاب القصة والأر بي جي بشكل رئيسي