News, Reviews

مراجعة Ghost of Tsushima

blank

إستوديو Sucker Punch كان من أول الإستوديوهات الي قدموا ألعاب على منصة PlayStation 4 خلال فترة إطلاقه وبدأ الجيل بلعبته الرائعة Infamous Second Son وها هو الإستوديو بينهي الجيل الحالي مع واحدة من أكثر الألعاب المنتظرة في السنة وهي Ghost of Tsushima. هل الإستوديو قدر انه ينهي جيل منصة PlayStation 4 بتجربة مميزة وفريدة من نوعها ؟ ، ده الي هنعرفه النهاردة في مراجعتنا للعبة.

قصة لعبة Ghost of Tsushima بتأخذ مكاناً خلال سنة 1274 على جزيرة Tsushima اليابانية أثناء أولى غزوات الجيش المغولي على اليابان، انت بتلعب شخصية Jin Sakai وهو واحد من محاربين الساموراي الي عددهم أقل من 80 والي بيحاولوا يدافعوا عن جزيرة Tsushima ضد الغزو المغولي.

blank

للأسف طبعاً جيش الساموراي بيفشل قدام قوة المغول العملاقة و Jin كان هيموت في المعركة لولا وجود سارقة في ساحة المعركة إسمها Yuna والي بتنقذه وبتضمد جراحه وبيبدأ من هنا Jin رحلته في كل جزيرة Tsushima عشان يقضي على الوجود المغولي تماماً.

طوال قصة Ghost of Tsushima هتقابل مجموعة ضخمة من الشخصيات زي Yuna وهتبدأ انك تجند مجموعة كبيرة من المحاربين عشان تكون الجيش الخاص بيك الي يقدر يساعدك في كل مواجهاتك ضد المغول، كل شخصية من الشخصيات الأساسية أو الجانبية الي قابلتها في القصة كانت مميزة جداً واللعبة قدرت توريك ان كلهم ليهم أهداف وكلهم بيعانوا من حاجات خاصة في حياتهم وهنا بيجي دورك في محاولة مساعدتهم هما كمان زي ماهما بيساعدوك في انتقامك ضد المغول.

عشان تنهي قصة Ghost of Tsushima هتحتاج بين 20 لـ 25 ساعة لعب تقريباً وده عدد حلو جداً من الساعات الي قدمت كل الي انت محتاج تعرفه عن الشخصيات والعالم وبشكل عام اللعبة مكانش فيها مط خالص في الأحداث ولا كان فيها استعجال في الأحداث، تنسيق الأحداث وسردها كان ماشي بشكل ممتاز جداً وفي تطور كبير بيحصل للشخصيات خاصةً الشخصية الرئيسية Jin Sakai.

blank

في Ghost of Tsushima بما إنك ساموراي فا طبعاً في تركيز رئيسي في اللعبة على المواجهات المباشرة مع الأعداء وبالنسبالي المواجهات المباشرة كانت أكثر متعة من التخفي والتسلل على الرغم من إن التخفي هو كمان كان في معظم الأحيان ممتع وفيه ابتكار حلو جداً.

المواجهات المباشرة في Ghost of Tsushima مش سهلة إطلاقاً ، لو لعبت Sekiro Shadows Die Twice هتلاقي نفسك اتعودت بسرعة على منظومة معارك Ghost ولكن لو ملعبتش Sekiro فا هتحتاج شوية وقت في البداية عشان تعود نفسك على المواجهات المباشرة لإنها هتكون صعبة عليك.

blank

اشمعنا ذكرت Sekiro ؟ ، عشان جيم بلاي Ghost مُطابق ليها تماماً في نقطتين وهما الـ Dodge والصد ولازم تعود نفسك على مواجهات مباشرة كتير بمزاجك في بداية اللعبة عشان بعد كدة في القصة لما اللعبة تجبرك انك تخش في مواجهات تبقى ضامن انك مش هتموت كتير. حركات المواجهة بسيف الـ Katana مميزة جداً والأنيميشن سلسة وسريعة وعنيفة وهتحسسك قد ايه محاربين الساموراي كانوا أقوياء جداً.

في اللعبة معاك سلاح أساسي واحد وهو سيف الـ Katana وبتقدر تعمله Upgrade ولكن بتقدر تاخد القوس والسهم وتحارب بيهم عادي بس هما قوتهم مش زي السيف طبعاً الا لو الـ Aiming بتاعك كان حلو وكل ضرباتك بتعرف تجيبها في الرأس.

غير السلاحين دول فأنت عندك مجموعة من الأدوات الي بتقدر تستخدمها لصالحك في المواجهات زي الـ Throwing Knives والقنابل وسهام السم ( هتاخدها متأخر في اللعبة ). كل الادوات ديه هتساعدك في المواجهات وهتسهلها عليك بنسبةٍ ما. مواجهات الزعماء كانت عظيمة في اللعبة وفيها مبتقدرش تستخدم اي سلاح غير السيف بتاعك فقط والاعتماد الكلي بيكون على الـ Dodge والصد المستمر ضد كل الزعماء عشان تقدر انك تهزمهم. مواجهات الزعماء كان جزء كبير منها صعب ولو متعودتش بسرعة على منظومة المعارك هتلاقي نفسك بتموت قدامهم كتير وبشكل متكرر.

blank

التخفي والتسلل في اللعبة ممتع  جداً لإنك بتقدر تقتل أي عدو ( ما عدا الزعماء ) بضربة واحدة بس وبيكون احساس عظيم لما تخلص على Camp كامل من المغول من غير ما حد فيهم يحس بيك وساعتها بتبقى فعلاً Ghost بكل ما تحمله الكلمة من معنى.

بتقدملك اللعبة شجرة مهارات ضخمة ومميزة وكل مهارة بتكتسبها أو بتفتحها عن طريق الـ Points الي بتجمعها من انهائك للمهمات بيكون ليها فايدة كبيرة، بتقدر تختار بين مهارات كتير بعضها بيساعدك في التخفي والبعض الآخر بيساعدك في المواجهات المباشرة ، وفي كمان شجرة مهارات صغيرة كدة مخصصة لمساعدتك في إستكشاف البيئة ومعرفة كل الأسرار الموجودة في جزيرة Tsushima.

blank

زي ما ذكرت في بداية المراجعة فالقصة الرئيسية نفسها هتاخد منك حوالي 20-25 ساعة عشان تنهيها ولكن اللعبة مليانة بالمهمات الجانبية الي لو قررت تخلصها كلها هتمد معاك عمر اللعبة لحوالي 40 ساعة تقريباً وصدقني انت فعلاً هتحب تلعب المهام الجانبية كلها. المهام الجانبية في Ghost of Tsushima مميزة بشكل انا مش قادر اوصفه لدرجة ان في جزء كبير منها أمتع ومميز أكثر من مهام القصة الرئيسية نفسها.

المهام الجانبية كلها بتديك هدايا حلوة زي مثلاً تعلم حركة قتال جديدة أوالحصول على Gear أو Charms جديدة هتساعدك في رحلتك في الجزيرة. غير كدة فا قصة كل المهمات ديه بتكون شيقة وبتجذبك ليها تلقائي وكل شوية هتلاقي نفسك بتقولك : لا انا هخلي المهمة الرئيسية على جنب شوية واروح اشوف المكان ده في ايه أو الشخص ده كان عايز مني ايه ، كل مرة هتقول فيها كدة لنفسك هتلاقيك بتنغمس في رحلة مختلفة ومميزة هتوريك قصة شخصية من الشخصيات العادية الي عايشة في جزيرة Tsushima ومفيش مهمة جانبية من الي جربتها كانت سيئة.

blank

عالم Ghost of Tsushima مليان بالأسرار الي بتقدر تلاقيها عن طريق انك تمشي ورا العصافير أو الحيوانات في البيئة والي هتوصلك لمكان ممكن يكون فيه مهمة جانبية مميزة أو بعض الهدايا الي هتفيدك في المستقبل، وعشان كدة لازم متسبش جزء في الخريطة الا لما تشوف هو هيقدملك ايه عشان تاخد التجربة الكاملة.

رسومياً فالعبة Ghost of Tsushima هي واحدة من أفضل الألعاب في التاريخ. جزيرة Tsushima بتقدملك مجموعة من البيئات المختلفة والمنوعة وكل بيئة من البيئات ديه بتقدملك مناظر طبيعية خلابة وتلقائي هتوقف اللعبة وتفتح الـ Photo Mode وهتخلي خيالك الواسع يُبدع في التقاط مجموعة من الصور الرائعة الي هتشاركها مع صحابك أونلاين.

blank

تصميم الشخصيات نفسها كان مميز جداً والإهتمام بالتفاصيل واضح حتى في الشخصيات الجانبية الي ملهاش اي تأثير على مجريات الأحداث بل هي مجرد شخصيات في البيئة، ممكن نقول إن انيمشن الوشوش مكانتش افضل حاجة ولكنها كانت كويسة جداً مش سيئة لدرجة انها تقفلك من اللعبة.

التمثيل الصوتي لكل الممثلين عامةً كان ممتاز سواء باللغتين الانجليزية أو اليابانية، أكتر الشخصيات الي حبيت تمثيلها الصوتي هو البطل Jin Sakai والعدو الرئيسي ليك في اللعبة قائد المغول Khotun Khan. المشكلة الوحيدة الي قابلتها هي ان حركة الشفايف في المحادثات مُصممة للغة الانجليزية فقط مش لليايانية كمان، فا لو حطيت اللغة للياباني هتلاقي حركة الشفايف مش ماشية مع الكلام وهتحس انك بتلعب لعبة يابانية لغتها الأساسية مش يابانية مدبلجة للياباني فا هو بشكل عام احساس غريب ومش حلو وشخصياً كنت شايف انهم لازم يظبطوا حركة الشفايف مع اللغتين خاصةً وإن عدد كبير من الناس هيفضل انه يستمتع بالتجربة اليابانية الكاملة.

blank

متقلقش لو انت مش كويس في اللغة الانجليزية لإن اللعبة مترجمة بالكامل للغة العربية سواء النصوص أو القوائم والترجمة كويسة جداً وهتفي بالغرض معاك.

الموسيقى التصويرية في اللعبة أقل ما يقال عليها انها عظيمة، الملحنين الي اشتغلوا على اللعبة Ilan Eshkeri و Shigeru Umebayashi قدموا تحفة فنية من كل النواحي والموسيقى هنا انت ممكن تستمتع بيها في يومك عادي من غير ما تسمعها في اللعبة نفسها.

نيجي بقى لناحية تقنية شوية، اللعبة شغالة بدقة 1080p على منصة PlayStation 4 العادية و 1800p على منصة PlayStation 4 Pro على 30 إطار في الثانية، للأسف اللعبة مش ثابتة على 30 إطار وفي أوقات كتير خاصةً في المعارك الكبيرة هتحس ان اللعبة بتقطع معاك والفريمات بتقل بشكل هيخليك مش مستمتع لبعض الثواني وبعد كدة هترجع اللعبة بشكل طبيعي تاني تتراوح بين 27 و30 إطار في الثانية. لو حابب تعرف تفاصيل أكثر عن أداء اللعبة التقني بننصحك تتفرج على فيديو قناة Digital Foundry الأخير الخاص باللعبة.

blank

الخلاصة إن لعبة Ghost of Tsushima هي تحفة فنية، اه اللعبة لناس كتير ممكن متبقاش تجربة مثالية وفيها أخطاء ولكني شخصياً استمتعت بكل ثانية قضيتها في العالم الخرافي الي صنعوا إستوديو Sucker Punch، عالم مُبهر رسومياً قدم قصة مميزة بشخصيات شيقة وأسلوب اللعب رائع هيخليك مش عايز تقوم من على اللعبة.

لعبة Ghost of Tsushima هي الختام المثالي لجيل PlayStation 4 ولمرة تانية إستوديو Sucker Punch بيثبت انه استوديو عظيم قادر انه يقدم عناوين جديدة بشكل مميز وشخصياً مستني اشوف الاستوديو ناوي على ايه في المستقبل سواء كان جزء جديد من سلسلة Infamous أو جزء ثاني من Ghost of Tsushima أو حتى عنوان جديدة كلياً لإن بقى عندي ثقة تامة في أي عمل فني هيقدمه الإستوديو.

المميزات :

  • قصة حماسية
  • شخصيات شيقة
  • أسلوب لعب ممتاز بيقدم تجربة خرافية سواء لو اخترت تلعب بتخفي أو مواجهات مباشرة
  • طفرة رسومية على منصة PlayStation 4
  • موسيقى تصويرية تُقشعر لها الأبدان في لحظات القصة الحماسية
  • عالم مفتوح ممتلئ بالمهام الجانبية المميزة والأسرار الرائعة

العيوب :

  • مشاكل اللعبة التقنية وهبوط الأداء في المعارك الضخمة
  • حركة الشفايف المُصممة للغة الانجليزية فقط مما أدى لعدم اكتمال تجربة اللغة اليابانية

التقييم النهائي : 9/10

Ahmed Yousry

About promidoz

Editor-in-Chief. About 5 years of experience in Gaming Journalism with more than 13k news written, tens of articles, video scripts and reviews. A hardcore gamer that loves a challenge.