Articles, Gaming News, News, Reviews, استعراضات, الأخبار, دليلك, عن الألعاب, مراجعات, مقالات

مراجعة Saints Row جاتا تحت تأثير المنشطات

مراجعة Saints Row جاتا تحت تأثير المنشطات

المقدمة

سلسلة Saints Row واحدة من السلاسل المشهورة ولكن للأسف مش بشكل كبير في الوطن العربي،في الحقيقة السلسلة دي تعتبر واحدة من منافسي GTA من زمان والي بيميز ألعاب Saints Row انها دايما مايلة لعدم الجدية وعدم الواقعية و الهزار، و اخر جزء في السلسة نزل ٢٠١٤ لحد ما قرروا في ٢٠٢٢ ينزلوا Reboot للعبة من تاني بشخصيات جديدة و ببداية جديدة للسلسلة تجذب محبي السلسة و تضيف محبين جدد بس هل اللعبة نجحت في ده فعلا؟

تابعوا معايا

القصة

القصة هنا بتتكلم عن بداية اربع شخصيات هما كيڤ و ايلاي و نينا و شخصيتك وهما بيصارعوا عشان يدفعوا ايجار السكن لتكوين تشكيل عصابي ينافس باقي العصابات في مدينة اللعبة  الخيالية سانتو اليسو.

بشكل عام كباقي ألعاب السلسة، الReboot هنا القصة فيه عبارة عن مسير لأحداث اللعبة واللي التركيز الاكبر بيبقى على جزئية الاحداث بحيث انها تبقى مجنونة ومليانة انفجارات و مطاردات وما الى ذلك فا لو مستني قصة عميقة و قوية وكدة لا مفيش الكلام ده هنا.

عالم اللعبة و المهمات و نظام التطور

عالم اللعبة بيقع في مدينة صحراوية امريكية قرب الحدود المكسيكية اسمها سانتو اليسو موجود فيها عصابتين بجانب العصابة بتاعتك و شركة امن متطورة طبعا انتا بتلوش في كله على مدار المهمات الرئيسية ،حجم الخريطة مش كبير مقارنة بباقي العاب الوقت الحالي،اما بالنسبة للمهمات فا كانت متنوعة في افكارها الحقيقة يعني بنتكلم في مطاردات او انك تسرق قطار او انك تدمر عالم اللعبة بأستخدام دبابة المهمات كلها بالشكل ده بتركز على المتعة واقدر اقول اللعبة نجحت في ده نوعاً ما، اما بالنسبة للمهمات الجانبية فا من خلال موبايلك في اللعبة ممكن تختار انك تقتل شخص مطلوب مقابل فلوس او انك تساعد شخص في الهروب عن طريق الركوب معاه و ضرب النار على الاعداء و لكن اكتر حاجة عجبتني و هيا جزئية الCriminal Venture وهيا كأي عصابة حابة تتوسع بتبدأ في بناء او شراء مشروعات مشبوهة زي انك تفتح مشروع بيساعد الشركات في التخلص من الحاويات السامة بشكل امن بس في الحقيقة انتا بترميهم في اي حته او اكتر حاجة عجبتني انك تفتح شركة تأمين نصابة و تبدأ ترمي نفسك قدام العربيات عشان تاخد تعويض و المود ده كان لذيذ جدا طبعا في مشاريع نصابة كتير غير دول يعني بس لو قلتهم كلهم المراجعة مش هتخلص،لازم نتكلم برضو على نظام التطور هنا وهوا سهل جدا كل ما بتعلى في المستوى بيزيد الهيلث عندك و بيتفتح ليك مزايا او ضربات خاصة زي انك تحشر قنبلة في واحد و ترمية بيها مثلا كلها حاجات مجنونة بالشكل ده،لازم اذكر كذلك مستوى التعديل على الشخصية او العربيات او الأسلحة او حتى الملابس نفسها مجنون اللعبة بتديك الحرية حتى في اختيار صوت شخصيتك من خلال ٦ اصوات او حتى انك تمشي عريان بالكامل في الشارع .

طريقة اللعب

طريقة اللعب هنا بسيطة على مستوى الشخصية اللعبة بتوفرلك بجانب الاسلحة اللي بعض منها غريب ومميز حركات Finish الحركات دي بتقتل الاعداء بشكل عبيط و مجنون و بتزود الهيلث عندك كل مره بتستخدمها و طبعا زي ما ذكرت فوق في ضربات خاصة بتتفتح مع كل مستوى،عايز اتكلم عن سواقة العربيات بصراحة هيا مسئلة اذواق بس القيادة هنا كانت نوعا ما اركيدية زيادة عن اللزوم و سهلة جدا.

الرسوميات و الجانب التقني

كل الكلام الي قلناه فوق حلو و كويس انما الجزئية دي الي هنبدأ فيها الكلام السلبي في اللعبة؛الرسوميات في اللعبة دي متواضعة في اغلبها بعض الجوانب البسيطة بس كانت كويسة زي الاضاءة و بعض الانعكاسات انما لو هنتكلم عن مستوى تصميم الشخصيات مثلا هو ببساطة متواضع جدا التكستشرز او الخامات دقتها قليلة جدا و انا كنت بلعب على جهاز جيل جديد على فكرة يعني من المفترض اللعبة ماتعانيش من حاجات زي دي،نتكلم بقى على الكارثة الجانب التقني في اللعبة دي رايح في داهية يعني بجانب وجود جلتشات في جرافيك اللعبة او انتشار ظاهرة الPop up في اللعبة بشكل بشع و كمان اللعبة على اقوى جهاز كونسول Series X عشان تاخد اداء مستقر لازم تشغلها على مود ال1080p الي بيقلل الدقة و الجرافيك كمان الا ان المصيبة ان اللعبة اجبرتني اعيد بعض المهمات و اقفل اللعبة و افتحها بسبب انها علقت دا حتى المهمة الاخيرة ياجماعة حصلي فيها جلتش ربنا يعلم انا عديت المهمة ازاي بالشكل ده انا ماجربتش اخر تحديث بس اظن انه اكيد حسن جوانب كتير.

الملخص

لعبة Saints Row ممتعة خفيفة الا ان المشاكل التقنية أثرت على التجربة بشكل كبير

التقييم

6.5/10

قام بمراجعة اللعبة 

خالد الأنصاري