Articles, Gaming News, News

ملخص أخبار الأسبوع المُنتهي بتاريخ 12 فبراير 2021

أهلاً بيكم في مقال جديد من مُلخص أخبار الأسبوع، والنهاردة هنتكلم عن مجموعة من الأخبار والتسريبات المهمة الي نزلت خلال الفترة الي فاتت خاصةً وإننا عرفنا شوية تسريبات جديدة عن لعبة Battlefield 6 وعرفنا مين الي هياخدوا دور البطولة في مسلسل The Last of Us. تعالوا نشوف مع بعض أهم أخبار االأسبوع.

1- تسريبات جديدة عن Battlefield 6 :

انتشرت تسريبات من مواقع كتير بتأكد شوية معلومات جديدة عن لعبة Battlefield 6 زي إن اللعبة هيكون فيها نظام الـ Battle Pass وكمان هتدعم اللعب المشترك بين كل المنصات، مش بس كدة، ده هيبقى في طور لعب مجاني زي Warzone من Modern Warfare.

الإعلان عن Battlefield 6 هيكون خلال شهر مارس أو أبريل المفروض وساعتها هنتأكد من صحة التسريبات ديه.

2- تفاصيل جديدة عن Elden  Ring قريباً :

مجموعة من المُسربين أكدوا إننا هنشوف تفاصيل جديدة عن لعبة Elden Ring خلال شهر فبراير أو مارس ونتمنى إن كلامهم يكون صح المرة ديه خاصةً وإننا سمعنا تفاصيل كتير الفترة الي فاتت ومتحققش منها أي حاجة.

لو انا شخصياً هتوقع فأظن اللعبة هينزلها عرض أولي في فبراير أو مارس مع الكشف عن أسلوب اللعب بشكل أعمق وأوسع في E3 2021 وتصدر في أواخر 2021.

3- لعبة Resident Evil Village هتستفيد من منصة PS5 :

شركة Capcom أكدت إن لعبة Resident Evil 8 Village هتستفيد بشكل ضخم من منصات الجيل الجديد لإنها هتدعم الهاردات الـ SSD الموجودة في PlayStation 5 و Xbox Series X  و Series S. كمان اللعبة هتستفيد بشكل كبير من يد تحكم Dualsense  لإنها هتدعم أهم خواصها زي Adaptive Triggers و Haptic Feedback مع دعم الصوت ثلاثي الأبعاد الممي.

4- تسجيل براءة إختراع نظام Nemesis لشركة WB Games :

من ساعة ما نزلت Middle Earth Shadow of Mordor في 2014 وشوفنا تقديم نظام جديد في عالم الألعاب إسمه Nemesis.

النظام ده غير من وجهة نظرنا عن الشخصيات الـ NPCs في اللعبة عشان شوفنا تقديم مختلف تماماً للأعداء في الألعاب وكان تجربة مميزة إننا نشوف الأعداء بيتصرفوا من دماغهم وبيعملوا حاجات مميزة منتوقعهاش إحنا كلاعبين لدرجة إننا كنا بنحس إننا بنواجه لاعبين حقيقيين مش ذكاء إصطناعي.

من ساعة 2015 وشركة Warner Bros بتحاول تسجيل براءة إختراع للحفاظ على النظام ده في ألعابهم بس كل المحاولات الي كانوا بيعملوها كانت بتفشل طبعاً. وصلنا 2021 والنظام بالفعل اتسجله براءة إختراع من الشركة وبكدة نظام Nemesis للذكاء الإصطناعي بقى ملك لشركة WB Games وإحتمال نشوفه في ألعاب كتير منهم في المستقبل

5- تفاصيل جديدة عن لعبة Hellblade II Senua’s Saga :

– اللعبة هتكون في ايسلاندا
– بيتم تطويرها من 40 موظف ( ضعف الجزء الأول )
– هتستفيد من محرك Unreal Engine 5 مع تقديم رسومات خلابة
– هتقدم نظام مواجهات أكبر وأعمق من الجزء الأول
– الموسيقى التصويرية هيساعد فيها فريق Heilung الي شارك في أعمال كتير أهمهم مسلسل Vikings
– الإستمرار في إستكشاف الأمراض العقلية والنفسية الي بتواجه البطلة Senua ومدى تأثيرها على تشكيل الحضارة والالهة الإسكندنافية

هتتوفر بشكل حصري على الحاسب الشخصي و Xbox Series X | S ومن وقت الإصدار هتضاف للجيم باس.

6- إستوديو CD Projekt RED تعرض لعملية قرصنة :

إستوديو CD Projekt Red تعرض لعملية اختراق كاملة على سيرفراته وتم أخذ بيانات الالعاب الأصلية غير بيانات في الحسابات والإدارة والعلاقات العامة. المخترقين عايزين فدية طبعا مقابل عدم نشر الملفات ديه للعامة والاعلام أو حتى بيعها.

المخترق قالهم يدفعوا الفدية عشان ميخليش شكلهم سئ أكتر ما هو سئ أصلاً حالياً وللأسف الإستوديو مسمعش الكلام وقالوا انهم هيلجأوا للسلطات عشان يحلوا الموضوع. الموضوع متحلش والمخترق بدأ في نشر الـ Source Code وعمل مزاد علني عليه وهنشوف إيه الي هيحصل خلال الفترة الجاية.

7- معرض E3 2021 يعود رسمياً في 2021 بشكل رقمي :

السنة الي فات معرض E3 وقف بسبب فيروس كورونا وده أثر بشكل كبير على إعلانات الشركات وحصل تأجيلات لحاجات كتير جداً. بس شركات كتير فضلوا مكملين مع نفسهم أونلاين زي PlayStation و Xbox و Ubisoft و EA وغيرهم وشوفنا إعلانات كتير مميزة برضو.

السنة ديه معرض E3 راجع بنسخة 2021 ومش هيكون معرض كامل فعلي بل هيكون معرض رقمي، المعرض هيستمر في الفترة بين 15 و 17 يونيو 2021 وهيشارك فيه مجموعة كبيرة من شركات الألعاب بالإضافة لواحدة من الشركات مُصنعة للأجهزة المنزلية، يعني ميكروسوفت أو سوني أو نينتيندو وبما إن سوني قررت إنها متدخلش أي حدث E3 تاني فا بنسبة كبيرة هنشوف ميكروسوفت هي الي في E3.

يوم 14 هيكون في حدث Pre Show هيستمر لكام ساعة وهيضم شوية إعلانات بسيطة تجهيزاً للحدث الرئيسي نفسه يوم 15، الحدث هيستمر لمدة 3 أيام وكل يوم هيستمر لمدة 12 ساعة بإعلانات وإستعراض Demos وحاجات كتير مختلفة لتشويق اللاعبين مرة تانية.

8- إختيار ممثلين مسلسل The Last of Us من شبكة HBO :

تم إختيار الممثلة Bella Ramsey الشهيرة بدور Lyanna Mormont في مسلسل Game of Thrones للعب دور Ellie في مسلسل The Last of Us من شبكة HBO وكمان أعلنوا عن الممثل الي هيقوم بدور شخصية Joel وهو الممثل الرائع Pedro Pascal الشهير بأدواره في Game of Thrones و The Mandalorian. بعد الإعلانات ديه  بقيت متفائل أكتر بالمسلسل وأظن هنشوف حاجة عظيمة جداً بصراحة.

Ahmed Yousry

About promidoz

Editor-in-Chief. About 5 years of experience in Gaming Journalism with more than 13k news written, tens of articles, video scripts and reviews. A hardcore gamer that loves a challenge.