أفضل 10 ألعاب في 2020

سنة 2020 هي واحدة من السنين اللي كانت مليانة عناوين كبيرة، ومفاجآت كتيرة ماكنتش متوقعة. بعض العنواين الكبيرة كان قد التوقعات، والبعض التاني خذلنا، هنتكلم في مقالين عن أفضل 10 ألعاب في السنة الطويلة دي، وأكتر 5 محبطين.وهنبدأ النهاردة بال10 الأفضل.

10- Mafia Definitive Edition

علي الرغم من إن مافيا شخصيًا من أفضل 4 تجارب ليا في 2020، لكن حطيتها في المركز العاشر عشان هي تكاد تكون محبطة في جانب عدم وجود أي نوع من أنواع المحتوي الجانبي اللي يخليك تكمل في اللعبة بعد القصة، وكمان فكرة كونها لعبة شبه خطية.

ستوديو هنجر 13 مطور مافيا 3 عرف إن قوة سلسلة مافيا في قصتها، واهتمامها بشخصياتها، وبالتالي تراجع عن فكرة نقل اللعبة لعالم مفتوح بحرية زايدة عن اللزوم، والتزم بسرد القصة بشكل خطي لمراعاة البناء الدرامي فيها. أحد أهم عيوب الجزء التالت كانت حرية اتمام المهمات بأي ترتيب، وبالتالي غياب الروابط بينهم بشكل خلاها مملة.

مافيا 1 تعتبر أحد أقوي قصص الجريمة الل شوفتها في الألعاب علي الرغم من عدم تقديمها حاجة ثورية. لكن القصة والشخصيات بتخليك تتعلق بيهم وتتعاطف معاهم. اللعبة تعتبر إعادة تطوير من الصفر للجرافيكس، ميكانيكيات السواقة، الmotion capture والحوارات، مع تعديلات عليهم بشكل يضيف سياق أكتر لبعض الشخصيات زي سارة مثلًا حبيبة البطل تومي. قصة اللعبة فكرتني بلعبة ريد ديد 2. قليل ما بتلاقي قصص في ألعاب بالقوة التمثيلية والسينيمائية دي، خصوصًا إن ده كان موجود زمان أكتر.

فكرة إن اللعبة شبه خطية في وجهة نظري مابينقصش من جمالها إطلاقًا. ألعاب قصة ممتازة كتير كانت خطية أشهرهم سلسلة أنشارتد مثلًا. ولكن طبعًا زي أي حد، أحب في الجزء الجاي من مافيا يكون العالم حيوي أكتر، وفي نشاطات جانبية مش لازم تبقي كتير، لكن تستغل العالم العظيم اللي أثبت هانجر 13 إنه يقدر يصممه.

9- Cyberpunk 2077 :

كلنا عارفين إن Cyberpunk 2077 كان فيها مشاكل تقنية كتير وقت الإصدار بس ده ميمنعش إن إستوديو CD Projekt RED قدملنا تجربة مميزة جداً وعرف يوصل فكرة بأسلوب مبتكر وشخصيات تخليك متعلق بيها حتى بعد عشرات ساعات اللعب.

Cyberpunk 2077 عرفت تقدم نقلة تقنية في تصميم مدينة Night City، المدينة هتخليك تتوه فيها وهتجذبك بعيداً عن القصة لأنك هتلاقي مهمات جانبية تتفوق على مهمات قصة في ألعاب تانية كتير.

الي هيعجبك جداً في Cyberpunk 2077 هو تصميم القصة ومهامتها والشخصيات الي فيها خاصةً مجموعة من الشخصيات الأساسية والجانبية زي Silverhand و Judy و Panam. الشخصيات ديه بالإضافة للموسيقى التصويرية هي الي هتخليك متحمس تعرف ايه الي هيحصل في القصة وهي الي هتخليك تتغاضى عن كل المشاكل الي هتشوفها قدامك سواء مشاكل تقنية أو مشاكل في أسلوب اللعب.

Cyberpunk كانت محتاجة تأجيل على الأقل 6 شهور كمان عشان تطلع بالمستوى المطلوب بس على الرغم من مشاكلها فاللعبة ديه هتقدملك تجربة ممتعة مش هتشوف زيها في 2020.

8-Final Fantasy 7 remake

عالم فاينال فانتسي من أكتر العوالم الجذابة اللي شوفتها في حياتي، والجزء السابع من أفضل أجزاء السلسلة من حيث القصة، ومن بعد نجاح تركيبة الأر بي جي الغربية مع الجزء ال13، قررت سكوير إينيكس إعادة تطوير الجزء السابع بنفس الاسلوب، وتقسيمه علي تلات حلقات، صدرت الحلقة الأولي منه النسة دي، وكانت عظيمة في مجملها. لعبة جديدة تمامًا، وسلسلة فاينال فانتسي كما لم تراها من قبل. شخصيات وعالم جذابين، رسوم عظيمة، وقصة عميقة مع إضافة تفاصيل وحوارات كتير ليها. أسلوب اللعب أميل لألعاب الهاك أند سلاش. مع وجود شجرة مهارات، وترسانة أسلحة كبيرة ممكن التغيير بينها أو دمجها مع بعض في منظومة معارك قوية.

7- Spiderman Miles Morales

روعة الجزء الأول في سبايدر مان ماكنت في اللي قدمه من منظومة معارك قوية، أو جرافيكس قوي، ولكن كانت في فهم المطور لعالم سبايدرمان، وأعداؤه، ومحاولة تقديم قصة مختلفة عن كل اللي اتقدم لسبايدرمان قبل كده. بطابع درامي قوي، والتركيز علي الشخصيات، وقصصهم الجانبية، واحد أهم شخصيات الجزء الأول كان مايلز موراليس. واللي أخيرًا حصل علي لعبته الخاصة كلعبة إطلاق علي الجيل الجديد (متوفرة برضو علي الجيل السابق) وبتقدم قصة قوية، شخصية أكتر من قصة بيتر باركر، بتتكلم عن التحديات اللي بتقابل عيلة مايلز، وتعريفه الشخصي اللخير والشر، ومواقفه تجاه حاجات كتير بتحصل حواليه، بعضها تقدر تتفهمه ومتتعاطفش معاه، وبعضها بيخليك تحب الشخصية أكتر وتتعاطف معاها.
منظومة المعارك هنا أقوي وأمتع، ولكن ده بيجي شوية علي حساب الصعوبة في اللعبة واللي بتقل كتير وبالتالي الأعداء بيقدموا تحدي أقل، ولكن أبرز حاجة في الإصدارة دي هي القصة، والجرافيكس لو هتلعبها علي الجيل الجديد، وعلي فكرة بيتر باركر بيظهر في بعض المراحل وبيكون له دور في القصة.

6- Crash Bandicoot 4

بعد غياب طويل لألعاب البلاتفورمر، بترجع لنا سلسلة كراش بجزء، علي إيد مطور جديد اسمه toys for bob، امتلك الجرأة بتسمية الجزء الجديد بالجزء الرابع، وبالفعل، كان النقلة اللي السلسلة محتاجاها، واتضح إن المطور الجديد فاهم فلسفة اللعبة، والأسباب اللي خلت الاعبين يحوبها زمان في أجزاءها الأساسية.
كراش 4 بتقدم تصميم مراحل تدريجي في الصعوبة، مع عوامل مساعدة كتير أهمهم منظومة الأقنعة اللي بتساعد علي تجاوز العقبات بشكل مميز، ده غير إمكانية اللعب بشخصيات مختلفة، لكل شخصية سلاح أو أسلوب مميز بيغير من طريقة تفكيرك وتعاملك مع العقبات اللي قدامك. كمان طول اللعبة كان مناسب جدًا، بل وحسيت إنه طويل نسبيًا وده شيء إيجابي في لعبة بلاتفورمر لإن معظم الألعاب دي بتبقي قصيرة ومكررة.

كل الإيجابيات دي كانت بالتوازي مع حفاظ علي طابع اللعبة الطفولي، وتناول قصتها بشكل شبيه بأفلام ديزني، وساعد في كده الرسوم الرائعة، والألوان الزاهية اللي خلت اللعبة تحفة بصرية، والأداء اللي خلالها تحفة تقنية. ده غير إن محتوي اللعبة من مراحل سرية وأطوار لعب تانية غير القصة يخليها صفقة ممتازة مقابل 60 دولار.

5- Wasteland 3

للي مايعرفش ويست لاند هي الأب الروحي لسلسلة Fallout. وهي لعبة أر بي جي من المنظور العلوي، قدمت جزءها الأول سنة 1988، وبسبب مشاكل في الحقوق تم الاتجاه لتطوير الاجزاء الأولي من فول أوت بنفس النظام أو المنظور. وبعدين تم حل مشاكل الحقوق وإصدار الجزء التاني سنة 2014 وتحقيق نجاح محدود، ومع إصدار الجزء التالت السنة دي، ماحدش توقع المستوي الخارق اللي قدمته اللعبة.

كلمة “لعبة أر بي جي” بقت بتتقال علي أي لعبة دلوقتي، وده شيء أفقدها معناها، لكن خليني أقولك إن wasteland 3 هي أكتر لعبة أر بي جي صريحة صادفتني السنة دي، أكتر لعبة في اختيارات مؤثرة، وأكتر لعبة في استكشاف جميل، وعالم يشدك بشكل عظيم، وشخصيات جانبية كتير تجبرك تفكر تعادي مين وتتضامن مع مين. علي الرغم من كون القصة قصة عادية، محلية زيادة عن اللزوم، إلا إنك هتلاقي نفسك اهتميت، وشدك كل القصص الفرعية اللي بتقدمها اللعبة، ومش هتلاقي نفسك مشتت بسبب الأنظمة الكتير اللي بتقدمها ، عشان تم تبسيطها بشكل ممتاز.

4- Demon’s Souls :

لعبة Demon’s Souls هي أفضل حصرية إطلاق في تاريخ أجهزة الكونسول، إستوديو Bluepoint أخد كل حاجة قدمها إستوديو From Software في 2009 وحسن عليها عشان تقدم تجربة تليق بإسم جهاز PlayStation 5.

لعبة Demon’s souls هتقدملك تجربة بصرية مبهرة على الرغم من عدم توفر تقنية تتبع الأشعة فيها، لو انت من محبي ألعاب السولز ومعرفتش تجرب Demon’s Souls على PlayStation 3 فالفرصة جتلك دلوقتي عشان تعيش التجربة الي بدأت السلسلة كلها.

إستوديو Bluepoint كمان عمل شوية تعديلات بسيطة على تصميم الأعداء والوحوش وبسبب شكلهم الاكثر واقعية هتحس إن اللعبة بقت اصعب وهتخليك مخنوق اكتر. بس خلي بالك، الـ PlayStation 5 لسة جديد معاك وانت هتتعصب كتير فا واحدة واحدة على الـ Dualsense الي معاك.

3-Assassin’s creed Valhalla

يسعدني إني أقول، إن أساسينز كريد فالهالا هي أكتر لعبة في السلسلة من بعد سينديكيت حسيت إنها تنتمي لسلسلة أساسينز كريد. قصة اللعبة العامة موجودة هنا وبقوة، فكرة الصراع بين الأساسينز والتمبلرز علي مر العصور، وفكرة الحضارة القديمة، وتكملة فعلية من بعد نهاية الجزء التالت اللي سابتنا كلنا مصدومين، كل ده وفرته فالهالا، وضافت عليه كمان قصة رحلة شخصية من أقوي شخصيات السلسلة منذ هيثم كينواي، وهو أيفور! قصته شخصية، ولكنها بتحصل وسط أحد أهم أحداث التاريخ وهو غزو الفايكينجز لإنجلترا.

ماخبيش عليك أنا ماكنتش متحمس نهائي للsetting بتاع الفايكنجز لكن وجود كاتب قصة الجزء الرابع وجزء ريفيليشنز “داربي ماكديفيت” خلاني أحس إن ممكن القصة تكون أفضل من الجزءين السابقين.
اسلوب اللعب والعالم هنا أفضل بمراحل من قبل كده، والقصة متركزة ومفيش تشتيت فيها كتير غير في الآخر. ده غير إن أغلب الشخصيات الجانبية متمثلة حلو وقوية، مع عالم كبير واسلوب استكشاف ومكافأة عليه رائعين. ده غير رجوع عناصر من الأجزاء القديمة زي الاغتيال من ضربة واحدة من الهيدن بلايد، والتخفي وسط الناس. أساسينز كريد فالهالا هي بلا شك أفضل جزء في ثلاثية الأر بي جي وأكثرهم اكتمالًا فيما عدا الجانب التقني، وهي واحدة من أجزاءي المفضلة في السلسلة ككل.

2- Ghost of Tsushima

علي الرغم من تسمية البعض للعبة دي ب”أساسينز كريد اليابان” وقت الإعلان عنها، إلا إن التشبيه ده اختفي مع إطلاق اللعبة وتجربة الناس ليها، ببساطة لإن اللعبة قدمت شيء خاص بيها، بعيد عن التقليد أو الاقتباس بشكل ملحوظ، بعالم افتراضي من أجمل ما رأيت في حياتي، من ألوان وفيزيائية وتصاميم بيئات. القصة كمان كانت درامية بامتياز وتجبرك تتعاطف مع كل الأطراف، مع فكرة وجود صراع اخلاقي بيواجه البطل بين كونه ساموراي، وبين رغبته في نصرة بلده والقضاء علي المغول.
كل ده بيتقدم باسلوب سرد عظيم، واسلوب لعب عميق وقابل للتطوير حتي بعد ما تخلص اللعبة. المعارك كانت أجمل وأمتع شيء في اسلوب اللعب، لكن لازم ماننساش نشيد بتصاميم المهمات، لإن المهما الجانبية هنا كانت ماتتخيرش علي الأساسية في أهميتها، بعض الشخصيات كانت بتظهر في القصة وتكمل قصتها الخاصة في مهمات جانبية، ليها مسار محدد وهدف بيخدم عالم اللعبة بشكل كبير.

جوست أوف تسوشيما لعبة عبقرية في كل ركن من أركانها، وعلي الرغم من حجمها الصغير مقارنة بلعبة أساسينز كريد اوديسي مثلًا، لكنها نجحت إنها تديك الكمية المناسبة مما تقدمه، بدون لحظة ملل. لو عند بلايستيشن 4، ماينفعش تفوت اللعبة دي.

1-Doom Eternal.

لعبة دووم إيتيرنال فاهمة فكرة أن تكون لعبة فيديو بشكل أقل ما يقال عليه عظيم. عالمها عالم مظلم، ومثير للغضب في كل أركانه سواء شكليًا أو سمعيًا. الموسيقي الصاخبة، والعام الموحش ده بيخلوك جاهز تدبح في الأعداء، وعلي استعداد لتجربة كل أسلوب متاح في القتل البشع، مع تقديم ترسانة أسلحة عملاقة، وإمكانية دمج الضربات مع بعض، وتصميم بيئات رائع، وذكاء اصطناعي ممتاز. كل ده بيخليك قدام لعبة عارة إنت عايز إيه. بتكافيء شعورك بالرغبة في الإنجاز، وابتكارك في المعارك بإنها تديك أسلحة أقوي، وأعداء أصعب، وعمرك ما هتحس بملل معاها. دووم 2016 رجعت هيبة الfirst person shooters بدون الاحتياج لقصة. لكن دووم Eternal خدت الموضوع لمستوي تاني، هيبقي صعب جدًا علي أي لعبة مستقبلًا إنها توصله.

في النهاية:

ترتيب ألعاب السنة هو رأي شخصي، وكل واحد رأيه طبعًا، لكن اللي نقدر نتفق عليه إن السنة دي كان فيها عناوين كتير مميزة، وكانت دسمة وجات المفاجأة فيها من الألعاب اللي ماتوقعناش إنها تكون قوية، وفي المقال الجاي هنتكلم عن الألعاب اللي أحبطتنا رغم إننا كنا متوقعين نجاح كبير ليها.