في فترة الكساد العالمي العظيم، ساءت الأحوال المادية لكل أفراد الطبقة الوسطي، وأصبحت أحوال المهاجر الطلياني، تومي أنجلو (بطل اللعبة) سيئة، في مدينة Lost Heaven المستوحاه من شيكاجو، حيث تحدث الجريمة في كل ركن من أركان المدينة، شيكاجو اللي كانت مركز مجموعة كبيرة من جرايم الفترة دي، وخصوصًا مافيا تهريب الكحوليات. قصة تومي أنجلو بتدور حوالين السعي ورا أي مجد من أي نوع، ومعني للحياة، بدلًا من حياته كسواق أجرة، واللي بتقوده في يوم من الأيام أثناء استراحته إنه يقابل أفراد من عائلة سالياري الإجرامية، ويساعدهم في الهروب تحد التهديد، ويدرك بعدها إن هذه الحياة تناديه، وهو يحتاج ليها، وإن وظيفته العادية، اللي بيقابل فيها ناس عاديين، ليست له ولا هو لها، هو يسعي لشيء أقوي، وأصعب في حياته يخليه قادر يحصل علي فلوس كتير، والأهم بالنسباله كان الشعور بالإنتماء لشيء كبير في عالمه اللي بيعاني!
مافيا هي قصة محاكاة لعالم العصابات الإيطالية بشكل غير مسبوق، مفيش سلسلة ألعاب جسدت أجواء أفلام زي Goodfellas و The Godfather و Donnie Brasco و The Irishman زي مافيا، ولكن اللي يفرق الجزء ده عن مافيا 3 مثلًا هو قوة الشخصيات وخاصةً الشخصية الرئيسية ودوافعهم الواضحة، واللي تقدر تتعاطف معاها بشكل واضح من غير ما تحس إنها مستهلكة أو متكررة في قصص تانية، زي فكرة الانتقام اللي كانت في مافيا 3.
في أحد مهمات القصة، وبعد ما تومي بيتعرف علي كمية الإثارة اللي بيحصل عليها أي حد في عالم الجريمة، والأهم كمية الفلوس، بيرجع يمارس وظيفته كسواق تاكسي، وبيصادف مجموعة من الشخصيات الغير مقدرين له، بيعاملوه بشكل أقل من العادي، وكأنه لا يملك أي موهبة أو شيء يميزه، وافتقاده لنظرة التقدير اللي حصل عليها من المافيا لما ساعدهم خلاه يفكر إن حياة الجريمة هي الشيء الأنسب له، ولكن حدث معين بيحصل بيزقه ناحية اتخاذ قرار الدخول للعالم ده، ومقابله الدون سالياري، عشان يقبله كجزء من العيله. في اللعبة انت مابتحصلش علي أسلحة قوية من الأول، بتاخد أسلحة يدوية الأول، وبعدين مسدس صغير يساعدك وقت اللزوم فقط، وبعدين سلاح Shotgun وبعدين رشاش.التقديم التدريجي ده للأحداث، وعدم الدخول في أزمة التسريع أو التبطيء الزايد في الأحداث، بيوريك قد إيه قصة مافيا (الجزء الأول) اتكتبت باحترافية شديدة، وعلي إيد أشخاص فاهمين هم بيعملوا إيه، وفاهمين شخصياتهم اللي كتبوها، وعشان كده القصة بتكبر مع كل لحظة بتمر عليك فيها، وبتعيشك مع شخصياتها أكتر وأكتر بشكل فكرني بلعبة RDR2، وده شيء يحسب للريميك، لإن الجزء الأصلي كان مختصر جوانب كتيرة في الأحداث، وطبعًا العوائق التقنية كانت مانعاه يظهر القصة بالشكل العظيم اللي ظهرت عليه النهاردة مع النسخة الجديدة.
شخصيات اللعبة مش كتير، ولكن كلهم تمثيلهم قوي، ومش كليشية، ولا مقتبس من شخصيات المافيا في الأفلام، بالعكس بتحس إنه فريد من نوعه، وجذاب بشكل خاص، خصوصًا شخصيات تومي، وسام، وبولي. اللي تمثيلهم عظيم وحواراتهم كانت كلها مكتوبة بشكل ممتع، يخليك تحب تسمع كل حوار فيهم كأنه جزء مهم من القصة. بولي فكرني كتير بشخصة الممثل (جو بيشي) في فيلم Goodfellas، لكن بشكل مايخلكش تحس إنه مقتبس منه، أو بيقلده. شخصيات زي سارة -مرات تومي- أخدت جزء أكبر في القصة وتم إضافة مقاطع ليها، وأحداث تخصها، لكن الحقيقة الأحداث دي برضو كانت ممكن تبقي أكتر عشان تدي فرصة لتطور الشخصية، وتعلق اللاعب بيها.
تطور شخصية تومي هو واحد من أفضل تطورات الشخصيات اللي شوفتها في الألعاب، ويمكن الأفلام كمان -بطبيعة الحال- لإن الألعاب بتملك عامل الوقت اللي لا تملكه الأفلام، لعبة مافيا خلصت معايا في 12 ساعة، حسيت إنهم رحلة مؤثرة، وقوية في كل جوانبها الخاصة بالقصة، وشخصية تومي رغم إني كنت عارف نهايتها -لإني لعبت بقية الأجزاء إلا إني مكنتش متوقع كل العمق والقوة في الاداء دول. لكن هل الجيم بلاي بنفس القوة دي؟
الجيم بلاي في مافيا صعب وصفه بكلمات بسيطة، لإنك لو بصيتلها كريميك، لازم هتبقي نظرتك مختلفة عن لو بصيت ليها كلعبة جديدة في 2020. في تضاد واضح بين المستوي القصصي، والمثيلي ومستوي الجيم بلاي في مدي حداثتهم، قصصيًا، Mafia Definitive Edition هتحسسك إنها لعبة اتعملت سنة 2020، ومش هتحس بأي عنصر قديم فيها، لكن من حيث إسلوب اللعب فإنت مجبر تبصلها علي إنها ريميك للعبة قديمة، لإنك هتحس إن فعلًا في عناصر من 2002 في ميكانكيات اللعب.
أولًا اللعبة بتتيح لك من الأول الاختيار بين مستويات صعوبة Easy, medium , Hard أو Classic، وكلاسيك ده بيقدملك أقرب تجربة ممكنة لتجربة اللعبة الأصلية، يعني مثلًا الreload لسلاحك وإنت معاك لسا طلقتين، بيخلي الطلقتين دول يروحوا عليك، بتلاقي علي الشاشة قدامك Markers تحددلك مكان المهمة، والطريق ليها بشكل أقل كثافة، وبيكون مفيش Health Regeneration، ده غير إن السواقة وتعامل الشرطة معاك بيبقي بنظام المحاكاة (Simulation).
نظام الSimulation في السواقة هو أكتر حاجة حسستني إن دي لعبة مافيا فعلًا، لإنه كان ومازال نظام غريب، واقعي بزيادة، بشكل ممكن يخليك ماتحبش السواقة في اللعبة، واللي هتقضي معظم وقتك بتعملها لإن طبعًا مفيش Fast Travel! النظام ده بيعتمد علي إنك بتحول سرعات من أول لتاني لتالت، ولو عايز ترجع لورا ماينفعش ترجع بزار الL2 زي بقية الألعاب، إنت محتاج تحول للمارشدير! لكن لحسن الحظ في خيار إنك تخلي السواقة عادية في اللعبة، أو تخليها محاكاة، لكن التحويل يبقي أوتوماتيك.
نظام تعامل الشرطة كان أحد الحاجات الواقعية بشكل زايد في الجزئين الأول والتاني من مافيا، ولكن واضح إن تم تخفيفهم شوية لمواكبة العصر، في الإصدار القديم كانت الشرطة موجودة في كل مكان ولما بتشوفك بتعمل حادثة، أو خبطت حد، أو مش ماشي صح (ماشي عكسي مثلًا) أو مزود في السرعة بيلاحقوك ويدوك مخالفة، في الريميك هنا الشرطة مش موجودة كتير أصلًا فمش هتلاقي نفسك مضطر باستمرار إنك تخلي بالك من اسلوبك، لكن لو اتطريت، فهتدوس علي الTouch . Pad عشان تفعل حاجة اسمها الLimiter اللي بيخلي أقصي سرعة ليك سرعة مناسبة.
اللعبة هنا مفيهاش عملة تكسبها من العمليات اللي بتعملها، وبالتالي مفيش حاجة بتخسرها لما بتاخد مخالفات، ولا دافع إنك تكسب فلوس أكتر عشان مثلًا تشتري ملابس أو عربيات أو أسلحة، واللي كانت أحد دوافعي للاستمرار في تجربة مافيا 3
كل أنظمة المحاكاة للحياة الواقعية دي كانت تعتبر براءة اختراع لسلسلة مافيا وقت ما نزلت، وسعيد إني شوفتها، مع نظام هايل لظبط الصعوبات بطريقة مناسبة ليك في شيء أشبه باللي شوفناه في لعبة The Last Of us 2 من مستوي تخصيصات دقيق عشان يناسب الكل.
الGameplay-loop نفسها بتتمحور حوالين مهمات التخفي، والسواقة، ومعارك الأسلحة النارية. وآخر أتنين واخدين مساحة أكبر، والسواقة هنا شبيهة بتجربة مافيا 3 شوية، سواقة كتير في مساحات كبيرة لكن لحسن الحظ تم أضافة اختيار إنك تتخطي كل مراحل السواقة اللي مش مهمة للقصة من المنيو الرئيسي ، وغير كده ،فالمدينة هنا أجمل، وأصغر، وتكثيف مجهودات المطورين في مساحة أصغر خلا المدينة تظهر بشكل حيوي أكتر من أي جزء تاني من لعبة مافيا، بالإضافة إلي مجموعة من التفاصيل الصغيرة اللي بتضيف للأجواء هنتكلم عنها بالتفصيل لما نتكلم عن العالم. تكرار الجيم بلاي هنا -الحمد لله- مكانش بالاسلوب اللي في مافيا 3، لإن تصميم المهمات كان ذكي، دايمًا يحطك في مواقف مختلفة، وأحداث مفاجأة و Set Pieces جميلة تخليك تحس إنك دايمًا بتعمل شيء جديد علي الرغم إنه علي الورق، مش هيخرج بره التخفي، أو السواقه أو المعارك سواء يدوية أو بأسلحة نارية. مرة بتكون في مهمة في معركة عصابات قوية في كنيسة، مرة في عملية سرقة بنك، مرة في عملية اغتيال، ومطاردات في الشارع، ومطاردة طيارة، أو سباق، أو الهروب من سجن ! تصميم المهمات هنا فكرني بالتنوع والقوة اللي شوفتها في Gta V و Red dead redemption 2، واللي كان فيهم حرية أقل في الكيفية بتاعة كل مهمة، لكن قوة المهمة واختلافها عن كل اللي قبلها خلاك قابل ده، بل وعايز أكتر.
ميكانكيات الشوتينج في اللعبة الأصلية كانت بدائية إلي أبعد الحدود، وهنا تم إضافة نظام الCover، وبقي الشوتينج قريب جدًا من لعبة مافيا 3، ودي مشكلة لإن الأسلحة تنوعها مش كبير، والاحساس اللي بتديهولك وأنت بتضرب ضعيف، وملوش تأثير مرئي واضح. لو مش فاتح الAim Assist فهتحس إن الشوتينج سيء وقديم برضو، ودي أحد عيوب اللعبة.
الدخول في معارك يدوية في مافيا 2 كان شيء ممتع، وكلنا فاكرين مهمة السجن اللي كان كلها ملاكمة، وكانت معمولة علي أعلي مستوي، في الجزء التالت الكومبات بالإيد كان شيء تم تهميشه بزيادة، وكان دايمًا في استخدام للسكينة العسكرية (Combat knife) بأنيميشن مكرر لقتل الأعداء، هنا تم إعادة الكومبات بالإيد، وإتاحة فرصة استخدام أسلحة Meleeزي السكاكين برضو، والعصيان لخشبية، أو عصيان البيسبول، والنظام هنا كان حلو لكن مش مستجيب بالحد الكافي. لما بتخش علي حد معاه سلاح Melee بيبقي مطلوب منك تصده بزرار الCounter Attack، وتضربه والأنيميشنز كانت منوعة بشكل كويس جدًا.
أحد الجوانب اللي عجبتني في أسلوب اللعب هو اختفاء الTactical Vision واللي كانت بتعلملك الأعداء فين من ورا الحيطان، أو عن بعد، هنا الاعتماد كاملًا علي رؤيتك الشخصية، وتركيزك في البيئات ودراستك ليها، وحركتك السريعة، وده كان تحدي صعب إني أتعود عليه في الأول، خصوصًأ مع فكرة إن مفيش Regeneration أو Health Kits بسهولة، لكن لما اتعودت عليه حسيت بتميز كبير،أو تحدي مُرحب بيه.
نظام السواقة مكنش سلس زي ما قولت، لكن أفضل وأوقع من مافيا 3 في التعامل مع العربيات بالنسبة للحقبة التاريخة، في مافيا 3 كان ممكن أخش مطاردة عنيفة بأي نوع عربية قديم، وده مكنش منطقي، وكان في عربيات بقدر أعمل بيها Drifting وهي مش مناسبة لكده، هنا انت بتحس بفرق بين كل عربية والتانية بشكل إيجابي، وواقعي. ده غير طبعًا سواقة الموتوسيكلات(الدراجات النارية) اللي تم إضافتها بشكل جميل وسلس.
علي الجانب الآخر، الحرية، والأسلوب الشبه مفتوح بتاع مافيا 3 مش موجود هنا، وده مش شيء وحش إطلاقًا لإن الحرية الزايدة، مع غياب أي عواقب للاختيارات المختلفة، شيء مش مشجع علي استثمار واستغلال الحرية، وبيخليها فارغة من معناها الحقيقي. علي سبيل المثال، في لعبة Hitman في حرية كبيرة لكن كل اختيار بتاخده لطريقة اتمام المهمة بيديك نتيجة مختلفة، وعشان كده أنا شخصيًا حبيت نظام التنوع اللي مشيت بيه Mafia Definitive Edition أكتر من الحرية بتاعة مافيا 3. (اتكلمت عن مافيا 3 بالتفصيل في مقال دراسة جودة).
لحظات السواقة الكتير تم تجنب جعلها مملة عن طريق الحوارات، الموضوع فكرني بلعبة La Noire. كتير من تفاعلات الشخصيات كانت أثناء سواقتهم، وتعليقهم علي اللي بيحصل في حياتهم، بشكل يحسسك إنهم أشخاص حقيقين، وليهم جوانب تانية ولحظات ضعف، وخوف، ويمكن كره للشر اللي بيعملوه، وأغلب الحوارات دي كانت مش موجودة في اللعبة الأصلية، وحتي الحوارات اللي كانت موجودة تم تعديلها، وإضافة سطور كتير عليها أو تعديل الاسلوب عشان يكون طبيعي أكتر ومش مصطنع. الحوارات دي كانت عظيمة وكانت أحد أكتر الجوانب اللي استمتعت بيها في اللعبة.
تصميم عالم اللعبة مش تصميم عالم مفتوح بالشكل المتعارف عليه، ولكن بيقدم قصة خطية، مفيش شخصيات تروحلها وقت مانت عايز تاخد منهم المهمة، القصة ماشية بشكل خطي من الأول للآخر، بدون توقف، بجانب طور تاني لوحده اسمه Free Ride، وده اللي بيديك حرية القيام بأي شيء في المدينة وشوارعها. وهنا بيظهر أحد عيوب اللعبة الكبيرة. المحتوي الجانبي..
للأسف أحد أكبر عيوب اللعبة هي المحتوي الجانبي. اللعبة مابتقدمش أي شيء يخليك تكمل في عالمها بعد القصة، أو مهمات جانبية علي الرغم من وعود الستوديو المطور بتجنب التكرار في “المهمات الجانبية” زي اللي حصل مع مافيا 3، ولكن الحقيقة هنا مفيش أي مهمات جانبية، والمحتوي الجانبي مقتصر علي مجموعة كبيرة من الCollectibles المتمثلة في مجلات، وتماثيل علي شكل ذئاب، ومجموعة من العربيات والملابس السرية اللي بتلاقيها في أماكن مختلفة في الخريطة، لكن دول كان عددهم مش كتير إطلاقًا ومش كافي إن أعتبرهم محتوي جانبي مُرضي. عالم اللعبة مصمم بشكل خرافي وجميل إلي حدود بعيدة، وكان مطلوب بشكل كبير العالم ده يتم تخليده، ومعاملته بشكل شبه لعبة Red dead redemption والباب كان مفتوح علي مصرعيه قدام المطورين، بحجة إن ده ريميك ومش مجبر يقدم نفس القيود اللي كانت اللعبة الأصلية مقيدة بيها، لكن المطور اختار التركيز علي القصة، وتقديم اللعبة بسعر أقل من سعر اللعبة الكاملة.
عالم اللعبة زي ما قولت خرافي، كل شيء بيحطك في الأجواء بتاعة الحقبة الزمنية دي، والخريطة متقسمة 3 اماكن، مدينة Lost Heaven وضواحيها، والطرق ما بينهم. كل الأماكن شكليًا جميلة وتخليك عايز تاخد صور كتير، ولكن المدينة نفسها هي أكتر شيء تم الاهتمام بيه، وخصوصًا في فترة الليل، اللي بتظهر فيه لوحات الإعلانات الضخمة علي الطريق، والأنوار النيون اللي مشهورة بيها الحقبة التاريخية دي، ده غير إن الاهتمام بتفاصيل زي موديلات العربيات وأشكالهم، وجعلهم أقرب شيء في الكنترولز للواقع وقتها اتبذل فيه مجهود خرافي، ومش العربيات بس، الأسلحة كمان،وبشكل يخليك ماتقدرش تعتمد عليها في معارك واسعة، أو يخلي المعارك اللي علي نطاق كبير حاجة مش محبذة، وده بالظبط ما كانت عليه الفترة الزمنية دي. عجبني كمان ريف المدينة الهادي، وتصميم البيئات فيه علي الرغم من إن تفاصيله قليلة، إلا إنه كان جميل برضو، ومريح ومختلف عن زحمة المدن.
في مقال دراسة الجودة بتاع مافيا 3، اتكلمت عن قد إيه الأجواء كانت قوية، وإن الإذاعة ( الراديو) ساهمت في إعطاء مصداقية وعمق لعالم اللعبة عن طريق برنامج كنت بحب أسمعه اسمه Native son، وهنا فالإذاعة برضو علي الرغم من تقديمها قناتين فقط، ولكن بتقدم أخبار بتخص أحداث مهمة في الوقت ده، زي صعود الحزب النازي بقيادة هتلر، وخطابات الرئيس روزفلت. وتعليقات علي الأحداث اللي انت كنت طرف فيها.
الأداء الصوتي و الرسوم في اللعبة هم أفضل جوانبهما مع القصة بلا شك، إعادة بناء كاملة تمت للعبة من البداية، مع تعديل الحوارات، وتعديل أشكال الشخصيات بشكل يخليهم يبعدوا عن كونهم Basic، وأكتر شخصية أثر معاها الموضوع ده كانت شخصية بولي، اللي بقي أحد شخصياتي المفضلة في عالم الألعاب.
المملثلين الرئيسين تم تغييرهم بشكل كامل عن اللعبة الأصلية، وده ساعد في زيادة الحوارات وإعادة تقديم طابع الشخصيات بشكل جديد، كأنهم لعبتين منفصلين تمامًا. حركات الوش كانت عظيمة وأفضل من الجزء التاني، لإن محرك الرسوم هنا هو نسخة معدلة ومطورة من لعبة مافيا 3. لكن ده مايمنعش إن كان في عيوب تقنية واضحة ساعات كانت بتخليني أعيد المهمة زي حاجات بتظهر فجأة، أو عدم إستجابة للObjective اللي عملتها ولسا اللعبة بتطلب مني أعملها! اللعبة تقنيًا أفضل بمراحل من الجزء التالت وقت إصداره، لكن لسا محتاجة شغل.
المؤثرات الصوتية الناتجة عن الانفجارات، اطلاق النار قوية، ولكن لاحظ إن “النار” نفسها شكلها كان ضعيف، ومؤثراتها سيئة، وده بيظهر في لحظات ضرب المولتوف أو الانفجارات. البيئات ليها ردود فعل رائعة علي الدمار اللي بيحصل، وده كان شيء مش موجود في أي جزء فات.
اللعبة بتقدم موسيقي وأغاني مُرخصة علي أعلي مستوي مناسبة للحقبة التاريخية والأجواء، وافتاجئت إن في تعديل لا بأس به علي الموسيقي الرئيسية للعبة، هي أصلًا كانت ممتازة لكن التعديل عليها خلالها أحسن، وحاليًا مع التمثيل الأكثر سينيمائية، والأداءات الصوتية الجبارة، والموسيقي كانت مؤثرة أكتر بكتير، وممكن نعتبرها أحد أفضل ما تم تقديمة علي الإطلاق.
الخلاصة:
Mafia Definitive Edition هي هدية لكل محبي سلسلة مافيا، ولكل محبي أفلام العصابات العظيمة في السينما الأمريكية، وفرصة للسفر عبر الزمن في أحد حقب التاريخ اللي مايتزهقش منها، والتعرف علي شخصيات جذابة، ومكتوبة ومتمثلة بشكل عظيم زي تومي أنجلو وبولي، وعشان كده بنصح بيها أي حد عايز يعيش تجربة شبه فيلم Once Upon a time in America مثلًا.
ريميك مافيا 1، هو إعادة تقديم للعبة عظيمة، بشكل يليق بيها، لكن زي ما اللعبة كان فيها عيوب واضحة، الريميك محاولش يقدم تجربة خالية من العيوب، وللأسف العيوب هنا واضحة أكتر لأننا بقينا بنسعي إننا نشوف ألعاب كاملة، من غير عيوب، ويؤسفني إني أقولك مافيا مش هي اللعبة اللي من غير عيوب، لكن تقديمها بسعر أقل من لعبة كاملة، أو إمكانية شراء الثلاثية كلها بسعر لعبة كاملة يخليني أقولك إن العيوب قابلة للتغاضي عنها،ويخليها Offer you can’t refuse ولو ملعبتش التلات أجزاء أنصحك وبشدة بلعبها دلوقتي.
