Reviews

مراجعة Horizon Forbbiden West

معلومات عامة:

طيب اللعبة هنا بتبدأ بشكل مباشر نوعاً ما بعد احداث الجزء الاول بنفس الشخصيات والي اللعبة متوقعة منك تكون عارف الشخصيات دي كلها و الحقيقة انا لعبت الجزء الاول اول ما نزل تقريبا ومش فاكر اي شخص من الشخصيات دي ولا فاكر القصة اصلا ولا اي حاجة غير ايلوي ودا راجع لضعف قصة الجزء الاول و ضعف الشخصيات نوعا ما فا طبيعي بتنسي كل حاجة بعد مدة من الزمن فا لو انتا مالعبتش اول جزء انصحك تلعب الجزء الاول مش عشان تبقي عارف القصة بس لا لأنه يستاهل يتلعب جدا جدا هوا و الاضافة و اللعبة لسا ماقدمتش خالص بالذات لو هتلعبها PC.

القصة:

القصة هنا بتكمل بعد الجزء الأول بنص سنة والي بتبدأ فيها رحلتك للغرب المحظور عشان تنقذ الارض من خطر محتوم بيهدد البشرية وكل الكائنات الحية علي الأرض.

فكرة اللعبة و القصة بشكل عام من بداية الجزء الاول هيا مثيرة للأهتمام و فكرة جديدة و تفاصيل كتيرة ولكن زي الجزء الاول القصة نفسها بتفتقد عناصر كتير بتخليك ماتهتمش بالقصة علي الاقل في الجزء الأول من اللعبة اه اللعبة في احداث اكشن ومغامرات و مشاهد سينيمائية محترمة بس الشخصيات مثلا مش مثيرين للأهتمام بأي شكل و الكلام ده بينطبق علي كل الشخصيات في اللعبة تقريبا معادا ايلوي وشخصية تانية ظهرت في مهمة واحده فقط.القصة هيا نقطة ضعف اللعبة الوحيدة و لكن ده مش معناه ان القصة سيئة بس هيا اقل من مستوي اللعبة الرهيب والي هيعوض دور القصة.

طريقة اللعب:

هنا بنلعب طبعا ب ايلوي بطلة السلسلة و بنقتل كميات كبيرة من الروبوتات المتنوعة والي بتبقي علي اشكال مختلفة يعني في روبوتات طائرة و علي شكل فيلة و حتي سيد قشطة و كتير من كدا و كل روبوت ليه نقاط قوه وضعف معينة يعني في روبوتات بتتأثر بالنار مثلا وتكون قوية من الثلج وهكذا دا غير نقط الضعف الي في الهيكل نفسه الي مهم تستغلها عشان تعرف تقتل الروبوت ده وتقدر تقتلهم عن طريق ترسانة أسلحة متنوعة ابرزها طبعا القوس والسهم والي في منها اسهم مسممة اسهم نارية قنابل فخاخ سهام متفجرة قنابل لزجة وغيرة كتير بتتفتح معاك علي حسب لعبك للمهمات الجانبية او تقدمك في المهمات الريئيسية و الي بالمناسبة بتحتاج منك تلعب مهمات جانبية و انشطة جانبية كتير شوية عشان المستوي بتاعك يوصل للمهمات دي زي الي بنشوفه في سلاسل زي Assassin’s Creed او The Witcher بس السيستم هنا مسامح شوية في الجزئية دي يعني ممكن تدخل المهمة تجرب لو وصلت لBoss Fight وماقدرتش تعدية تقدر تسيف عنده وتطور نفسك وترجعله من غير ما تعيد المهمة و لكن انتا مش هتحتاج كدا لأن محتوي اللعبة علي الرغم انه كبير و متنوع من انشطة جانبية و مهمات قصيرة و جانبية و اماكن استكشاف ومهمات تتبع و استعاده الدرونز و غيرة فا كل ده ممتع اصلا و معمول علي مستوي عالي ماتحسش انك بتلعب حاجة درجة تانية مثلا زي بعض الالعاب.

بارتفاع المستوي بتقدر برضو تطور الأسلحة بتاعتك و الدرع وتشتري غيرهم لو حابب وعندك بعض الحاجات الجديدة الي ماكنتش موجودة في الجزء الاول زي قناع الغوص و الGlider الي بتخليك تنط من اماكن عالية و تنساب مع الهواء و عندك ال Grapple

الرسوميات و الجانب التقني:

طبعا عيب ان احنا نتكلم في جزئية الرسوميات علي اي لعبة لألعاب سوني عموماً بس انا لعبت اللعبة علي PS4 مش 5 فا في كلام مهم لازم يتقال.

اولا الرسوميات بشكل عام من الطراز الرفيع جايبين اخر اخر الجهاز و الحقيقة احد المطوريين قال ان اللعبة اصلا معمولة للPS4 مش 5 فا دي التجربة الأصلية و ال5 هيا تجربة محسنة فا لو انتا هتلعب جيل قديم زيي خليك عارف ان اللعبة مش بورت تعبان من لعبة جيل جديد او غيرة لا هيا مبينة اصلا للجهاز.

الخامات الانيميشن الاضائة فيزيائية المياة كل ده في مستوي ممتاز مافيش تضحيات و الحقيقة كنت اتمني يبقي في تضحيات ودا هيدخلنا للجانب التقني الي هشرح فيه ليه.

طيب اللعبة ك سرعة تحميل كسرعة قوائم كل ده معقول يمكن القوائم لما تدخلها بتاخد وقت شوية بس مافيش تهنيج معادا الدقة فعلي الرغم من جوده الجرافيك العالية جدا فا ده بيجي بتضحيه طبيعي في دقة الوضوح والي هيا حسب ما انا شايف 1080p متغيرة ناس كتير ممكن مايهمهاش حاجة زي كدا بس احب اقلك لا يهمك لأن اللعبة هنا كمية الزرع و الحشائش و الاشجار و شعر الشخصيات الكثيف مع انخفاض الدقة و استخدام علي ما يبدو نوع من انواع تنعيم الحواف بيأدي الي نغمشة زايدة في الاماكن دي و الي شكلها صعب بصراحة في بعض الاحيان.

جانب تاني هوا متعلق في الحقيقة بضعف الهاردوير بشكل اساسي خاصة الهارد درايف هوا بطئ تحميل العناصر في الشاشة خاصة في المشاهد السينيمائية او لما تجري بسرعة من مكان للتاني هتلاقي ان بعض العناصر بتاخد وقت طويل عشان تحمل زي لبس الشخصية و الابواب وحتي الشخصية نفسها ممكن يكون نصها طاير ودا فصيل الحقيقة بس زي ما قلت هوا متعلق ببطيء الهارد الميكانيكي الي في الجهاز والي ابطيء بمراحل المراحل من الSSD فائق السرعة الي في PS5.

اللعبة شغالة ٣٠ فريم ولكن ياجماعة انا مش عارف العاب سوني بالذات ببستخدمو خلطة من الموشن بلور مع حاجات تانية يمكن بتخليك ماتحسش ان دي ٣٠ فريم خالص يعني اللعبة سلسلة جدا و التحكم مستجيب بشكل سريع عكس معظم الالعاب الي شغالة ب٣٠ فريم .

اللعبة بتدعم اللغة العربية سواء ترجمة او دبلجة و كعادة سوني برضو الترجمة شاملة كل حاجة حتي شعار اللعبة واسم اللعبة هورايزن الغرب المحظور و خط الترجمة ممتاز الدبلجة هيا الي طبيعي تبقي مش بتشدك اوي فا انا انصح باللعب بالترجمة بس مع الصوت الانجليزي الاصلي.

الصوتيات:

الاداء التمثيلي للشخصيات كان جيد جدا ايلوي كانت بارده شوية ولكن المجمل في شغل حلو.

الساوند تراك طبعا خطير و بيختلف من قبيلة للتانية. حاجة اضافية كان لازم اذكرها هوا اهتمام اللعبة بأستخدام السماعة الي في الدراع ودي حركة اعتيادية في العاب سوني بس حقيقي حركة ظريفة جدا لما تسمع صوت تجميع بعض العناصر من الدراع او صوت السهام بيديك انغماس اكبر في اللعبة.

الملخص :

هورايزن حصرية من سوني يعني كواليتي عالي يعني جرافيك ممتاز لعبة مصقولة تستاهل ال٧٠ دولار حتي لو مستوي القصة والشخصيات مش احسن حاجة بس بيغطي ده كل جوانب اللعبة التانية من رسوميات لطريقة لعب لصوتيات لمدة لعب محترمة علي الاقل ٢٧ ساعة لتختيم القصة الرئيسية فا لو معاك PS4 و ياسلام لو 5 سيب الي في ايدك و العب هورايزن الغرب المحظور 

انصح بيها بشدة 

8.5 / 10