Uncategorized

إنطباع عن نسخة الألفا من Call of Duty Black Ops Cold War

أنا واحد من مُحبي سلسلة Call of Duty بشكل كبير جداً، السنة الي فاتت إستوديو Infinity Ward بالنسبالي يعتبر قدم تحفة فنية مع Call of Duty Modern Warfare وكنت متحمس جداً أشوف إستوديو Treyarch هيعمل ايه السنة ديه مع Black Ops.

بعد تجربتي لنسخة الألفا من لعبة Call of Duty Black Ops Cold War على منصة PlayStation 4 حبيت اشارككم إنطباع سريع عن التجربة.

أول حاجة هتكلم عليها هي أسلوب اللعب، أسلوب اللعب المرة ديه أسرع من Call of Duty Modern Warfare بفرق واضح، الشخصية نفسها تحس انها بقت اسرع واخف وده كمان بينطبق على الأسلحة نفسها، الاسلحة بقيت بتحس انها اخف من Modern Warfare وشخصياً أنا بفضل الأسلوب ده.

الألفا مكانش فيها الا مجموعة صغيرة من الأسلحة جربتهم كلهم واكتر حاجة حبيتها كانت القناصات، من ضربة واحدة بتموت على طول بس لازم طبعاً تكون مُتقن للـ aiming عشان تجيب الضربة فوق منطقة الصدر والرأس عشان تضمن ان الضربة تبقى واحدة. إستوديو Treyarch أكد انه هيخفف قوتها عشان ناس كتير اشتكت انهم بقوا بيموتوا بشكل سريع جداً من القناصات.

وقت القتل في اللعبة زاد ويعتبر بين Modern Warfare و Black Ops 4 فأنت مش هتموت الشخص بسرعة زي Modern Warfare ولا هياخد وقت طويل زي Black Ops 4، الموضوع بقى في النص كدة بشكل حلو وحبيته جداً عن Modern Warfare.

الأصوات في اللعبة فيها ميزة وعيب، الميزة هي خطوات الرجلين، في Modern Warfare دايماً كانت النقطة ديه بايظة وتحس ان الي في الدور الي فوقك تحتك والي بيجري بعيد قريب والموضوع كان بيخسرني كتير في بعض الأحيان بس المرة ديه إستوديو Treyarch أتقن الموضوع بشكل مثالي. أصوات خطوات الرجلين معمولة بشكل صح جداً وتركيزي في الصوت بالـ Gaming Headset الي معايا ساعدني كتير اجيب Kills أكثر.

العيب بقى هو أصوات الأسلحة. في Modern Warfare دايماً كنت بتحس ان كل الأسلحة ليها قوة ووزن وده بيبان في صوت كل سلاح منهم، الوضع مختلف شوية في Black Ops Cold War فا زي ما قولت الاحساس بإن اللعبة بقت أخف مش في سرعة وحركة الشخصية أو وزن السلاح بس لا ده كمان واضح في الأصوات. لو جربت نفس الأسلحة في اللعبتين هتلاقي إن في Modern Warfare صوت السلاح أقوى وأوضح وبعض الأسلحة الي صوتها كان مُخيف بقى عادي جداً ويكاد يكون سيء في Black Ops Cold War.

حابب اتكلم في نقطة جرافيك اللعبة عشان في ناس كتير شايفاه اقل من Modern Warfare. انا اتفق واختلف في نفس الوقت. في خرائط صغيرة زي Miami و Moscow الجرافيك فيهم خرافي والإضاءة والإنعكاسات أفضل بكتير من أي حاجة اتقدمت في Modern Warfare. نفس الكلام بينطبق على واحدة من الخرائط الكبيرة وهي Armada وفيها تصميم مياه من الأفضل في تاريخ الألعاب لإن الخريطة كلها على 3 سفن في المحيط.

في نفس الوقت في خريطتين الجرافيك فيهم ضعيف، خريطة Satellite الصغيرة و Crossroads الكبيرة، على الرغم من ان الجرافيك مش سيء الا انه فعلاً اضعف من حاجات تانية اتقدمت في Modern Warfare. بشكل عام خلونا نستنى نسخة الجيل الجديد من اللعبة وساعتها هنشوف اد ايه اللعبة اتقدمت رسومياً وتقنياً.

بالنسبة لتصميم الأسلحة والشخصيات وحاجات كتير في البيئة فا هو ممتاز زيه زي Modern Warfare السنة  الي فاتت بل يتفوق عليه في بعض الأحيان كمان !

اخر نقطة هتكلم فيها هي السيرفرات، لو جربت نسخة الألفا والبيتا أو حتى النسخة النهائية من Modern Warfare فا على طول كنت بتلاقي مشاكل في الخوادم وديه حصلت معايا كتير ومع صحابي. المشكلة ديه مش موجودة إطلاقاً في نسخة أولية من Black Ops Cold War.

عارف انها مجرد نسخة ألفا وان الي جربها لاعبين على PS4 فقط بس لحد دلوقتي الموضوع مُبشر بالنسبالي لنسخة البيتا والنسخة النهائية. مواجهنيش أي مشكلة خالص في اني ادخل ماتش ومحصلش اي مشكلة في سيرفرات اللعبة وانا بلعب إطلاقاً واللعبة كانت سلسة ومفيهاش Lag. المشكلة الوحيدة الي حصلت هي ان في ماتش دخل ومبدأش فا كل الناس طلعت، ديه مش مشكلة في الخوادم بل هي مشكلة في اللعبة نفسها ( Bug ).

بمناسبة الكلام على الماتشات فا في خاصية مهمة جداً رجعت تاني في Black Ops Cold War وهي خاصية التصويت على الخرائط الي عايزين تلعبوها في الـ Lobby بعد كدة، الخاصية ديه كانت مُفتقدة جداً في Modern Warfare بس اهي رجعت تاني وكدة هنضمن ان الاختيار مش عشوائي بل هو بحسبك رغبات اللاعبين.

ده كدة كان مجرد إنطباع بسيط عن نسخة الـ Alpha من اللعبة، تابعوا الموقع خلال الشهر الجاي عشان هقولكم رأيي عن نسخة البيتا والحاجات الجديدة الي فيها سواء الخرائط أو الأسلحة واللعب المشترك طبعاً. وإنتظرونا مع مراجعتنا الكاملة للعبة في وقت إصدارها خلال نوفمبر 2020.

تتوفر Call of Duty Black Ops Cold War على الحاسب الشخصي و Xbox One و Xbox Series X / S و PlayStation 4 و PlayStation 5 في 13 نوفمبر 2020.

Ahmed Yousry

About promidoz

Editor-in-Chief. About 5 years of experience in Gaming Journalism with more than 13k news written, tens of articles, video scripts and reviews. A hardcore gamer that loves a challenge.