أعتقد أن ناس كتير فينا عارفين ومقتنعين إن لعبة Forza Horizon 5 هي أفضل لعبة عربيات من حيث الجرافيك والواقعية والمتعة. إحساس إنك تمشي بعربية سبوور زي لامبورجيني أو فيراري بسرعات عالية في خريطة ضخمة وعلى يمينك وشمالك مناظر طبيعية جميلة إحساس مايتوصفش، ومش هعرف أقولك عليه غير لما تجربه بنفسك في لعبة من الألعاب اللي بتقدمه بشكل عظيم زي The crew 2 و forza 5
The crew motorfest بقى معترفة بأفضلية فورزا تمامًا، وبتحاول تستفيد من اللي قدمته وتبني عليه وفي ناس ممكن تشوف ده اقتباس صريح أو كسل من مطورين اللعبة لكن أنا بصراحة شايفه ذكاء وفهم للواقع…the crew motorfest بتقدم محتوى ضخم جدًا بشكل يخليك تفرقها كتير عن فورزا وبالتالي المطور تعب هنا واجتهد لكن في جوانب تانية غير إنه يعيد اختراع التركيبة بتاعة ألعاب العربيات
في ألعاب عربيات زي need for speed most wanted أو need for speed the run حاولوا يقدموا حاجة جديدة تمامًا في تجربتهم، الأولى قدمت نظام مطاردات في أول مرة كلعبة سباقات، والتانية قدمت قصة وكات سينز كأنها تجربة لعبة مقتبسة من فيلم fast & furious ولكن the crew motorfest بتحاول تقدملك الحاجات اللي أنت كلاعب ألعاب سباقات عادية بتدور عليها، وده شيء جميل جدًا لما يتعمل بإتقان.
ذا كرو في جزءها التالت بتقدملك 600 مركبة بين طيارات ومراكب وعربيات، وخريطة ضخمة جدًا في مدينة هاواي
هي أصغر كتير من الجزء اللي فات اللي كانت خريطته أمريكا بحالها، ولكن مع تقليل الحجم ده ظهر تنوعية كبيرة في البيئات وشكلها، وكمان المناخ اللي بيكون ساعات ممطر وساعات مشمس وساعات تانية عاصف ومترب كده…مقدمة اللعبة بتقدملك “الموتور فيست” اللي مبني عليه طريقة تقديم المحتوى في اللعبة وتقدر تعتبره “قصة اللعبة” واللي بتلعب فيها سنجل بلاير مود يعتبر هو مقدمتك لكل اللي هيتعمل بعد كده.
محتوى القصة ده متقسم حاجة اسمها playlists وزي ما أسمها بيوحي، هي فعلًا بتقدم ثيم مختلف في كل مرة. في بلاي ليست اسمها made in japan ودي بتدور أحداثها في أجواء وأماكن بثيم ياباني، وحتى الموسيقى اللي بتسمعها بتكون لايقة على الأجواء جدًا.
اللعبة فيها حوالي 15 بلاي ليست وكل واحدة منهم إما لبراند عربيات معين، ولازم يكون معاك عربية من البراند ده عشان تخش، يا إما بتكون نوع سباقات مختلف زي سباقات الديرت أو الأوف وود off road واللي بتكون أصعب كتير، وسباقات السرعة على الأسفلت، في الشارع، أو سباقات الفورميولا ون داخل حلبات مستديرة.
كل اللي نفسك فيه هتلاقيه، الافتكاسة بقى اللي بدأت مع الجزء التاني وتتحسب للمطورين بتوع سلسلة ذا كرو إنها اختراعهم هي التبديل بين الطيارة والمركب والعربية في نفس السباق بشكل سلس وجميل والنوعية دي من السباقات موجودة كمان هنا تحت مسمى grand race بيشارك فيها 32 لاعب في المجمل، بتبقى زحمة جدًا طبعًا ولو طلعت الأخير بصراحة كده تبقى إحممم….مش بتاع عربيات خالص يعني
المهم…اللعبة فيها كمان محتوى عبارة عن تصوير بالفوتو موود بتاعها، بتروح معالم مدينة هاواي وتفضل تصور فيها بشروط معينة كانت ممتعة جدًا واتفاجئت لما لقيت نفسي مقضي ساعتين كاملين بدور على معالم أصورها في المدينة
الذكاء الاصطناعي في اللعبة هنا صعب جدًا ودي حاجة كويسة لإن اللعبة بتقدملك أسلوب سواقة معتمد على السيطرة على العربية أثناء المنعطفات أكتر من مجرد إنك تحافظ على سرعتك في السباقات. البقاء هنا مش للأسرع، لأ للمتعود أكتر على الجيم بلاي وطريقة هندلة العربيات.
بس لو لقيت الموضوع صعب ماتخافش، في مستويات صعوبة مختلفة وكل ما تعلي فيها كل ما هتلاقي نفسك بتاخد مكافآت أعلى وده هيحمسك تتحدى نفسك.
طيب المكافآت دي هتعمل بيها إيه؟ تقدر تشتري قطع غيار لمختلف قطع عربيتك وتعلي فيها عشان مستواها يتحسن، بس الجانب ده حسيته سطحي ومش بيديك فرصة لو أنت شخص مهتم وفاهم في العربيات إنك تظهر أفضلية على باقي اللاعبين العاديين.
بالنسبة للأونلاين بقى، ففي جيم مودز مختلفة تمامًا ووعود بحاجات كتير تيجي مع الوقت للعبة دي تحت مسمى challenges ودي بتكون عبارة عن منافسات أونلاين زي الجراند ريس اللي قولتلك عليها بس بشروط مختلفة. في منافسات مش مطلوب منك فيها تتسابق مع حد أصلا، كل المطلوب إنك بتنزل مع فريقك ضد فريق تاني في زون عمالة بتضيف مع الوقت، ودورك إنك تكسر وتدمج الخصم بتاعك أكبر دامدج ممكن تعمله….بتفكرك بحاجة صح؟
بصراحة أنا استمتعت جدًا بالمودات التانية دي وكان منها مود عبارة عن سباقات الغرض فيها مش المنافسة مع حد على مين أسرع بس كانت المنافسة مين هيقدر يعمل حركات خطيرة أكتر، وينط من فوق حواجز وأسوار عالية ويقطع مسافات أكتر. كل ما عملت حركة أخطر كل ما خدت نقط أكتر
في تشالنج أسمه Summit Contest وده عبارة عن تشالنشج إنك تسوق وتوصل لنقطة محددة في وقت محدد بعواقب متغيرة كل مرة أو حاجات بيحصلها ليميت على عربيتك.
بشكل عام الجيم بلاي جميل جدًا ولو دعموا اللعبة دي جامد زي عادتهم، يوبي سوفت هتكون قدام لعبة العربيات الأفضل في تاريخها بصراحة خصوصًا إنهم مقدمين الجرافيكس والصوتيات بشكل عظيم يخليك حابب عالم اللعبة وحابب إنك تفضل فيه أطول فترة ممكنة.
أنا عاجبني كل شيء عن الجرافيكس ماعدا الفيزكس بتاعة الخبطات…ومتفهم إن دي مش gta وعشان كده مش مطلوب منها تقدملي تدمير عربيات بشكل فائق الواقعية بس حسيت إني لما بخبط في حد سرعتي بتقل بس والضرر بيكون شبه مش باين على عربيتي، كمان في تفاصيل كتير مش موجودة زي تأثير المطر على العجلات والطرطشة اللي بتحصل دي في ألعاب تانية أكثر واقعية، وكمان تفاصيل بعض مناطق العربية زي الجنبين والعجلات بتكون أقل شوية من المطلوب…هل دي تفاصيل تأثر على اللعب نفسه والاستمتاع؟ لأ طبعًا، لكن هي ملحوظات تستحق تتقال
اللعبة كمان بتدعم استخدام عجلات السواقة بدل الدراعات، وده معناه إنك قدام تجربة سواقة شاملة وتقدر تزيد من متعتها وواقعيتها كمان، وفي أوبشن في اللعبة بيخليك تحول عربيتك مانيوال ويخليك تحول بقى من الأول للتاني والتالت ولحد السابع في بعض العربيات بنفسك…مش عارف مين ممكن يستمتع بكده بس إنجوي يا سيدي يلا مش حارمينك من حاجة
لو بتدور على لعبة عربيات قوية بجرافيكس خرافي ومحتوى ضخم وممتع، وخصوصًا لو أنت بلايستيشن جيمر ومعندكش أوبشن فورزا ده نهائي، فذا كرو موتور فيست أوبشن جامد جدًا جدًا في تقديم كل ما يمكن لمحبي ألعاب العربيات إنهم يطلبوه…خريطة ضخمة نشاطات كتير، جميع أنواع السباقات ام بين مراكب وطيارات ودرجات نارية وعربيات بكل أنواعها وإمكانية تعديل كويسة على العربيات.
تقييم للعبة
10/10
