مراجعات, Articles, Reviews, الأخبار, عن الألعاب, مقالات

مراجعة لعبة Dead Space Remake

مراجعة لعبة Dead Space Remake

مراجعة لعبة Dead Space Remake

من وقت الإعلان عن ريميك الجزء الأول من Dead Space وأنا مبسوط جدًا بإعادة إحياء السلسلة. ومكنتش أنا لوحدي ده كان العالم كله، لإن ده معناه إن في نية لإنتاج أجزاء جديدة. بس ليه ريميك للعبة أصلًا ماقدمتش أوي، أو على الأقل لسا قابلة للعب بالمقاييس الجديدة. ليه مش مجرد ريماستر محترم؟

الحقيقة الإجابة على السؤال ده مش عندي ولكن رأيي اتغير بعد ما جربت الريميك، وشوفت قد إيه تم تغيير حاجات كتير لدرجة خلت اللعبة وكأنها لسا جديدة ونازلة في 2023. لكن هل تستحق 70$؟

مراجعة لعبة Dead Space Remake

القصة

قصة اللعبة بتتكلم عن حدث غريب بيحصل في محطة US Ishimura الفضائية، بيتسبب في انقطاع الاتصال بيها. وبيوصل فريق انقاذ مكون من المهندس (إيزك كلارك) ومسؤولة إصلاح للمركبات ولما بيوصلوا للمحطة مركبته بتتضرر، ولإن المشاكل لازم تحصل كلها مع بعض. بيكتشفوا إن المحطة حصل فيها زي وباء كده خلى رواد الفضاء الموجودين كلهم يتحولوا لمخلوقات شبيهة بالزومبي.

مراجعة لعبة Dead Space Remake

القصة في حد ذاتها عادية ولكن أكتر ما يميز اللعبة هو الأجواء كونها لعبة بتعتمد على بناء التوتر من خلال التجول في مساحات ضيقة وقتال مخلوقات مرعبة بتفاجئك بوجودها والقتال بيتم بذخيرة محدودة. القصة قرب النهاية بتحلو لكن الجزء الأول بشكل عام مكنش معتمد أوي على وجود تفاصيل كتير في القصة فمتتوقعش عمق وأحداث درامية عظيمة.

مراجعة لعبة Dead Space Remake

الجيم بلاي

الجيم بلاي هنا متقسم 3 حاجات. قتال، ألغاز، استكشاف. الألغاز كانت بسيطة ومعتمدة على سرعة البديهة بشكل أساسي، والاستكشاف كان في بيئة خطية بشكل عام والقتال طبعًا كان يشمل بعض معارك الزعماء الرهيبة.

الجيم بلاي كان ممتاز بالنسبة للعبة رعب خطية في وقت إصدار اللعبة أول مرة، وأكتر حاجة ميزت اللعبة كانت فكرة إنك عشان تقضي على الأعداء هنا مش بتضربهم في الراس Headshots زي أي لعبة تانية. لأ أنت بتضرب أطرافهم عشان تشل حركتهم وبعدين تفعص راسهم برجلك! كم الGore والأشلاء اللي في اللعبة كان هو أكتر ما ميزها وقت إصدار الجزء الأول. واحتاج شغل كتير على محرك رسوم Frostbite للوصول للدرجة دي من التفاصيل.

مراجعة لعبة Dead Space Remake

عنصر البقاء على قيد الحياة والشعور الدائم بالخطر برضه كان مميز اللعبة جدًا عن غيرها كونها لعبة في الفضاء. والفضاء دايمًا مرعب لإنه واسع ومجهول ومظلم بشكل بشع. أي حد عنده Claustrophobia أو خوف من المساحات الضيقة هيترعب من اللعبة دي من مجرد التجول فيها.

Dead space هي واحدة من الألعاب اللي لازم تلعبها وأنت قافل الأنوار كلها ولابس سماعات هيدفونز محترمة وياريت لو بتدعم الصوت ثلاثي الأبعاد. طيب ده كان التجربة الأصلية، الريميك بقى ضاف إيه جديد؟

مراجعة لعبة Dead Space Remake

إيه الجديد في ريميك Dead Space؟

حاجات كتير أتضافت هنا أولها إن البطل بقى متكلم. في الجزء التاني والتالت للسلسلة البطل بقى متكلم ولكن الجزء الأول مكنش كده، وعشان كده الريميك أخد قرار إنه يكون في أداء صوتي للبطل عشان يكون الجزء ده متماشي مع باقي أجزاء السلسلة. الموضوع ده ممكن يبانلك بسيط، بس هو مش بسيط إطلاقًا لإنه ضاف هوية للشخصية وتعليقاته دايمًا مميزة وفي محلها. في لعبة Forspoken مثلًا كانت البطلة بتتكلم بزيادة وساعات كتير مش في وقتها أو بتقول كلام ممكن تحس إنه حشو بس. إنما هنا البطل بيتكلم في أوقات صح.

مراجعة لعبة Dead Space Remake

غير كده، الجرافيكس تم تحسينه بشكل فائق الجودة الحقيقة. الإضاءات، والدخان والAmbient Occlusion وتفاصيل كل حاجة حواليك بقت أكتر بأضعاف مضاعفة، وبأداء تقني جبار على كل المنصات. جربنا اللعبة على بي سي بكارت GTX 1650 و رامات 16 جيجا وبروسيسور Intel i7 الجيل العاشر واللعبة اشتغلت على 90 فريم على High !

مراجعة لعبة Dead Space Remake

محطة US Ishimura بقت مكان أكتر حيوية. هتحس بجد إن كان في ناس عايشين وشغالين في المكان، وده مكنش موجود في اللعبة الأصلية. السرد البيئي هنا عبقري وعلى مستوى مقارب لألعاب زي The Last of us. كل شبر في اللعبة بيقول تفاصيل جديدة عن حالة العالم الافتراضي اللي بتدور فيه الأحداث.

مراجعة لعبة Dead Space Remake

غير التطوير الرسومي، في تطوير وتحسين لبعض جوانب اللعبة وأهمها البيئة اللي بقت أقرب لنظام تصميم Metroidvania بعد ما كانت خطية قبل كده. نظام التصميم ده هو نظام تصميم بيئات Resident Evil 2 و 3 Remake واللي بيبقى معتمد على انفتاح البيئات واحدة واحدة عشان تكون مرتبطة ببعض. في أماكن مش هتقدر تخشها غير بأدوات هتاخدها متأخر، وده بيشجع على إعادة اللعبة بطور New Game+ أو الرجوع في الماب كذا مرة وده اللي بنسميه Back track.

مراجعة لعبة Dead Space Remake

غير كده في مراحل تم إعادة تصميمها بالكامل، وهي مراحل الzero gravity واللي كان التنقل فيها محدود. بقى دلوقتي حر وبيسمحلك تتحرك بزاوية 360 درجة. غير كده في كمان تحسين لتطوير الأسلحة اللي بقى أشبه بشجرة المهارات بتاعة The Callisto Protocol أو أي لعبة رعب عصرية.

أصوات الأسلحة برضه تم التعديل عليها بحيث تبقى أكثر تنوعًا وتقترب للواقع. وطبعًا المؤثرات البصرية الناتجة عنها تم تحسينها وتنويعها أكتر.

مراجعة لعبة Dead Space Remake

في ألغاز أتضافت في اللعبة كمان. ودي أكتر إضافة أنا مبسوط بيها لإنها بتكسر التوتر شوية وبتتطلب منك تشغيل دماغ أكتر.

موسيقى اللعبة والصوتيات شيء لا يقل عن مستوى ألعاب EA فائق الجودة بصراحة، ودي حاجة أنا سعيد إنها امتدت لألعاب الأوفلاين الخاصة بالشركة كمان في الخمس سنين اللي فاتت.

مراجعة لعبة Dead Space Remake

هل تستاهل منك 70 دولار؟

لعبة Dead Space Remake هي أفضل طريقة ممكن تجرب بيها لعبة Dead space الأولى، وموضوع السعر الكامل ده يرجعلك ولكن أقدر أقولك إني برشحهالك لو أنت ملعبتش الجزء الأول خالص. لكن لو لعبته قبل كده أو حتى في وقت قريب هيبقى صعب تصرف المبلغ ده بدون ما يكون جزء جديد. لإن في النهاية الريميك ده يظل وفي للمنتج الأصلي وماغيرش فيه كتير. مش لعبة جديدة زي RE2 مثلًا أو 3.

التقييم

9.5/10

مراجعة لعبة Dead Space Remake