Reviews, استعراضات, الأخبار, عن الألعاب, مراجعات, مقالات

مراجعة لعبة Evil West

مراجعة لعبة

Evil West

أول مرة سمعت فيها إن لعبة Evil West اتأجلت لنوفمبر، الشهر اللي هتصدر فيه لعبة God OF War Ragnarok قولت أكيد مطور اللعبة دي حاجة من أتنين. يا قلبه ميت وواثق من لعبته..يا مستجد ومش فاهم السوق كويس. ونظرًا لإن دي مش أول لعبة للاستوديو في مسيرته المهنية، بل وتالت لعبة ليهم السنة دي بس. كان صعب نتوقع حاجة بمستوى خرافي لإن 3 ألعاب في سنة واحدة من استوديو متوسط الحجم صعب يكونوا بمستوى خرافي.

استوديو Flying Wild Hog عملنا لعبتين مختلفتين السنة دي وهم Shadow Warrior 3 ودي لعبة شوتر، وTrek to yomi ودي لعبة بلاتفورمر 2d ياباني مستوحاة من أعمال المخرج أكيرا كوروساوا الياباني اللي بتدور حوالين الساموراي، واللعبة التالتة هي Evil West اللي بتدور في عالم موازي فيه صائدي الجوائز في الغرب الأمريكي القديم بيصطادوا فامبايرز! أيوة إنت سمعت صح…مصاصي دماء و Cowboys. حاجة كده ما بين Doom و Red dead. فهل تستحق انك تشتريها؟

Evil West تجربة مختلفة في فكرتها العامة بس، لكن الجيم بلاي مألوف ويمكن انت لو لسا خارج من تجربة God of war زيي يبقى أنت مقبل على تجربة مشابهة إلى حد كبير من حيث الجيم بلاي. لإن Evil West لعبة خطية معتمدة على القصة والجيم بلاي اللي أغلبه معارك متوزعة ما بين مقاطع سينمائية وألغاز بيئية واستكشاف. لكن خلينا الأول نتكلم على القصة .

القصة

القصة بتدور زي ما قولت في عالم موازي بيكون فيه مصاصي الدماء مخلوقات عايشة وسطنا وفي منظمة حكومية أمريكية اسمها Rentier institute شغلها تحاربهم وتمنعهم من أي جرايم. بطل اللعبة هو ابن زعيم المنظمة دي وبيكون دوره يمنع خطة جديدة بيحاول بيها مصاصي الدماء السيطرة على البشر وتجنيدهم لحسابهم. خلينا متفقين إن القصة كانت بسيطة أوي مفيهاش تفاصيل كتير وتقريبًا ده بسبب إن اللعبة كانت بتجس نبض الجمهور لو عايزين جزء تاني، لإن العالم غني ويجي منه تفاصيل وقصص حلوة وقوية كتير لكن ماتمش استغلاله بالشكل الكافي والنهاية كانت إلى حد ما سايبة الباب موارب على فكرة وجود أجزاء جديدة.

المقاطع السينيمائية والشخصيات متمثلين حلو جدًا لكن هزليين إلى حد كبير وكأن اللعبة بتسخر من أفلام الاسباجتي ويسترن وهي أفلام الكاوبويز في الستينات والسبعينات في هولييوود اللي كانت بتخلي الشخصيات ليهم لزمات معينة في الكلام والأسلوب. أنا عن نفسي حبيت الشخصيات والعالم جدًا ونفسي أشوف أجزاء جديدة بقصة اكبر لإن اللعبة هنا خدت مني 15 ساعة لعب بس، عدوا بسرعة أوي بسبب سرعة الجيم بلاي ومتعته الكبيرة.

الجيم بلاي

الجيم بلاي هو نجم اللعبة هنا. فكرني بلعبة God of war كتير لإنه معتمد على مناطق مقفولة أو Combat arenas كل شوية لما بتتقدم في الخريطة ولما بتخلص بيرجع تاني يتسمحلك بالاستشكاف. المعارك فيها كم أسلحة وحركات مهول وممتع جدًا. بتبدأ معاك سلاح واحد وهو قفاز قوي تقدر تستخدمه في ضربات يدوية أو Melee وبعدين بتتوسع ترسانتك عشان تشمل كذا سلاح ناري منهم Flamethrower و Revolver و Shotgun وكمان قفاز كهربائي وده بقى نجم الكومبات في اللعبة.

القفاز الكهربائي ده بيسمحلك بحركة شد أو جذب للأعداء بتعلم ديناميكية مش طبيعية على أرض المعركة. بحيث تقدر تتحرك أو تعمل Dash لحد عند العدو اللي تختاره أو تشده عليك، وتعمل Chain Attack أو ضربات متتالية. الآلية دي بالذات عملت انسيابية غير طبيعية في المعارك وخلتني أحب أكررها كتير بترتيب مختلف مع ضربات تانية.
الأجمل والأصيع بقى إن ده مش كل حاجة…ده حاجة بسيطة من الموجود في اللعبة واللي ممكن تفتحه عن طريق شجرة المهارات القوية جدًا. سواء للشخصية نفسها أو لكل سلاح على حدى.

الاستكشاف بقى هنا شبيه جدًا بGod Of War لإنك بتدور على موارد واللي بتكون هنا على هيئة كوينز تستثمرها في شراء التحديثات للأسلحة. الاستكشاف مافيهوش غير الكوينز وده من أحد سلبيات اللعبة لكن زي ما قولتلك اللعبة تركيزها الأساسي على الكومبات.

في شوية ألغاز برضو بتفصلك عن جو المعارك شوية، والألغاز هنا مش بتكون صعبة خالص وممكن تتلخص في فكرة واحدة وهي “إزاي توصل للحتة اللي عايز توصل لها” وده بنسميه في الألعاب ألغاز بيئية. الألغاز دي كان مستواها متوسط بصراحة لكن عجبتني بصفة عامة.

اللعبة كمان فيها Boss Fights بتقدم مستوى محترم جدًا من الصعوبة بل إنه في أخر اللعبة هتحس إنك بتلعب Dark Souls من كتر الصعوبة، بس ده مضايقنيش وكنت مستمتع لإني على آخر اللعبة كنت بلعب بدبابة ماشية عالأرض من كتر الأسلحة والحركات المفتوحة.

ولو حسيت إن اللعبة صعبة عليك في مستويات صعوبة كتير ممكن تتنقل بينهم، ولو بتحب الصعوبة أوي وعايز تلعبها كأنها سولز أو أصعب كمان في أوبشن الPermadeath واللي بيخليك تعيد اللعبة كلها لو مت مرة واحدة. ربنا معاك بقى لو جربته أنا مش ناوي بصراحة

اللعبة كمان فيها co-op بيخليك تقدر تلعبها مع واحد صاحبك وطبعًا مش محتاج أقولك قد إيه هو ممتع لإن التجربة كلها ممتعة وسريعة وديناميكية.

الجرافيكس والأصوات

الجرافيكس كان خرافي من حيث الجودة والتفاصيل على قد كونها لعبة خطية. البيئات متنوعة وكنت حاسس إني كل مرحلة بشوف بالتة ألوان مختلفة تمامًا عن اللي قبلها.الأداء التقني كمان مش بيتأثر خالص بالعظمة اللي على الشاشة.
كنت خايف الوشوش وحركات الشفايف تبقى سيئة لإنها لعبة بميزانية متوسطة لكن ده ماحصلش وكنت مستمتع بكل دقيقة من المقاطع السنيمائية مع إن القصة سطحية وبسيطة زي ما قولت.


الموسيقى في اللعبة كانت بسيطة أوي، وساعات مش هتحس بيها لكن بالنسبة للأداء الصوتي والمؤثرات كانت عظيمة وبمستوى فظيع بصراحة. كل حاجة في اللعبة ليها صوت وبالذات ضربات معينة للأعداء بتديك Hint على رد الفعل اللي المفروض تعمله. أول مرة مثلًا أشوف لعبة بتنبهك إنك المفروض تعمل Dodge بالصوت بدل ما تكتفي بحاجة تظهر قدامك على الشاشة. فكرة ذكية وجميلة ومتطبقة صح.

في النهاية، لعبة Evil West مش أعظم لعبة في السنة لكنها لعبة جميلة وممتعة وبنصح بيها أي حد بيحب الالعاب الخطية ومفتقد ألعاب الكاو بويز والشوتينج والمعارك القوية. لعبة أكشن هتعيش معاها 15 ساعة ممتعين من أولهم لأخرهم وممكن تتلعب مع صديق كمان.

تقييم اللعبة
8.5/10

لو عايز تشتري اللعبة تقدر تحصل عليها من متجر جيمزاوي من هنا