مراجعة لعبة
Final Fantasy XVI
Final Fantasy هي واحدة من أشهر ألعاب الـ RPG واللي ليها تاريخ طويل في الصناعة
تاريخ طويل جدًا لدرجة إننا النهاردة بنراجع الجزء الـ 16 منها
بس متقلقش لأن دي مجرد تسمية بس وانت مش محتاج تلعب 15 جزء قبلها ولا حاجة
Final Fantasy 16 من اكتر الألعاب اللي أثارت الجدل السنة دي
بين آراء إيجابية جدًا، أو آراء سلبية جدًا، مع شوية تحابيش ودعم أجندات كدة في النص
فـ مكدبش عليك اللعبة دي عاملة قلق كبير اليومين اللي فاتوا
فـ يلا بينا نشوف هل هي مستاهلة الكلام ده كله فعلا؟ دي مراجعتنا لـ Final Fantasy 16
قبل ما اللعبة تنزل جربنا الديمو المجاني اللي كان متاح لتجربة ساعتين تقريبًا من اللعبة
واللي بصراحة كان حلو في نواحي كتيرة ومبشر بالجودة النهائية للعبة
لدرجة إن مواقع التحليل التقنية نشرت وقالت إن اللعبة أداءها حلو جدًا ومش هتحتاج تحديث اليوم الأول زي أغلب الألعاب اللي بتنزل الفترة دي
ومع الدعاية الضخمة للعبة كله كان منتظر تجربة جبارة وحصرية جديدة من سوني لا تقل عن حصرياتها التانية
بس للأسف انا جايلك بخبر وحش
الكلام ده كله طلع كذبة كبيرة
تعالى أقولك ليه بعد ما قضينا وقت كافي خلصنا فيه أحداث القصة الرئيسية وشوية من المحتوى الجانبي
وخلينا نخش في التفاصيل
القصة
أحداث القصة ملهاش ارتباط واضح بأحداث أجزاء تانية من السلسلة
فـ الشخصيات هنا جديدة والعالم كمان جديد
في محاولة لجذب شريحة أكبر من اللاعبين..
بتدور القصة في عالم خيالي بيتكون من ممالك وعوالم مختلفة
وبنركز في الأحداث على عالم اسمه “فليسثيا”
كل مملكة في العالم عندها بطل خارق بيسموه Dominant، البطل ده بيقدر يتحول لوحش فتاك، وعشان كدة أهل المملكة بيقدسوا البطل ده
في قصة اللعبة بتحصل كارثة بسبب نقص كريستالات الطاقة
ودي بتكون شرارة الصراعات بين القوى السياسية في أحداث اللعبة
وكمان نقص الطاقة دا بيعرض السَحَرة لخطر كبير..
بطل قصتنا هو Clive Rosfield، أمير مملكة Rosaira في الأصل لكنه دلوقتي جندي مستعبد
عشان كدة بينطلق Clive في رحلة انتقام لوطنه، ولكن أكيد الموضوع بيطلع مش بالبساطة دي وفي رحلته بيكتشف أسرار خطيرة ومفاجآت كتيرة..
على الرغم إن القصة تُعتبر أبسط ومباشرة أكتر من أجزاء تانية في السلسلة كانت قصتها معقدة بشكل مبالغ فيه،
لكنها مش بسيطة بشكل مبالغ فيه وهتحتاج منك تركيز ومتابعة للأحداث والأطراف المختلفة،
القصة فيها طبقات كتير وتاريخ بيأثر على الأحداث،
وتقدر تقول إن البناء الدرامي للعالم هو أحسن حاجة في القصة
وكمان واضح الجانب السياسي في القصة وأهميته في الأحداث
فـ الحتة دي بالذات مستوحاة بشكل كبير من المسلسل المعروف Game of Thrones من حيث الممالك المختلفة والصراع اللي داير بينهم، وتفاصيل تانية مش هدخل فيها عشان الحرق
بشكل عام القصة مبشرة في الأول ومثيرة للاهتمام، بس في أوقات كتيرة حسيت بالملل وتمطيط غير مبرر في الأحداث
يعني فكرة القصة نفسها مع عالم اللعبة الحلو جدًا خلوني متحمس في البداية لقصة ملحمية، خصوصًا وإنها بتفكرني بـ Game of Thrones في جوانب كتير منها
لكن للأسف زي ما قلتلك القصة كانت محتاجة شغل أكتر من كدة، وإن التمطيط في القصة لمجرد زيادة عدد ساعات اللعب بالطريقة دي، سلبية لازم تتقال
فـ أوقات كتير كنت بلاقي نفسي عايز اخلص من الجزء ده من القصة لأني ببساطة مش مهتم
وهتحس فعلا ان فيه اجزاء كان ممكن تخلص بشكل اسرع من كدة وأفضل كمان
لكن من ناحية الشخصيات والخلفية الدرامية للعالم،
فـ دي أحسن حاجة في القصة
خصوصًا البطل حبيت استكشف شخصيته في المواقف المختلفة، وتفاعله مع الشخصيات التانية كمان
القصة محتاجة 50 ساعة تقريبًا عشان تخلصها، دا طبعًا من غير المحتوى الجانبي اللي بيوصل لـ 10 ساعات تقريبًا
الجيمبلاي
بالرغم من إنها لعبة RPG في الأساس، جيمبلاي Final Fantasy 16 بيجمع بين عناصر Hack and Slash مع عناصر RPG
المعارك هنا بتعتمد على استخدام السيف مع قوى السحر المختلفة اللي بتاخدها لما تتقدم في الأحداث، وتقدر تطورها كمان مع الوقت
وهنا خلينا نتكلم عن قدرات السحر لأنها بتشكل جزء كبير من الجيمبلاي
في البداية بيكون معاك نوع واحد من السحر، وهو سحر العنقاء أو Phoenix، وده بيخليك تقرب من الأعداء بشكل سريع جدًا، وكمان تقدر تولع في الأعداء القريبين منك..
مع الوقت انواع السحر التانية بتكون متاحة،
وفيه تنوع واضح بين كل نوع والتاني
فـ مثلًا فيه نوع بيخليك تبطأ الوقت وتهجم على أكتر من عدو في وقت واحد
ونوع تاني بيشد الأعداء ناحيتك ويخليهم أبطأ
ونوع تالت بيحط حواليك دايرة من النار بتمنع أي عدو يقرب منك
وأنواع تانية من السحر
وطبعًا تقدر تدمج بينهم وتستخدم واحد مع التاني
وكمان تقدر تطورهم من شجرة المهارات وتحسن منهم حسب أسلوب لعبك
حاجة كدة شبيهة بـ Forspoken
دا كله بيخلي المعارك ممتعة فعلًا، بس للأسف مع الوقت بتبدأ تكون تكرارية وبتحس إنك بتعمل نفس الحاجة مرة ورا التانية
وسبب مهم في المشكلة دي هو سهولة المعارك وقلة التحديات اللي اللعبة بتحطها قدامك في كل معركة
وأحيانًا هتلاقي نفسك مش محتاج غير إنك تفضل تضرب بشكل مستمر من غير ما تعمل حاجة تانية
ممكن يكون بسبب ضعف الذكاء الاصطناعي في أوقات كتيرة، أو إن تنوع قدرات الأعداء مش كافي على الرغم من التنوع المقبول للأعداء..
عنصر الـ Hack and Slash واضح في المعارك، ولو بتحب النوع ده من الألعاب، زي Devil May Cry مثلًا، هتعجبك الحتة دي هنا في Final Fantasy 16
من عناصر الجيمبلاي الأساسية هنا هو وجود كلب معاك، بتقدر توجهه يهجم على الأعداء
وعنده هجمتين مختلفتين
أو تخليه يساعدك في ال Heal
بس للأسف متقدرش تطور قدراته أو تغيرها طول فترة اللعب، ف هتحس بتكرار في استخدامه بردو خصوصا إن القصة هتكمل معاك ل ٥٠ ساعة تقريبا..
المحتوى الجانبي هنا تقدر تقول عنه سيئ ومش مستاهل وقتك إلا لو عايز تجمع موارد وتطور القدرات وخلاص
لكن واضح جدًا عدم الاهتمام بالمحتوى الجانبي على عكس الألعاب التانية في السلسلة..
بتقدم Final Fantasy 16 معارك زعماء مختلفة في رحلتك في عالمها
وعجبتني جدًا المعارك دي ولقيت نفسي متحمس أدخل البوص الفايت الجاي وأكون مستنيه كمان
فـ بالرغم من التكرارية الموجودة في المعارك العادية، معارك الزعماء كانت ملحمية وادتني جرعة أدرينالين من الوقت للتاني
كمان التصميم البصري للزعماء نفسهم جامد جدًا، تصميم ياباني فعلًا
بس للأسف الناحية البصرية دي متأثرة بشكل كبير بالأداء التقني اللي محتاجين نتكلم عنه شوية..
الأداء التقني
واحدة من أكتر الحاجات السلبية والمزعجة في Final Fantasy 16 هي الأداء التقني
واحنا هنا مش بنتكلم عن مجرد لعبة جديدة نزلت على بلايستيشن 5
لا دي المفروض انها حصرية، حتى لو حصرية مؤقتة
يعني المفروض الأداء يكون مفيهوش غلطة..
الديمو اللي نزل من فترة كان الأداء فيه كويس جدًا والناس أشادت بيه وزاد حماسهم للعبة
لكن أداء اللعبة الكاملة اللي راجعناها بيقول عكس كدة
في وضع الأداء الفريمات بتنزل لأقل من 30 فريم في المعارك الزحمة والمعارك المليانة
ومش بس كدة، دا الدقة بتنزل لـ 720p مرة واحدة!! مع انخفاض واضح في وضوح الجرافيكس والحِدّة بتاعت ال textures
تخيل في 2023 تلعب حصرية على بلايستشن 5 وبـ 70 دولار بحالهم، والدقة توصل معاك لـ 720p مع 30 فريم..
ضيف عندك كمان إن فيه مستخدمين قالوا إن الجهاز بيسخن جامد في Boss Fights معينة لما الفوضى بتزيد والدنيا بتولع
وده بيخلي اللعبة تقفل مرة واحدة عشان تحمي الجهاز من الحرارة، بدل ما يولع هو كمان
أداء تقني مش مقبول طبعًا لحصرية منتظرة من سوني وعنوان كبير بشكل عام
الترجمة العربية.. ودعم الألوان!
Final Fantasy 16 بتقدم ترجمة عربية كاملة للقوائم والنصوص والحوارات
وفي لعبة قصصية تقيلة زي دي
خلينا نقول إن وجود الترجمة بيساعد اللاعبين العرب في فهم الأحداث بشكل كبير
لأننا بنتكلم عن قصة ملحمية في عالم خيالي، بألفاظ صعبة شوية وكلمات مش شائعة أوي
انا بصراحة انبسطت بالترجمة جدًا
ترجمة بعيدة عن الترجمة الحرفية أو الأخطاء المؤثرة في سياق الكلام
حتى المصطلحات في القوائم اتعربت بشكل كويس
وشكل الخط جميل ومريح للعين…
جميـــــــل!
دا معناه إن فيه دعم كويس للمنطقة العربية صح؟
امممم لا
و لأ جدًا كمان
خليني أقولك إن Final Fantasy 16 للأسف بتدعم المثلية الجنسية بشكل واضح وصريح
حتى في نسخة الشرق الأوسط من اللعبة محصلش حجب للأجزاء دي
فاللعبة فيها مشهد صريح لـ قبلة بين اتنين ذكور
والمشهد ده متقدرش تتخطاه أو تعمله Skip
ضيف على كدة إن المشهد ملوش لازمة خالص في أحداث اللعبة الأساسية وحبكة العالم
دا طبعًا زي ما اتعودنا في الموضوع ده
وهي بردو من المحاولات اليائسة لإقحام الجماعة إياهم في كل وسائل الترفيه
وللأسف الألعاب مش استثناء
اللي يضايق كمان إن Square Enix مكلفتش نفسها تصدر نسخة معدلة للعرب بدون اللقطة اللي ملهاش داعي دي
فـ لو سألتني، بعيدًا عن القصة المملة في أجزاء كتيرة منها، أو الجيمبلاي المكرر والسهل بشكل مبالغ فيه، أو حتى أزمة الهوية في الواضحة في خيارات تصميمية كتيرة في جوانب مختلفة من اللعبة
نقطة المثليين دي بالنسبة لي كافية تخليني أنصحك متلعبش Final Fantasy 16
لأنها بتبين أد إيه الناشر مش مهتم بالمنطقة واللاعبين فيها..
وطبعًا الحاجة اللي منقدرش منذكرهاش، دعم الجماعة إياهم، أو خلينا نقول الدعم الناقص للمنطقة العربية..