نزلت لعبة HiFi Rush لأول مرة السنة اللي فاتت في نفس يوم الإعلان عنها كحصرية لأجهزة Xbox والـ PC من تطوير استوديو Tango Gameworks نفس اللي عمل ألعاب The Evil Within و Ghostwire Tokyo، وهي لعبة إيقاع موسيقي من نوع أكشن و Hack and Slash بتتزامن فيها حركات الشخصيات والعالم مع لحن موسيقي بيفضل شغال طول ما انت بتلعب حتى القتال نفسه معتمد على مزامنة حركاتك مع اللحن ده وعشان كدا فهي كانت واحدة من احسن حصريات Xbox في سنة 2023.
دلوقتي بعد سنة كاملة على نزولها كحصرية لإكس بوكس أعلنت مايكروسوفت عن فك حصريتها ونزولها لجهاز PlayStation 5 بجانب 3 حصريات تانية، وعشان كدا بعتتلنا Bethesda -ناشر اللعبة- نسخة خاصة من اللعبة على PS5 في الفترة اللي فاتت وقدرنا نخلص كل حاجة فيها تقريبًا. أكتر حاجة ركزنا عليها خلال تجربتنا هي الأداء التقني على PS5 بالمقارنة مع Xbox Series X واستغلالها لقدرات دراع Dualsense والجهاز بشكل عام، وده كله هنتعرف عليه في مراجعتنا لنسخة PS5 من اللعبة فا يلا بينا!
قصة اللعبة
في النوع ده من الألعاب مبتكونش دايمًا القصة هي أهم حاجة أو احسن عنصر في اللعبة وده عشان في النوع بتحطلك الألعاب هدف درامي وسبب عشان تستمر في التقدم اكتر واكتر وتواجه أعداد كبيرة جدًا من الأعداء وده نفس اللي موجود هنا.
قصة اللعبة بتتكلم عن شاب بيعشق الموسيقي ونفسه يبقى عازف جيتار في المستقبل واسمه Chai وبتبدأ القصة بأنه بيروح لشركة Vandelay المتخصصة في مجال الروبوتات عشان يركب ذراع آلية بدل دراعه المكسورة بس في وقت العملية بيحصل خطأ بيتسبب في إن جهاز الموسيقى بتاع Chai يتزرع في صدره عشان بعدها يديله طاقة عن طريق الموسيقى بتخلي كل حاجة في عالم اللعبة تتراقص مع ألحان الموسيقى.
بتكتشف شركة Vandelay اللي حصل وبتصنف Chai على أنه “معيوب” وبتبدأ في مطاردته عشان تقتله وتتخلص منه، وفي أثناء ما هو بيهرب بيقابل بنت اسمها Peppermint والقطة الآلية بتاعتها 808 اللي بتساعدك في المعارك بعد كدا، عشان تعرفه على خطتها للقضاء على مشروع سري خطير بتعمل عليها الشركة في السر ومن هنا بتبدأ رحلة Chai في محاربة الشركة.
القصة بشكل عام زي ما قولت هي قصة عادية بسيطة نهايتها متوقعة شوية وهي معمولة عشان تديك بس سبب للي بتعمله، وعلى الرغم من ده فالقصة عملت دورها وزيادة وحتى الشخصيات واللحظات الكوميدية والحس الفكاهي بتخلي القصة أفضل بكتير وتخليك طول الوقت مستمتع.
أسلوب اللعب
زي ما قولت فهي لعبة إيقاع موسيقي من نوع أكشن و Hack and Slash وعشان كدا فالجيمبلاي في اللعبة بيعتمد على تزامن حركتك في ضرب الأعداء بالجيتار والمراوغة والتصدي مع لحن الموسيقى في اللعبة عشان تحقق أعلى Score ممكن، وطول ما ما أنت بتتجول في عالم اللعبة اللي هو بتصميم خطي بالمناسبة هتفضل تجمع “تروس” عشان ترقي الشخصية وتفتح قدرات جديدة سواء ليك أو لأصدقاء Chai في اللعبة اللي تقدر تستدعيهم عشان يساعدوك، منها “قدرات مميزة” اللي بتسبب في ضرر عالي جدًا للأعداء.
وعلى ذكر الأعداء فاللعبة بتقدم طول ما بتتقدم أنواع جديدة من الأعداء، منهم الأعداء الضعاف نسبيًا ومنهم الأعداء الأقوياء اللي هتحتاج وقت كبير شوية عشان تقتلهم، كل عدو منهم بيكون ليه قدرات خاصة بيهم فمثلًا في اللي بيحاربوك من بعيد بأسلحة بعيدة المدى وفي اللي بيحاربوك من قريب بأسلحة قريبة المدى.
اللعبة بتستمر معاك لمدة 10 ساعات تقريبًا بتلعب فيهم 12 مرحلة كل مرحلة منهم بتاخدك لمكان جديد كل مكان منهم بيتميز بالتصميم البصري المميز والمختلف وبيفتحلك أعداء جدد ومهارات قدرات جديدة، المراحل دي مصممة بشكل خطي بيكون قدامك فيها هدف محدد ومفيش فيها طرق جانبية كتير وبعد ما المرحلة بتخلص بترجع لمقرك تاني أو المخبأ وهناك تقدر تطور شخصيتك وقدراتك.
باختصار كدا، الجيمبلاي في اللعبة هو احسن عنصر في اللعبة وهيخليك مستمتع طول الوقت خصوصًا في المعارك اللي هي 90% تقريبًا منه وهتبقى عاوز دايمًا تلعب المعارك دي، وده بسبب اللحن الموسيقي اللي بتحاول دايمًا تزامن حركتك في القتال معاه وده بيخلي اللعبة تقدم متعة كبيرة، بس مشكلة الجيمبلاي الوحيدة هي مراحل القفز المنصي اللي بتنط فيها من منصة للتانية وده اللي بيكون صعب أحياناً وهتموت كتير بسببه.
الرسوميات والصوتيات
التوجه الرسومي في HiFi Rush مختلف تمامًا عن التوجه في ألعاب الاستوديو اللي فاتت خصوصًا لعبة The Evil Within، بس ده مش معناه أن التوجه الجديد وحش بل جميل جدًا وهيعجب أي حد حرفيًا. فاللعبة بتقدم رسوميات كرتونية مميزة شبه رسوميات أفلام الكرتون أو مسلسلات الأنمي هتخليك تندمج مع أجواء اللعبة أكثر خصوصًا إنها مليانة لحظات كوميدية.
الصوتيات برضو كانت من احسن عناصر اللعبة خاصةً الموسيقي الحماسية التي بتفضل شغالة في الخلفية طول الوقت وبتتغير علطول، لأنها لعبة إيقاع موسيقي في الأساس وفي المعارك بيعلي رتم الموسيقي ده وهتخليك ترقص وانت قاعد في مكانك، وبرضو نفس الحاجة بالنسبة للأداء التمثيلي اللي هيخليك تندمج مع القصة والشخصيات والحوارات وتحب الشخصيات دي اكتر.
الأداء التقني
تعتبر لعبة HiFi Rush واحدة من أفضل الألعاب من ناحية الأداء فهي بتقدم أداء ممتاز على جهاز PS5 ومستغلة كل إمكانياته بنسبة 100%، فطول فترة لعبي للعبة اللي وصلت ل 11 ساعة -قدرت اخلص فيهم اللعبة- مواجهتش أي مشكلة تذكر أو هبوط في الفريمات. اللعبة بتشتغل بجودة 4K و 60 فريم في الثانية وهي نفس الأرقام اللي بتشتغل بيها اللعبة على Xbox Series X، الـ 60 فريم اللي شغالة بيهم اللعبة ثابتين طول الوقت وعشان كدا مش هتلاحظ أي هبوط في الفريمات أو تقطيع وقت اللعب.
وبالمقارنة مع المنافس Xbox Series X فاللعبة بتقدم نفس الأداء في عدد الفريمات اللي شغالة بيهم اللعبة ومفيش أي تقطيع، بس أداء اللعبة على PS5 بيتفوق على أدائها على Xbox بنسبة بسيطة فمثلًا عندك الظلال أحسن وحتى مدة تشغيل اللعبة بتاخد وقت أقل على PS5 والمدة اللي بتاخدها اللعبة هي 1.60 ثانية مقارنة مع 2.50 ثانية على Xbox وهو تفوق بسيط مش هيفرق كتير في أداء اللعبة فسواء لعبتها على ده أو ده هتعيش تجربة جميلة.
نيجي بقى لنقطة أخيرة ومهمة جدًا وهي استغلال اللعبة لقدرات دراع Dualsense؛ فاللعبة بتستغل قدرات الدراع بشكل كامل سواء تقنية Adaptive Triggers أو Haptic Feedback وخصوصًا Haptic Feedback لأن بسبب التقنية دي هتحس وانت ماسك الدراع بكل حركة وكل لحن وإيقاع وده بيخلي تجربة اللعبة أفضل بنسبة كبيرة من تجربتها على Xbox، وعشان كدا فبتقدم اللعبة تجربة مميزة جدًا على PS5.
في النهاية حابب أقول إن لعبة HiFi Rush تعتبر واحدة من أفضل ألعاب الأكشن والـ Hack and Slash في الجيل الحالي ونزولها على PS5 بيدي فرصة لناس أكتر أنهم يجربوا التحفة الفنية دي بعد ما كانت حصرية Xbox لمدة سنة، وعشان كدا لو انت من ملاك PS5 فلازم متفوتش اللعبة دي لأنها حقيقي من أفضل الألعاب.
وبس كدا نكون وصلنا لنهاية مراجعتنا، وتقييمنا النهائي هو
