مراجعة لعبة
Lego 2K Drive
في حاجات كتير في الدنيا دي مش لازم نفهمها، زي مثلًا ليه بنحب ألعاب الليجو وليه بتنجح مع إن كلها شبه بعضها.
وعلى فكرة، مش الألعاب بتاعة الليجو بس اللي بتنجح ده كمان الأفلام…يكفي إني أقولك إن في كمية أفلام Lego حلوة هتقضي معاها وقت حلو أوي لو شوفتها زي Lego batman movie و The lego movie و Lego DC comics Superheros. إنهاردة بقى انا جي اكلمك عن لعبة مختلفة جدًا من العالم ده نفسه، لعبة سباقات اسمها 2K Drive من مطور ألعاب المصارة والـNBA المعروفة اللي بتنتجها شركة 2K، لعبة أنا شخصيًا كنت مستني أشوف هتبقى عاملة إزاي في الآخر لإنها فكرة جديدة ومش بتتعمل كتير.
لعبة Lego 2K drive هي لعبة ليجو في المقام الأول، يعني تتوقع منها نفس اللي تتوقعه من ألعاب زي Lego batman مثلًا، قصة طفولية وشخصيات وعالم متكونين من مكعبات الليجو وجيم بلاي بسيط ومش معقد ومفيهوش تنويع رهيب.
الجديد هنا بقى إن اللعبة المرة دي بتقدم سباقات في عالم شبه مفتوح، والسباقات دي فيها انتقال سلس بين البيئات من أرض ومياة وهوا. يعني المركبة بتاعتك بتتحول أوتوماتيك لطيارة وهي في الجو، ومركب وهي في الماية، وعربية وهي على الأرض. الموضوع غريب في فكرته من أوله لأخره والأغرب إن استوديو Visual Concepts اللي عمره ما عمل لعبة ليجو هو اللي يتم اختياره للمهمة دي.
عمومًا خلينا نبدأ بالكلام عن جوانب اللعبة وهبدأ هنا بالقصة. القصة مفيهاش حاجة الحقيقة أكتر من إنها قصة طفولية بتحاول تكون قريبة من أفلام الليجو، وبتتكلم عن متسابق مشهور اسمه Clutch Racington بيختارك عشان تكون الشخص اللي هو هيدربه على السباقات ويكسب بيه بطولة كبيرة اسمها Sky Trophy والسرد بيكون عن طريق مقاطع سينيماتك خفيفة كده وتحس إن المطور مش مكلف نفسه وكاتب قصة وحوارات بقى وتفاصيل، لا هو ممشيها بالمنيمام. وده مش وحش إطلاقًا بس هو مش مناسب أو بمعنى أصح مش هيكون مرضي لأي حد سنه أكبر من 15 سنة عشان حتى الكوميديا اللي فيها ساذجة شوية ومش منطقية.
الجيم بلاي بقى كان أحسن شوية من القصة، وممتع وفي حاجات تتعمل كتير. أنت عندك مهمات قصة ومهمات جانبية، وطبعًا كلها في هيئة سباقات لأنها لعبة سباقات في الأول والآخر.مهمات القصة بتكون مهمات سباقات الـsky tour وبتكون متحددة على أساس مستواك في اللعبة أو اللفل بتاعك، وده طبعًا بيخليك مجبر في بعض الأحيان تعمل نشاطات جانبية ودي مش دايمًا بتكون حلوة.
في نشاطات جانبية عبارة عن مهمات في صورة سباقات، مثلًا في مرة اتطلب مني أحمي مكان معين عن طريق إني أجري ورا مجموعة من الفضائيين وأضربهم بالعربية، ومهمات تانية كانت عبارة عن سباقات تكسير لمكعبات ليجو على هيئة ماشروم في حقل ضخم، ومهمات كانت على هيئة سباقات فيها قدرات خاصة زي مثلا القدرة على إطلاق صواريخ من عربيتك، أو شبكة عنكبوت تعطل المنافسين بتوعك.المهمات دي ممتعة لكنها محطوطة
بكم كبير جدًا على خريطة ضخمة فمع الوقت بتبقى مملة شوية.
لكن لو أنت عندك اطفال عايزه مينبسطوا بحاجة مفيهاش تفكير كتير وممتعة وشكلها حلو، فاللعبة هنا بتحققلك جزء كبير من الهدف ده.
عايز أقولك إن كمان العالم المفتوح هو مش مفتوح 100% لأ، هو 4 خرايط بتعلم فاست ترافل بينهم، وفيهم بيكون العالم مفتوح وتقدر تتنقل في نفس البيئة براحتك بدون loading screens، وكل خريطة من دول مختلفة بصريًا بشكل كبير بيضمنلك تنوع جميل.
الحلو في بيئات اللعبة ألوانها وتصميمها البصري الجميل واللي بيديك إحساس إن اللعبة دي هي الجيل الجديد من ألعاب الليجو اللي طول عمرها ألوانها وعالمها شكلهم حلو، لكن المرة دي الشكل هو الأحسن وسط معظم ألعاب الليجو، وخصوصًا تصاميم العربيات والمؤثرات البصرية الناتجة عنهم سواء دخان ،انفجارات، مياة، تراب وكمان قابلية التدمير في البيئة من حواليك بتديها تفاعلية ممتازة واللي بيزود جمال الموضوع إن التنقل بين الماية والأرض والهوا seamless من غير أي مشاكل. بس ده بيجي على حتة التحكم في السرعة والمهارة المطلوبة في اللعبة.
يعني اللعبة دي مفيش فيها أي مهارة مطلوبة تقريبًا، على عكس ألعاب تانية زي مثلا crash team racing اللي كانت سرعتك بتتأثر جامد لو ماتعاملتش مع الملفات والقفزات مثلا بشكل صحيح، لا هنا إنت في 90% من السباقات هتكسب مفيش فيها كلام، والمنافس اللي بيبدأ معاك قوي جدًا وتحس إنه هيكسبك بيخيش معاك في الآخر، والعكس صحيح لو أنت متقدم بفرق كبير بتلاقي المنافسين بيلحقوك بطرق مش منطقية بس مش بيحاولوا يسبقوك !! يعني اللعبة معمولة بحيث تكون المنافسة منعدمة لكن تفضل محسساك إن في منافسة…زي ما بنعمل مع أولادنا دايمًا.
في كمان ميزة في اللعبة هي اللعب الجماعي اللي بيوصل لـ6 لاعبين من عالنتكورك، أو 2 كو أوب محلي يعني أنت وأخوك أو صاحبك على شاشة split screen، ودي طبعًا أمتع طريقة ممكن طفلين يقضوا مع اللعبة بيها وقت، وأكتر حاجة أعتقد إن اللعبة متوجهة ليها أصلا.
اللعبة فيها كمان جراجات تقدر تعدل فيها على العربيات كأنها مكعبات ليجو بتتفكك وتتركب وتقدر تصمم عربية أحلامك من الليجو، وده كان أمتع جانب بالنسبالي كشخص كبير وأنا بلعب اللعبة، بس هل تستحق اللعبة 70$ دولار بقى لو هتجيبها عالكونسول على اللي بتقدمه ده؟
الحقيقة الموضوع يختلف من شخص للتاني، بس أنا شخصيًا شايفها تجربة سباقات مش تنافسية خالص، ومش بتقدم جانب سباقات حلو غير في حتة تصميم البيئات وقابلية التدمير، لكن المتعة برضو بتقل مع الوقت لإن المحتوى متكرر. عشان كده اللعبة دي أنصحك تستناها لما تنزل على أي اشتراك من الاشتراكات اللي موجودة على المنصات، أو تستنى لما تتخفض شوية.
التقييم
7.5/10
