Gaming News, Reviews, استعراضات, الأخبار, دليلك, عن الألعاب, مراجعات, مقالات

مراجعة لعبة Call of Duty : Modern Warfare 2

مراجعة لعبة

Call of Duty : Modern Warfare 2

Call of duty Modern warfare 2 هو اسم اللعبة اللي صدرت في 2009 وبرضو اسم اللعبة الجديدة من نفس السلسلة واللي بتعتبر إعادة تصور لفكرة الحرب الحديثة من منظور استوديو Infinity ward مع عودة نفس الشخصيات اللي حبيناها زي جوست وكابت برايس وغيرهم. إرث كبير وضخم تحمله اللعبة على عاتقها وتحدي عملاق أمام الاستوديو المطور إنه يقدر يتفوق على نفسه فهل ستقدم call of duty تجربة مميزة خاصة وإن مفيش نسخة جديدة من السلسلة السنة الجاية؟

الإجابة القصيرة هي أه، لكن الشيطان يكمن في التفاصيل وعشان نخش في التفاصيل خليني بس أوضحلك إن اللعبة هي تكملة لأحداث واتجاه جزء 2019 اللي أبهر ناس كتير كقصة ومالتي بلاير فالمرة دي الاستوديو بيقدم محتوى ضخم عشان يحافظ على اهتمام الناس بالتجربة.

القصة

لو أتفرجت على أي فيلم بتدور أحداثه عن الاستخبارات والعمليات الخاصة خلال آخر 20 سنة فأنت عارف أنت داخل على إيه. لكن خلينا نقول إن القصة رغم تقليديتها إلا إنها بتقدملك 8-10 ساعات ممتعين جدًا وده بفضل الكاست بتاعها والشخصيات المتمثلة حلو والقيمة الإنتاجية الضخمة اللي مخلية اللعبة كأنها فيلم مصروف عليه مليارات عشان يطلع بأفضل شكل.

القصة بتدور أحداثها عن عملية اغتيال لقائد تنظيم إرهابي اسمه “القتلة” وبيجي خليفة الزعيم ده بنية الإنتقام من الأمريكان والأوروبيين وكل اللي شارك في اغتيال القائد. تقليدية مش كده؟ بس بتاخدك في عواصم أوروبية كتير وأماكن مميزة على الصعيد البصري بحجة إن العملية الإرهابية الدولية دي بيواجهها مخابرات بلدان كتير. أحد الشخصيات اللي حبتهم جدًا هي شخصية ألخاندرو من العمليات الخاصة المكسيكية وكان هو نجم القصة بالنسبالي وبتمنى أشوفه في الأجزاء الجاية.

مهمات القصة كتيرة وطويلة ومتصممة بشكل مبدع وحماسي، بحيث يكون فيها Set pieces كتير ولحظات الأدرنالين فيها هيكون في السما، مطاردات بقى بالعربيات في طريق منحني، شوتينج وأنت مربوط في طيارة هليكوبتر ومتشقلب في الجو! ومهمات تحت الماية اللي كانت إضافة جديدة في اللعبة كلها. إمكانية السباحة حاجة تم تقديمها كميزة جديدة في القصة والمالتي وحتى الخرايط متصمم فيها مسطحات مائية أكبر بكيتر وأكثر تعقيدًا. في أكتر من مهمة بتحاول تعيد تقديم كلاسيكيات من السلسلة زي All gilled up بس مفيش مهمة محددة أقدر أقول إن دي بصمة الجزء ده بالتحديد على السلسلة. هل دي مشكلة بالنسبالي؟ الحقيقة لأ بس بعض الناس ممكن تكون مشكلة بالنسبالهم.

عندي مشكلتين مع القصة وهي الصعوبة اللي بتنط فجأة لفوق بدون مبرر في نص القصة التاني، ونظام الcheckpoints البخيل واللي بيتسبب إنك تعيد كتير في القصة لو مت بسبب الصعوبة العالية. وده شيء مش عادل وملوش لازمة الحقيقة يعني كان ممكن تسيب الصعوبة تعلى مع نظام حفظ أفضل من كده وكنت هبقى راضي.

لكن في المجمل اللعبة قدمت واحدة من أطول وأمتع القصص اللي تقدر تتوقعها من كابتن برايس وصحبته. أداءات تمثيلية عظيمة وشخصيات ماتتنسيش بسهولة.

المالتي بلاير

المالتي بلاير هو أهم حاجة بالنسبالي في كود كل سنة وبالنسبة لمعظم اللاعبين والمطور كان عارف ده كويس واشتغل عليه بشكل ممتاز الحقيقة بتقديم أطوار جديدة، وتحديثات محترمة جدًا للأطوار القديمة زي ground war و Spec ops واللي بعتبرهم أهم حاجة في اللعبة السنة دي واللي هيكبروا مع مرور الوقت.

للأسف الspec ops متاح فيه 3 مهمات فقط وقت الإصدار لكن المفروض المواسم الجاية العدد هيزيد وكلنا عارفين إن الاستوديو بيدعم اللعبة كويس أوي مع الوقت.

مهمات الspec ops دي عبارة عن مهمات بتقوم بيها بشكل تعاوني مع أصدقاءك بيتطلب منك حاجة معينة تشبه مهمات القصة إلى حد كبير.

ground war بقى هو مود فيه 64 لاعب ضد بعض شبيه شوية بباتلفيلد في خرايط كبيرة وهنا المود ده بالرغم إني كنت مفتقده إلا إني حسيت إنه لسا محتاج خرايط أفضل لإن الخرايط اللي فيه متواضعة المستوى وفي منها سيء للأسف، لكن الجانب الإيجابي إن المركبات الإعتماد عليها كان أكبر. وده إيجابي لإن السواقة بقت أسهل وأكتر واقعية والمركبات نفسها مش over powered يعني تقدر تقضي عليها على رجلك عادي…وده حل مشاكل كتير كانت موجودة قبل كده.

أما الخرايط ال6 ضد 6 فهي من أفضل ما يكون تصميمًا وعمليًا وشايف إنها بتقدم أمتع طور جماعي موجود في تاريخ سلسةل كود العريقة. اللي زود متعتي هو تقديم حاجتين مؤثرين جدًا على بساطتهم وهم :

1- إمكانية السباحة

2- الدولفين دايف ودي إمكانية القفز مباشرة من وضع الوقوف لوضع prone ودي حركة فرقت كتير مع الدينماكية بتاعة اللعب في الخرايط الصغيرة. بقيت أقدر أتفادي ضربات أو أتحرك حركات سريعة في أماكن ضيقة بشكل ممتاز.

في مودين بس جداد، بس عملوا فرق كبير بسبب اعتمادهم عالتكتيك أكتر، وبكدة كود قربت أكتر للعبة زي Rainbow six siege وهم Prisoner rescue و Knock out والأول شبه hostage من رينبو وبيكون مطلوب من كل فريق ينقذ رهينة مع الفريق التاني ويهرب بيها لنقطة الإستخراج.

وKnockout بيكون مطلوب من كل فريق يحتفظ بpackage معين ومطلوب من الفريق التاني استرداده.

الأتنين مودين ممتعين وجربناهم في البيتا وأظن إنهم هيزدادوا شعبية مع الوقت بس وسط محبي رينبو فقط لإنهم مش شبه مودات كود الإعتيادية.

غير الخرايط والمودات والمحتوى، اللعبة فيها تغييرات على نظام التعديل على الأسلحة اللي بقى نظام رائع وممتع وبيفتحلك أسلحة متنوعة تخليك تجرب طرق لعب جديدة. كل سلاح بقى ممكن تعدل عليه بما يناسب أسلوب لعبك من حيث الattachment أو الملحقات. في ملحقات هتسرع الريلود بتاعك وفي ملحقات هتسرع الAiming بتاعك وأنت وأسلوبك. اللي تشوفه ناقص دورله على ملحقات تحسن منه، وهتلاقي مستواك بيتحسن مع الوقت.

أما نظام الperks أتجدد وبقى ممكن تعمل perk package خاص بيك يناسب لعبك. بتبدأ باتني بيركات من اختيارك وبعدين لما تتقدم في اللعب شوية بيتفتحلك واحدة جديدة وبعديها ultimate perk.النظام ده أفضل نظام بيركات شوفته في اللعبة لحد دلوقتي.

الجرافيكس والأصوات عظمة على عظمة، وكلنا أظن بقينا نتوقع من كود المستوى ده خلاص. جرافيكس ووشوش شخصيات عظيمة، وتفاصيل بيئات وأصوات ممتازة. أصوات الأسلحة تحس إن السلاح في إيدك بجد، وطبعًا على بلايستيشن 5 في استغلال عظيم لمميزات الدراع المظلوم بتاع الفايف.

والأسلحة بقى ليها شعور واقعي أكتر، الريكويل وردة الفعل وكل ده معمول بشكل مثالي مفيهوش غلطة واحدة.

في النهاية، بشكل مفاجئ أنا مكنتش متوقعه، اللعبة السنة دي حصلت على إعجابي الكامل بكل أركانها بالرغم من بعض العيوب. دي امتع إصدارة من كود، وأطول قصة، وأغنى مالتي بلاير من سنين. ولسا هيتم دعمه بمحتوى كبير. إذًا، دي إصدارة لازم كل محبي كود يشتروها لإنها تستحق التجربة بأطوارها الجديدة وتغيراتها المؤثرة في أسلوب اللعب.

التقييم النهائي

9/10