Reviews, Articles, Gaming News, News

مراجعة Psychonauts 2

مراجعة Psychonauts 2

خلال السنين الي فاتت بقينا ننتظر فترات طويلة جدًا بين أجزاء الألعاب. حاجة زي The Last of Us خلتنا ننتظر 7 سنين بين الجزء الأول والتاني ونفس الكلام ينطبق على Red Dead Redemption 2. لكن استوديو Double Fine Productions خلانا المرة ديه نستنى 16 سنة عقبال ما نزل بالجزء التاني من اللعبة. الانتظار كان طويل جدًا، ولكن يُسعدني أني أقول ان النتيجة النهائية كانت خرافية وتستحق الانتظار الفترة ديه كلها. خلونا النهاردة نتكلم عن واحدة من الألعاب الي بقت من وجهة نظري هي واحدة من أقوى ألعاب الجيل الجديد لحد دلوقتي.

مراجعة Psychonauts 2

أحداث قصة Psychonauts 2 بتكمل على طول بعد أحداث الجزء الأول. Raz صاحب الـ 10 أعوام لا يزال بطل السلسلة وكل الشخصيات الي حبيناها في الجزء الاول رجعتلنا تاني. Raz ربنا فتحها عليه واتقبل كمتدرب في منظمة الـ Psychonauts و في أحداث القصة أهمية Raz بتزيد وبيساعد كُبار المنظمة في أنهم يخلصوا مهماتهم وينقذوا المنظمة من الهبوط.

قصة اللعبة تعتبر طويلة نسبيًا وهتاخد منك حوالي 15-20 ساعة عشان تخلصها. على الرغم من أن مدة القصة أطول بكتير من الجزء الأول، إلا أنك مش هتحس بأي ملل طول فترة اللعب لأن أحداثها وشخصياتها بتطور بشكل ممتاز.

مراجعة Psychonauts 2

الجيم بلاي في اللعبة لو هنوصفه في كلمة واحدة فا هقولك عليه ممتع. لكن كلمة واحدة مش كافية لوصفه، فخليني أقولك التفاصيل.

أغلب وقت في اللعبة هتقضيه في التنقل في عالم اللعبة اللي بالمناسبة مصمم بشكل عظيم وجميل، باتجاه فني مميز، ولكن في بعض المهمات هيبقي قدامك لغز، وطبعًا في معارك بين كل حين وآخر. المعارك مش أحسن حاجة، عيوبها إنها مش سلسة، ومابتحسش بتأثير الضربات عالأعداء، لكن مميزاتها كتير، وهي مجموعة الضربات اللي بتفتحهالك اللعبة مع الوقت، واللي بتحافظ علي شعورك بالتجديد والمتعة الناتجة عن المعارك، وكمان تنوع الأعداء، اللي بيبقوا تجسيد فعلي لصفات كل شخص بتخش جوه دماغه.

مراجعة Psychonauts 2

مثلًا في أشخاص بتحارب صفات الكذب جواهم، أو الندم، أو الأفكار السيئة، وكل نوع أعداء له طريقة قتال أو أسلحة بتبقي معاه مرتبطة بشكل مباشر بأسمه، زي مثلًا “الشك” واللي بيبقي معاه حاجة شبه الختم، شغلته إنه يختم علي أي حاجة شكلها “في مكان مش المفروض تكون فيه” وبما إنك بتبقي دخيل علي دماغ أي حد، فأنت هذا الشيء اللي لازم يتم ختمه من وجهة نظر النوع ده من الأعداء.

طول اللعبة هتكون معاك قدرات جديدة، أو بتواجه بنفس القدرات القديمة أعداء جدد وده بيميز المعارك وبيعوض تصميمها المتوسط. الـ Platforming بقي أو التنقل في اللعبة هو أحلي وأهم حاجة فيها، البيئات اللي بتتنقل فيها تصميمها جميل، وجذاب للعين، ده غير إنها كمراحل بلاتفورمينج متصممة حلو ومتنوعة بشكل خرافي.

ماعنديش كلام كتير أقوله عن الجيم بلاي في اللعبة إلا إنه جميل وممتع، ولحسن الحظ اللعبة فيها منطقة شبه مفتوحة، بتقوم فيها بجمع الحاجات القابلة للجمع، وأداء المهمات الجانبية. حتي الأشياء القابلة للجمع مرتبطة بشكل ذكي بالقصة. اللعبة فيها كمان Boss fights، متصممة بشكل ممتاز، لكن عيبها إنها أطول من اللازم.

مراجعة Psychonauts 2

من ناحية الجرافيك فاللعبة مبنية على محرك Unreal Engine 4، اللعبة مش بتعتمد على انها تبهرك بمستوى رسومات خرافي وواقعي، بل الاستوديو اتجه لإنه يستخدم Art Style مميز جدًا مش بيتقدم كتير في الألعاب الفترة ديه.

ناس كتير ممكن تبص على اللعبة وتشوفها على انها سيئة رسوميًا بس ده بعيد تمامًا عن الحقيقة. اللعبة من أكتر التجارب المميزة رسوميًا، تصميم البيئات والشخصيات والأعداء ليهم طابع خاص وبيميز سلسلة Psychonauts عن أي لعبة تانية موجودة في السوق من نفس الـ Genre.

مراجعة Psychonauts 2

تجربتي للعبة كانت على منصة Xbox Series S، اللعبة اشتغلت بدقة 1620p على 60 فريم في الثانية وكان ممكن أخلي الدقة توصل لـ 1080p مقابل اني اخد تجربة 120 فريم في الثانية. استوديو Double Fine قدر انه يستغل المنصة الأضعف في الجديد بشكل ممتاز لدرجة أنها بتقدم أداء أفضل من أداء PlayStation 5 مع اللعبة. ده مش بسبب ضعف المنصة، بل بسبب عدم وجود نسخة مُخصصة لمنصة PlayStation 5.

التمثيل الصوتي عجبني جدًا في اللعبة، كل الشخصيات ليها أسلوب مميز في الكلام بيتجه للنوع الساخر وده بيخلي القصة حلوة وممتعة أكتر. كنت أتمنى ان اللعبة تكون مُترجمة لأنك ممكن تعتبرها تجربة هيحبها الأطفال بسبب المغامرات المميزة الي موجودة فيها. الموسيقى التصويرية كمان استخدمها الاستوديو أثناء التنقل في البيئات ومواجهة الأعداء وكان ليها طابع حماسي ومثير.

مراجعة Psychonauts 2

الخلاصة :

لعبة Psychonauts 2 هي مفاجأة كبيرة في سنة 2021. اللعبة ديه هي رد من ميكروسوفت على انتقادات اللاعبين الي بيقولوا ان استوديوهات الشركة مش بتقدر تقدم تجارب قوية. اه اللعبة اتأخرت بشكل كبير جدًا، بس حقيقي كانت تستحق الانتظار ده وبننصحك تجربها في أقرب وقت ممكن. الحلو كمان ان اللعبة موجودة على منصات PlayStation وهتكون اخر ألعاب الاستوديو الموجودة على الأجهزة ديه لإن شركة ميكروسوفت استحوذت عليه.

لو حابب تجرب اللعبة على الحاسب الشخصي أو منصات Xbox للجيل الجديد والقديم، فبننصحك تشترك في خدمة Xbox Game Pass Ultimate عشان تجربها وتجرب باقي ألعاب ميكروسوفت. اشترك في الخدمة بأرخص سعر من هنا.

التقييم النهائي : 9/10

author-avatar

About promidoz

Editor-in-Chief. About 5 years of experience in Gaming Journalism with more than 13k news written, tens of articles, video scripts and reviews. A hardcore gamer that loves a challenge.