من كام يوم خلصت فيلم Daybreakers من بطولة ايثان هوك، ولو كنت شفت الفيلم هتعرف أنه فيلم فامبيرز بس بقصة مختلفة، وهو أن معظم البشر بسبب فيروس تحولوا لفامبيرز وبقوا عايشين فقط على دماء البشر اللي أوشكوا على الانقراض.
فهنا الفيلم خيال علمي مش فانتازيا عصور وسطى، ومصاصي الدماء هم الاغلبية مش قلة بتحكم العالم في الخفاء زي باقي الافلام
طبعا لحد هنا مستغرب انا ليه بتكلم عن فيلم 🤣، بس الفكرة أن الفيلم فكرني على طول بلعبة Redfall القادمة واللي قصتها فيروس حول الناس لفامبيرز برده، ولما قريت قصة اللعبة مدخلتش دماغي اوي، انا متعود ديما أن مصاصي الدماء حاجة زي لعنة مش فيروس، بس لما شفت الفيلم فكرتي اتغيرت خالص
لعبة Redfall ممكن تستخدم حاجات كتير حصلت في الفيلم في تصميم اللعبة، زي الفامبيرز ينفع يرجعوا بشر تاني عن طريق التعرض للشمس ثم الغمر في الماء بسرعة قبل الحرق، وفي كمان طريقة تانية بس مش هحرقها عشان لو مشفتش الفيلم
كمان الفامبيرز مش عايزين يقضوا على البشر ولا يحولوهم كلهم، بل عايزين عدد معين ومقبول من البشر عايشين عشان يفضل الدم متوفر ويلبي حاجة الفامبيرز، واصلا الفيروس في الاصل لم يصب جميع الناس، بل إن ناس كتير كانوا قاصدين يحولوا نفسهم فامبيرز عشان فكرة الخلود وعدم الموت.
المقصد في النهاية أن قصة فامبيرز تكون شبيهة بقصص الزومبي في أن التحول بسبب فيروس مش لعنة أو فانتازيا، حلو جدا لانه بيناقش مواضيع مختلفة زي فكرة الخلود وغير مكنش بيتعرض كويس في افلام الفامبيرز التانية، واتمنى لعبة #Redfall تركز على الجوانب دي.