Reviews, Console News, News

مراجعة XBOX Series X|S

مراجعة XBOX Series X|S

يبدأ معانا الجيل الجديد بإعلان الxbox وإطلاق الxbox، فا هل جملة أقوى جهاز منزلي في العالم والتاريخ، هي جملة حقيقة ؟ ولا مجرد جملة تسويقية مش أكتر ؟ 

هبدأ كلامي عن الxbox series X عشان هو الاقوى والكلام ده، وبعدين هتكلم عن الseries s بعديه.

(Xbox Series X)

مراجعة XBOX Series X|S

(التصميم)

من أول ما تفتح علبة جهاز الseries x، فا أول حاجة هتشدك جامد أوي وهي تصميم الجهاز، فعلا عمرنا ما شفنا جهاز console واخد شكل البرج ده، كل التصميمات بتكون عبارة عن مستطيل كده ومحطوط بشكل افقي على مكتبك، بس فعلا تصميم الseries x مميز جدا، ممكن ناس تكون شايفاه عادي اوي او مفهوش ابداع خالص، وطبعا بتكون المقارنة هنا مع تصميم الPS5، بس في ناس وانا منهم تحب البساطة في التصميم، وانه يأدي الغرض وخلاص، وفي ناس فضلت كمان تصميم الxbox على الPS5، تصميم الجهاز اصلا تحسه بيديه هيبة كده، تحسه واخد وضعه جامد، بس للأسف المادة اللي مصنوعة منه الجهاز بتلقط البصمات بشكل مرعب، والمشكلة الأكبر أنه صعب حبتين أنك تنظفه، محتاج طريقة معينة كده في التنظيف. 

مراجعة XBOX Series X|S

عندك الجهاز من قدام فيه علامة الxbox اللي هي زرار التشغيل طبعاً وعندك كمان فتحت usb عادية، وزرار الsync اللي بيربط الدراع بالجهاز، ومن فوق عندك المروحة الرئيسيه وتأثير كده مميز يديك لون أخضر شكله جامد، ولكن المشكلة ان الفتحات اللي فوق دي كبيرة اوي، وبسهولة ممكن تدخل صباعك الصغير في الفتحات دي، واصلا والمروحة مش شغالة انت ممكن تشوف الاجزاء الداخليه للجهاز بكل وضوح، فا الخوف هنا من الحجات اللي ممكن تقع في الفتحات دي، وخصوصا السوائل، فا خلي بالك جامد اوي في الموضوع ده، في جهة فيها جواعد rubber عشان لو عايز تحطه بشكل افقي، ومن ورا عندك مدخل الpower والHDMI out مفيش in خلاص، وفتحتين usb عادي برده وفتحت الstorge اللي هتكلم عنها بالتفصيل بعد شوية، وعندك كمان مدخل الethernet.

مراجعة XBOX Series X|S

طب ليه التصميم ده اصلا ؟ الصراحة تصميم الجهاز هو حاجة هندسية اكتر من انها شكل جمالي، فا بجانب أهتمام Xbox من أنهم يقدموا أفضل تجربة ممكنة في الأداء، فا هم أهتمه أكتر بموضوع التبريد ده جامد اوي، واللي من رأي هم متفوقين فيه بشكل كبير، في الجيل اللي فات واللي قبله كمان، عمري ما عدا عليا جهاز اكس بوكس كان صوته عالي او كان بيسخن بسرعة، وكل الأجهزة مرتاحة ومفيش اي مشاكل حتى بعد مرور سنين كتير جدا، فا عشان كده تصميم الجهاز واخد شكل البرج ده، فا هو بيشفط الهوا من تحت الجهاز، والمروحة اللي فوق دي بتطلع الهوا لفوق، واصلا الهوا السخن بطبيعته بيندفع لفوق، فا بمساعدة المروحة اللي فوق دي، الجهاز بيكون أكتر حاجة ممكن نقولها عنه أنه دافي، فا تقريبا انسا موضوع سخونة الجهاز دي خالص، وبجانب كل ده فا الجهاز ملوش صوت نهائي، وكأنه مش شغال أصلا، حتى لما تفتح ألعاب تقيلة زي Red dead  او assassin’s Creed Valhalla، الجهاز مش بيطلع نفس، ولكن من رأي كل ده طبيعي في أول الجيل، عشان الجهاز لسه جديد وكمان مفيش ولا لعبة نزلت حالياً، تستغل كل قدرات الseries x، فا نستنا سنة ولا سنتين عشان فعلا نشوف أداء الجهاز من ناحية التبريد والصوت والكلام ده كله.

مراجعة XBOX Series X|S

لو أنت شخص عندك xbox اصلا فا مش هتحس بفرق اوي، نفس الصوت لما بدوس على زرار الpower ونفس الواجهة تقريباً، وممكن يكون الموضوع ده عيب وميزة في نفس الوقت، ميزة لأنك بتحس بسهولة وبساطة في دخولك للجيل الجديد، مفيش رهبة اني خلاص هنسا جهازي القديم وهخش الجيل الجديد وهيبقا صعب أني اتعود على النظام الجديد وبتاع، بتفتح الجهاز وبتنقل بياناتك بشكل سهل جدا، مش محتاج تجيب جهاز الxbox one بتاعك ويوكونا هم الاتنين متوصلين بنفس السلك والرغي ده كله، كل اللي هتعمله انك هتعمل sign in بس، وتسيب جهازك بقا يعمل الباقي، هيحط كل الاكونتات اللي انت كنت حافظها على جهازك القديم هيحطها على الجديد، لو انت كنت حاطط صورة خلفية مثلا معينة، هيحطها على الجهاز الجديد، وهاكذا، ممكن بقا يكون موضوع ان مفيش تميز أو حاجة جديدة ده عيب في نفس الوقت، لأنك مش بتحس انك دخلت جيل جديد، مفيش إختلاف، كل حاجة زي ما هي على جهازك القديم، تحس انك فتحت جهاز الxbox one بتاعك عادي خالص، مش حاجة جديدة يعني، تحس أن الseries x هو xbox one بس عنده عضلات كده، بس هو نفس الشخص متغيرش.

(خدمة الجيم باس)

مراجعة XBOX Series X|S

لو أنت بطريقة ما متعرفش خدمة الجيم باس فا انا هقولك أيه هي بالظبط، خدمة الجيم باس بتفتحلك فوق ال250 لعبة ببلاش، بأشتراك سعره 10 دولار في الشهر، والألعاب اللي في الخدمة دي مش أي ألعاب وخلاص لا بالعكس، أنت عندك أعظم لعبة في الجيل اللي فات لعبة the witcher 3 ، عندك سلسة the walking dead كلها، عندك لعبة Doom enternal اللي لسه نازلة السنة دي، وكمان عندك أي لعبة حصرية على الxbox هتكون متوفرة من أول يوم إطلاق ببلاش على الجيم باس، وغيرها كتير أوي من الألعاب اللي فعلا لازم تجربها، ومن كتر الخيارات اللي موجوده في الجيم باس وكمية الالعاب اللي بيتم إضافتها كل شهر فا انا تقريبا مش فاكر أخر مرة أشتريت فيها لعبة من السترو كانت امتى، فعلاً خدمة عظيمة جداً، قلبت كل الموازين، وخلت سوني في مكان حرج جدا قدام الخدمة العظيمة دي، وانا بشوف ان خدمة الجيم باس هي أحد أهم مزايا الxbox بشكل كبير.

(قوة الجهاز)

مراجعة XBOX Series X|S

هل هو فعلا “أقوى جهاز في العالم!!” زي ما صدعتنا Microsoft بالجملة دي ؟ الصراحة الجهاز فعلا بيقدم أحسن تجربة في السوق حالياً، مقارنة بالذات مع الPS5 فا الseries x أقوي من الPS5 ب20% في الأداء الرسومي بشكل عام، ولكن الPS5 متفوق في موضوع الssd ده، بس ده ميخليش جهاز الاكس بوكس بطيء في سرعات التحميل، بالعكس الجهاز فعلا في ثواني بيكون فاتح معاك ألعاب تقيلة جدا، كانت بتقعد دقيقتين وتلاته عشان تفتح على الجيل اللي فات، وكان في مقارنات على النت انتشرت جدا، بتوضح أن الxbox أسرع من الPS5 في فترات التحميل، والPS5 أحسن من الseries x في الgraphics، اللي هو المفروض العكس أصلا في كل حاجة، الPS5 احسن في سرعة التحميل، والxbox أفضل في الgraphics، والسبب طبعاً لكل ده أن كل الالعاب اللي اتجرب عليها هي ألعاب جيل قديم، ومحسنة على الجيل الجديد مش أكتر، وشغالة بتقنية الBackward Compatibility، فا عشان كده تلاقي في لخبطة في الموضوع ده، لأن مفيش لعبة مخصصة للجيل الجديد بس نزلت لحد دلوقتي.

(4K 120fps)

مراجعة XBOX Series X|S

الجهاز بيدعم تقنية ال4K 120fps وكمان ممكن يوصل ل8K، ولكن كل التقنيات دي عالية اوي، ومفيش شاشات كتير بتدعم الحجات دي أصلا، لانها تقنيات جديدة ولسه مش منتشرة بشكل كبير، وكمان مفيش ألعاب كتير بتدعم الخواص دي برده، فا الأمر بيرجع للمطور بقا عشان يخلي لعبته تدعم الكلام ده ولا لا، ولكن في ألعاب قليلة بتدعم ال4k 120 frame زي مثلا لعبة ori او gears 5 او حتى اهم واحدة فيهم وهي cold war الجديدة، وأصلا خاصية ال120 frame دي خاصية أنا بشوفها مناسبة أكتر للألعاب التنافسية، أو ألعاب الshooter، زي rainbow وكود وفورت والالعاب دي، فا الجهاز يقدر يشغل الالعاب على الجودة دي، دي حاجة مهمة لأن الجهاز مش هيقعد معاك سنة ولا سنتين، ده هيقعد معاك فترة مش أقل من ست سنين، ومين عارف ممكن موضوع ال8K ده يكون بقا متوفر وسهل و أي حد يجيبه بعد كام سنة كده.

(شاشتي تشغل الجهاز؟)

كنت عايز أوضح فكرة مهمة جدا لأي حد بيفكر أنه يجيب جهاز من الجيل الجديد، لازم تبقا عارف أن بجانب أن جهازك بيدعم 4K 120 frame و8K وكل الكلام الجميل ده، فا كل الحجات دي مش هتشتغل أصلا لو شاشتك مش بتدعم الخواص دي، فا لو انت عايز تستفيد بكل خواص الxbox من سرعة frames او دقة الصورة مع ال4k، فا انت لازم تجيب شاشه بتدعم الكلام ده كله، ويكون فيها مدخل HDMI 2.1 عشان يقدر أنه يستحمل ال4k 120 frame والحجات التقيلة دي كلها ويكون معاك سلك HDMI 2.1 عشان يقدر ينقل كل ده، وأصلا السلك ده موجود مع الجهاز فا عشان كده متستخدمش أي سلك HDMI تاني، اما أي شاشة فيها مدخل HDMI وخلاص فا الجهاز هيشتغل عادي مش هيقولك لا، بس هيكون مربوط بجودة الشاشه بتعتك انت، مش هيشغل كل القدرات بتعته غير لما تكون شاشتك تقدر تشغلها.

(خاصية الQuick resume)

مراجعة XBOX Series X|S

من أهم خواص الxbox هي خاصية الQuick resume، وهي خاصية بتخليك تتنقل ما بين الألعاب بشكل سريع بدون أي شاشات تحميل، يعني لو انت كنت مثلا بتلعب في قصة red dead، وبعدين جيه صحابك عايزينك تخش معاهم في جيم اونلاين في لعبة كود مثلا، بعد ما تخلص مع صحابك وتقفلوا، فا لو رجعت للعبة red dead تاني، فا هتلاقي نفسك واقف في نفس الحته اللي انت سبت فيها اللعبة، وتقدر تكمل من نفس الحته اللي انت سبتها فيها، الخاصية دي بتتيح ليك أنك تتنقل ما بين 5 ألعاب بحالهم، 5 العاب شغالين في نفس الوقت، فعلا خاصية مفيدة جداً، وهتلاقي نفسك بتستخدامها بشكل كبير، واللي بهرني بجد، أنك لو فصلت الجهاز من الكهربا خالص، شيلت السلك بتاع الpower من الجهاز، وبعدين قعدت بتاع أسبوع كده الجهاز مفصول من الكهربا، لو شغلت الجهاز تاني هتلاقي الالعاب اللي انت كنت بتلعبها لسه شغالة وتقدر تكمل مكان ما سيبت، من غير أي شاشات تحميل ولا أي حاجة.

(المساحة)

مراجعة XBOX Series X|S

مساحة الجهاز اللي مكتوبة على العلبة هي 1 تيرا، بس طبعا بعد حصة النظام، فا بيكون فاضلك بتاع 800 جيجا وشوية كده، انا بالنسبه ليا مش بيبقا عندي مشاكل في موضوع المساحة ده، لأن انا بنزل لعبة بخلصها وبعدين بمسحها، ولكن لو انت حبيت تزود المساحة عندك، فا هتتطر أنك تشتري المساحة الإضافية اللي بتعملها xbox، اللي سعرها غالي جدا، بتاع 200 دولار، وهي عبارة عن كرت كده بتحطه في الفتحة المخصصة ليه في الجهاز، ولكن Microsoft أعلنه أن في شركات تنية هتقدر أنها تعمل الهارد ده وبالتالي هيكون سعره أرخص، في ناس أكيد ممكن تسأل: أن أنا معايا الهارد بتاعي من الجيل القديم ليه مينفعش استخدمه ؟ والاجابة بكل بساطة أن الهارد اللي معاك ده هو هارد hdd مش ssd، ومعنى الكلام ده أن الهارد الhdd هيشغل كل ألعاب الجيل القديم، لو حبيت تلعب مثلا ألعاب كانت عندك على الهارد القديم فا هتقدر تلعبها عادي، بس مينفعش تستخدمه لألعاب الجيل الجديد، ساعتها هتحتاج هادر ssd عشان تقدر تشغلهم.

(خاصية الBackward Compatibility)

مراجعة XBOX Series X|S

بدأت Microsoft مع جهاز الxbox one خاصية الBackward Compatibility، اللي بتتيح ليك أنك تلعب كل ألعاب الأجيال القديمة، من كل ألعاب الXbox original و ال360، فا مع مدخل الجيل الجديد، Microsoft بتطور الخاصية دي بشكل ممتاز، بجانب أن عندك متوفر كل ألعاب الأجيال اللي فاتت كلها، وتقدر تشتريها من الستور عادي جداً، فا لما تيجي تشغل الالعاب دي فا هيكون فيها تحسين بشكل تلقائي كده من الجهاز، زي تحسين بسيط في الgraphics أو سرعة التحميل أو سرعة الframes، ولازم على الاقل تكون اللعبة متوفر فيها على الاقل تحسين واحد بس من التحسينات دي، وفي ألعاب متوفر فيها كل التحسينات اللي قولتها، ومن أكتر الالعاب اللي بهرتني الصراحة هي لعبة red dead 2، فعلا تحس ان الجهاز وصل اللعبة للlimits، جاب أخرها حرفياً، جاب أفضل صورة ليها على الconsoles، والموضوع ده بيشجعك أنك تلعب ألعاب كتير قديمة، لمرجد أنك تجربها بشكل أفضل على الجيل الجديد.

(الController)

مراجعة XBOX Series X|S

بالنسبة للدراع فا هو مفهوش تغيرات كتيرة، أنا أصلا كنت عايزهم ميغيروش في الدراع لأنه فعلاً أكتر دراع مريح في العالم، من مكان الanalogs او تصميمه اللي فيه curve كده بيخليه أفضل controller من ناحية الراحة، الاختلافات اللي موجوده في الدراع، واللي هتلاحظها على طول وهو زرار الshare، طبعا مكنش موجود الزرار ده، وأنا شايف أنه مفيد جداً، عشان بمجرد تغطات بسيطة تاخد صورة او تصور فيديو وهاكذا، من غير ما كنت توقف اللعبة وبعدين تروح على capture، وموضوع طويل كده، فا بجد زرار مهم جدا، خاصة للناس اللي بتحب تاخد لقطات كل شوية، الدراع صغروا حجمه شوية، فا بقا مملوك أكتر في الأيد، ومريح أكتر وأكتر، ومن الاختلافات المميزة برده موجودة في الtrigger، الtriggers بتاعت الxbox كانت اصلا مريحة ومستحيل صباعك يتزحلق من عليهم، عشان هم مصممين بcurve كده لفوق، وطبعا ده بيمنع صباعك انه يتزحلق من الtrigger، فا زودوا على الtriggers خشونة كده، grip إضافي، اللي هو كده مستحيل خالص بقا ان صباعك يتزحلق، من الحاجات اللي متغيرتش لحد دلوقتي وهي أن الدراع لسه محتاج بطريات عشان تشغله، بجد حاجة غربية اوي أن Microsoft لسه محتفظة بالموضوع ده، بس هم طلعوا في مقابلة و وضحوا الفكرة من الموضوع ده، وانا الصراحة اقتنعت بيها، هم بيقولوا أن أحنا بندي للاعب حرية في إختيار الطريقة اللي هو عايز يستخدم بيها دراعه، يعني لو كان الدراع مثلا بيتشخن زي الPS5 عادي جداً، ايه اللي ممكن يحصل ؟ بعد فترة من الزمن، ومع الأستخدام السئ، في ان انت مثلا بتحطه في الشاحن طول الوقت او بتستخدمه كتير جدا، فا بعد فترة البطرية اللي جوا دي عمرها الافتراضي هيخلص، ومعنى أنها خلصت فا الدراع مش هيشتغل، ومعنى كده أيه، أن الدراع كله باظ ! وهتتطر أنك تشتري دراع جديد تماما، أما في الxbox، لو البطرية خلصت والله شيلها وحط غيرها، مش عجباك البطاريات، احنا بنبيع بطريات بتتشحن، استخدمها وهيكون الدراع بيشحن زي الPS5 بالظبط، بس لما تبوظ البطرية فا هتجيب غيرها، اما الدراع شغال معاك مفيش اي مشاكل، فا ده طبعا بيطول عمر الدراع لفترة طويلة جداً، يعني انا عندي دراع الxbox 360 لسه شغال معايا لحد دلوقتي ومقلش لا، شغال و زي الفل، انا شخصيا مع الxbox one انا حطه عندي على المكتب فا الجهاز انا قريب منه، فا بستخدم السلك على طول، فا هي خيارات كتير Microsoft بتقدمهالك، وفي الاول والاخر كله لمصلحتك، فا انا شايف أنه رأي منطقي والصراحة عجبني، وبقيت قلقان من دراع الPS5 وأقول هيقعد معايا كتير ده ولا هيموت بعد 3 سنين ؟ فا Microsoft هم فاهمين هم بيعملوا ايه كويس أوي، في برده معلومه جميلة جدا بتقول أنك ممكن تستخدم كل اكسسوارات جهاز الxbox one بتاعك، من دراعات او سمعات او اي حاجة مع جهازك الجديد، ودي حاجة جامدة أوي، فا لو انت عندك xbox one، كل الدراعات بتاعتك اللي بتشتغل على الone هتقدر تستخدمها مع الseries x او الseries s، فا موضوع دعم كل المنصات والدعم للجيل القديم ده جميل أوي، بس فا انا شايف أن دراع الxbox الجديد ممتاز وبيأدي الغرض، في الراحة وسهولة الاستخدام.

(خدمات الصوت)

مراجعة XBOX Series X|S

طبعاً أي حد بيفهم في مجال الصوتيات فا هيلاحظ أن مدخل الoptical اتشال من أجهزة الxbox الجديدة، واللي ميعرفش ايه هو مدخل الoptical ده فا اكيد انت طول الجيل اللي فات ده انت كنت بتستخدم صوت stereo عادي، وموضوع أن الoptical اتشال ده ممكن يدايق ناس كتير الصراحة، خاصة الناس اللي عندهم سماعات إحترافية وغالية، اللي كانت بتخش في مدخل الoptical ده، ولكن دلوقتي انت عندك كل الخيارات اللي انت عايزها وبسعر أرخص وبتجربة أفضل، وأصلا مدخل الoptical ده حاجة قديمة ومش عملي بشكل كبير، اللي هيعمل الشغل كله في نقل البيانات، خاصة الصوت وكل حاجة، هو سلك الHDMI نفسه، عشان أسلاك الHDMI دلوقتي بقت متطورة وتقدر أنها تنقل كم من البيانات مهول، كنا سمعنا قبل كده من سوني أنهم عملين يقولوا: أحنا بنقدم خاصية الصوت المحيطي ال3D، وعندنا أفضل تأثيرات صوت، وهتحس أنك جوا اللعبة، ورغي ده كله اللي سوني صدعتنا بيه، فا في ناس افتكرت أن xbox مش بيقدم اي حاجة شبيها، بالعكس ده Xbox بيقدم خيارات وخدمات أكتر وكمان أفضل من الPS5، هقولك عندك ايه في جهاز الxbox من خيارات صوتيه، عندك أول حاجة خيار الstereo uncompressed، وده بأختصار هيديك صوت stereo بأنقى وأفضل جودة ممكنة، واللي هتشتغل مع كل سماعاتك أي كان نوعها، تاني خيار وهو الWindows sonic for headphones، وهو بالظبط خاصية الصوت المحيطي اللي عند سوني في الPS5، ولكن طبعا المسمى مختلف، فا هي بتخليك تحس انك جوا اللعبة، والميزة أنها بتشتغل معاك على أي لعبة، يعني مفيش موضوع أن اللعبة لازم تدعم الصوت المحيطي والكلام ده لا، تشغل الخاصية دي، هتشتغل معاك على كل الالعاب أي كانت، عندك في الxbox خاصيتين واللي مفيش اي جهاز تاني بيدعم الموضوع ده غير الxbox وهم الdolby atmos و الDTS، واللي ممكن تشتغل على ارخص سماعة عندك في البيت، وكل اللي عليك انك تنزل البرنامج الخاص بالdolby وتدفع مبلغ بسيط لمرة واحدة في الحياة، يعني تشتري البرنامج، والخاصية دي هتفتحلك نظام صوت كامل بجوده عاليه جدا، ومن غير ما اتكلم عنه كتير ممكن انت تنزل البرنامج وتجربه بنفسك لمدة أسبوعين ببلاش، وبعد كده تحكم انت وتشوف هل حسيت بفرق ولا لا، فا بأختصار الxbox بيقدملك خيارات صوت كتيرة جدا ومتنوعة وبجودة عالية.

(المزيا والعيوب)

مراجعة XBOX Series X|S

الجهاز بيقدم قوة فعلاً عالية، وممكن توصل المقارنة مع جهاز pc gaming، والمواصفات دي بسعر 500 دولار مناسبة جداً، وبتاخد اللي انت دفعت عشانه، تاني ميزة أن الجهاز هادي جدا، تحس أوقات أنه مش شغال أصلا، حتى مع أقوى الالعاب، اللي فيها عوالم ضخمة، وgraphics وتفاصيل عالية جداً، وبالنسبة لحرارة الجهاز، فا هي لا تذكر، عندك كمان ميزة الجيم باس اللي فعلا هي أفضل خدمة ألعاب في العالم، بتقدملك مكتبة ضخمة من الألعاب اللي تقدر تنزل فيهم براحتك، وسعر الاشتراك ممتاز، ومن المزايا برده اللي عجبتني جدا هي خاصية الsmart delivery، وهي بتنقلك كل الالعاب اللي انت اشتريتها في الجيل الحالي على الجيل الجديد بدون أي مبلغ إضافي، يعني لو أنت أشتريت مثلا لعبت assassin’s Creed Valhalla دلوقتي، فا لما تيجي تجيب جهاز الجيل الجديد الseries x او الseries s، هتلاقيها عندك ready to install وتقدر تلعبها، وهتكون مش نسخة الجيل القديم ، لا بالعكس هتكون موجودة عندك بنسخة الجيل الجديد، اللي هي طبعا محسنة بشكل كبير من ناحية الgraphics عن الجيل القديم، فا مش هتتطر أنك تشتريها تاني على الجيل الجديد، بس طبعا الخاصية دي مش متوفرة مع كل الالعاب، في ألعاب معينة بتدعم الخاصية دي، هتلاقي عليها علامة الsmart delivery في الستور بتوضحلك أن اللعبة دي بتدعم خاصية الsmart delivery، آخر ميزة وهي الcontroller، عجبني فيه التطوير البسيط اللي حسن من التجربة بشكل كبير، من ناحية الgrip اللي يخلي الدراع انت ملكه كده، ومريح جدا لفترات طويله من اللعب.

مراجعة XBOX Series X|S

أما بالنسبة للعيوب، فا أولها أن مفيش مدخل usb c، اللي كان طبعاً هيساعد في سرعة نقل البيانات بشكل كبير جداً، مش عارف ليه الصراحة مش موجود أصلا، عندك كمان المادة اللي مصنوعة منه الجهاز، زي ما قولت قبل كده فعلا بتلقط البصمات جامد اوي، ومن صعب تنظيفها، ومن العيوب اللي فعلا مخيبة جدا، وهي أن جهاز الxbox الجديد هو أفقر جهاز في التاريخ من ناحية ألعاب الاطلاق، كل الالعاب الحصريه اللي كانت من المفروض أنها تنزل مع الجهاز أتأجلت، زي the medium أو Halo infinite، اللي بجد كنت متحمس ليها بشكل كبير جدا، وانا أصلا مش من محبي سلسلة Halo، بس لما تسمع أن اللعبة دي هي أكتر لعبة أتصرف عليها في التاريخ، فا دي حاجة تحمس أي حد الصراحة، بس ادينا هنستنا ونشوف، لعبة the medium اتأجلت للسنة اللي جاية وhalo لأجل غير مسمى.

(Xbox series S)

مراجعة XBOX Series X|S

(الجهاز مناسب لمين ؟)

جهاز الxbox series s من رأي واحد من أذكى الحركات التجارية في مجال الالعاب حاليا، الجهاز انا بشوف انه مناسب لفئة كبيرة من الناس، منهم اللي عايز يخش الجيل الجديد وهو مش مهتم بالخواص الخرافية اللي في أجهزة الجيل الجديد، زي ال4K وال8K والكلام ده كله، في ناس معندهمش غير شاشة 1080p ومبسوطين بيها، ومش مستعد أنه يدفع فلوس زياده على شاشة 4K غالية، واصلا الشاشات اللي بتدعم كل خواص الجيل الجديد قليلة وغالية جداً ومش منتشرة بشكل كبير، في ناس لسه جديدة في مجال الألعاب وحابب انه يتعرف على المجال، فا جهاز الseries s هو جهاز مناسب جداً ليك، جهاز رخيص وبداية ممتازه بخساير قليلة، الجهاز برده مناسب للناس اللي بتلعب لعبة واحدة بس او لعبتين، في ناس مثلا مش بيلعبوا غير فيفا بس او كود او فورت، مش مهتمين بأي لعبة تانية، فا ليه تجيب جهاز الseries x او الPS5 ويديك خواص انت مش هتستخدمها أصلا، لو أنت شخص مش متهم بالxbox أصلا وطول عمرك مع الplay station، وعايز تعرف كده ايه الxbox ده، أو حابب تجرب خدمة الجيم باس المميزة، فا ممكن تجيب جهاز الseries s، رخيص وهيقدملك كل اللي انت عايزه، فا انا شايف أن الجهاز مناسب لفئات كتير من الناس.

(قوة الجهاز)

مراجعة XBOX Series X|S

في ناس كتير أوي بعد ما سمعت أن جهاز الseries s ضعيف تقنياً، أفتكرت أن الجهاز ميت، وملهوش أي لازمة، ده في ناس كمان فاكره ان الseries s هو جهاز جيل قديم، ومش هينزل عليه ألعاب الجيل الجديد، وطبعا كل الكلام ده مش صح، الجهاز هو جهاز جيل جديد، وأي لعبة هتنزل على الseries x هتنزل برده على الseries s، مفيش فرق غير في موضوع الجوده بس مش أكتر، جهاز الseries x هيديك أفضل تجربة من ناحية الgraphics، اما الseries s فا هيديك نفس الالعاب ولكن بأداء رسومي أقل من الseries x، الجهاز غلط ان احنا نقارنه بالseries x أصلاً، لأن الseries x هو أقوى جهاز منزلي في العالم، وكمان مينفعش يتقارن بالPS5، لانه جهاز جيل جديد من الPS، الجهاز يتقارن مع الجيل القديم، لانه فعلاً نقلة الجيل الجديد، الجهاز مش ضعيف تقنياً زي ما الناس بتقول، الجهاز ضعيف قدام الseries x، وده طبيعي، جهاز الseries s بيقدم 4K على فكرة، بس في 60 frame، مش 120، بس الجهاز برده بيدعم ال120 frame ولكن في دقة 1080p، فا أنت لو شخص عندك شاشة 1080p، فا الجهاز ده بيقدملك كل اللي انت عايزه بزيادة كمان، والجهاز زي ما قولت مناسب جداً للناس اللي بيلعبوا كود بس او rainbow، لأنه بيقدملك ال120 frame اللي انت عايزهم، والframes أصلاً مهمة جداً لأي حد بيلعب ألعاب الshooter وكده، فا من ناحية قوة الجهاز فا هو جهاز قوى، أقوى من أجهزة الجيل القديم، الجهاز برده في موضوع سرعة شاشات التحميل، وفي خاصية الquick resume، وأغلب خواص الseries x التانية.

(تصميم الجهاز)

مراجعة XBOX Series X|S

الجهاز صغير جداً، وهو أصلا أصغر جهاز console في العالم والتاريخ، بجد صغير أوي، فا كان أكتر حاجة أنا قلقان منها، هي أيه وضع الجهاز مع الصوت والسخونية، ولكن الصدمة كانت فأن الجهاز دافي وملوش صوت نهائي، بجد شئ مبهر، فعلا Microsoft محترفين هندسيا في أنهم إزاي يحطه قوة عالية وأداء عالي في مساحة صغيرة، وفي نفس الوقت ميكنش في حرارة ولا صوت، فا أنا معجب جدا بتصميم الseries s، وكل ما ابص عليه ابقا مبهور بالتصميم الصغير أوي ده.

(المزايا والعيوب)

جهاز الseries s فعلا جهاز عملي، وأختيار مناسب لكتير من الناس، خاصة الطلاب أو محدودي الدخل، أو حتى الناس اللي مش مهتمة بالخواص العالية في الأجهزة الغالية، فا انا شايف الجهاز بسعره ده فوق الممتاز، حجمه الصغير ده كان ميزة بالنسبة ليا، لأنه مكنش عائق خالص في موضوع المساحة عندي على المكتب، ملائم جدا وشكله جميل.

الجهاز ولازم تكون عارف كده أن هو digital only، يعني مفيش مدخل للأسطوانات، ومن المنطقي أن تكون مساحة الجهاز كبيرة عشان تقدر تنزل عليه الالعاب بشكل رقمي، ولكن للأسف المساحة اللي مكتوبة على العلبة هي 500 جيجا، وطبعا مش دي المساحة الحقيقة بتاعتك، بعد ما الsystem ياخد مساحته بيفضل معاك مساحة قليلة جداً، وانا شايف أن موضوع المساحة ده بقا عيب في كل الأجهزة الصراحة، مفيش جهاز بيسبلك مساحة كافية تنزل فيها اللي انت عايزه.

(الملخص)

مراجعة XBOX Series X|S

في الختام جهاز الxbox الجديد فعلا هو النقلة الحقيقة للجيل الجديد من ناحية القوة في الأداء، مقارنة بأي جهاز console تاني، وبيديك خيارات كتير من ناحية الجهاز القوي أو الجهاز الاقتصادي الرخيص وبيقدملك كل اللي انت عايزه، تصميم الجهازين فعلا مميز، اللي مصممين بعناية وفكر هندسي عالي، عشان يساعد في التبريد ويكتم الصوت تماماً، ومنقدرش ننسى الجيم باس اللي كان سبب في شراء الجهاز من ناس كتير جدا عشان الخدمة دي بس، أنا شايف أن جهاز الxbox بسعره ده ممتاز جداً لكتير من الناس اللي بتحلم بجهاز pc قوي بس مفيش فلوس.