Uncategorized

إزاي استفاد فيلم Spiderman No way home من نجاح لعبة Spiderman PS4؟

من أيام اتفرجت على فيلم No way home وهو الفيلم التالت في ثلاثية سبايدرمان الخاصة بعالم مارفل السنيمائي، واللي بيتم إنتاجه بالاشتراك بين سوني واستوديوهات مارفل، ولاحظت إن في بعض التأثر باللعبة اللي كنت من أشد معجبيها لما نزلت في سنة 2018. في مقال النهاردة هنعرف إزاي فيلم بالحجم ده شاف فرصة في نجاح اللعبة واستغلها صح، وقدر يحقق نجاحه الخاص ببعض أفكار اللعبة.

تنويه: المقال فيه حرق طفيف لكفرة فيلم No way home

أولًا، لازم نفهم إن الاستعارة من لعبة أو فيلم مش حاجة وحشة أو كسل من الكتاب، وإنما ده نجاح لعالم الألعاب إنه قدر يوصل تأثيره لما هو أبعد من التأثير على الألعاب المنافسة، وبدأ يأثر كمان على الأفلام!

شخصية سبايدرمان لا تزال شخصية مملوكة لسوني، وإدخال شخصية سبايدرمان في عالم مارف السنيمائي كان بسبب اتفاق توصله الشركتين بعد فشل سلسلة The Amazing Spiderman في تحقيق الأرباح المرجوه.

طيب، نرجع لسؤالنا، إيه اوجه التشابه بين اللعبة والفيلم؟

1-فكرة استغلال أعداء سبايدرمان وإنشاء فريق الSininster 6

يمكن يكون Batman Arkham City و Arkham Origin هم أول لعبتين لأبطال خارقين استغلوا فكرة الSource الكبير اللي بيستمدوا منهم قصتهم، وهو الكويمكس وحطوا كمية شخصيات كبيرة في القصة بدون ما يأثروا بالسلب عالقصة. خصوصًا الأعداء. الBoss Fights كانت ولاتزال اعظم شيء في لعبة Arkham Origins بالذات، وده اللي عملته لعبة Spiderman PS4، ونجحت فيه بشدة. جمعت اللعبة مجموعة كبيرة من اعداء سبايدرمان المحبوبين، ونجحت في توظيفهم في قصة لمست كل اللي جربها.

الموضوع امتد كمان للجيم بلاي وخلانا قدام تنوعية كبيرة في المواجهات، ورتم الأحداث سريع وبيخلي مفيش لحظة في اللعبة مملة. الفيلم عمل كده، وشكل فريق Sinister 6 الخاص بيه من أعداء سبايدرمان اللي ظهروا في الأفلام كلها. ونجح في إنه يدي كل واحد دور مقنع ومساحة متناسبة مع أهميته.

 

2- الناس بتحب الCrossovers

سبايدرمان Spiderman

في لعبة مايلز موراليس بنشوف شخصية بيتر باركر، والعكس. فكرة الاستعانة بشخصية محبوبة من لعبة أو فيلم تاني له علاقة بفيلم أو لعبتك فكرة عظيمة قايم عليها عالم مارفل السنيمائي كله، لكن خطوة الاستعانة بسبايدرمان الخاص بتوبي ماجوير و أنردو جارفيلد أعتقد اللي شجع سوني عليها -وده مش رأيي لوحدي- نجاح فيلم Spiderman Into the spiderverse ولعبة Miles Morales.

 

2- التركيز على الأكشن أكتر

في أفلام سبايدرمان القديمة كان في تركيز على الحركات والتنقل بتاع سبايدرمان. المخرجين كانوا بيتعمدوا يستعرضوا سبايدرمان أثناء تنقله في شوتات واسعة مركزة على سهولة ومتعة التأرجح على الشبكة بتاعته، ودي حاجة ماكنتش موجودة اوي مع سبايدرمان الخاص بتوم هولاند. بس الوضع اختلف في No way home شوية وتم التركيز عالحته دي، بجانب التركيز على تصميم معارك كاملة تاخد وقتها على الشاشة بين سبايدرمان والأعداء كلهم. وده ماكنش موجود كتير في الفيلمين اللي قبل كده من بطولة توم هولاند. المشهد الأخير في No way home يكاد يكون مشهد منسوخ من لعبة Spiderman PS4 في طريقة الحركة، حتى إن توم هولاند نفسه اعترف إن سوني بعتتله جهاز معاه اللعبة وهو من غعجابه الشديد بيها استخدم أحد الحركات من اللعبة.

 

4- التركيز على بيتر باركر.

سبايدرمان Spiderman

طول عمر شخصيات سبايدرمان كانت بتركز على جانبي الشخصية، بيتر وسبايدرمان كبطل خارق. أفلام عالم مارفل الاخيرة ماكنتش مركزة على بيتر بشكل مقنع، أو ركزت عليه في حاجات جانبية زي علاقته مع توني ستارك، واهتمت بإظهار قد إيه هو غير جاهز لتحمل المسؤليات اللي عليه. لكن المرة دي في No way home تم التركيز على

 تحديات وتحولات درامية كبيرة جدًا، فكرتني ببعض لحظات لعبة Spiderman PS4، خصوصًأ مع شخصية Doc Oc.

5- تنوع رهيب في البدلات اللي بيستخدمها سبايدرمان !

سبايدرمان Spiderman

حصل سبايدرمان في No way homes على 5 بدلات مختلفة، وده شيء ماشوفناهوش في الأفلام السابقة. تصميم الزي الخاص بالبطل كان بيبقا تصميم واحد، في حالة The Amazing Spiderman كان تصميمين، وفي حالة ثلاثية Sam Raimi كانوا تصميمين والزي الأسود اللي كان بسبب الاتحاد مع الSymbiote في الجزء التالت. لكن مكانش في التنوعية اللي شوفناها في Now way home واللي كانت برضو موجودة في لعب Spiderman PS4.

في النهاية، فيلم No way home هو واحد من أجمل أفلام الأكشن والأبطال الخارقين على مر التاريخ، وفي كمية شخصيات كبيرة محبوبة وتم إعطاءها حقها، حتى اللي مكانوش واخدين حقهم في أول ظهور ليهم في الأفلام القديمة. المقال في الأول والآخر رأي شخصي، قد يصيب أو لأ ولكن في كل الأحوال الفيلم واللعبة يستاهلوا وقتك.

Mostafa Argoun

About Mostafa Argoun

محرر في مجال الألعاب منذ عام 2012 بعتبر الألعاب فن، وبحب ألعاب القصة والأر بي جي بشكل رئيسي